Ginipai Nika Manga Kumbatayo Tipa Aboro?
Tipagine Si Aida ti ni Ani Ini Gupai Nika Manga Kumbatayo Tipa Aboro? Gupai boro aberãha ya si nika manga gba, si naʹaria gu gene ní amangapai ngbaha areme. Nikpiapai, agu aboro duna maabangirise tooni tipa raka kumbatayo, i nagumba ngbatunga agu afugo nga: “Ani rí he ki nimbiri he, bambiko gba ani akpí akpi.” (1 AKorindo 15:32) Ngbatunga gu sino berã re nasa gupai dedede nga boro niri he nibakerehe, kini mbirihe na kini bakibangirini. Si afunga ndikidi zereda fu boro te.
Nirengo, wa ka si adu nga agu apai du tipa raka kumbatayo dunduko si kina kube aboro, ka gaani maabangirise du nikina kangbaha. Aboro nabirikosi gu wege du auru kpotosende ane, na ime, na sende ngba gu gene si aamanganga mbata rogoho ya. Aboro nabaka kina bangiriyo be kere avura gbiati wai agu avura nga ga abamoi amaapai. Akaza gbiati rungo namanga badungu abirioni aboro rogo zegino. Ono tie, wene nduapai kinaho si aida ani du ti ni na maabangirise.
Wa vura duhe nga aboro arengbanga ka ino agu apai nzunzu nika manga kumbatayo te, Yekova Mbori naya tipa tiko wee ko ‘natakapande pa digidapai ti tonatona rago na pa agu ahe atamanganga ya bakuru yo.’ (Yesaya 46:10) Ginipai Yekova agumbaha tipa gupai nika manga kumbatayo tipa aboro?
Gupai Ziazia Kekeapai Agumbaha
Yekova ambunga kpotosende watadu gu ungaahe du rogoho si gberẽ susi ba mbakadimbakadihe te. Nirengo, Ziazia Kekeapai nakidohe kini yawee Mbori nika “gbarasa agu . . . [aboro] nagbarasa kpotosende.” (Yugoti 11:18) Yekova nika mangasunge na gu gako Kindo du ngbangbaturũ yo tipa ka giriso kpotosende ki di gbegberẽ apai kusayo rogoho na ki sa gupai ko aringbisihe ti bambataha si mangi. (Bambata Pai 1:26-31; 2:8, 9; Matayo 6:9, 10) Agi averesi du kusende re nayugo kpia agu apai furani nika manga kumbatayo, na agu apai nika manga agu aboro dunduko naraka auru kpotosende.
Atambuahe 46:8, 9. “Oni yé ka bi agu apai Yekova amangi, nga gu kere gbarasahe ko amangi auru kpotosende no. Ko namanga pai, vura nyasi digida kpotosende no; ko nakua mboto, ki kuadi baso rukutu, ko nazo angbagidavura ku we yo!”
Yesaya 35:5, 6. “Bangiri airavurari azá, tu airangbianga ki ha; terengeterenge aboro agúka wa ngbiimo, mirã kisikisi ngba boro abi bia ni ngbarago. Bambiko aime agbáda ngbakungba yo, na awiriadi rogo ngbi ngume.”
Yesaya 65:21, 22. “I adúdua abambu ki niraki rogo; i arũka bakakue aati yo ki niri zuzuhe. I adúa nga bambu kura aboro ki raki rogo ho te; i arũ nga he kura aboro ki ri he te.”
Daniere 2:44. “Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.”
Yoane 5:28, 29. “Ka gi iriwo nga ti roni re ya, bambiko ragoho nada, ho agu yo ka gia [fugo Yesu] ni dunduko du rogo amurã yo, ki kuru.”
Yugoti 21:3, 4. “Ga Mbori banye du na aboro, ko anyé na yo, i adú ni gako aboro, Mbori anyé na yo tigako, ki du ni gayo Mbori. Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”
Wai agu Akaragapai Ziazia Kekeapai Afuhe Asa Boro Ní Zeredi Berãni yo Nzunzu?
Boro rengbe ka bi agu apai tangara ani he kuari re ni agu apai kaa manganga ya. Ono si naida ani ini gupai nga, agu amokido re, Mbori du namangihe, angianga aboro ya. Na Yekova Mbori “arengba nga na re zire” te.—Tito 1:2.
Ka oni wiriki wai ka kido kuti agu amokido nga ga Mbori na kini raki ringbisihe kuti gako andiko, oni nyeanye na zereda berãroni yo zavura ho du apai ni nikpakarakpakaraha vurũ. Vura, rungo, kaza, na zavura gu fudifudiapai naye mbiko gbinza, watadu berã pakpio, guho dagba agi apai re nika gbarasapa gaoni zereda nyeanye kindi te. Tipagine? Bambiko oni aida kuti gupai nga, ga Mbori Kindo nika dia gu gbegberẽ apai dunduko kusayo agi apai re aye nani.
Wai rengbe oni ka gbia gu ngbatunga maabangirise re? Si naida oni ‘mbakadi berãroni berewe’ na ki “kpária pa gu he nga ga Mbori nyemu he du ni wene he, nzunzu, ni ziazia ha.” (ARomo 12:2) Ka oni mangihe wo, ani naberãha nga oni aida aida ka ino gu kura apai berewe nayugo gupai nga, agu amokido du rogo Ziazia Kekeapai, si daada boro kido kuti ni. Si daada oni mangi ngbatunga gu wisigopai re. Ngenga agu apai oni amangaha rogo gaoni raka rengbe ka sa roni oni zeredi berãroni yo wenengai te.
[Gu kpiahe du ti kpewaraga 7]
Ginipai Fugo Mbori agumbaha tipa raka kumbatayo?
[Gu kpiahe du ti kpewaraga 7]
Yesaya 35:5
[Gu kpiahe du ti kpewaraga 8]
Yesaya 35:6
[Gu kpiahe du ti kpewaraga 8]
Yoane 5:28, 29