Wene Pangbanga Dure Fu Rungorungo Aboro

FUGO MBORI nakido rani kini yaa: “Bangirise ago nga ti aboro zingo ahe kindi te.” (Atambuahe 9:18) Ziazia Kekeapai nape pa Bakusirani a kini yaa: “Mo naza bero, ki nimbisi gu nyemuhe nga ga unga ahe dunduko.” (Atambuahe 145:16) Kina boro rengo du nga agu apai Ziazia Kekeapai akidopaha kumbatayo re. Gu Mbori Duna Tanduapai Dũ ima rengba ka mangapai ki nyasiriipa rungo kusayo. Ginipai rungorungo aboro aidaha?

Dee sa nga bangbasia nawirikipai tipa banda marã ayaa, gupai si aidaha tipa rungorungo aboro nga “bawene sino nyanyaki bazogo.” Rogo gu fugori yo re nga, tipa ka nyasariipa rungo kusayo, si naida gu boro duna ome ka mangapai gbiati wene sino ka ngerafuo aboro. Ani rengbe ka gbia gupai kuti fugori nga, gu bazogo rengbe ka nyasariipa rungo rogo zegino dunduko, si naida ní du nigu boro nazoga zegino dunduko, bambiko kere rungo naye gbe mbiko gupai nga kura aringara na agu ahe behe adunga be kura aringara ya. Kurigure, gu bazogo rengbe ka dia rungo kusayo, si naida ní rengbe arengba ka dia guhe kusayo naye na rungo, nga gu ringi du rogo aboro yo. Ono wari rengbe ani ka gbia gu ngbatunga bazogo re ni?

Mbori akedi Yesu ku sende no na wene pangbanga fu airarungo. Ho Yesu aru ni kuari ka geda pa gu sunge Mbori afuhe fuko, ko ayaa: “Ga Gbia Toro ti re, bambiko ko auka nzeme ku ri re mi tungusi wene pangbanga fu rungorungo aboro.”​—Ruka 4:16-18.

Gu Wene Pangbanga Re Nga Gine?

Mbori moi Yesu ni Bakindo. Wene pangbanga du ngaha. Ko nga gu Bazogo nzunzu nika nyasariipa rungo bambiko (1) ko nika zoga aboro dunduko rogo zegino na ko na ome beko; (2) ko namangapai ninunga tipa rungorungo aboro na kini yugupai fu apefuoko i ningere fuoyo; na (3) ko rengbe arengba ka dia gupai kusayo naye na rungo, nga gu ringi du kpoto aboro yo. Ani wisigingo agi apapara wene pangbanga du biata re.

1. Ga Yesu tandu kurii arikaaboro dũ Fugo Mbori naya tipa Yesu wee: “I aasia pa zogarago fu ko . . . ya aboro dunduko, na arikaaboro, na ngbatunga aboro na afugoyo mangi pa ko.” (Daniere 7:14) Oni berẽnga pa gu weneapai nikadu ho bangisa boro nikaa zoga aboro ni dunduko. Vura adunga ho berewe pati agu aũkumuko nga ga sende te. Aboro dunduko nikaa gbia undo kina sa. Yesu aima gumbaha ningbako ki yawee ko nikadu nibazogo zegino na tandu beko ka mangapai. Ko ayaa: “I asia pa ahe fere dunduko ku ngbangbaturũ yo na ku sende no.”​—Matayo 28:18.

2. Ga Yesu nunga tipa rungorungo aboro Ti regbo ga Yesu sunge auru kpotosende, ko amangipai ninunga tipa rungorungo aboro. Nikpiapai, dee nagberesi pa gari ahe dunduko tipa ka gbia ziga tipa gari kaza azadi ngba ga Yesu remu, kini berẽhe nga ri nika hu. Kure aga tiri tipa agarã 12 na si nirengo nga kure anye tii kpotoriyo gbua tooni. Ringbisihe kuti Ndiko, gu boro ka ri azadi ní, ka ní ada nibibiriko boro. Yesu amangi ri ninunga. Ko aya furi: “Vungu, ga idapase batasi ro; mo ndu zezeredi ki bati be ga kere kaza.”​—Marako 5:25-34.

Ga Yesu yugopai na ome ti ni ka aria ngbadu aboro yo tipa i naamangapai a ninunga. Nikpiapai, oni bingo wai Yesu akaragapai fu gu kumba naidi ka ino wai ka ko sa ngbarago ti Mbori. Gu kumba re aima ino ya Mbori nakpinyemu gupai nga ani kpinyemu akuarani, ono ko asana Yesu ki yaa: “Da nga kuare?”

Yesu akaragapai fuko nigumbako gu gako sanza aboro naima inoho wenengai, nga gu i naayambaha nga “sanza wene boro Somorona.” Si nafura tipa gu kumba naguari Yerusarema yo ka ndu ku Yereo yo abatuka kini tako gene ki mbuko ko ‘nambedi ka kpi.’ Gu boromotumo naandu ngba gu gene re aneko ane. Revi amangihe kinawo a. ‘Ono boro Somorona naandu ngba gu gene re aye koyo du ko ni. Ho ko abi ko ni, nungako ki mangi ko.’ Ko agirisi gako aoro, ki diko ku sinziri yo, ki fu marã fu irasinziri i ngerefuoko nani. Yesu asanahe ki yaa: ‘Da dagba agi aboro biata re nadu wa kurako fu gu ko nagbia abatuka?’ Gu kumba re ki karagapai ki yaa: “Gu ni naini pai fu ko.” Yesu ki ya fuko: “Mo ndú ki mangi kina wo a.”​—Ruka 10:25-37.

Agu aboro nada ni aDezire Yekova nawisigo ngbatunga agu apai Yesu ayuguhe re na ki aria gayo berã tipa kaa undo agu aboro du rogo zingo. Nikpiapai, dee sa nga boro Latvia akepai rogo gari buku tipa gu kaza namangi ri ho ri aamangasunge ni rogo gu bataya ziziaboro nangia Potma bara rogo gu garã nga 1965. Sangbari nga: “Ti regbo gimi kaza dunduko, [aDezire Yekova] angerefuo re wenengai. Kura ngerafuo re ho ka aboro angerefuo re susi gure te.” Ri aya berewe wee: “ADezire Yekova nabihe ninyanyakipa pai ka undo aboro dunduko, ka gayo pambori watadu gayo ringara vura du kia vurũ.”​—Women in Soviet Prisons.

Ho kere zingo mosoro ati ni kurogo gu gbata nga Ancón du Ecuodor yo, badungu aDezire Yekova sunge aadunga beyo tipa ka mangaha ya, na ka marã adunga beyo ya. Agu akurayo nga aDezire Yekova adiberã ka gbata marã fuyo; i anaamanga riahe kaa bagaha fu agu abazi-atĩo nayego wiso gene zio atĩo yo, (a wa du suraha ku kumbabee yo re). Aboro dunduko rogo dungurati nafubee tipa ka undo, kodihe na agude. I anaatona sunge riahe saa sa fuo bebere yuru tipa riahe ima kura ho akurungba nika da ni saa biama. Gu marã i agbiaha, i akparakaha ti akurayo ringbisihe kuti gayo azingo.

Ngbatunga agu apangbanga re nayugo gupai nga, ga Yesu kpiapai na gako yugopai, si du na ome ti ni ka aria gu bipai nga ga aboro tipa i naaundo agu aboro du rogo zingo.

3. Ga Yesu tandu ka aria gupai du rogo aboro yo Gupai du rogo aboro yo nasayo i naamangapai niringi, si nga gupai aboro naima inoho rogo zegino dunduko. Ziazia Kekeapai nayambaha nga “ingapai.” Pauro afura tipaha ki yaa: “Mi bi rugute tie ya wa mi nikpi nyemu manga wenepai, gbegberẽpai nimbedi na mi.” Ko agbia gupai kutini nga: “Da ka batasi re ti gi boro kpio re? Mi natambua Mbori mbiko Yesu Kristo gaani Gbia.” (ARomo 7:21-25) Ane, Pauro afura tipa wai Mbori nika batasa ndikidi airisiko rogo Yesu yo be gu ingapai du kpotoyo yo, du gu sa nga ringi, nga guhe naye na rungo. Wai gipai re nika manga?

Yoane Bafu Bapatiza aya tipa Yesu wee, ko nga “gu Wiri kandoro nga ga Mbori ru, nadia gu ingapai nga ga zegino ku sa yo!” (Yoane 1:29) Fuo regbo ngbutuko, zegino nika hi be kina agu aboro adunga na ingapai tiyo ya, kodihe na gu gbegberẽ nyemupai nga boro niberẽ kina pa tiní. (Yesaya 11:9) Yesu nika dia gupai adia kusayo naye na rungo.

Si nipa ngbarago ka berãpa gu regbo aboro dunduko nikadu na agu ahe beyo du yó na zingoho! Fugo Mbori nayaa: “Aboro ni ba sa sa asúnga kina tii gayo bakakue na tii gayo vurumo a, a nga boro sa nikagundesi yo te.” (Mika 4:4) Gu veresi re nafura tipa gu regbo aboro nikadu na wene asunge beyo dunduko, bayo ki ngba angba, i kini raki rogo gu zegino adunga rungo rogoho ya, na kini fu tambuahe fu Yekova tipa gako weneapai.