Ga Yesu Kpiapai Naundo Rani Ani Raki Wene Raka

AWA ani afura tipaha rogo gu kekeapai ye mbata fu gere, Yesu aima raka wene raka. Ka ani aida ka raka wene raka, si naida ani wiriki gako kpiapai na kini degeturani kuti gako arugute.

Nirengo, gere nga gupai Yekova azungodi rani ani mangihe a wagu veresi du kuari re ayugoho. Kaa ta wagu Yesu anaata naida na gupai nga gaani gene raka pekefuo gako kpiapai na ayugopai. Manga ani he wo nika undo rani Mbori idi na gaani pai na ani ki raki wene raka.

Ga Yesu yugopai na bangua arugute rengbe ka undo rani ani ta kina wai ko anaata. Gi bangua arugute re, dunguhe gudu rogo gu gako tungusapai naadu rii bagangara yo. Ani makianga bete gi bangua arugute re na ki bingo wai rengbe ani ka mangasunge nani rogo gaani raka yo.

BANGUA RUGUTE: “Aboro ngbarago nga agu aboro inipa gu gayó azingo nga ga toro.”—Matayo 5:3, NW.

WAI GU BANGUA ARUGUTE AUNDO BORO NIRAKI WENE RAKA:

Yesu ape gupai nga Mbori akusi aboro na nyemu gupai nga i iniko. Ani na nyemu ka ino akaragapai sa agu asanahe duwa: Tipagine du ani ti ni herẽ? Tipagine du bakere rungo ti ni auru kpotosende? Ya mo Mbori naberãpa rani aberã nzunzu? Ya mo raka ho fuo kpio? Ani naida ka ino akaragapai kuti agi asanahe re tipa ka ruho ka raka wene raka. Yesu aima inoho nga, gu ndikidi ba rengbe ani ka gbia akaragapai sa agi asanahe re rogoho nga Fugo Mbori. Ko akpari fu Bako ki yaa: “Ga pai nga rengo.” (Yoane 17:17) Ya mo Fugo Mbori rengbe ka mbisa gu gaani azingo nga ga toro?

NDIKIDI KPIAPAI:

Esa angia batabia na kingia wene bayango, na gi gako sunge re aandu ka sako ko da niwene batabia. Ono wa si avura duwo, Esa aabi tiko nga pai kinaho nakpa rogo gako raka yo. Sangbako nga, “Wa mi avura du na ngbarago tipa kangia batabia, mi aakpinyemu ka raka wene raka susi gure.” Fuo bete regbo kusa, Esa agbiatiko na boro sa dagba aDezire Yekova. Ko ayaa, “Mi asasanako na dungu asanahe. Rago aima ngba tire na wai ko akaragapai fere rogo Ziazia Kekeapai, sidu, mi ki idihe fuko ko wiriki Ziazia Kekeapai nami.” Gupai Esa awirikihe rogo Ziazia Kekeapai azi ngbadukoyo na ki fõ ko ko kpara gako raka fu Yekova. Ko ayaa: “Mbata kusayo, wo mi anaarimiso tire kurogo akpakarapai na kini kusi tire behe. Ono awere, mi naraka wene raka.”a

BANGUA ARUGUTE: “Aboro maku nga airahipai.”—Matayo 5:7.

WAI GU BANGUA ARUGUTE AUNDO BORO NIRAKI WENE RAKA:

Hipai watadu inopai, si nga kadu na nunga kura aboro, ka manga wenepai fuyo na kini berẽpa yó. Yesu ainipai fu agu aboro naadu na zingo. Mbiko gu bakere nunga naadu tiko, ko amangipai tipa ka undo agu aboro naadu narungo. (Matayo 14:14; 20:30-34) Ho ani awirika ga Yesu kpiapai ni nga ga inopai, ani nasa gaani raka si du niwenehe, mbiko agu aboro nainopai fu akurayo, i na ngbarago. (Amokedi 20:35) Ani rengbe ka inopai fu kura aboro rogo gaani wene afugo na mangapai na kini undo aguyo naida ani undoyo. Ya mo inopai rengbe ka sa gaani raka si du niwenehe?

NDIKIDI KPIAPAI:

Maria na kumbaari nga Carlos nga wene kpiapai rogo inopai yo. Ba Maria nga dekurugbo, agi agarã nina ndu were re, ko aguaringa rii ba berewe te. Maria na kumbaari diko ku kpuyo yó tipa ka ngerafuo ko na agu apai ko aidaha. Dungu aregbo kinaho i azanga rame yuru, na ti kura aregbo i naora naako ku bambungua yo ho pai atunguo ko ni. Sangbayo nga, aregbo kinaho i naabitiyo wa i ima mbu nikerehe. Ono i na ngbarago mbiko gupai Yesu apehe nga rago nangba tiyo tipa undoyo ba Maria na agu apai ko aidaha.

BANGUA ARUGUTE: “Aboro maku nga aboro azarõ.”—Matayo 5:9.

WAI GU BANGUA ARUGUTE AUNDO BORO NIRAKI WENE RAKA:

Waigu padu boro niboro azarõ narengbe ka sa gani raka si du niwenehe kisusi? Mbiko si nasarani ani duna wene pagume na agu aboro du pati rani. Si adu niwenepai ka degeturani kuti agu arugute nga ga Ziazia Kekeapai nayaa: “Oni dú zezeredi na aboro dũ, kina ro tigamo ka si du wa ka mo mangi he.” (ARomo 12:18) “Aboro dũ” nakoda gaani aborokporo gbiati agu aboro adunga na ani ti idapase ya. Ya mo padu ani nazereda na “aboro dũ” rengbe ka sa gaani raka niwenehe?

NDIKIDI KPIAPAI:

Ani bingo gupai namangi tipa gu dee nangia Nair. Tipa dungu agarã, ri agbia tiri na agu asoapai namoi ri ngba asada tipa kadu nazereda dagba tiri na gari aborokporo. Tona tigu regbo kumbaari amburi agarã 15 kusayo, kina ri ninaamanga ome tipa kaa sonosa awiri. Gu wiiri nga kumbagude nadia kere ngua kutii kpotokoyo na omeri arẽnga naako te ko namanga ri kporo na gu wiri nga degude gbegberẽ. Nair idi kuti gupai nga gupai wiriki ri he rogo Ziazia Kekeapai ima undori ri du na pazereda na aboro, zavura ti ngbatunga regbo asada wa gure vurũ. Ri aʹasadanga ka paya watadu ka sovura tipa ahe te. Ri naʹasada tiri nyanyakii kadu na weneringise, nunga na kini gii tiri na kura aboro. (AEfeso 4:31, 32) Ri idi kuti gupai nga, padu ri nazereda na aboro ima sari ri duna wene pagume dagbari na gari aborokporo gbiati kura aboro.

ONI BERẼ TIPA KUMBATAYO

Ka ani pekefuo ga Yesu arugute, ani nikadu na ngbarago na ki rengbe kina be agu ahe du berani. Ono tie, ka ani aida na ndikidi wene raka, si naida ani ini gupai du kumbatayo. Nirengo, wai rengbe raka kadu niwenehe ka si du nga gu yangarapai ini ani he nga ka sona ki gbinza, ki woki na ki kpi niyangaraha? Nirengo, gere nga gu ndikidi apai namanga rogo gi zegino re.

Ono tie, wene pangbanga kinaho! Yekova na dungu wene ahe beko fu agu aboro diberã tipa kaa ta ‘a wa Yesu anaata.’ Yekova nakidohe nga ko nika ye na ruru vovo zegino barambeda, nga gu ruru aboro nika raka rogoho kina wai ko aida i raki nyeanye kindi na wene kpotoyo. Fugoko nayaa: “Oni ngére, ga Mbori banye du na aboro, ko anyé na yo, i adú ni gako aboro, Mbori anyé na yo tigako, ki du ni gayo Mbori. Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”—Yugoti 21:3, 4.

Maria du garãri 84 ani nifura tipa ri rogo bambata kekeapai, ri namaabangiri na ngbarago tipa ka bi wai agi afugo re nika dati rengo. Ginipai du tipa roni tigaoni? Ya mo mo naida ka inopai nibakerehe tipa gu “ndikidi unga” nikadu rogo ga Mbori Kindo? (1 Timoteo 6:19) Kangia wo duhe, mo rengbe ka sana aDezire Yekova rogo gamo dagbarago watadu ka ke waraga fu agu aboro nakusa gi magazini re.b