Gbugbu Bazogo Zegino Akuru Kuyangura

TI KURA regbo sa, Yesu aya fu aboro wee, “Gbia gi zegino re i abá ko aba awere.” Kusa, ko agbia gu kurapai kutini nga, ‘bakindo zegino naye, tandu be ko ku auru re te’ na “kindo gi zegino re i ima sapa ngbanga ko.” (Yoane 12:31; 14:30; 16:11) Da Yesu aafura tipa ní?

Ka ani makiapai tipa gupai Yesu agumbaha nga ‘Bakindo gi zegino re,’ si ziazia nga ko aafuranga ane tipa gu Bako du ngbangbaturũ yo nga Yekova Mbori te. Da du tie nga ‘Bakindo gi zegino re’? Wai du i nika ‘ba ko,’ na wai du ‘i naima sapangbanga ko’?

‘Bakindo gi Zegino re’ Kusi Tiko

Kina wai baira amangi gbegberẽ apai naata ngbaduni ka yugopa gu ome du ní nani, kinawo Satana amangihe ti gu regbo ko aasada Wiri Mbori nga Yesu. Fuo Bakitingbanga “yugu angbi” zegino dunduko fu Yesu, ko aasadi ka gamahe fu Yesu niyaa: “Mi afú gi tandu foro dunduko re na gaha taarimo; bambiko i afu he ku bere; mi ki fu he fu gu ni idi mi ka fu he fu ni. Ka mo irisi re tie, si du adu ni gamo dunduko.”​—Ruka 4:5-7.

Kangia Satana nga kungbo gbegberẽpai gbua wa gu kura aboro agumbaha, wai rengbe aboro ka giarogo gu asada re? Ya mo gure nga Yesu adu ni asadi asadiko be kina gu nyemuapai naadu rogoko yo watadu be gu tagbagapai naaye fuoko fuo zioko bapatiza? Kangia wo duhe, wai tie ka i arengbe ka gumba gupai tipa ko nga “ingapai ti ko te”? (1 Yoane 3:5) Yesu aatinga kango gu ome du Bakitingbanga nani kurii aboro te, boro Yesu nitiko nzunzu naima ida kutini na ki fura tipa ko nga “kindo gi zegino re,” na ki sakipai tipa ko a nga “baimiaboro” nga ko na “irazire nga ko.”​—Yoane 14:30; 8:44.

Fuo susa bete agarã wa 60 fuo gbia Yesu tiko na gi ga Bakitingbanga asada re, gu mokedi nangia Yoane atingidi akurako aKristano naapa gu ome du Bakitingbanga nani kurii aboro ki ya, “zegino dunduko du ni zogozogo ho be gbegberẽ ko.” Yoane afura tipa ko berewe ki ya, ko “nga banangi aboro kpotosende yo dunduko.” (1 Yoane 5:19; Yugoti 12:9) Nirengo, Ziazia Kekeapai nafura tipa gu toro du ni gbugbu ko re ki ya ko nga ‘bakindo gi zegino re.’ Ono wai du bakio gako maapai kurii aboro?

Bazogo gi Zegino Re Nafu Pagbia fu Abakureako

Ho gu Mokedi nangia Pauro aakepai ni tipa gu vura aKristano asoho tipa idapase, ko ayugu gu kere akare i aso gi vura re kutiyo. Ko yaa: “Gaani kenahe sa borose na kure te kina sa angbi, sa atandu, sa azogo zegino nga ga gi bitimo re sa rimbasa agu atoro nga ga gbegberẽpai yo rogo agu arago du ngbangbaturũ yo.” (AEfeso 6:12) Sidu, gi vura re kuti agu aboro niima nyaka kisusi ndikidi aboro, mbiko i asongaha “sa borose na kure te” ono kuti “rimbasa agu atoro nga ga gbegberẽpai yo.”

Ringbisihe kuti gu vovo asasa-fugo Ziazia Kekeapai du awere, anga gi “rimbasa agu atoro nga ga gbegberẽpai yo” re nafura tipa kungbo gbegberẽpai gbua te, ono si nafura tipa gu gbegberẽ atoro ni aboro duna bakere ome tiyo. Sidu, Bakitingbanga aima digo niimangisunge na gu ome du beko rogo gu kura amaraika nga aguyo “[na]he gu rago i aringbisi he fu yo” wakina Bakitingbanga a.​—Yuda 6.

Gu kitabu sangbaanebi nga ga Daniere nayugo wai agi “azogo zegino” re adu na bakere ome kurii gi zegino re tona kina bakuru kusayo. Mbiko gu bakere bakabangirise Daniere adu nani tipa agu akurako aYudo naaguari be sunge zio Babera yo ki ga ku Yerusarema yo rogo gu garã nangia 537 M.B.K., ko akpari fu Mbori tipa yó tipa aposo biata. Gu maraika Mbori akedi ko tipa ko ye ka ngarasa gu nebi re agumba ndu gupai ko adanga ti ni niipo ya. Ko yaa: “Gu bazogo ngbi nga ga Parasa adika re tipa [a]rame 21.”​—Daniere 10:2, 13.

Da nga gu ‘bazogo aParaso’ re? Nirengo, gu maraika re aafuranga tipa gu Bakindo aParaso nangia Kurese te, nga gu boro nainipai fu Daniere gbiati aboro ti gu kura regbo. Kurigure, wai ka kungbo boro arengbe ka ká na maraika tipa aposo biata baraho maraika sa gbua aimi kere abasovura ni rogo bangisa yuru sa nga 185,000? (Yesaya 37:36) Gi gbegberẽ ‘bazogo nangia ga aParaso’ ko re arengbe kadu nga ga Bakitingbanga bandusunge, nga gu daimona Bakitingbanga amoiko ko naangera kurii gu zogarago nangia ga aParaso. Kusa rogo kina gu pangbanga re, gu ga Mbori maraika re agumba gu kurapai nga ko naandu berewe ka sovura na “gu bazogo ngbi nga ga Parasa” gbiati gu kura daimona nga “bazogo aGriki.”​—Daniere 10:20.

Gini digisopai rengbe ani ka kura nani rogo gi pangbanga re? Gipai re nayugo gupai furani nga gbugbu aboro kinaho nga “azogo zegino,” nga agu adaimona namangasunge na zegino kutiibe bairayo nga Satana Bakitingbanga. Ono ginipai i naida ka mangaha da ku areme?

Bazogo gi Zegino Re Yugu Tiko Nzunzu

Rogo gu yangara buku nga ga Ziazia Kekeapai nga Yugoti, gu mokedi nangia Yoane nasakapai yo furani tipa Yesu nga Mikaere nga bakumba maraika, nga ko aima diabe Bakitingbanga na gako adaimona na ki gumbapa gu kerepai pa do yó ngbangbaturũ yo arengbe ka mangaha. Ani nageda gupai yo nga: “Rungo du fu kpotosende . . . bambiko bakitingbanga azorõ koyo du oni ni na bakere zinga, bambiko ko ini he ya kina bete rago nye fu ko.”​—Yugoti 12:9, 12.

Wai gu Bakitingbanga ayuguhe nga ko na bakere zinga? Dungu amangi gbegberẽ apai niidi ka manga ai gupai rengbeyo ka mangaha tipa ka bata, kina gu bangisapai re Bakitingbanga na gako adaimona aida ka mangaha nga ka gbarasa zegino na agu aboro naraka rogoho tipa wa ka i kpi naayo sa. Wa Bakitingbanga naini gupai nga gu regbo nye fuko si nikina wiri guruhe gbua, ko namangasunge na kikindigi abasunge nga ga bagaahe, nga gu banguapai ngba ti aboro gbe tipa ka sa aboro i du na gu sino nga ga ngbeka kumu ahe, nga gu mangapai nasa gupai nga zingo ahe naamanga rogo ringara na kini gbarasipa arago rogo zegino dunduko na kini bagunde ti aboro.​—Yugoti 11:18; 18:11-17.

Natona kinaho aboro aenge ni, gu bakere nyemu pagbia duti Bakitingbanga, si niyuguyuguhe rogo birĩ-zogarago gbiati pambori. Gu kitabu nga yugoti, si naringbisapa gu pagbia du aboro birĩ-zogarago nani kuti gu nyarinde Bakitingbanga nafu “pa bakere bazogo fu ru.” Si nasakapai a tipa gu gbegberẽ pagume du dagba aboro birĩ-zogarago na pambori ya si wakina gu bäri nga ga toro. (Yugoti 13:2; 17:1, 2) Oni berẽnga kina pa gu rungosi, sunge kanga, na agu avura nadigi nimangi dagba aboro tipa dungu akama agarã nga gu imi dungu amirioni aboro. Ya mo boro ho rengbe ka ya wee gu riko gbegberẽ apai naadigi nimangi rogo ga aboro raka re aye nisangbana gu mangapai nga ga boro? Ya mo anga gbegberẽ atoro du du kugii gipai re te?

Ziazia Kekeapai nafura afura ziazia tipa gu boro naadigi nimangisunge rogo agu abazogo gbiati agu aringara duna bakere ome kisusi rogo zegino. Singia agu aboro re inihe watadu i ainongo ho te, gayo mangapai nayugo kina agu asino nga ga gayo bazogo nga gu ko naida ka gbarasa aboro tipa ka kpi naayo sa. Ono aboro nika rungo be gi ga Bakitingbanga zogarago re da ti gini regbo?

Gu Yangara Regbo Nye fu Bakitingbanga

Rogo bambata sa kama agarã, ga Kristo mangapai ayugupa gu kpio Bakitingbanga na gako adaimona nika kpihe. Ho gako abawiriki agumbapa wai i ado adaimona ti aboro, ko aya fuyo wee: “Mi abi Satana [ko ni]ti wa kina we gumba ngbangbaturũ yo.” (Ruka 10:18) Agu afugo Yesu re nayugo gupai nga Yesu angi tipa gu diabese ko nikadu nani kumbatayo rii bazogo gi zegino re nga gu narengbe ka manga nibasa fuo da Yesu ngbangbaturũ yo ni Mikaere nga bakumba maraika. (Yugoti 12:7-9) Sirisiri wisigo gu sangbaanebi nga ga Ziazia Kekeapai nayugo gupai nga gi diabese re amangi ngbangbaturũ yo rogo gu garã nangia 1914.a

Tona ti gu regbo re kada ku areme, Bakitingbanga ima inoho nga gu regbo nye koyo tipa i gbarasi ko si nikina wiri guruhe. Wa vura duhe nga ‘zegino dunduko du ni zogozogo ho beko,’ amirioni aboro kinaho ko ananganga yó ya. Ziazia Kekeapai ima kusako ku yangura fuyo na gako abawagi. (2 AKorindo 2:11) I nagbia maabangirise be agu afugo Pauro agumbaha fu awirinako aKristano nga: “Gu Mbori nga ga zereda ko ko nikasi Satana asi ku tii nduroni [yo] mbembedi.”b​—ARomo 16:20.

Gu yangara regbo nye fu Bakitingbanga tipa i gbarasi ko nika digo barambeda! Tii gu wene zogarago nikangia ga Kristo, ruru aboro nika aria kpotosende nga gu narukuba gbada ndu Mbori ni paradizo. Zuu, sogote, na ngbaduse nika nyasa anyasa nyeanye kindi. Ziazia Kekeapai nayaa: “I atíngida nga pa gu bambata apai te.” (Yesaya 65:17) Nairiwo gu bakere ongoda nikangiaha fu agu aboro dunduko nika kusa goyo kusayo tii gu pagbia nga ga bazogo gi zegino du nigbugbuko re!

[Gu rukutu kekeapai du bandu kpewaraga yo]

[Gu sura du ti kpewaraga 9]

Tii gu wene zogarago nikangia ga Kristo, ruru aboro nika aria kpotosende ni paradizo