Oni Mbedi Na Mbori

‘Ako Yekova, Mo Ini Re’

“BAKE buku sa rimoko angia Arthur H. Stainback agumba gupai nga: “Pai ho naye na bakere gberarago kuti boro susi gu nga ní ini gupai nga boro ho nabaka bangirise tipa ní te watadu boro ho nagia tiní nani te te.” Ya mo pai wa gure ninaamanganga roni? Ya mo oni aberẽnga gupai nga boro ho nabaka bangiri ní tipa agu apai nagbia roni watadu nagia tiní na oni wagusa te, ka ani agumbanga gu nga ka ino roni ya? Kangia wo duhe, rago nika ngba angba tironi ka ino gupai nga: Yekova nabaka bangiriko abaka tipa airisiko na ko nabi agu apai abi namanga yó rogo gayo raka yo naʹauru dunduko. Agu afugo Davide du rogo Atambuahe139 nasa rani ani du na kido kuti gupai re.

Bambiko gupai nga Davide aima ino nga Yekova na kina nyemuko tiko, ko agumba gupai nga: “Ako Yekova, mo awisigi pa re, ki ini re!” (Veresi 1) Davide amangisunge ane na wene fugo tipa ka yugo wai Yekova ainiko. Gu pa-Ebere, i asaha kurogo Pa-Zande nga “awisigi,” ani rengbe ka ringbisaha kuti ge rago tipa woronzo (Eyobo 28:3), ta rogo ringara (Abasapungbanga 18:2), watadu wisigopai wenengai singia si ruaru (Pa Fu Rugute ni Ue he 13:14). Nirengo, Yekova ima ino rani wenengai, si sa wa ka i yawee, ko ima wisigo gu futufutu apai du tipa rani dunduko. Pa gumba Davide gupai nga ‘mo ini re’ nayugo gupai nga Yekova naberãpa gako amoyambu nibasasa dunduko. Ko nawisigo yó nibasasa dunduko na ki ini apai tipa yó dunduko.

Davide akiisi pa wai Yekova awisigo gako aboro niyako wee: “Mo ini pa gi sunga na gimi ru ku ari; mo rugu tiro na pa gi berã wa du mo tuturũ.” (Veresi 2) Nirengo, Yekova naraka “tuturũ” ngbangbaturũ yo. Wa vura duhe wo, ko ima ino gu regbo ani asungo ti ni sande, isoke tifuo bagbanga uru, na gu regbo ani aguari ti ni wiso tipa ka tona manga agu apai ani ninaamanga ha tipa kaa raka. Ko ima ino gaani aberã, nyemuapai gbiati agu apai ani aida ka mangaha. Ya mo Davide agunde be wai Yekova awisigi ko? Oó, kuba gure, ko agumba gupai fu Yekova nga ko wisigi ko. (Averesi 23, 24) Tipagine ko agumbaha ti ni wo?

Davide aima ino gupai nga Yekova nawisigo airisiko na wene ndupai. Davide ayugu gu ndupai re ho ko ayani wee: “Mo nawisiga pa gi gene na gi pika sande, ki ini gimi apai dunduko.” (Veresi 3) Yekova nabi ‘gaani apai’ naʹauru dunduko, agu du niwenehe gbiati agu du nigbegberehe. Ya mo ko nagbe berãko kina kuti agu du nigbegberehe watadu agu du niwenehe? Gu pa-Ebere, i asaha kurogo Pa-Zande nga “nawisiga,” ani rengbe ka ringbisaha kuti wai boro ninaawisigo guhe ni apẽhe rogo kangira, wakina gu basopo bino ninaaroga wene zende ahe dagba gbegbere he. Gu fugo nga “ki ini,” i asaha rogo gu pa-Ebere du rogoyo nga ka bihe na “nyanyaki paha”. Ho Yekova abi agu apai ni gako amoyambu amangaha na kini gumbaha naʹauru dunduko, ko nagbe berãko kina kuti wenehe. Tipagine? Rago nangba angba tiko ka bi wai i amanga ome tipa kaa manga agu apai ngba tiko.

Gupai ani awirikaha rogo Atambuahe 139 nga, Yekova nabaka bangiriko abaka tipa airisiko. Ko nawisigo yó awisigo na kini ngerefuo yó rogo agu apai yo dunduko i amangaha. Sidu, ko ima inopai tipa gu kpakaraapai nagbia yó, na ko naino pa gu imisiri aino i agbia tiyo nani mbiko agu akpakarapai re. Ya mo rago nangba tironi ka iriso ngbatunga gu Mbori re? Kangia wo duhe, oni nikadu adu na kido kuti gupai nga: Bangiri Yekova ‘ago nga ti gaoni sunge gbiati gu nyemuse oni ayugoho tipa rimoko te.’​—AEbere 6:10.