Ya Mo Yekova Ini Roni?

“[Yekova] ini agu yo nga gako yo.”​—2 TIM. 2:19.

1, 2. (a) Ginipai Yesu aabakabangiriko tipaha? (b) Gini asanahe si aida ani wisigipai tipaha?

ROGO uru sa, Farusi aye fuo Yesu na ki sanako nga: “Dagba arugute dunduko gini gu susi?” Yesu akaragapai ki yaa: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ.” (Mt. 22:35-37) Yesu aduna bakere nyemuse fu gu Bako du ngbangbaturũ yo na ko araki ringbisihe kina kuti gupai re. Yesu aabakabangiriko a tipa kadu nigigiri ko bangiri Yekova, na ko ayuguhe rogo padu ko niruruko. Sidu tie, ngbutuko mbata fu kpioko, ko agumba agu afugo nga Mbori iniko nigu ruru boro nagiasangba gako arugute. Rogo gi gene re, Yesu anye rogo ga Yekova nyemuse yo.​—Yo. 15:10.

² Badungu aboro natangbaduyo areme nga i nakpinyemu Mbori akpi. Zanga kapa, ani a kina dagbayo. Ono tie, gu nyanyakipa apai si aida ani wisigihe nga: Ya Mbori ini re? Wai Yekova abi re? Ya mo aboro ini re niga Yekova boro? (2 Tim. 2:19) Nairiwo gu bawene momu nga ani berẽkurii pa gaani wene ngbanya na Bakere Bakusiahe rogo zegino!

3. Tipagine kura aboro abitiyo ti ni nga Yekova ainongo yó te, na ginihe rengbe ka undo yó i sovura kuti gu ngbatunga bipai re?

³ Ono wa vura duhe wo, kura aboro kinaho duna bakere nyemu Yekova tiyo nabihe nikpakarapai ka ida kuti gupai nga ko rengbe arengba ka inoyo ngba wene gene. Aguyo naberãha nga sunge tiyo te, i arengbanga kadu niga Mbori aboro te. Nairiwo gu ngbarago du ani nani ka ino gupai nga Mbori na gu bipai dukia tipa rani? (1 Sam. 16:7) Gu mokedi nangia Pauro agumbapai fu awirinako aKristano ki yaa: “Ka boro kpi nyemu Mbori, ko ini ni.” (1 Kor. 8:3) Gu nyemuse du oni nani tipa Mbori nga gu bambata he rengbe ka sa gupai nga Mbori ini roni. Oni makianga gipai re: Tipagine oni ageda gi waraga re ti ni? Tipagine oni amanga ome ti ni tipa ka mangasunge fu Yekova na ngbaduroniyo, mbisimo roni, berãroni, na ome roni dũ? Kangia oni aima kpara gaoni raka fu Mbori na ki zi bapatiza, ginihe nasa roni oni mangi gu diaberã re? Ziazia Kekeapai nasaka gupai nga Yekova nga gu boro nawisigo ngbadu aboro yo, ko naye na agu ahe ngba bangiriko. (Oni gedi Agai 2:7; Yoane 6:44.) Sidu, oni rengbe ka digisoho na agu afugo nga oni namangasunge fu Yekova mbiko ko ye na oni koyo du ko ni. Ko arengbanga ka mbu gu boro kinako naye nani te ka si dunga ní nye niruru ní fuko. Mbori nabiyo na nyanyakipa yó na kini kpinyemuyo nyanyaki.​—Tam. 94:14.

4. Tipagine si aida ani naaberã aberã ti ni kindi tipa wai Mbori naini rani?

⁴ Bara sa kindi Yekova naye na ani koyo du ko ni, si naida ani naaberã kina pa banda ani tirani kurogo gako nyemuse yo. (Oni gedi Yuda 20, 21.) Oni tingidi gupai nga, Ziazia Kekeapai nagumba gupai nga si nitaatapai tipa boro bitikpa watadu boro guari kusayo ti Mbori. (Eb. 2:1; 3:12, 13) Nikpiapai, mbata fu Pauro gumba agu afugo du rogo 2 Timoteo 2:19, ko afura tipa agu aboro nangia Umenaio na Fireto. Agi aboro du ue re angia kina ga Yekova aboro mbata, ono kusa, i kini bitikpa ti gu gene nangia ga rengo. (2 Tim. 2:16-18) Gupai re natingida rani a na gupai namangi tipa agu aboro naadu rogo gu dungurati naadu Garatia yo, nga agu aboro Mbori aima inoyo mbata ono naanyenga kurogo gu imarago yo nga ga toro i agbiaha ya. (Gara. 4:9) Si aidanga ani bipa gaani ruru mangapai bangiri Mbori nitaataha te.

5. (a) Gini ngbatunga asino Yekova abihe na nyanyakipaha? (b) Gini akpiapai ani nika wisigopai tipaha?

⁵ Asino kinaho nga gu Yekova abihe na nyanyakipaha. (Tam. 15:1-5; 1 Pet. 3:4) Idapase gbiati umbasitise i aino agu aboro ti ni Mbori aini yó. Ani wisigingo kpiapai nga ga akumba ue ka bi wai agi asino re asa yó Yekova iniyo wenengai. Ani nika wisigopai a tipa gu kumba Yekova aima inoko mbata ono mbiko rukö, Yekova ki sogoko. Ani rengbe arengba ka wirika nyanyaki pai ti agi akpiapai re.

Ba Fu Aguyo Dunduko Naida pa Mbori

6. (a) Gini idapase Abarayama ayuguhe nibipa ga Yekova akidohe? (b) Wai Yekova aini Abarayama?

⁶ Abarayama angia gu kumba naima ‘idapa Yekova.’ Nirengo, i aayambako nga “ba fu agu yo dunduko naida pa Mbori.” (Bam. P. 15:6; Rom. 4:11) Mbiko idapase, Abarayama ambu kpuko, abakureako, gbiati gako aũkumuko tipa ka ndu ka raka rogo tuturũ ringara. (Bam. P. 12:1-4; Eb. 11:8-10) Kusa fuo dungu agarã, ga Abarayama idapase adu kindi ninyanyakihe. Gipai re adu niyuguyuguhe ti gu regbo ko aida ka fu wiriko nangia Yisaka nimotumo nigiasangbaa gupai Yekova agumbaha. (Eb. 11:17-19) Abarayama ayugu idapase rogo ga Yekova akidohe yo, Yekova ki biko na nyanyakipa ko; ko aima ino Abarayama wenengai. (Oni gedi Bambata Pai 18:19.) Anga kina padu Abarayama ti ni Yekova ainihe sa te, ono ko akpinyemuko wa ndikidi bakureako.​—Yak. 2:22, 23.

7. Ginipai iriwo nibipa digisidigisi ga Yekova akidohe fu Abarayama, na gini sangbanaha si adu nani kuriko?

⁷ Si ima iriwo ka bi gupai nga agu akidohe dunduko Abarayama agihe tipa diakumbo ringara, gu ho kandara sa naringbisi tihe ti ragoko te. Ko abingo ngbatungako si nida “wa kina akerekuru ngbangbaturũ yo na wa kina ngume pangba baime” te. (Bam. P. 22:17, 18) Wa vura duhe nga agi akidohe re aringbisanga tihe ti rago Abarayama te, ko akakuti nyanyaki idapase kindi kuti Yekova. Ko aima ino gupai nga, gupai Mbori nagumbaha, si teketeke wakina gupai ko naima mangaha. Ii, Abarayama araki gako raka dunduko ringbisihe kuti gu idapase re. (Oni gedi AEbere 11:13.) Ya mo Yekova ini rani ni agu aboro duna idapase wa ga Abarayama?

Sungudo Yekova Nayugo Idapase

8. Gini apai aboro akpinyemu ka bihe si nidigisitihe?

⁸ Si rengbe kadu nga apai kinaho ani aida ka bihe si nidigisitihe. Rogatise, vunga agude, na du na wene kpotose nga agu apai dunduko aboro akpinyemuhe. Tipa dungu aboro, apai kinaho dagba agi apai re nga gu ata ringbisanga tihe rogo gayo raka yo ya. Kangia wo duhe tipa rani, gu gene ani amangapai ngbaha kuti agi apai re nayugopa gu idapase du ani nani.

9, 10. (a) Wai gu kura aboro aasadi ka ringbisa gayo nyemuapai? (b) Ginipai oni aberãha tipa digisidigisi ga Mbori akidohe?

⁹ Nairiwo gu zingo tatamana kangiaha ka ani agbata gene ka ringbisa gi nyemuapai re ngba gu gene dukia ti gu tatamana naye ariyo. Gure rengbe ka gbarasapa rani rogo toro yo. Nikpiapai, gu kura aboro kinaho nasia agu agene husa kaza natagbagatihe na ga Yekova arugute. Agu akurayo namanga sunge tuturũu ti gayo aborokporo watadu agu aba adunga adunguratise rogoho nga ga dungurati ya. Aguyo kini fura na agu aboro angianga idipase ya tipa agu apai nabipa kodaba. Kingia Kristano namanga ngbatunga apai wa gi du re, ya mo ní nagbata gene nzunzu tipa Yekova ini ní? Gini bipai ka Yekova adu nani ka ko abi gupai nga Abarayama aadunga na hipai berewe ka pido agu akidohe Yekova akido ko nani si ringbisitihe te? Na ginipai ka mangi ka Abarayama atona ka mangaapai kina wai ko akpinyemuhe, ki asadi ka sa rimoko si wo kuba gupai nga ka sungudo Yekova? (Oni ringbisinga ha na Bambata Pai 11:4.) Ya mo ka ko anye kindi nibakurea Yekova?

¹⁰ Ginipai oni akpinyemu ka bihe si nidigisitihe? Ya mo gaoni idapase ninyanyakihe tipa oni sungudi Yekova, nga guko kidohe tipa ka ringbisa agu apai oni akpinyemuhe? (Tam. 145:16) A wa si adu tipa Abarayama, gu kura ga Mbori akidohe kinaho arengbanga ka ye wa gu ani aberã paha ya. Ono wa vura duhe wo, ka ani sonosi gaani idapase wa ga Abarayama na kini mangipai ringbisihe kutini, Yekova bi gaani idapase abi na nyanyakipaha. Manga ani he wo nika undo rani nibakerehe.​—Eb. 11:6.

Gu Kparakparapai du Dagba Umbasitise na Rukö

11. Gini amomu Kora agbiaha, na ginipai si ayugoho ziazia tipa gako biapai tipa Mbori?

¹¹ Kparakparapai aima du dagba aMoize na Kora nibipa yugo irisa tipa ga Yekova mbakadapai na adiaberã. Gayo mangapai ayugo gu gene Yekova abiyo ngbaha. Kora angia gu boro Revi naadu rogo ngbatunga Koata na kidu na dungu amomu. Si nawira wa ko adu kinaho ti gu regbo Yekova abatasi aYisaraere Zamba Baime yo, na ko asongodi ga Yekova sarangbanga kurii agu aYisaraere nasamungu pati Bagangara Sinai yo, na kini undo sunge tinda Sanduki Mokido. (Gate 32:26-29; Geda 3:30, 31) Ko aima du niruruko fu Yekova tipa dungu agarã, na dungu aboro aafu irisa afu fuko dagba aYisaraere.

12. A wa yuguyo ho ti kpewaraga 31, wai gu rukö agbarasi pa ino Mbori Kora?

¹² Wa si avura duwo, ho aYisaraere aduni ngbagene Ringara Mokido, Kora aberẽ gupai nga gu gene Mbori aanungusa yó ngbaha angbanga te. Fuani, akumba 250 naangbe kumbatayo fu angbatunga aYisaraere akoditiyo na Kora tipa ka manga ariapai. Kora na gu kura aboro re aima ino gupai nga gayo pagume niwenehe na Yekova. I aya fu Moize wee: “Oni di pai ku ri roni ki susi! Wa du he nga rimbasa aboro ni kparakpara yo ziazia dunduko, i ni ba sa sa dunduko, Yekova du dagbayo.” (Geda 16:1-3) Nairiwo gu ngbatunga kido kuti tise na rukö re! Moize akaragaha fuyo ki yaa: ‘Yekova nika yugo gu ní nga gako ní.’ (Oni gedi Pa Geda Aboro16:5.) Fuo girarago, Kora gbiati agu aboro dunduko nangbe naako kuti samungu akpiki kusayo.​—Geda 16:31-35.

13, 14. Rogo gini agene Moize ayugu gako umbasitise?

¹³ Ono tipa Moize tigako, ko angia “bayee boro ni rengo, ki susi agu aboro nadu ri kpotosende dunduko.” (Geda 12:3) Ko ayugupa gako du nibayee boro na niboro umbasitise nika ko nyanyaki kuti ga Yekova rugapai. (Gate 7:6; 40:16) Pai ho rogo Ziazia Kekeapai nayugo gupai nga Moize anaatikango na Yekova riipa agu agene Yekova anaamanga apai ngbaha te, ko azinganga a ho Yekova anaafu arugute fuko tipa ko mangipai kutini te. Nikpiapai, Yekova afu arugute tipa wai si aida ko dua banye. Agi arugute re akodi gu rangi gire na bange agu agire si aida aYisaraere mangisunge nani tipa ka manga gu bambu rokoo naadu tipa gu banye re. (Gate 26:1-6) Kangia babiapai gu duho nangerakurii gu sunge oni amangaha na kini fu arugute furoni na agu afutufutuhe dunduko tipa gu sunge re, rago rengbe arengba ka gberã tironi. Ono tie, Yekova nga gu bangerekurii sunge du nirengberengbe ko, ko nafu sunge fu aboro dunduko na kidu na kido kuti gako amoyambu. Ho ko afu arugute ni na futufutu he dunduko, wene ndupai kinaho ko amangaha ti ni wo. Oni kparia gupai nga, Moize azinganga na Yekova watadu ka berãha nga Yekova naumbasi pako, si du fuko dendekere arugute ti ni fuko wa gure te. Ko aberãnga ha nga Yekova nadia gako ranirii beko a te. Kuba gure, Moize amangi ome ka bi gupai nga agu aboro naamangasunge re, i mangi he ‘kina wai’ Mbori aruguhe. (Gate 39:32) Nairiwo gu umbasitise re! Moize aini gupai nga ga Yekova sunge du ngaha na Yekova aamangasunge naako tipa ka digiso gu sunge re.

¹⁴ Moize ayugu tiko a niboro umbasitise ti gu regbo ko agbiatiko na gu kpakarapai nga gu naadu na bakere sangbanaha kurii gako sino mangapai. Ti kura regbo sa, Moize arengbanga ka za tiko berewe te, na si ki sako ko zanga fu taarimo fu Mbori nibi wai ko amangipai kuti gu kpakanahe nangia ga aboro. Nisangbana gupai re, Yekova agumba gupai fu Moize nga ko andunga na aboro kurogo Ringara Mokido yo te. (Geda 20:2-12) Ko gbiati wirinako nangia Arona aima digo nihi gu kpakanahe nga ga aboro tipa dungu agarã. Mbiko wa Moize aingi bara sa, gene aadunga tipa ko bi gu wene apai ko aima digo nipidihe tipa gbanga regbo re te! Ginipai Moize amangihe tipa gipai re? A wa sino aboro nidu, rago aima gberã tiko ono ko ki umbasi tiko na ki mangipai kuti ga Yekova diaberã. Ko aima ino gupai nga Yekova nga ruru Mbori nga gu boro adunga irairapai tiní ya. (Pa Rug. 3:25-27; 32:4) Ho oni aberã ni tipa Moize, ya mo oni abingo ko wa gu boro Mbori aima ino ní te?​—Oni gedi Gate 33:12, 13.

Giasangba Yekova Naida na Umbasitise

15. Ginipai rengbe ani ka wirikaha ti ga Kora sunge rukö?

¹⁵ Gu gene ani amangapai ngbaha kuti agu ariapai du rogo adungurati na agu adiaberã agu aboro nangbembatayo rogo apai amangaha nayugopa wai Yekova naini rani. Kora na gako aboro akparatiyo kusayo ti Mbori mbiko gu bakere kido kuti tise, rukö, na gu zingo idapase naadu tiyo. Wa vura duhe nga gu boro Kora anaabi ní ní nimangi adiaberã naʹauru dunduko angia gbinza Moize, kina boro Yekova du naafu agu arugapai re fu gako aboro. Bangiri Kora aima go ti gupai re na ko ki zanga yugo irisa fu agu aboro Mbori amangasunge naayo. Si aida Kora sungudi Yekova tipa ka rugatiko na rogo gupai naamanga wenengai watadu tipa Yekova ye na ariapai kangia si aidaha wo. Niyangaraha, Kora agbarasipa gu dungu agarã ko amangisunge fu Mbori niruruko mbiko gu mangapai nangia ga rukö!

16. Wai rengbe pekafuo ga Moize kpiapai nga ga umbasitise ka sa gupai nga Yekova ini rani?

¹⁶ Gu pangbanga re nafu bakere zahe fu abaakumba gbiati kura aboro rogo dungurati areme. Sungudo Yekova na pekafuo agu arugapai agu aboro nangbembatayo rogo apai amangaha naida na umbasitise. Ya mo ani nayugoho rogo gaani raka yo nga ani na umbasitise na nibayee rani wa Moize adu? Ya mo ani rengbe ka ida kuti gu sunge fuyo ho fu agu aboro nangbembatayo rogo apai na ki mangisunge kuti agu arugapai i afuhe furani? Ya mo ani naza tirani ti gu regbo rago nagberẽ tirani? Kangia wo duhe, Yekova nika ino rani aino. Gaani umbasitise gbiati giasangba nika sa gupai nga ko kpinyemu rani nibakere he.

Yekova Ima Ino Agu Aboro Nga Gako Yó

17, 18. Ginipai rengbe ka undo rani tipa Yekova naaino rani aino kindi nigako aboro?

¹⁷ Si niwenepai ani berẽkurii pa agu aboro Yekova aini yó na ki ye naayo koyo du ko ni. Abarayama na Moize angia kina kpakpa aboro na aingahe tiyo wakina rani. Ono wa si vura du wo, Yekova aima inoyo nigako aboro. Gu kpiapai nga ga Kora nayugo gupai furani nga si taata tipa ani guari pati Yekova kusayo ka ko ainongo rani berewe ya. Si naida ani sana tirani nibasasa nga: Wai du Yekova abi re? Ginipai rengbe mi ka wirikaha ti agi akpiapai nga ga Ziazia Kekeapai re?

¹⁸ Pa wasa du ngaha furani ka bi gupai nga Yekova nabi gako ruru amoyambu wa gako aboro na kini ye naayo koyo du ko ni. Oni ndu kumbatayo kindi na sonosa idapase, umbasitise, na gu kura asino nga gu rengbe ka sa gupai nga Mbori kpinyemu roni. Wene momu du ngaha nga Yekova ini rani na si naye na ngbarago kurogo gaani raka yo awere, na si nasa rani ani du na maabangirise tipa agu amaku nikadu kumbatayo.​—Tam. 37:18.

Oni Natingidaha?

• Gini nyanyakipa ngbanya rengbe kadu dagbarani na Yekova?

• Wai rengbe ani ka wirika ga Abarayama idapase?

• Gini apai rengbe ani ka wirikaha be Kora na Moize?

[Gu sura du ti kpewaraga 29]

Wa kina Abarayama, ya mo ani na idapase nga Yekova nika digiso gako akidohe naabaha?

[Gu sura du ti kpewaraga 31]

Kora akpinga nyemu ka mangapai kuti arugute na umbasitise te

[Gu sura du ti kpewaraga 32]

Ya mo Yekova ini roni ni agu aboro giasangba namangapai kuti arugapai?