I Asamungu Kuti Yekova

Fuo bete aregbo kusa, baraho aYisaraere adu ni ngbakungbo yo, Kora, Datana, Abirama na gu kura aboro 250 asamungu kuti Moize. I aya fuko: ‘Oni dipai kurironi kisusi! Tipagine du mo ti ni ni gaani barumbatayo na Arona kingia gbiamotumo? Yekova na kina rani dunduko, angianga kina ro sa na Arona ya.’ Rago aangbanga ti Yekova na gupai re te. Ko abihe wakina samungu kutiko!

Moize aya fu Kora na asongodi ko wẽ: ‘Oni ye gba ku barabangiri bamburoko dezirepai, na ki di gaoni aũzokingire ki hiisihe na fuõngua. Yekova nika yugo da ko nasia ni furani.’

Rogo gu uru nangbefuo ho, Kora na gako aboro nga 250 andu ka gbia Moize banye yo. I atona ka zokoda fuõngua yo wa ka i ya i nga aboromotumo. Yekova ki ya fu Moize na Arona wẽ: ‘Oni kpara tironi pati Kora na gako aboro.’

Wa si avura du nga Kora aima ndu fuo Moize ku banye yo, Datana, Abirama, na gayo aborokporo aaidanga ka ndu te. Yekova aya fu aYisaraere wẽ i guari kusayo pati gu bamburoko nga ga Kora, Datana, na Abirama. Nibasa, aYisaraere aguari kusayo. ADatana na Abirama gbiati gayo aborokporo ki ru barabangiri gayo abamburoko. Wakina ikpirogumba, kpotosende aza ngbaha nibasa ki mbiri yo! Pati banye yo, we aye ki zo Kora na gako aboro naadu 250.

Fuani, Yekova aya fu Moize: ‘Mo rogodi ngbondo be abazogo nga ga angbatunga dunduko ni basasa, na ki keke arimoyo ti ni. Ono ti gu ngbondo nga ga ngbatunga arevi, mo ke rimo Arona ti ni. Mo ki moihe ku bamburoko dezirepai yo, ga gu boro ngbondo mi nika siaha, mbumbudo nika kura ti ni.’

Fuo girarago, Moize akusi angbondo dunduko ka yugoho fu agu abangbembatayo re. Ga Arona ngbondo adu na mbumbudo na zamba zuzuhe ti ni. Rogo gi gene re Yekova ayuguhe nga ko sia Arona ko du ni gbiamotumo.