Oni Ra Fu Ga Mbori Pagbia Na Goroni Dũ

“Yekova nga gaani basaringbanga, Yekova nga gaani bafurugute, Yekova nga gaani bakindo.”—YESAYA 33:22.

1. Gini apai nasa agu aYisaraere nadu mbata i du kia ti kura rikaaboro?

ROGO gu garã nangia 1513 Mbata fu Gaani Regbo, gu rikaaboro nangia aYisaraere atona kaa raka ngbariyo. Ti gu regbo re, gu rikaaboro re adunga na bakerepa gbata, ringara, watadu gu bakindo i abi ni abi ni bangirise beyo te. Gu rikaaboro re angia agu aboro nadu mbata ni akanga. Wa si avura du wo, gu vovo rikaaboro re adu kia ti kura rikaaboro rogo kura kparakpara gene. Yekova Mbori nangia gu gayo Basaringbanga, ni gayo Bafundiko, na ni gayo Bakindo i abinga ko ni bangirise ya. (Gate 19:5, 6; Yesaya 33:22) Rikaaboro adunga ho ka fura tipa tiyo wa gure te!

2. Gini sanahe nakura tipa gu gene i ambakadi aYisaraere i naamangaapai kuti ni, na tipagine nyakipa gu karagapai du tipaha tini fu rani?

² Wa duhe nga, Yekova nga gu Mbori namanga apai ti genehe, na kingia gu Mbori nga ga zereda ko a, ani naberã gupai nga, gu rikaaboro ko azogo yo, aduni wene mbakadimbakadiyo kini mangi apai ti genehe. (1 AKorindo 14:33) Wo si adu nirengo tipa gu rikaaboro nangia aYisaraere. Ono wai si arengbe gu Mbori ka i abinga ko ya nirugu gu riigbu nga ga kpotosende i abihe abi? Si ni wenepai fu rani ani wisigi gu gene Yekova azogo gu kuru rikaaboro re ngbaha, kini kparia gu gene gbe gako mangaapai na aYisaraere anyakasa nyakapa ra boro kutii gu pagbia nga ga Mbori rogoho na goni dũ.

Gu Gene I Azogo agu AYisaraere Nadu Mbata Rogoho

3. Gini wene mbakadimbakadiapai Yekova amangihe tipa si rugu gako aboro?

³ Wa si avura du nga, Yekova nangia ga aYisaraere Bakindo ka i abinga ko ni bangirise ya, ko asia ruru akumba ni gu gako aboro i abiyo abi i mangisunge kubako. I asia akumba ki moi yo ni agu abaakumba nga abarii atunga, ni asambiri kurii ga ngbatunga abayo aborokporo, na aguyo ni abaakumba i mangisunge fu aboro ni abafurugute na ni abasapungbanga. (Gate 18:25, 26; Pa Fu Rugute ni Ue he 1:15) Wa si avura du were, ka ani berẽnga gupai nga, agi akumba re arengbe arengba ka sarangbanga na ruru bipai na rogo rugatinapai zanga undo be Mbori ya. I angianga rengberengbe aboro te, na i arengbanga ka ino gupai nadu ngbadu akurayo yo nangia airisimbori te. Wa si avura du wo, agu abasapungbanga nangia agunde ti Mbori arengbe arengba ka fu wene arugute fu akurayo aidipase nga gu narengbe ka undo yo mbiko mburu gu gayo arugute re adu rii ga Yekova aNdiko.—Pa Fu Rugute ni Ue he 19:15; Atambuahe 119:97-100.

4. Gini gbegbere nyemupai si aidi ga aYisaraere ruru abasapungbanga duna rubangirise ka mbu mangaha, na tipagine?

⁴ Ono tie, padu boro ni basapungbanga aida gupai nga ni ini kura apai tigu gbua nga ga ino Ndiko. Ni du agi abaakumba re nga kpakpa aboro, si aidi i duna rubangirise ka mbu manga gu gayo nyemu gbegbereapai du wa gbangbati, ngbe na kina kura aboro, na maa ngbaduse fuo ga aboro ahe, nga agu apai narengbe ka gbarasapa gayo sapangbanga niruruhe. Mose aya fuyo: “Ka oni kpára nga boro rogo pa sarangbanga ya; oni ka gia fugo umba boro wa sa na fugo kikindigi yo a; ka oni agúnde nga be bangiri boro ya, bambiko sarangbanga nga ga Mbori.” (Gu kekepai duni pigipigihe re, ani du pigihe.) Ii, agu abasapungbanga nangia aYisaraere, i anasarangbanga kuba Mbori. Nga gu iiriwo mamu sunge nangia gure!—Pa Fu Rugute ni Ue he 1:16, 17.

5. Ku pati sia aboro ni abasapungbanga, gini kura mbakadapai Yekova amangihe tipa ka ngera fuo gako aboro rogoho?

⁵ Yekova amangi kura mbakadaapai tipa i ngere rogoho fuo gu zingo nga ga toro nangia ga gako aboro. Zavura mbata fu i da rogo Ringara Mokido, ko azinahe fuyo i dua bambu rokoo, ni ba dunguratise tipa ndikidi irisombori. Ko asia aboro a i mangisunge ni aboromotumo kaa yugo Ndiko fu aboro, kini fu anyaa ni amotumo, na kini zo wene fuõngua wiso na nyemu. Mbori amoi Arona, nangia unvuru fu Mose ni ga aYisaraere bambata gbiamotumo na ki sia awiri Arona i undo bayo rogo gako asunge.—Gate 28:1; Pa Geda Aboro 3:10; 2 Pekapai 13:10, 11.

6, 7. (a) Ginipai nanakoda aboromotumo na agu aRevi naangianga aboromotumo ya? (b) Ginipai rengbe ani ka wirikaha be gu rengo nga, agu aYisaraere nangia angbatunga Revi anamanga ngbatunga asunge nibakiakia? (AKorosaio 3:23)

⁶ Pa ngera fuo gu zingo nga ga dungu mirioni aboro angia bakere sunge, na kurii gure, bange aboromotumo aduni umbaha nibipa ome sunge. Sidu, i ambakadipai tipa gu kura aboro rogo ngbatunga Revi i naaundo yo na gayo asunge. Yekova aya fu Mose wee: “Mo afú aRevi ku be Arona na ku be awiriko; i fu yo dunduko ku be ko dagba awiri aYisaraere.”—Pa Geda Aboro 3:9, 39.

⁷ Awiri Revi aduni wene mbakadimbakadiyo. I akparaka yo kurogo angbadimokporo biata, nga awiri Gerusona, awiri Koata, na awiri Merari, agu angbatunga nibasasa re aduku na asunge beyo ka mangaha. (Pa Geda Aboro 3:14-17, 23-37) Pa kura asunge avura wira kio ti akuraha, ono si dunduko si aida gupai nga i naamangaha amanga. Gu sunge nangia ga agu aRevi nangia awiri Koata asa yo i naamangasunge mbembedii na ziazia sanduki mokido gbiati aũ gu bambu rokoo nangia ga irisombori. Ono tie, aRevi dunduko, singia i angia awiri Koata, watadu i angianga awiri ko te, nanagbia ngbarago be wene amamu nga ga sunge. (Pa Geda Aboro 1:51, 53) Si ni pa gberarago nga, beteyo adunga na tambuahe tipa gayo asunge te. Kuba gupai nga i ra na gose kutii gu pagbia nangia ga Mbori, i adunga na ngbarago be agu amamu sunge nadu beyo te, sidu i ki sa tiyo ni aboro ruko, ki duna bakere nyemu pagbia, na kini kpi akurayo. Boro sa dagba angbatunga Revi rimoko angia Kora angia guni sa dagba agu aboro nadu na gi nyemu pagbia tiyo re.

“Oni Nagbata Pa Sunge Boromotumo A?”

8. (a) Da nangia Kora? (b) Gine navura sa Kora ko tona ka bi gu sunge nga ga boromotumo rogo kina gu bipai nabaha nga ga aboro?

⁸ Kora angianga barii gu ngbadimokporo nangia ga Revi te, na ko angianga sambiri kurii awiri Koata a te. (Pa Geda Aboro 3:30, 32) Wa si avura du wo, ko angia gu barii tunga aboro anabi ko na irisa dagba aYisaraere. Ga Kora sunge avura sa ko ko du mbembedii na Arona gbiati awiriko. (Pa Geda Aboro 4:18, 19) Ni bi kina boro ko nitiko gu zangarengba nangia ga agi akumba re, Kora avura sakapai berã ko yo ki ya: ‘Agi aboromotumo re nga kpakpa aboro nirengo, ono, wa vura duhe wo, i naida gupai bere nga mi naagiapai ngbayo! Ngbutuko kusayo, Arona amangi kpia wiri bagara rogo dahabu. Pa iriso gaani aboro gu wiri bagara re asa yo ni airisikpiahe. Awere, Arona, nga unvura Mose, namangasunge ni gbiamotumo! Nagbere gi ngba na kina kura aboro re! Na kurii gure, ginipai tigaha tipa awiri Arona nangia Nadaba na Abiu? Nirengo, i aduna kere zanga irisa tipa gayo mamu asunge si ki sa Yekova ko imi yo!’a (Gate 32:1-5; Pa Amotumo 10:1, 2) Ka si vura du nga kina gine Kora aasakaha berã ko yo, si ziazia nga, ko atona ka bi gu sunge nga ga boromotumo rogo gu bipai nga ga aboro. Gupai re andu na ko sa samungu kuti Mose na kuti Arona na niyangaraha, kuti Yekova.—1 Samuere 15:23; Yakoba 1:14, 15.

9, 10. Gini kitangbaangase Kora gbiati akurako abasamungu agumbaha tipa Mose, na tipagine si aidi i ima ruga tiyo tini wenengai na pa sangbana samungu?

⁹ Ni du Kora ni gu boro nadu na tandu maapai kurii kura aboro, si adunga fuko ni mbumbupai ko gbe agu aboro fuo ko nadu na gayo berã wa kina gako te. Ko, gbiati Datana na Abirama agbia aboro 250 nangbe na yo, i dunduko nangia abarii tunga dagba rimbasa aYisaraere. I akodi tiyo sa ki ndu fuo Mose na Arona ki ya: “Wa du he nga rimbasa aboro ni kparakpara yo ziazia dunduko, i ni ba sa sa dunduko, Yekova du dagba yo; tipagine tie oni atumba tironi ti ni ku ri gu gbuu nga ga Yekova?”—Pa Geda Aboro 16:1-3.

¹⁰ Gupai ka agi abasamungu re aima inoho nga, si aidanga i samungu kuti Mose mbiko gu pagbia nadu beko te. Ngbutuko kusayo, Arona gbiati Miriama amangi kina gu bangisapai re. Nirengo, gupai i asakihe berã yo yo adu wa kina ga Kora! Kuti sangba Pa Geda Aboro 12:1, 2 i asanahe ki ya: ‘Yekova naafura tigu na kina Mose sa? Anga ko naafura afura na ani a tee?’ Yekova adegatuko adega kuti gipai i aagumbaha re. Ko azinahe fu aMose, Arona na fu Miriama i dungura tiyo ku ngbadimo bamburokoo nga ga dunguratise tipa Ko yugu gu boro fuyo ko nasia ni ni ngbembatayo fu gako aboro. Fuo gure, rogo agu afugo nadu ziazia Yekova ayaa: “Ka nebi du ho dagba roni yo, mi Yekova ka yugu tire fu ni tigimi rogo yuguyugupai yo, mi afúra na ni rogo mosumo. Gi moyambu nga Mose ko wo te; ko du ni irarengo rogo gi kporo dunduko.” Ngbutuko fuo gipai re, Yekova amangi Mariama na ngbataka tipa guru regbo.—Pa Geda Aboro 12:4-7, 10.

11. Wai Mose amangipai kuti gupai nadu tipa Kora?

¹¹ Si aima du nga Kora gbiakuti agu aboro nangbe na ko aima ruga tiyo na pa gipai namangi re. Boro ho ka rengbe ka rugusapa gayo samungu ku bangiri aboro ya si aru aru te. Wa si avura du wo, Mose a’asadi tiko kindi nizerangbaduse ka sakapai na yo. Ko azungodi yo i duna tambuahe tipa agu amamu sunge nadu beyo kini ya fuyo: “Si bangironi ni wiri toni pai? wa Mbori nga ga aYisaraere ko nakpara roni ti gu rimbasa nga ga awiri aYisaraere, ka ye na oni mbembedi koyo du ko ni.” Oó, anga “wiri toni pai” nangiaha te! ARevi aima duna dungu asunge beyo ka mangaha. Gini kuraha berewe ka i aduna nyemuhe? Gu kura afugo Mose naye re nayugo gupai i aaberãha ngbaduyo yo, ko ayaa: “Oni nagbata pa sunge boromotumo a?”b (Pa Geda Aboro 12:3; 16:9, 10) Ono tie, wai Yekova amangipai tipa gi samungu kuti gako pagbia re?

Ga AYisaraere Basapungbanga Arimisi Tiko ka Sarangbanga

12. Gine ka ga aYisaraere wene pagume na Mbori aru riihe kumbatayo kindi?

¹² Ho Yekova afu gako Ndiko ni fu aYisaraere, ko agumba gupai fuyo nga, ka i duna giasangbaa, i adu adu ni “ziazia rikaaboro” na ki rengbe ka nye ni ziazia yo a wa ka i nye rogo gako mbakadaapai. (Gate 19:5, 6) Awere tie, fuo aYisaraere samungu na kini mangihe gbaiga, si angia regbo tipa gayo Basapungbanga na nangia gayo Bafurugute a rimisi tiko kurogo gipai re! Mose aya fu Kora wee: “Mo gúari na ga rika ki ru bara bangiri Yekova gba, oni na yo, na Arona a; oni ki rogodi gaoni aũzokingire ni ba sa sa, ki moi fuõngua ku rogo ho; oni dunduko ki ye na gaoni aũzokingire ku bara bangiri Yekova, aũzokingire ki du 250; mo a wo, na Arona, oni ni ba sa sa na gaoni aũzokingire.”—Pa Geda Aboro 16:16, 17.

13. (a) Tipagine si adu tini ni gusapai fu agu abasamungu naidi ka zo wene fuõngua fu Yekova? (b) Wai Yekova amangipai na agu abasamungu re?

¹³ Kuti ga Mbori Ndiko, si aidi kina aboromotumo sa nifu zozo fuõngua. Sidu, gu berã nga, agu aRevi angianga aboromotumo ya zo fuõngua fu Yekova ka sa yo i makiapa tiyo wenengai mbata fu manga yo ho. (Gate 30:7; Pa Geda Aboro 4:16) Anga wo tie si adu tipa Kora gbiati agu aboro nangbe na ko te! Rogo gu uru naye fuo gure, ko “[a]dungura gbuu [nga ga] rimbasa dunduko kuti yo [aMose na Arona] ku pangbadimo bamburoko dungurati yo.” Keke gu pangbanga re nayaa fu rani: “Yekova ki ya fu Mose na fu Arona, ‘Oni kpára tironi pati gi rimbasa re, mi ba tungayo tipa kina wiri guru rago.’ ” Ono aMose na Arona azungodi ko tipa ka ko iminga kungbo rimbasa aboro ya. Yekova aidi gipai re. Ono tipa Kora na gako rimbasa aboro, “we . . . [a]kuru yo du Yekova ni, ki riti gu 250 akumba naye na fuõngua.”—Pa Geda Aboro 16:19-22, 35.c

14. Tipagine Yekova asaringbanga tini nikerehe wa ngbatunga gure kuti rimbasa aYisaraere?

¹⁴ Gu nairiwo tirani nga, agu aYisaraere naima bi wai Yekova amangi agi abasamungu re awirikanga wiripai behe te. “Fuo girarago [fuo gipai re] awiri aYisaraere dunduko agumba rimo Mose na rimo Arona, ki ya, ‘Oni imi ga Yekova aboro.’ ” Ni gi gayo afugo re, aYisaraere aangbe na abasamungu! Ga Yekova zerangbaduse adigi niyangaraha. Boro adunga ho, zavura Mose na Arona, ka duni azaro tipa agi aboro re ti gi regbo re berewe te. Yekova aye na gberangbii kurii agi abasamungu re, “agu yo nakpiki be kaza gberãngbi adu wa aboro 14,700, . . . [zanga koda bange] agu yo nakpiki tipa gu pai nangia ga Kora.”—Pa Geda Aboro 16:41-49.

15. (a) Tipa gini nduapai si aidanga aYisaraere kapa tini tipa idapa Mose na pa Arona ni gayo abangbembatayo ya? (b) Ginipai gi pangbanga re nayuguhe fu roni tipa Yekova?

¹⁵ Si adunga nidingisoro fu agu aboro re dunduko i kpiki te. Wa ka i asakipai berã yo yo mbata, ka i akpikinga te. Ka i arengbe ka sana tiyo na ngbatunga asanahe wa: ‘Ada nangia agu aboro namoi gayo raka ngba kpio ka ndu ka ru barabangiri Faro? Ada nanyakasi pa kusa aYisaraere kusayo be sunge akanga i du ngbariyo? Kina gini boro sa i aidihe funi ni dakpa kurii Bagangara Orebe yo ka fura na ga Mbori maraika kina boro ku ngbako?’ Nirengo, gu iiriwo kekeapai du tipa aMose na Arona nga gopa gayo ziotise kuti manga rurupai fu Yekova na tipa gayo nyemuse tipa aboro. (Gate 10:28; 19:24; 24:12-15) Yekova adunga na ngbarago tiko ka imo agu abasamungu re te. Wa si avura du wo, ho si aduni ziazia nga, agu aboro re nikaa ndu kumbatayo kindi na gayo samungu, ko aguari ka manga nyanyakipai sani. (Yezekere 33:11) Agi apai dunduko re ni nyanyakipa pai fu rani areme. Tipagine?

Ino gu Gene Mbori Amangasunge Rogoho Areme

16. (a) Gini gopai ka sa agu aYudo nadu rogo bambata sa kama agarã i idi kuti gupai zanga kapa nga,Yesu aamangasunge kuba Yekova? (b) Tipagine Yekova amoi gu kura aboromotumo tini kuba aguyo nangia angbatunga Revi na gini aboromotumo nangia gi vovo yo re?

¹⁶ Vovo “rikaaboro” gu duho areme du Yekova ni gu gayo Basapungbanga, Bafurugute, na ni gu gayo Bakindo ka i abinga ko ya. (Matayo 21:43) Gu “rikaaboro” re aenge rogo bambata sa kama agarã ti Gaani Regbo. Ti gu regbo re, i aima dua bawene yekaru nga gu aRevi aamangasunge tiihe kindi Yerusarema yo kuba gu bamburokoo nangia ga irisombori nadu ti rago Mose. (Ruka 1:5, 8, 9) Ono tie, rogo gu garã nangia 29 ti Gaani Regbo, gu kura yekaru, nga ga toro, akuru ku yangura, nga gu Yesu Kristo amangasunge rogoho ni Gbiamotumo. (AEbere 9:9, 11) Gu sakapai nadu tipa gu pagbia nga ga Mbori akuru berewe. Da si adu nga Yekova mangisunge nani ni bangbembatayo fu gi vovo “rikaaboro” re? Yesu ayugu tiko ni gu boro nafu tiko fu Mbori na ngbadukoyo dunduko. Ko akpinyemu aboro. Ko amangi dungu iiriwo apai a. Wa si avura du wo, dungu aRevi adianga Yesu kugume te, wa kina agu atitayo nangia airakeretu. (Matayo 26:63-68; Amokedi 4:5, 6, 18; 5:17) Niyangaraha, Yekova amoi kura aboromotumo kia, nangia agu aboromotumo nga abakindo kuba aguyo nangia angbatunga Revi. Agu aboromotumo ni abakindo re namanga gayo sunge kindi daa kurogo agi a’uru re.

17. (a) Gini badona aboro i ayambaha nga agu aboromotumo nga abakindo areme? (b) Wai Yekova amangasunge na agu aboromotumo nga abakindo?

¹⁷ Ada du rogo gi riko nga ga agu aboromotumo nga abakindo re areme? Fugo gu mokedi nangia Petero nakaragapai sa gi sanahe re rogo gako bambata waraga nga gu ziazia toro adu kugii ko ko kehe. Petero akepai fu gu mbedimbedi aKristano nangia boro Kristo ki ya: ‘Oni nga siasia ngbatunga aboro, nga agu aboromotumo nga abakindo, nga ziazia rikaaboro, nga ga Mbori aboro, ya oni yugu gu wene sino gbaiga nga ga guko nayambu roni bitimo yo kurogo gako iiriwo imarago.’ (1 Petero 2:9) Be agi afugo re, si ziazia tie nga, ni riko, agu apefuo Yesu duni mbedimbediyo, i nga agu ‘aboromotumo nga abakindo,’ nga aguyo Petero ayambu yo a nga ‘ziazia rikaaboro.’ I nga agu aboro Yekova amangasunge na yo ka fu rugute rogo yo yo gbiati gu rugapai nga ga toro fu gako aboro.—Matayo 24:45-47.

18. Ginipai duho nakoda agu abaakumba i nasia yo i mangisunge rogo dungurati na agu aboromotumo nga abakindo?

¹⁸ Agu aboro namangasunge kuba agu aboromotumo nga abakindo nga agu abaakumba i nasia yo, nga aguyo namangasunge rogo agu aba nga ga ngera kurii apai rogo agu adungurati nga ga ga Yekova aboro rogo zegino dunduko. Agi akumba re ima rẽ tipa ani fu irisa fuyo na kini songodiyo na ngbaduraniyo dunduko, singia i nga gu mbedimbediyo watadu i nga yo te. Tipagine? Mbiko, rogo gako ziazia toro, Yekova nasia agi abaakumba re i mangi gako sunge. (AEbere 13:7, 17) Wai rengbe gupai re ka manga?

19. Rogo gini agene ziazia toro amaa abaakumba ti sunge?

¹⁹ Agi abaakumba re nanyasa agu apai si aidaha a wa duhe nikekehe rogo Fugo Mbori, nga sabe ga Mbori toro. (1 Timoteo 3:1-7; Tito 1:5-9) Sidu, i rengbe ka ya, pa sia yo tipa sunge naye be ziazia toro. (Amokedi 20:28) Si naida agi abaakumba re inidi tiyo wenengai na Fugo Mbori. Wa kina gu Bakerepa Basapungbanga namoi yo ti sunge, si naida abaakumba sogo pa ngbe na kina kura aboro rogo gayo sarangbanga.—Pa Fu Rugute ni Ue he 10:17, 18.

20. Ginipai du oni na tambuahe tipaha be agu abaakumba namangasunge nyanyakii?

²⁰ Kuba gupai nga, ani naabasapa gayo pagbia, si naida ani duna ndikidi tambuahe tipa agi abaakumba namangasunge nyanyakii re! Keke pande gu gayo ruru sunge i aima digo nimangihe tipa dungu agarã nasa gupai nga ani kido kuti yo. I nambakada tiyo wenengai tipa adunguratise na kini nungusihe, na ki mongo nitungusi “wene pangbanga” na ani, na kini fu agu arugute nga ga Ziazia Kekeapai fu rani ho ani aidaha ni. (Matayo 24:14; AEbere 10:23, 25; 1 Petero 5:2) I naaye ka bi rani ho ani awoka ni na kini fu wasa fu rani ho du ani ni na nunga. I nasongoda agu apai nga ga Kindo na ngbaduyo yo dunduko zanga gbangbati. Ga Yekova toro gu du kuriyo, ko ima ida na gayo pai.—AGaratio 5:22, 23.

21. Ginipai si aida abaakumba rugu tiyo na paha, na tipagine?

²¹ Rengo ngaha, anga abaakumba nga rengberengbe aboro te. Ni ino yo pa gayo angbanda, i a’asadanga tiyo ka duni agbia kurii rimbasa avusende te, nga ‘ga Mbori aboro.’ Kuba gure, i nabi tiyo ni ‘abamangisunge na awirinayo tipa gayo ngbarago.’ (1 Petero 5:3; 2 AKorindo 1:24) Agu abaakumba duna umbasitise, na namangasunge nyanyakii, nakpinyemu Yekova, na i ini gupai nga, wa i aye ka wirika ko gbe, i nika manga bakere wene apai a gbe rogo dungurati. Na agi apai re berã yo yo, i na’asada tiyo nyanyakii ka sonosa ngbatunga agu asino du wa nyemuse, nunga, na zerangbaduse.

22. Wai pa ngera ani berewe rii gu pangbanga du tipa Kora anyakasa gaani idapase kuti gu ga Yekova riigbu i abihe abi?

²² Nga gu ngbarago du ani nani mbiko Yekova nga gu gaani Bazogo i abinga ko ni bangirise ya, Yesu Kristo kingia gaani Gbiamotumo, gu mbedimbedi aboromotumo nga abakindo kingia gaani abayugupai, na agu abaakumba nga ruru aKristano kingia gaani abafurugute! Wa vura duhe nga, riigbu ho aboro aruga apai rogoho rengbe ka duni rengberengbehe te, ani na tambuahe ka mangasunge fu Mbori dagba ruru akuarani nga aidipase, nga aguyo narafu gu pagbia nga ga Mbori na ngbarago!

[Gu rukutu kekeapai du bandu kpewaraga yo]

Ginipai Wiriki Oni He?

• Gini wene mbakadapai nga ga nyemuse Yekova amangihe tipa ka ngera fuo aYisaraere rogoho?

• Tipagine si adu tini ni gasigasipai ka rugusapa ga Kora samungu kuti Mose na kuti Arona ya si aru aru?

• Ginipai rengbe ani ka wirikaha ti gupai Yekova amangihe na agu abasamungu re?

• Wai rengbe ani ka yugo gupai nga, ani na tambuahe areme tipa ga Yekova mbakadimbakadiapai?

[Gu kpiahe du ti kpewaraga 23]

Ani nabi agu asunge dunduko i afuhe fu rani rogo ga Yekova riigbu ni mamu?

[Gu kpiahe du ti kpewaraga 24]

“Tipagine tie oni atumba tironi ti ni ku ri gu gbuu nga ga Yekova?”

[Gu kpiahe du ti kpewaraga 26]

Agu abaakumba moi yo yo ti sunge namangasunge kuba agu aboromotumo nga abakindo