Abarayama Angia Boro Idapase

Abarayama ru zagiyo nziinzii rago. Wa ko angera ku ngbangbaturũ yo kaa bi wai akerekuru nange, ko naberã kina pa wai Mbori akido ko nga atitako nika nge wakina agu akerekuru re. (Bambata Pai 15:5) Agu akerekuru re nga gu he Abarayama abihe abi na ami natingida ko naapa ga Yekova mokido. Ami a nasako ko du naa kido. Wa duhe nga Mbori aduadu na rengba beko ka kusa zegino na agu ahe du rogoho dunduko, ya mo ko arengbanga ka sa Abarayama na Sara i vungu gude te? Gupai re du nasa gupai nga Abarayama du na idapase.

GINE NGA IDAPASE? A wa duhe rogo Ziazia Kekeapai, “idapase” nga du na ida kuti gu he boro abingo ho ya ono du ndikidi gopai kinaho nayugo gupai nga si kina ti ni. Gu boro du na idapase kuti Mbori, ní nagbe berãni kuti gako amokido, na kidu na gu kido nga si nika manga amanga.

WAI GU ABARAYAMA AYUGU IDAPASE? Abarayama ayugu gupai nga ko aima ida kuti ga Mbori amokido. Mbiko idapase, Abarayama aguari rogo gu ringara i avunguko rogoho, kidu naa kido nga Yekova nika digiso Gako mokido adigiso ki fu kura ringara fuko. Mbiko idapase, Abarayama ata rogo ringara Kanana, kidu naa kido nga atitako nika dia gu ringara re adia kumbatayo. Na mbiko idapase, Abarayama aʹasadi ka fu Yisaka nimotumo, kidu na gu kido nga Yekova rengbe arengba ka zingisako bekpio ka si aida i zingisi ko.—AEbere 11:8, 9, 17-19.

Abarayama aaberã kina kurii pa agu apai naadu kumbatayo angianga agu apai naadu kusayo ya. Wa si avura du nga aAbarayama na Sara araki wene raka Ura yo susi gu i arakihe Kanana yo, i aaberãnga “pa gu ringara i akuru rogo ho” te. (AEbere 11:15) Kuba gure, i aaberã pa wai Yekova aandu ka fu maku fuyo na atitayo kumbatayo.—AEbere 11:16.

Ya mo wene ndupai aduho tipa Abarayama du na nyanyaki idapase? Zanga kapa, wene ndupai adu kinaho. Yekova adigisi gako amokido nibasasa dunduko. Atita Abarayama azugo kusa ki da nigu rikaaboro nangia aYisaraere. Fuo bete regbo kusa, aYisaraere aye ka raka Kanana yo, nga kina boro gu ringara Yekova akido paha fu Abarayama.—Yosua 11:23.

GINI APAI ANI AWIRIKAHA BE GA ABARAYAMA KPIAPAI? Si nasa rani ani du naa kido nga Yekova nika digiso gako amokido adigiso. Ka si vura du vurũ nga ani nabi agu akuraha na gu bangirise nga ga kpakpa aboro nga ka si mangingo te, si naida ani du na gu kido nga “ka Mbori mangi apai amanga dunduko.”—Matayo 19:26.

Gu kurapai ani awirikaha ti ga Abarayama kpiapai nga si aidanga ani naaberã kina kurii agu apai namangi kusayo te, ono si naida ani naaberã kurii agu apai nika ye na ngbarago furani kumbatayo. Gure nga gupai kumba sa du rimoko nga Jason awiriki mangaha. Ko nawoka be kaza nga gu yosorasi kpotoko naabaha. Sangbako nga: “Kura aregbo kinaho mi naaberã kuriipa agu apai namangi kusayo.” Sangbako berewe nga: “Gu rukutu wiri apai mi anaamangaha du mi azingo ti mangaha, ngbatunga gu nga kaa dungo diare nga Amanda.”

Wa vura duhe wo, Jason na gu kido nga Yekova nika digiso gako amokido adigiso, kodihe na gu mokido nga kpotosende nika da barambeda niparadizo, ruru aboro ki raki rogoho na wene kpotoyo.a (Atambuahe 37:10, 11, 29; Yesaya 35:5, 6; Yugoti 21:3, 4) Jason agumba gupai nga: “Mi naatingida tire na gupai nga wene aregbo kina kumbatayo, barambeda, ambugo, abakabangirise, gbiati gberarago nika nyasa anyasa.” Nairiwo gu nyanyaki idapase duwa kina ga Abarayama re!

[Footnote]