Abarayama Angia Boro Wingbaduse

Abarayama nangana gako aborokporo gbiati gako amoyambu wa i ambakadatiyo tipa ka ndu ku Kanana yo. (Bambata Pai 12:1-5) Fuo ngana Abarayama gu zegino aboro nangera kina kubeko tipa gayo raka re, ko ini gupai nga, ga agu aboro raka re dunduko kina kubeko. Wai ko nika ngerafuo agu azingo du yó nani rogo gu ringara ko ainongo pai tipaha re ya? Ya mo pa ngera ko fuoyo Ura yo nga gu kumukokumuko rago du na bakere nvuo tipa riga anya, mbudusende, na aime kpaima du taata ti gu ba ko andu kurogoho re? Ginipai ka mangi ka ko ti nikaza watadu ka ko kpi rogo gu ringara re? Da ka ngerefuo gako aborokporo? Ka si vura du nga Abarayama aima du na ngbatunga bakabangirise wa gure, ko aambunga ha si gundesiko te. Ko aima diaberã nga ka apai vura manga amanga wai vurũ, ko duwa ka ko mangi gupai Mbori aidaha. Agu apai re nayugopa ndikidi wingbaduse.

GINE NGA WINGBADUSE? Si nga du ngangara, zanga gunde. Pa du ani na wingbaduse ayugongo gupai nga ani agundenga berewe te te. Kuba gure, gu boro Mbori nafu wingbaduse funi, ní namangapai zanga gunde.

WAI GU ABARAYAMA AYUGU WINGBADUSE? Abarayama aagundenga ti manga gupai Mbori aya fuko ko mangihe te. Abarayama asono rogo gu dagbarago aboro anaairiso dungu ambori gbiati akpiahe rogoho. Wa si avura du wo, ko aambunga gu bipai nga ga aboro si ká naako ti manga rurupai te. Kuba gure, Abarayama asia ka iriso ndikidi Mbori sa rogo gako raka yo nga gu “Mbori nga Bahe ki susi” nga Yekova.—Bambata Pai 14:21, 22.

Abarayama amoi iriso ndikidi Mbori mbata fu nyemu aũzegino. Ko aima ida ka mbupa gu wene raka ko aarakaha Ura yo tipa ka ndu ku ngbakungba yo na kidu naa kido nga Yekova nika ngera angerafuo agu azingo ko adu nani. Kina rengo du ngaha nga, wa agarã aasusa, Abarayama aima rengba ka berãpa gu beedi ahe naadu beko Ura yo. Ono Abarayama adu naa kido kindi nga Yekova nika ngera angerafuo ko na gako aborokporo. Pa ka Abarayama kuti Yekova nyanyaki rogo gako raka yo asako ko du na wingbaduse ka degatuko sa ga Mbori arugute.

GINI APAI ANI AWIRIKAHA BE GA ABARAYAMA KPIAPAI? Ani rengbe ka wirika Abarayama nidu ani na wingbaduse ka giasangba Yekova ka si vurangia agu aboro ani araka dagbayo amanganga ha te vurũ. Nikpiapai, Ziazia Kekeapai nagumba gupai nga agu aboro naru nyanyaki rogo gayo idapase yo kuti Yekova Mbori, wene abakureayo watadu agumeyo arungosi yó arungosi. (Yoane 15:20) Ono tie, kangia ani ima ida kuti gupai ani nawirikihe tipa Yekova, ani ruaru nyanyaki rogo gaani idapase yo.—1 Petero 3:15.

Ani rengbe kadu naa kido kuti ga Mbori kidohe nga ko nika ngera angerafuo agu aboro namaa gayo idapase kutiko. Ngbatunga gu kido re nasa rani ani peresipa agu apai nga ga toro mbatayo kuba peresa ani kina pa agu apai nga ga borose mbatayo. (Matayo 6:33) Oni bingo wai gu kura aborokporo sa amangi gipai re.

Wa si avura du nga aDoug na Becky adu na rukutu agude beyo ue nga akumbagude, i adu na nyemu ka ndu ka mangasunge tungusapai rogo gu gbata naadu na zingo abatungusi wene pangbanga rogoho. Fuo mangayo wene wetekapai na kparakpee, i adiberã tipa ka manga gupai i aaida ka mangaha. Doug ayaa: “Wingbaduse nasa gupai nga ani di agude ka ndu kurogo gu gbata re zanga ino ani wai nzunzu apai nika du na ani yo. Ho ani atona kaa berãpa guari ni, ani asakipai tipa ga Abarayama kpiapai na Sara. Pa berã ani kurii wai i adu naa kido kuti Yekova, na wai Yekova angerefuo yó nga apai nzunzu naundo rani.”

Nibi gu raka i arakaha rogo gu ringara aboro agumba gu fugo rogoho du kia ti gayo, Doug ayaa: “Mbori ima fu maku furani nibakere.” Ko aya berewe wee: “Mbiko wadu gaani raka nitaataha ane, ani na rengba berani kaa dia regbo dedede sa wa du ani ni aborokporo kaa tungusapai, kaa fura dagba tirani, na kaa ngimbaro sa na awirani. Mbiko raka ani taata, ani awere na ranirii berani tipa kaa manga weneapai fu gaani aborokporo na kini irisombori.”

Kina rengo ngaha nga, anga aboro dunduko rengbe ka manga ngbatunga gu bakere ariapai re te. Ono tie, ani dunduko rengbe arengba ka wirika gu kpiapai nga ga Abarayama tipa ka maa irisombori nibambatapai rogo gaani raka yo, na kidu naa kido nga ko nika undo rani aundo. Ho ani amangaha ni wa gure, ani naairisa gu rugute Ziazia Kekeapai afuhe niya, ‘ani erẽ aerã wenengaĩ ki ya, “Gbia nga gimi mounda; mi agúnde nga wa sa te.”’—AEbere 13:5, 6.

[Box/​Gu sura du ti kpewaraga 7]

Gu Dee Nanaamanga Gupai Mbori Akpinyemuhe na Kidu Niwene Diakumba

Sara adi gu kumba naadu na nyanyaki idapase tiko. Ono ri amoi wene kpiapai a nga gu rengbe ani arengba ka wirikaha. Nirengo, Ziazia Kekeapai fura tipa ri bara biata kina boro ti rimori nigu boro si aida agu adee namanga gupai Mbori akpinyemuhe wiriki gari kpiapai. (Yesaya 51:1, 2; AEbere 11:11; 1 Petero 3:3-6) Wa vura duhe nga Ziazia Kekeapai fura gbua tooni tipa ri, ani ima rengba ka bi gupai nga ri adu na wene asino tiri.

Nikpiapai, oni berẽnga pa wai ri amangipai ho Abarayama agumba gupai ni furi Mbori aruguko nani nga i guari Ura yo. Ya mo ri abaki bangiri tipa gu ba i aandu kurogoho na ndu gupai i aandu ti ni? Ya mo ri abaki bangiri tipa agu ahe ka zingoho amangi yó yo? Ya mo rago agbere tiri mbiko wa ri aandu ka kpara na anakureari gbiati agumeri zanga ino gu regbo ri ka biyo ti ni berewe? Zanga kapa, ri aima berãkurii ngbatunga apai wa gure. Wa si avura du wo, ri aguari, kidu naa kido nga Yekova nika fu maku afu furi mbiko gari giasangba.—Amokedi 7:2, 3.

Kodihe kuti gupai nga Sara adu nigu ga Mbori moyambu naadu na giasangba, ri angia beedi diakumba. Kuba gupai nga kaa sovura na kumbaari watadu kaa diangbiti agu apai nga ga kporo, ri anaayugo irisa kina boro ngbaduri yo fu Abarayama, na kini songodiko rogo agu adiaberã yo dunduko ko anaamangaha tipa kaa nungusa kporo. Mbiko manga ri he wo, ri afongo tiri kidu niwene ri mbiko gu wene asino naadu tiri.—1 Petero 3:1-6.

Ya mo ngbatunga agu asino re rengbe ka undo dereakumba areme? Dee sa du rimori nga Jill naima dia agarã awere 30 kurogo rogatise na ki gbia ngbarago rogoho agumba gupai nga: “Ga Sara kpiapai yugu gupai fere nga si naida mi nifura afura zukazuka fu kumbaami na kini gumba agu apai fuko mi aberãha.” Ri agumba gupai berewe nga: “Wa duhe nga kumbaami du du nga bariikporo, ko du si aida ko naamanga diaberã. Na ho ko amanga diaberã ni, gi sunge du nga ka manga gupai rengbe mi ka mangaha tipa ka songoda gu diaberã re tipa si du na diabese.”

Isoke, gu nyanyakipa pai ani awirikaha be Sara nga gere: Wa si avura du nga Sara aima ngba kisusi, ri ambunga gari ngbanya si sari ni irarukö te. (Bambata Pai 12:10-13) Kuba gure, ri adu nibayee ri na kini songodi Abarayama ti wene aregbo na gbegberẽ aregbo rogo gayo raka yo dunduko. Zanga kapa, aAbarayama na Sara angia agu arogotise naadu niruruyo, nibayee yó, na ni agu aboro naundo tiyo dagbatiyo.