Oni Banda gu Wene Sino Nga ga Dungurati

“Gu undahe nga ga Gbia Yesu Kristo si du na tororoni.”—FRP. 4:23.

WAI RENGBE ANI KA YUGO WENE ASINO ROGO DUNGURATI . . .

ho ani amangapai ni na awirina?

nidu ani zaaza tingba sunge tungusapai?

nikusa ani pa gu ingapai fu abaakumba wirina namangihe?

1. Tipagine Pauro gbiati Yesu afura ti ni wenengai tipa agu adungurati naadu Firipoi yo na Tuatira yo.

AGU aKristano naadu rogo bambata sa kama agarã Firipoi yo angia airarungo. Ono tie, i adu na gu sino nga ga gamahe na ki yugu dudunguro nyemuse fu akurayo aidipase. (Frp. 1:3-5, 9; 4:15, 16) Gu mokedi nangia Pauro adigisi gu waraga ko akehe fuyo ki yaa: “Gu undahe nga ga Gbia Yesu Kristo si du na tororoni.” (Frp. 4:23) Agu aKristano naadu Tuatira yo ayugu kina ngbatunga gu sino re a, si du Yesu aya ti ni fuyo wee: ‘Mi ini gaoni mangaapai, na gaoni nyemuse, na idapase, na mangapase, na hipai, ya gu gaoni mangaapai du ni kusa ha si susi gu naadu mbata.’—Yugo. 2:19.

2. Wai rengbe gaani mangaapai kadu na maapai kurii gu sino mangapai du rogo dungurati?

² Agu adungurati nga ga aDezire Yekova areme na asinoho ti ni. Agu nayugo wene asino gbiati nyemuse. Agu akuraha kidu na kakaka nyemu sunge tungusapa Kindo na kini bi mangasunge tungusapai ti aregbo dunduko na nyanyakipaha. Ho ani asonosa wene asinoni wa du ani dunduko nibasasa, si naye na kodatise rogo dungurati na ki sa gupai nga aboro sono kumbatayo rogo toro yo. (1 Kor. 1:10) Ono ka ani duna gbegberẽ asino, si ima rengba kadu na gbegberẽ sangbanaha kurii agu aboro du rogo dungurati mbiko si rengbe ka zeresa yó ti ga Mbori sunge na ki fu bee sa gbegberẽ mangaapai. (1 Kor. 5:1; Yugo. 3:15, 16) Gini sino mangapai du rogo gaoni dungurati? Ginipai rengbe oni ka mangaha nibasasa dunduko tipa ka sonosa wene asino watadu wene toro rogo dungurati?

ONI SONOSI WENE ASINO ROGO DUNGURATI

3, 4. Wai rengbe ani ka ‘tambua Yekova dagba bakere rimbasa aboro?’

³ Bake papara atambuahe abibia ki yaa: “Mi afú atambuahe foro dagba bakere rimbasa agu aboro; mi atámbua ro dagba dungu aboro a.” (Tam. 35:18) Bake papara Atambuahe aambunga tambua Yekova ho ko aniduni dagba ga Mbori amoyambu te. Agu adunguratise ani amangaha rogo aposo dunduko wa ngbatunga gu nga Wisigo Ngbaõbambu Sinziri, si nafu wene amomu furani tipa ani yugu gaani kakaka nyemupai na gaani idapase nikaraga ani apai ti regboho. Si naida ani sana tirani wa du ani dunduko nibasasa nga: ‘Ya mo mi naakaragapai ba adunguratise yo? Ya mo mi naambakadaha wenengai tipa kafu wene akaragapai? Wa ngia mi bariikporo, ya mo mi naaundo awire mbata fu dunguratise nimbakada ani tirani tipa dunguratise naayo wa sa wa ka i fu karagapai zanga gedaha agedaha?’

⁴ Bake papara atambuahe aringbisipa ru kpotorani yo nyanyaki kuti bibia. Ko ayaa: “Ako Mbori, kpotore yo ru nyanyaki, kpotore yo ru nyanyaki! Mi abí bia, ii mi abí bia atambuahe!” (Tam. 57:7) Agu abia ani abihe ba adunguratise yo nafu wene momu furani ani ‘bibia tambuahe fu’ Yekova na ruru kpotorani yo. Ka si du nga ani ainongo bete agu abia re te, si angba gbe ka ani wirikihe ti regbo Gu Irisombori Nga ga Aborokporo. Ani ‘bibia fu Yekova a wa du ani ni ungarani; ani bibia tambuahe fuko wa du kpotorani ti ni.’—Tam. 104:33.

5, 6. Wai rengbe ani ka dia awirina kugume na kidu na gu sino nga ga gamahe, na ginipai rengbehe ka undo awirina rogo dungurati i mangihe?

⁵ Dia awirina kugume nga gu kura gene rengbe ani ka sonosa nyemuse ngbaha rogo dungurati. Rogo ga Pauro yangara kapita nga ga gu waraga ko akehe fu aEbere, ko azungodi yó ki yaa: “Nyemu awirina nye dagba roni. Ka bangironi gó nga tipa yugo nyemuse fu agu aboro naye koyo du oni ni ya.” (Eb. 13:1, 2) Yamba agu ababiapai ninaata ata na adiayo watadu agu amoyambu namangasunge Kindo ti aregbo dũ rogo dungurati ku kpurani tipa riahe nga gu wene gene rengbe ani ka dia aboro ngbaha kugume. Ti kura aregbo, ani rengbe ka yamba adekurugbo, agu avunguagude adunga na gayo abadiarogatise ti ni ya, watadu kura aboro tipa riahe watadu tipa gu gaani irisombori nga ga aborokporo.

⁶ Pauro aya fu Timoteo wee, ko ngarasi aboro i “mángi gu pai ngba angba, i kúmuko na wene mangaapai, i só gima fu he, rago ki ngba angba ti yo sa fuka ha. I naiga wene nyanyaki he fu kina yo sa gu rago nikaye yo, i nye anye na gu unga nga ndikidi unga.” (1 Tim. 6:17-19) Pauro angarasi akurako airisimbori i sonosi gu sino nga ga gamahe. Zavura ti regbo kere zingo, ani ima rengba ka gamahe. Nikpiapai, ka ani duna tarambiri berani, ani ima rengba ka tinda agu aboro adunga gene beyo ya tipa sunge tungusapai watadu tipa adunguratise. Wai gu rengbe agu awirina i aundo yó ka yugo gayo tambuahe na ki fubee sa wene sino rogo dungurati? I rengbe ka yugo gayo tambuahe nifuyo gu wiri marã kadu beyo tipa ngbe giazi na agu ahe ka gberẽ ti tarambiri. Kurigure, pa manga ani mbakadapai kaa dia regbo na awirinarani rengbe ka sayo i bi gupai nga i na nyanyakipayo na ani nakpinyemuyo akpi. Ho ani amanga weneapai ni ‘fu agu aboro duna ani rogo idapase yo’ na kini mangisunge ti aregbo du na gaani regbo gbiati agu ahe du berani tipa ka undoyo, gaani nyemuse tipa yó nasona na si ki undo aboro rogo dungurati i duna wene sino.—Gara. 6:10.

7. Wai pa banda ani ga akuarani gbugbuapai aundo dungurati si du na wene sino?

⁷ Ani makianga kura apai berewe rengbe ka nyakasa nyemuse dagba awirina, si nga: pa bakure na oka gu gbugbuapai nga ga abakure. (Oni gedi Asanza 18:24.) Ndikidi abakure akusanga ga abakureayo gbugbuapai te. Ho awirinarani apeka gayo aberãpai ni furani watadu agu apai du tipa yó kidu na gu kido nga ani agumbaha kumbatayo te, gu nyemuse du dagbarani ima rengba ka sona kina kumbatayo. Ani dunga adu ni agu abakure rengbe ka banda ga akuarani gbugbuapai na ki undo dungurati si du nikodikodihe wa aborokporo sa.—Snz. 20:19.

ANI DU ZAAZA TIPA SUNGE TUNGUSAPAI

8. Gini arugute Yesu afuhe fu agu aKristano naadu Raodikiya yo, na tipagine?

⁸ Ho Yesu afura ni fu gu dungurati naadu Raodikiya yo, ko ayaa: ‘Mi ini gaoni mangaapai, a nga oni ni zezere he na ni fafoi he a te. Mi nakpi nyemu oni du ni zezere he watadu ni fafoi he a. Were bambiko oni ni uruuru he, ka oni adu nga ni fafoi he na ni zezere he a ya, mi asúka roni ngbare yo.’ (Yugo. 3:15, 16) Agu awirina naadu Raodikiya yo aadunga zaaza tipa sunge tungusapai te. Gu sino re aima du na maapai kurii gayo bakure dagbatiyo. Sidu, Yesu aruguyo rogo nyemuse yo ki yaa: ‘Agu yo dunduko mi nakpi nyemu yo mi naza yo ti pai ki nirugu yo; si oni ka du ngangarã ti ni, ki sa gaoni berã.’—Yugo. 3:19.

9. Wai gaani bipai tipa sunge tungusapai narengbe kadu na maapai kurii dungurati?

⁹ Ka ani aida ka sonosa wene asino rogo dungurati, si naida ani du zaaza tipa sunge tungusapai. Ga dungurati sunge nga ka gbata agu aboro duwa akandoro gene tungusapai yo na ki undoyo i sono rogo toro yo. Sidu, si naida ani mangisunge sa aboro ni abawiriki zaaza kina wai Yesu amangihe. (Mt. 28:19, 20; Rk. 4:43) A wa gaani kakaka nyemu sunge tungusapai nikaa kio, kinawo a si nikaa kpamia rani wa ngia ani “ga Mbori abadiasunge.” (1 Kor. 3:9) Ho ani amangasunge tungusapai ni na akuarani na kini bi wai i afura watadu i anyakasapai kubara gayo idapase yo na kidu na tambuahe tipa agu apai nga ga toro, si nasarani ani kpinyemuyo na kini irisiyo. Na berewe a, mangasunge tungusapai “kina ku bani sa” naye na wene asino kurogo dungurati.—Oni gedi Zefania 3:9.

10. Gini sangbanapai rengbe gaani asadatise kada niwene abatungusipai kadu nani kurii agu aboro du rogo dungurati?

¹⁰ Gaani asadatise kadu niwene abatungusipai ima rengba a kadu na wene sangbanaha kurii kura aboro. A wa ani kaa yugo kakaka nyemupai tipa agu aboro ani agbiayo batungusapai yo na kini mangi ome tipa ka undoyo, nyemu sunge tungusapai nikaa kio kina kumbatayo. (Mt. 9:36, 37) Ka ani du zaaza, si nika sa gupai nga agu aboro du na ani du a zaaza. Yesu akedi gako abawiriki tipa sunge tungusapai niba ue ue angianga nibasasa ya. (Rk. 10:1) Anga gipai re adu gbua tipa ka ngarasayo na ki raba yó te, ono si asayo a i du zaaza tipa sunge tungusapai. Ya mo anga pa ngbarago ngaha furani ka mangasunge na zaaza abatungusipai te? Padu yó zaaza nangarasa rani na kini undo rani ani naandu kindi kumbatayo na sunge tungusapai.—Rom. 1:12.

ONI BANDATIRONI TI KPAKANAHE NA GBEGBERẼ MANGAPAI

11. Gini ngbatunga sino kura aYisaraere adu nani ti rago Moize, na si asayo i mangi ginipai?

¹¹ Fuo bete aposo gbua fuo Yekova sa aYisaraere nivovo rikaaboro, i atona kaa kpakanahe. Gipai re asayo i samungu kuti Yekova na agu aboro naaru kubako. (Gate 16:1, 2) Kina bete aYisaraere gbua nga aguyo nakuru Ezipeta yo narimi Ringara Mokido. Zavura Moize a, Mbori aidanga ha fuko ko rimi gu ringara re te, mbiko gu gene ko amangipai ngbaha kuti ga aYisaraere gbegberẽ mangapai! (Pa Rug. 32:48-52) Ginipai rengbe ani ka mangaha areme tipa ka ne gbegberẽ mangapai?

12. Ginipai rengbe ka undo rani ka ani dunga na gu sino nga ga kpakanahe ya?

¹² Si naida ani bandatirani ti gu sino nga ga kpakanahe. Sidu, yugo umbasitise na irisa fu agu aboro duna pagbia beyo nika undo rani ani ne gu sino nga ga kpakanahe. Gu kurapai rengbe ka undo rani berewe nga sia agu aboro ani akodatirani naayo na rubangirise. Ka ani sia gbegberẽ aũngbarago watadu ka ani adia bakere regbo basunge yo watadu sukuru yo na agu aboro angianga airisi Yekova ya, si rengbe ka ye na gbegberẽ sangbanapai. Si nipatatamana ani du na ngbanda ti kodatise na agu aboro nakpakanahe watadu naʹasada kadu na gu sino nga ga ranirii.—Snz. 13:20.

13. Gini kura gbegberẽ apai rengba gu sino nga ga kpakanahe ka ya nani kurogo dungurati?

¹³ Ho du aboro ni rogo dungurati na gu sino nga ga kpakanahe, si rengbe ka ye na agu apai rengbe ka gbarasa aboro rogo toro yo. Nikpiapai, kpakanahe rengbe ka gbarasapa zereda gbiati kodatise rogo dungurati. Kurigure, kpakanahe ti rimo kuarani idipase rengbe ka imisa ní na ki sa gupai nga ani rimisi tirani kurogo gu ingapai nga ga kere gumba rimo na sengahe. (Pa Mot. 19:16; 1 Kor. 5:11) Gu kura akpakanahe rogo gu dungurati naadu rogo bambata sa kama agarã ‘anaaka fu atandu kini gberẽ ngbayo yo fu ataarimo.’ (Yuda 8, 16) Ngbatunga gu kpakanahe kuti agu aboro naangera kurii apai rogo dungurati re angbanga tiko te.

14, 15. (a) Ginipai rengbe ka manga tipa dungurati ka si du nga i akusanga pa gu kere ingapai boro amangaha te? (b) Ginipai si aida ani mangihe ka si du nga ani ini pa boro rogo dungurati namanga ingapai nigbuko?

¹⁴ Ginipai ka mangi ka oni ini gupai nga boro namanga ingapai nigbuko, ngbatunga gu duwa bakere mbirabuda, bi agu ahe yugokpia kundiri aboro, raka wasiwasi raka? (Ef. 5:11, 12) Ka ani aakusanga gu kere ingapai re ya, Yekova ima rengba ka dia gako ziazia toro kusayo rogo dungurati. Gipai re ima rengba ka gberesapa gu zereda du rogo dungurati. (Gara. 5:19-23) Pauro aya fu agu aKristano naadu Korinda yo wee, “oni kusi kuru agbooro ku sa yo.” Kina gu bangisapai re du tipa rani areme a, ani duwa ka ani nyasi riipa gbegberẽpai kusayo rogo dungurati tipa ka bandaha nigigirihe. Ginipai rengbe oni ka mangaha tipa ka fubee sa pazereda rogo dungurati?

¹⁵ A wa ani nifura tipaha mbata, si ninyanyakipa pai ka banda gu gbugbuapai nga ga akuarani, gbe ho i agumba gayo bipai watadu berãpai ni furani. Nairiwo wai ka si du nigbegberẽpai na nipa imisiri ka ani gumba gu gbugbuapai nga ga akuarani fu kura aboro! Wa vura duhe nga si naida ani banda gu gbugbuapai nga ga akuarani, ho boro amanga kere ingapai ni, si naida ani pehe ape fu abaakumba. I du na gu tindiro beyo nga ga mbakada gupai re ringbisihe kuti agu arugute nga ga Ziazia Kekeapai. (Oni gedi Pa Amotumo 5:1.) Ka ani ini gupai nga wirina mangi ingapai, si naida ani ngarasi ní ní ndu ka kusaha fu abaakumba tipa i undo ní. (Yak. 5:13-15) Ka si du nga si naima aima ka ní akusanga ha ya, si naida kina rani ndu ka kusaha.

16. Wai pa gumba ani pa gu kere ingapai wirina namangihe fu abaakumba abanda dungurati nigigirihe?

¹⁶ Gu dungurati nga ga aKristano nga ba zereda nga ga toro furani, na ani duwa ka ani undo tipa ka banda gu zereda re nikusa ani gu gbegberẽpai fu abaakumba boro namangihe. Ka si du nga abaakumba undo gu boro mangi ingapai re ní ki idipa gani ingapai na ki saberã, ní gberesinga pa gu sino watadu zereda du rogo dungurati te. Ono na ka gu boro mangi ingapai re asanga gani berã na ki di gu undo nga ga abaakumba kugume ya? I nakusa gu boro re kusayo rogo dungurati. Ngba gi gene re, i nadia surungba gu gbegberẽpai re kusayo, na abaakumba ki banda dungurati nigigirihe. (Oni gedi 1 AKorindo 5:5.) Sidu, ka si du nga ani inipa kere ingapai wirina namangihe, ani dunduko duhe ni gaani tindiro ka gumbaha fu abaakumba.

ONI KA “KUTI GU DU SA NGA GA TORO ZIKAZIKA”

17, 18. Ginipai nika undo rani ani ‘ka kuti gu du sa nga ga toro zikazika.’

¹⁷ Agu apefuo Yesu nadumbata aundo dungurati si du na kodatise ‘ninye yó rogo ga amokedi yugopai yo.’ (Amo. 2:42) I abi gu rugute abaakumba afuhe nga gu mburuhe adu rii Ziazia Kekeapai na nyanyakipaha. Abaakumba areme a namangapai kina kubanisa na gu riko nga ga ruru kangara moyambu, si kini sa gupai nga agu aboro du rogo dungurati gbia ngarasaro na undo tipa ka du na kodatise. (1 Kor. 1:10) Ho ani airisa agu arugute ni Yekova afuhe vurube gako riigbu na kini pekefuo gu rugapai nga ga abaakumba, ani nayugo gupai nga ani ‘nake na ka kuti gu du sa nga ga toro zikazika, ni gu ũkpamiatise nga zereda.’—Ef. 4:3.

¹⁸ Ani mangingo bakere asadatise amanga tipa ka undo dungurati si du wenengai na nibandabandaha. Ka ani mangihe wo, ani duadu na gu kido nga ‘gu undahe nga ga Gbia Yesu Kristo, si duadu na tororani.’—Frp. 4:23.

[Gu sura du ti kpewaraga 24]

Ya mo mo naafubee sa wene mangapai rogo dungurati nimbakada mo wene akaragapai?

[Gu sura du ti kpewaraga 25]

Ani fubee sa wene asino niwirika ani agu abia ani abihe Bambu Kindo yo