“Da Ka Mi Gunde Be Ni?”

“Ka vura vura guari kuti re vurũ, mi adú zukazuka.”—TAM. 27:3.

RINGBISIHE KUTI AGI AVERESI DU KUSENDE RE, GINIPAI RENGBE KA UNDO RONI ONI DUNA WINGBADUSE?

Atambuahe 27:1

Atambuahe 27:4

Atambuahe 27:11

1. Ginipai Atambuahe 27 nika undo rani ani girogoyo?

TIPAGINE gaani sunge tungusapai akio ti ni kina kumbatayo si ki vura du vurũ nga apai nagberã rogo zegino kina kumbatayo? Tipagine ani afu gaani regbo ti ni na omerani tipa kaa mangasunge tungusapai si ki vura du vurũ nga pa gbia marã ima mbu? Wai rengbe ani kadu na wingbaduse baraho dungu aboro abaka kina bakabangiriyo ni tipa raka kumbatayo? Gu bia ga Mbori toro adu kugii Bakindo Davide ko kehe rogo Atambuahe 27 nafu akaragapai furani sa agi asanahe re.

2. Bakere gunde nasa boro ní naabi tiní wai, ono gini kido du ani nani?

² Davide atona gi bia tambuahe re na agu afugo nga: “Yekova nga gi imarago nga gi bata; da ka mi gunde be ni? Yekova nga gu gbata nga ga ungare; da ka mi gunde be ni?” (Tam. 27:1) Bakere gunde rengbe ka sa boro ní naabi tiní nga ní arengbanga ka manga wiripai te. Ono agu aboro nakido kuti Yekova, si aidanga i gunde te. (1 Pet. 3:14) Ho ani asa Yekova ni nigaani nyanyaki gbata, ani ‘naraka ni bandabanda rani, ki du zezeredi zanga gunde be gbigbitapai.’ (Snz. 1:33; 3:25) Tipagine?

“YEKOVA NGA GI IMARAGO NGA GI BATA”

3. Rogo gini gene du Yekova ni imarago furani, na ginipai si aida ani mangihe?

³ Gu masaku nga “Yekova nga gi imarago,” si nayugo gupai nga Yekova nakusa rani be gu bitimo nga ga toro watadu ko nayugo rengo furani. (Tam. 27:1) Ndikidi imarago nakusa kerepai ku yangura watadu gu kerepai kadu ngba gaani gene, ono si adianga ha kusayo te. Si naida ani mangipai nitatamana ka ne guhe ani nabihe. Wakina gure a, Yekova nayugo agu apai furani namanga rogo zegino. Ko nafu zahe furani tipa gu kereapai du rogo gi zegino re. Ko fu gu bangua arugute nga ga Ziazia Kekeapai furani nga gu naundo rani, ono si naida ani mangi agu apai ani awirikaha rogoho. Ho ani amangapai ni kutini, ani ima rengba kadu ni airatatamana susi avurarani watadu gaani abayugupai.—Tam. 119:98, 99, 130.

4. (a) Tipagine Davide arengbe ka ya ti ni naa kido wee: “Yekova nga gi . . . Bata”? (b) Gini regbo gbe Yekova nika batasarani ti ni?

⁴ Agu afugo Davide du rogo Atambuahe 27:1 nayugopa wai ko atingidipa wai Yekova abatasi ko rogo agu akpakarapai ko agbia tiko nani. Nikpiapai, Yekova abatasi ko “vurube bahu, na vurube urisi a.” Yekova aundo Davide a ko dibe gu ngburunga kumba nangia Goriata. Kusa, Bakindo Saura agbatagene ka so Davide na baso, ono Yekova aabatasa ko ti aregbo dunduko. (1 Sam. 17:37, 49, 50; 18:11, 12; 19:10) Zanga kapa, Davide arengbe arengba ka ya naa kido wee: “Yekova nga gi . . . bata”! Yekova nika batasa gako amoyambu abatasa a wa ko abatasi Davide. Wai? Ko nika batasa yó rogo “bakere gberãngbi.”—Yugo. 7:14; 2 Pet. 2:9.

ANI TINGIDIPA AGU AREGBO YEKOVA AUNDO RANI TI NI

5, 6. (a) Wai pa tingida ani agu apai namangi kusayo angarasa rani? (b) Wai gu pangbanga du tipa wai Yekova aundo gako amoyambu angarasa rani?

⁵ I pepa gu nyanyakipa pai rengbe ka undo rani ani duna wingbaduse rogo Atambuahe 27:2, 3. (Oni gedihe.) Davide atingidapa gu kereapai Yekova abatasi ko rogoho. (1 Sam. 17:34-37) Agi apai re nangarasi ko ko hi kura kpakaraapai. Ya mo oni naberãnga pa wai Yekova abatasi roni kusayo? Nikpiapai, ya mo oni akparingo kakaka ho oni adu ni rogo kpakarapai na ki bi wai Yekova afu tatamana furoni na wingbaduse tipa oni dibe gu kpakarapai re? Watadu ya mo oni rengbe ka tingidapa wai Yekova adi gu kpakarapai naaká na oni ti mangasunge fuko watadu wai du gene awere furoni nizazaha ka mangasunge fuko? (1 Kor. 16:9) Ho oni atingida agi apai re ni, gini sangbanapai duhe nani kurironi awere? Ya mo agu akpakarapai Yekova aundo roni rogoho asanga roni oni ini gupai nga ko rengbe arengba ka undo roni oni mbakadi kpakarapai watadu oni hi kereapai te?—Rom. 5:3-5.

⁶ Na ginipai ka mangi ka si du nga nyanyaki bazogo nataburõ ka nyasa riipa gu riigbu nga ga aDezire Yekova dunduko? Badungu aboro ti gi gaani regbo re aima asada ka mangaha wo ono zanga i duna diabese. Pa tingida ani pa wai Yekova aundo gu gako aboro nadumbata kusayo nika undo rani ani duna hipai rogo agu apai ani kaa gbia tirani nani.—Dan. 3:28.

ONI DUNA NYEMU NDIKIDI IRISOMBORI

7, 8. (a) Ringbisihe kuti Atambuahe 27:4, ginipai Davide asana Yekova tipaha? (b) Gini he nga gu ga Yekova bakere yekaru nga ga toro, na wai gu ani airisoko yo?

⁷ Gu kura nyanyakipa pai rengbe ka sarani ani duna wingbaduse nga nyemu ndikidi irisombori. (Oni gedi Atambuahe 27:4.) Ti rago Davide, “ga Yekova bambu” angia banye. Davide namangi mbakadapai ka dungura aũ dua yekaru nga gu si adu nga gu wiriko nga Soromo nika duaha. Fuo kama agarã kusa, Yesu agumba gupai nga regbo nikadu adu ho aboro nikaa irisongo Yekova ti ni berewe yekaru yo ya. (Yo. 4:21-23) Gu mokedi nangia Pauro ayugu gupai rogo aEbere kapita 8 kuti 10 nga, gu bakere yekaru nga ga toro atona ti gu regbo i abapatizi Yesu ti ni rogo 29 F.B.K., ho Yesu akpara gako raka ni ka manga gupai Yekova akpinyemuhe. (Eb. 10:10) Gi bakere yekaru nga ga toro re nga gu mbakadapai Yekova amangihe furani nga ka ani duna idapase kuti gu motumo tumori nga ga Yesu, ko rengbe arengba ka ida na ani. Wai gu ani airisombori rogo gu yekaru re? Ani nairisombori rogo gu yekaru re nikpara ani fuko na “ruru kpotorani yo nihiki be idapase,” nitungusa ani pai zanga gunde, na berewe a ningarasa ani akuarani airisimbori ba agu dunguratise yo nga ga dungurati na ti regbo gu irisombori nga ga aborokporo. (Eb. 10:22-25) Gaani nyemuse tipa gu mbakadapai du tipa ndikidi irisombori nangarasa rani ti gi yangara arame re.

⁸ Rogo zegino areme dunduko, ga Yekova amoyambu nakiiso gayo sunge tungusapai, i nawirika vovo afugo, na kini ndu kurogo agu aba du zingo abatungusipa Kindo rogoho. Gayo mangaapai nayugo gupai nga i wakina bake papara Atambuahe nasana Yekova tipa pai sa. I naida ka bi gu wene ngbanya nga ga Yekova na kini mangi ziazia sunge fuko ka gini apai vura kaa manga amanga wai vuru.—Oni gedi Atambuahe 27:6.

ANI KIDO KUTI GA MBORI UNDO

9, 10. Gini kidohe Atambuahe 27:10 akido rani nani?

⁹ Afugo Davide nayugo gu kido ko adu nani kuti Yekova, ko ayaa: “Bambiko buba mbu re na nina, ono Yekova adia re.” (Tam. 27:10) Ringbisihe kuti agu apai du rogo 1 Samuere kapita 22, avungu Davide aambunga ko te. Ono tie, badungu aboro areme avunguyo naima mbuyo. Ono wa vura duhe wo, agu aboro avunguyo nambu yó nagbia undo na bandahe rogo gu dungurati nga ga aKristano.

¹⁰ Wa duhe tie nga Yekova ti aregbo du na nyemu ka songoda gako amoyambu ho aboro asoga yó watadu ambuyo ni, ya mo ko arengbanga ka bandayo ti regbo gberãngbi te? Nikpiapai, ka si du nga ani nabakabangirani naapa wai ka ngerafuo gaani aborokporo na aũzegino, ya mo ani arengbanga kadu nakido nga Yekova nika undo rani aundo te? (Eb. 13:5, 6) Ko ima rugatiko na agu pai du tipa gako amoyambu na agu ahe du yó na zingoho.

11. Gaani kido kuti Yekova rengbe kadu na gini sangbanapai kurii kura aboro? Oni funga kpiapai.

¹¹ Ani makianga gupai naadu tipa Victoria, nga gu ri naawirika Ziazia Kekeapai Liberia yo. Wa ri aamanga sonakumbatayo tipa ka zio bapatiza, gu kumba ri aaraka naako ambu ri na agude biata. Wa si avura du nga kporo aadunga tiri te na ri aamanganga sunge te, ri aamanga sonakumbatayo kindi rogo toro yo. Tifuo ri zi bapatiza, wiriri du garãri nga 13 abi mangu na bakere marã rogoho. I adi gu marã re zanga gedaha tipa ka i tinga kurogo ingapai ya. I agbata gu borisi niipo gu marã re ati beko. Ko aya fuyo ka aboro nidu dunduko niruruyo wakina aDezire Yekova, ka zegino dunduko du niwene ba na zereda kpaima. Victoria ayugupa ga Yekova kidohe tipa vovo zegino fu gu borisi re rogo Ziazia Kekeapai. Gu borisi re afu marã furi dagba gu marã ri afuhe fuko re nibakerehe mbikopa du ri niruru ri. Aboro rogo zegino ini gupai nga aDezire Yekova adĩngo he te bambiko i na ndikidi kido nga Yekova nikaa ngera angerafuoyo, gipai re nasayo i du niruruyo.

12. Gini he ani ayugoho ho ani andu ni kindi kumbatayo kaa mangasunge fu Yekova si ki vura du nga ani narungo watadu i mbu rani ti sunge vurũ? Oni funga kpiapai.

¹² Oni berãnga pa gupai namangi Thomas nga batungusipai ata ziongo bapatiza ya du Sierra Leone yo. Ko atona kaa mangasunge nibayugupai rogo bakere sukuru, ono si aima mbeda ka da ti garã sa zanga ko zi marã. Ginipai si aida Thomas mangihe mbata ko niru ka zio marã? Gu boro naangerakurii gu sukuru re angia bavugahe na ko asasana Thomas na asasanahe. Gu bavugahe re aya fuko wee, agu apai aDezire Yekova aida kutini, i aidanga ha rogo gu sukuru re te. Ko agumba gupai fu Thomas nga ko mangi siapai sa dagba apai ue, singia ko namanga gu sunge re watadu ko naka kuti gako idapase. Ko ambu gu sunge re wa si avura du nga i afunga gako marã te vurũ, ko agbia kura sunge berewe nga mbakada aradio na aterefuni. Wa gi kpiapai re ayugoho na agu akuraha nga ka ani kido kuti Yekova, si aidanga ani gunde nga ani nika raka wai te. Bambiko Yekova nakusi ahe dunduko na ko nabanda gako aboro abanda ti aregbo dunduko, ani ima ino gupai nga ko nikaa ngera angerafuo rani.

13. Tipagine sunge tungusapa Kindo asona kumbatayo ti ni rogo agu aringara du nirungorungo ho?

¹³ Rogo gu dungu aringara duni rungorungoho, awirina namangasunge tungusapai yo nibakerehe. Tipagine? Be-basunge sa ake ndu gupai si amanga ti ni wo ki yaa: “Badungu agu aboro nagia rengo nga agu aboro amanganga sunge ya na i na bakere regbo beyo tipa wirika Ziazia Kekeapai uru. Zavura awirina a i na bakere regbo beyo tipa ka tungusapai. Agu aboro du rogo rungorungo aringara, i naida niipo kuti gupai nga ani naraka rogo yangara arame; bambiko i nabi wai abi gbegberẽ apai amanga patiyo.” Mokedi sa nga guko mangisunge tungusapai tipa agarã 12 rogo gu ringara duhe rogoho nga batungusipai sa nawirika Ziazia Kekeapai na aboro naima susa biata akepai ki yaa: “Wa duhe nga badungu abatungusipai naraka taata raka na apai ho nagbeberãyo te, i na bakere regbo beyo ka mangasunge tungusipai na ka wisigo Ziazia Kekeapai na aboro.”

14. Rogo gini agene Yekova nika banda bakere rimbasa aboro ngbaha?

¹⁴ Yekova ima kidohe tipa ka undo gako aboro, ka bandayo, na ka batasa yó nibadona, rogo borose yo na rogo toro yo, na ani nakido akido kutiko. (Tam. 37:28; 91:1-3) Agu aboro nika bata rogo “bakere gberãngbi,” i nikadu nibakere rimbasa aboro. (Yugo. 7:9, 14) Sidu, Yekova nika banda gi badona re ka i imingo yó ti yangara arame ya. Gu kura gene Yekova nika bandayo ngbaha nga ko nika fu agu ahe fuyo si aidaha tipa i hi aʹasada na ki banda gayo pagume naako. Na ti yangara bakere gberãngbi, Yekova nika banda gako aboro abanda.

“AKO YEKOVA, MO YÚGU PA GA GENE FERE”

15, 16. Wai gu ani agbia undo ho ani amangapai ni ringbisihe kuti ga Mbori arugute? Oni funga kpiapai.

¹⁵ Tipa ka nye ngangara, si naida ani naandu kindi kumbatayo nawirikapai tipa ga Mbori gene. Davide ayugu gipai re rogo gako kpee yo ki yaa: “Ako Yekova, mo yúgu pa ga gene fere, ki ngbe fere ku mbata yo ngba ruru gene bambiko avurare.” (Tam. 27:11) Tipa ka mangapai na ngbanya kuti gi kpee re, si naida ani degeturani wenengai kuti ai gu rugute du mburuhe rii Ziazia Kekeapai nga gu ani agbiaha rogo ga Yekova riigbu na ki mangipai nibasa kutini rogo gaani raka. Nikpiapai, badungu aboro mangipai kuti gu rugute nga ga ka sa gayo raka taata. I ima karaga agu abape naadu kuriyo na ki bagi kura gayo ahe. Sidu, ho kere zingo ati ni, i abakanga bangiriyo gbe tipa marã te. Kuba gupai nga i naamangasunge kakaka ka ngbe agu ahe i azingongo azingo tipaha ya, i nakiiso gayo sunge nga ga tungusapai. Si naida ani nibasasa dunduko sana tirani nga: ‘Ya mo mi naamangapai niipo kuti agu apai dunduko mi agedaha rogo Ziazia Kekeapai na rogo agu abuku ruru kangara moyambu akusaha, zavura ho si aida mi mbupa kura gimi apai ambu ni vurũ?’—Mt. 24:45.

¹⁶ Ka ani mbu Yekova ko rugu rani na ki nungusi rani ngba ruru gene, pai du nga ho ka ani gunde behe te. Ho bazakigene du Amerika yo asanahe ni tipa sunge nga gu narengbe ka undoko na gako aborokporo tipa i nimangisunge tungusapai ti aregbo dũ, bangerekuriisunge agumba gupai fuko nga ka i funga gu sunge re fuko te bambiko ko anyasanga bakere sukuru te. Ya mo pai wa gure amangingo roni, ya mo oni abira tironi nga ka oni anyasi bakere wirikapai mbata oni kini ka tona sunge tungusapai ti aregbo dũ? Tifuo aposo ue kusa, i ambu gu bangerekuriisunge re, gu kura bangerekuriisunge i amoiko kubako asana gu wirina re tipa gako asásá. Gu wirina re aya fuko wee, ko gbiati diako namangasunge fu Yekova ti aregbo dũ na ko naida kaa manga gi sunge re kindi. Mbata fu gu wirina re gumba kurapai, gu bangerekuriisunge re ayaa: “Mi aima ino gupai nga pai tipa ro kia! Ho uba aasamba ni riiba be kpio, akuaroni aidipase ue anaaye kaa geda Ziazia Kekeapai fuko naʹauru dunduko. Mi akidohe nga ka mi gbia momu tipa ka undo boro sa dagba aDezire Yekova, mi naundo ní nibasa.” Fuo girorago, i afu kina gu bangisa sunge i aká nani be gu wirina re mbata. Nirengo, ho ani amaa agu apai ni nga ga Kindo mbatayo rogo gaani raka, Yekova namangapai amanga ringbisihe kuti gako kidohe nga ka fu agu ahe furani du ani na zingoho.—Mt. 6:33.

IDAPASE GBIATI MAABANGIRISE NA NYANYAKIPAHA

17. Ginipai nika undo rani ani du naa kido tipa kumbatayo?

¹⁷ Davide anyakasi ndu gupai du idapase gbiati maabangirise ti ni na nyanyakipaha ki yaa: “Ono mi idi mi abí agu wenesino nga ga Yekova rogo ringara unga aboro ni rengo!” (Tam. 27:13) Ka Mbori aafunga maabangirise furani ya na ka ani ainongo gupai gumbayo ho rogo Atambuahe 27 ya, ka gaani raka du wai? Ani naakparanga akpara kindi naa kido kuti Yekova tipa ko ngarasi rani na ki batasirani ti regbo Aramegido.—Oni gedi Atambuahe 27:14.

[Gu sura du ti kpewaraga 23]

Gupai nangarasi Davide nga ko atingidi pa wai Yekova abatasi ko

[Gu sura du ti kpewaraga 25]

Ya mo ho du zingo mosoro ni ani nabi gu regbo re nimomu tipa ka kiiso gaani sunge nga ga tungusapai?