“Agu [Aboro] Nagbata Yekova a Nga Wene He ho Sa ka Zingo ho Mangi Yo Te”

1. Gini kpakarakpakarapai Davide adu rogoho?

DAVIDE aazubo mbiko boro aaida ka imo ko. Saura nangia gu bakindo aYisaraere naadu na ome tiko aima diaberã tipa ka imo Davide. Ho Davide aaida na riahe ni, ko andu ku Nobo yo, yo ko asanahe ni tipa kpakuto gbua bisue. (1 Sam. 21:1, 3) Kusa, ko na gako akumba agbia bagbuko rogo simbia. (1 Sam. 22:1) Tipagine Davide adu ti ni rogo gipai re?

2. Gini kere gbegberẽpai Saura amangihe? (1 Samuere 23:16, 17)

² Saura adu na ngbaduse ni bakerehe kuti Davide mbiko badungu aboro nakpinyemu Davide na kini tambua ko mbiko ko adibe dungu avura. Saura aima ino gupai a nga Yekova ima ká ko mbiko ko abasasangba Yekova, na Yekova ima sia Davide ko du ni bakindo kumbatayo. (Oni gedi 1 Samuere 23:16, 17.) Ono Saura adu kindi nga bakindo aYisaraere, na ko adu na badungu abanzengere beko gbiati dungu aboro naasongoda ko, si du si aaida Davide zubo ti ni tipa ka batasa unga ko. Ya mo Saura aberẽ gupai nga ko ima rengba nzunzu ka ká na Mbori ti maa ko Davide ni bakindo? (Yes. 55:11) Ziazia Kekeapai agumbanga ha te, ono ani ima rengba kadu na kido tipa pai sa nga: Saura aamaa tiko rogo kerepai. Agu aboro ninaasovura kuti Mbori ninaadunga na diabese te!

3. Waigu Davide adu apai ki vura kaa manga ko vurũ?

³ Davide angia boro umbasitise. Anga ko nasia gupai nga kadu ni bakindo aYisaraere te. Yekova du nasia ko ko du ni bakindo. (1 Sam. 16:1, 12, 13) Saura asogo Davide ni kerehe gbe. Ono Davide aabiranga Yekova tipa gu kerepai ko adu rogo yo re te; na ko akpakanangahe ho ko adu ni na kina bete riahe beko na kini gbu rogo simbia te. Kuba gure, si ima rengba kadu nga ho ko aagbu ni rogo simbia du ko ake gu wene bia tambuahe nga gu nakoda agu afugo du rogo gu veresi du mburu gi kekeapai re rihe nga: “Agu [aboro] nagbata Yekova a nga wene he ho sa ka zingo ho mangi yo te.”—Tam. 34:10.

4. Gini asanahe ani nika sakapai tipaha, na tipagine du agu asanahe re ti ni na nyanyakipaha?

⁴ Areme, badungu ga Yekova amoyambu ti kura aregbo ninaadunga na riahe beyo rengbe arengba watadu gu kura ahe si aidaha tipa raka te.b Gipai re ima manga tipa dungu ga Yekova amoyambu, gbe ti regbo ririkaza. Na apai nika kpakara nikerehe wa ani nikaa mbeda gbe na “bakere gberãngbi.” (Mt. 24:21) Na agi apai re berãrani yo, ani karaganga pai kuti asanahe biama: Rogo gini gene zingo ‘wene he sa’ aamanganga Davide ya? Tipagine si aida ani wiriki wai ti ni ka rengba kina be agu ahe du berani? Tipagine rengbe ani kadu ti ni na gu kido nga Yekova nika ngera angerafuo rani? Na waigu rengbe ani ka mbakadatirani awere tipa kumbatayo?

“ZINGOHE AMÁNGA NGA RE TE”

5-6. Waigu Atambuahe 23:1-6 aundo rani ani rugutirani na gupai Davide aaida ka gumbaha ho ko aya ni wẽ, “wene he ho sa ka zingo ho mangi” ga Mbori amoyambu te?

⁵ Ginipai Davide aaida ka gumbaha ho ko aya ni wẽ, “wene he ho sa ka zingo ho mangi” ga Yekova amoyambu te? Ho Davide ake Atambuahe 23 ni, ko amangisunge na kina ngbatunga agu afugo re. Sidu, agu Atambuahe re ima rengba ka undo rani ani rugutirani na gupai ko aaida ka gumbaha. (Oni gedi Atambuahe 23:1-6.) Davide atona agu Atambuahe re na agu afugo nga: ‘Yekova nga babandare, zingohe amánga nga re te.’ Rogo agu Atambuahe re yo dunduko, Davide afura tipa agu ahe du na nyanyakipaha nzunzu—wa ngbatunga gu wene ahe Yekova afuhe fuko mbiko ko aidi Yekova ni Babanda ko. Yekova angbe fu Davide kumbatayo “ngba gene rurupai,” na Ko aundo ko ti wene aregbo na ti gbegberẽ aregbo. Davide aima ino gupai nga, gako raka rogo ga Yekova “wesewese banambu” aadunga zanga akpakarapai te. Ti kura aregbo, ko anidu adu na gberãrago si kidu wa ka i ya ko nata rogo “ngbungumo kirima kpio,” na avurako kidu ti ni. Ono mbiko Yekova angia Babanda Davide, ko “agunde nga be gbigbitapai te.”

⁶ Sidu, karagapai gi du re kuti gaani sanahe: Rogo gini gene zingo ‘wene he sa’ aamanganga Davide ya? Ahe adu kina beko dunduko nga gu si aaidaha tipa ko nye mbembedi na Yekova. Gako ngbarago aarunga riipa aũborose te. Davide aima rengba kina be agu ahe Yekova afuhe fuko. Agu apai naadu na nyanyakipaha bangiriko angia, Mbori afu maku fuko na ki banda ko.

7. Ringbisihe kuti Ruka 21:20-24, gini akpakarapai kura agu aKristano naraki Yuda yo agbiatiyo na ni?

⁷ Ani ima rengba ka bi gupai ti ga Davide afugo nga si aidanga aũborose du na nyanyakipaha kisusi furani a te. Ani ima rengba ka gbia ngbarago ti agu aũborose du berani, ono ka ani moingo ho si du ni nyanyakipai kisusi rogo gaani raka yo ya. Gu re nangia gu nyanyakipa rengo si aaida kura agu aKristano naaraka Yuda yo ye ka rugatiyo na ni. (Oni gedi Ruka 21:20-24.) Yesu aima fu zahe fuyo nga regbo nika daada ho gu gbata nga Yerusarema nika du ni ‘nikisi kisihe kirikiri na aboro vura.’ Si adu nga ho gupai re nika manga ni, i “oro ku abaagangara yo.” Ka i ambu gu gbata re, ka i aaraka araka, ono ka i ambu dungu ahe ambu sa yo. Bete agarã kusayo, Ngbaõbambu Sinziri aya: “I ambu aˈati na akporo, zanga roga kandara gayo ahe nga gu nadu rogo gayo akporo. Ni kidoyo kuti gu bandahe na songodahe nga ga Yekova, i amoi gako iriso mbatayo fu agu apai dunduko narengbe ka du na nyanyakipaha.”

8. Gini nyanyakipa pai ani awirikaha ti gupai namangi agu aKristano naadu rogo bambata sa kama agarã nga aguyo naaraka Yuda yo?

⁸ Gini nyanyakipa pai ani awirikaha ti gupai namangi agu aKristano naadu rogo bambata sa kama agarã nga aguyo naaraka Yuda yo? Gu Ngbaõbambu Sinziri i nifura tipaha re aya: “Sidu, aasada rengbe ka duho kumbatayo tipa wai ani abi aũzegino; si na nyanyakipaha furani, watadu gu bata nga gu nika ye tipa agu aboro dunduko nangbe na Mbori nyakipaha? Ii, gaani oto rengbe ka koda arungo gbiati bengeta boro na ahe. Ani ambakada tirani ka manga agu apai dunduko si aidaha, awa agu akuarani nadu rogo bambata kama agarã amangihe nga aguyo naoro kusayo ringara Yuda yo.”c

9. Waigu gu ga Pauro rugute ko afuhe fu aEbere angarasa ro?

⁹ Ya mo mo rengbe ka berãpa wai si adu ni kpakarakpakaraha fu agu aKristano re i mbu agu ahe naadu beyo sayo na ki tona vovo raka rogo vovo ba? Si aaida i du na idapase nga Yekova nika undo yo aundo i gbia agu ahe i aaidaha. Ono pai kinaho narengbe ka undo yo. Agarã bisue mbata fu aRomo ke Yerusarema, gu mokedi nangia Pauro aima fu wene rugute fu aEbere ko aya: “Ka oni dú nga ni akanga fu nyemu marã ya; agu ahe du be roni si ki rengbe bangironi, bambiko ko aya tigako, ‘Mi ahe nga unda ro wa sa te, mi ambú nga ro a wa sa te.’ Si du ani aerã ti ni wenengaĩ ki ya, ‘Gbia nga gimi mounda; mi agúnde nga wa sa te; gini pai boro ka manga re na ni?’” (Eb. 13:5, 6) Agu aboro namangipai kuti ga Pauro rugute, si adu taata fuyo i rengbe kina be gu bete ahe naadu beyo rogo gayo vovo kporo. I aima du na gu kido nga Yekova nika ngera angerafuo yo na agu ahe i adu na zingoho. Ga Pauro afugo nakido rani na gupai nga, ani ima rengba kadu na kina gu bangisa kido re.

“ANI NIKA RENGBA KINA BE AGI AHE RE”

10. Ginipai Pauro ‘ainihe’ nga gu ko agumbaha furani?

¹⁰ Pauro afu kina ngbatunga gu rugute re fu Timoteo, na gu rugute re nabipa rani abi areme a. Ko akepai nga: “Ono wa du ani na riahe na roko ani nika rengba kina be agi ahe re.” (1 Tim. 6:8, NW) Ya mo gere nayugo gupai nga ka ani gbianga ngbarago ti bawene riahe, kadu na wene kporo, watadu ka ngbe vovo aroko ti kura aregbo te? Anga gupai re Pauro aagumbaha te. Pauro aagumba gupai nga si naida ani rengbe kina be ai guhe nga ga borose du berani. (Frp. 4:12) Gure nga gupai Pauro ‘ainihe.’ Gaani nyanyakipa he kisusi nga gaani pagume na gaani Mbori, angianga gu ũborose du berani ya.—Abak. 3:17, 18.

11. Ginipai ani awirikaha tipa rengba kina be agu ahe du berani ti agu afugo Moize apehe fu aYisaraere?

¹¹ Kparakparapai kinaho rengbe kadu dagba gaani bipai na ga Yekova bipai nibipa agu ahe ani aidaha. Oni bingo gupai Moize apehe fu aYisaraere fuo dia yo agarã 40 ku ngbakungba yo, ko aya: ‘Yekova gaoni Mbori fu maku fu roni rogo gaoni mangaapai dunduko nga ga beroni; ko ini pa gaoni ta rogo gi bakere ngbakungba re; agi agarã 40 re Yekova gaoni Mbori adu na oni; zingohe amanga nga roni wa sa te.’ (Pa Rug. 2:7) Vuru agu agarã yo 40 re, Yekova afu manu fu aYisaraere i naarihe. Yekova asa gupai nga ka gayo aroko sipingo ya. Sidu, i adu kindi na rengba kaa vo agu aroko i akuru na ni Ezipeta yo. (Pa Rug. 8:3, 4) Wa vura duhe nga kura aboro aima rengba ka berã gupai nga agi ahe re aadunga rengbearengba te, Moize atingidi aYisaraere na gupai nga, i aima du na agu ahe beyo dunduko i aaidaha. Yekova nika du na ngbarago na ani ka si du nga ani wiriki wai ka rengba kina be agu ahe du berani. Ko naida gupai nga ani du na tambuahe zavura tipa gu taata ahe ko afuhe furani na ani ki rugutirani na gupai nga agu ahe re nga gamahe beko.

ONI DU NA GU KIDO NGA YEKOVA NIKA NGERA ANGERA FUO RONI

12. Ginipai nayugo gupai nga Davide akido kuti Yekova, angianga kuti tiko ya?

¹² Davide aima ino gupai nga Yekova ni ruruko na ko naberãpa agu aboro aberã ni bakerehe nakpinyemuko. Wa vura duhe nga ga Davide raka adu ngba kerepai yo ho ko ake Atambuahe 34 ni, gako idapase kuti Yekova aima du ni nyanyakihe gbe si ki sa gupai nga ko du na gu kido nga, “ga Yekova maraika” avo “gbu pati” ko kirikiri. (Tam. 34:7) Isoke Davide aaringbisa ga Yekova maraika kuti gu banzengere navo gbu pati ba sovura, na kini ngere ti aregbo dunduko tipa vura ni. Davide angia gu banzengere naadu na wingbaduse na Yekova aima kido ko nga ko nika du ni bakindo, ono Davide aakidongo kuti gako ome tipa ka zumo wirimbia watadu ka mangasunge na basape tipa ka diabe vurako te. (1 Sam. 16:13; 24:12) Davide amoi gako kido kuti Mbori na kidu na gu kido nga ga Yekova maraika nabatasa agu aboro ‘nagunde ti Ko.’ Rengo ngaha nga, ani amaanga berãrani tipa ka gbia iiriwo bandahe areme te. Ono ani ima ino gupai nga, agu aboro dunduko nakido kuti Yekova nika gbia nyenye unga, ka i vura kpi vurũ awere.

13. Ho Gogo boro Magogo nika zubohe ni, tipagine ani nika du ti ni wa ka i ya boro ho nabanda rani te, ono tipagine si nikaa idanga ti ni ani gunde ya? (Oni bi gu sura duti kpotoho.)

¹³ Barambeda kumbatayo, gaani kido kuti Yekova nga ko nika banda rani abanda nika du rogo asada. Ho Gogo boro Magogo, nga dungura dungura ariigbu nika zubo ga Mbori aboro ni, ani ima rengba ka berã gupai nga i nika imo rani aimo. Si nika ida ani du na gu kido nga Yekova ima rengba ka batasa rani na ko nika batasa rani abatasa. Ani nika du fu arikaaboro wakina agu akandoro kaa bandanga tira ya, si nika du wa ka i ya boro ho nabanda rani te. (Yeze. 38:10-12) Aũvura adunga berani te, na i araba nga rani tipa vura a te. Arikaaboro nika berã gupai nga, si nika du taata ka diabe rani. I abingo gupai ani nika bihe na gu bangirani nga ga idapase te—amaraika nika ke pati ga Mbori aboro kirikiri na kidu regerege ka banda rani. Gi rikaaboro re abingo yo te. Mbiko i na idapase kuti Mbori te. Nairiwo gu iriwo rago nika ti tiyo ho agu abanzengere nga ga ngbangbaturũ yo nikaa sovura ni tipa rani!—Yugo. 19:11, 14, 15.

ONI MBAKADITIRONI AWERE TIPA KUMBATAYO

14. Gini apai rengbe ani ka mangaha awere tipa ka mbakadatirani tipa kumbatayo?

¹⁴ Gini apai rengbe ani ka mangaha awere tipa ka mbakadatirani tipa kumbatayo? Bambatapai nga, si aidanga ani berẽ gupai nga aũborose nyakipaha kisusi te, bambiko rogo kura uru, si nika ida aida ani mbu agu ahe re ni gii rani. Si naida ani rengbe kina be agu ahe du berani na si naida ani du na bakere ngbarago mbiko ani na pagume na Yekova. Ka ani ini Mbori wenengai, ani nika du na gu kido nga, ko nika banda rani abanda ho Gogo boro Magogo nika zubohe ni.

15. Gini apai namangi Davide mbuko tooni nga gu nayugu gupai fuko nga Yekova nikaa undo ko ti aregbo dũ?

¹⁵ Oni bingo gu kurapai berewe naundo Davide na nga gu rengbe ka undo rani ani mbakaditirani tipa aˈasada. Davide aya: “Oni ía Yekova ka bi ko ko du ni wene ko! Boro maku nga gu ni ninafu tini ku be ko!” (Tam. 34:8) Agu afugo re nasaka ndu gupai Davide aini gupai ti ni nga ko ima rengba ka kido kuti ga Yekova undohe. Davide aakido kuti Yekova dedede, na gako Mbori aabanga gberãrago tiko te. Ho Davide adu ni ni tooni ko, ko asovura na gu ngburunga Fereseto nangia Goriata na ko agumba gupai fu gu kere basovura re nga: “Areme Yekova afú ro ku bere.” (1 Sam. 17:46) Kusa, ho Davide aamangasunge ni fu Saura, Saura aasadi bara dunguhe ka imoko. Ono “Yekova adu na” Davide. (1 Sam. 18:12) Bambiko Davide aima bi wai Yekova aundo ko mbata kusayo, ko aima ino gupai nga Yekova nika undo ko aundo na gako akpakarapai.

16. Gini agene rengbe ani ka “ía” ga Yekova wenesino ngbaha?

¹⁶ Kina wai ani nikaa kido kuti ga Yekova arugapai awere, kinawo a gaani kido kuti gu tandu du ko na ni ka batasa rani kumbatayo nikaa kio gbe. Si naida ani du na idapase na ki kido kuti Yekova tipa ka sana gaani bairasunge ni fu regbo furani ani ndu tipa bakere adunguratise watadu ka sanahe tipa i mangi ariapai ti ringbisa regbo sunge tipa wa ka ani ndu tipa adunguratise na kini di regbo ni bakerehe gbe gene tungusapai yo. Na ka si du nga gaani bairasunge ká gupai ani nasanahe tipaha na ani ki zanga gaani sunge? Ya mo ani du na idapase nga Yekova ambunga rani te na ko nikaa fu agu ahe furani ti aregbo dunduko du ani na zingoho? (Eb. 13:5) Badungu agu aboro namangasunge Kindo ti aregbo dũ ima rengba ka pekapa agu akpiapai nayugopa wai Yekova aundo yo ho i aaida ko ni ni bakerehe gbe. Yekova niruru ko.

17. Gu veresi nga ga gu garã nga 2022 nga gine, na tipagine rẽarẽ ti ni?

¹⁷ Ndupai ho tipa ani gunde tipa gupai nika manga kumbatayo te, mbiko Yekova kina pati rani. Ka si du nga ani moi gupai ni bambatapai rogo gaani raka yo gaani Mbori akpinyemuhe, ko ambunga rani te. Tipa ka tingida rani na ndu gupai si aida ani mbakaditirani ti ni awere tipa gu kpakarakpakara aregbo naye kumbatayo na kidu na gu kido nga Yekova ambunga rani te, Riigbu Bipasunge ima sia Atambuahe 34:10 ni gu gaani veresi nga ga gu garã nga 2022: “Agu [aboro] nagbata Yekova a nga wene he ho sa ka zingo ho mangi yo te.”