Tipagine Biriki Akio ti ni Kina Kumbatayo?
‘Boro nidu nigbia kurii kurani tipa ka imisa ni.’—BATUNGUSIPAI 8:9.
GU VERESI re nasakapai tipa gupai du tipa ga aboro zogarago. Gu zogarago nga ga aboro aima ye na dungu arungo gbiati agberarago. Rogo gu pangbanga nga ga aboro, aboro aima asada ka ye na wene zogarago, kura aboro kini gbirisi riyo yo na agu apai nga ga ngbaduse gbiati biriki. Tipagine si amanga ti ni wo? Tipagine biriki akio ti ni kina kumbatayo? Si mbiko gu gbegberẽ nduapai du biata re.
1. Gu ome du ingapai nani kurirani.
Ziazia Kekeapai naya ani dunduko “tii gbegberẽapai [ingapai].” (ARomo 3:9) A wa gu kaza nasusa kumbatayo ti avunguagude kuti awiriyo, kinawo a ingapai ‘nanye kpotoraniyo.’ Tipa dungu akutu agarã, ingapai ‘nakindo’ kurii aboro wa bakindo. Gaha “rugute” namangasunge ti aregbo dũ rogo rani yo. Gu nyemu ingapai du tirani nasa dungu aboro i nimoi agu apai i akpinyemuhe mbatayo watadu ka maa mburu gayo raka rii nyemu bakere aũzegino watadu kadu na pagbia ka nze rii akurayo.—ARomo 5:21; 7:17, 20, 23, 25.
2. Gu ome du gi gbegberẽ zegino re nani kurirani.
Gi gaani zegino re ima hi be ngbaduse gbiati gbangbati. Rogo gi ngbatunga sino raka re, si ima mbu fu kura aboro i kparatiyo ti ni. Nibi gu bakere nyemu pagbia du yó nani, si nasayo i nimangisunge na nani ngba gbegberẽ gene. Si nasayo a i nisonosi bakere nyemu marã gbiati aũzegino kisusi gu si aidaha tipa tiyo. Si nipa rungo nga, ngbatunga agi aboro re natona dĩ watadu nangahe wa ka i da ti gi gayo asásá re. Kuba gupai nga i ká fu gi gbegberẽ apai re, i napekafuo “gbigbita pai.”—Gate 23:2.
3. Gu ome du Satana Bakitingbanga nani kurirani.
Satana nga zingizingi maraika, ko ‘nananga aboro auru kpotosende dunduko.’ (Yugoti 12:9) Ko na ngbarago ho ko abi aboro ni i nirungo. Ko ima rengba ka mangasunge na gu nyemu aũzegino watadu gu nyemu marã du rogo boro yo ní ki tona kaa nangahe.
Ya mo gure nayugo gupai nga ko rengbe ka sarani ani giasangbako na kini mangi agu apai ko aidaha? Ani nika wisigopai tipa gipai re rogo gu kekeapai naye fuo gere.