Biriki Nika Digo Adigo!

“Mo súngudi Yekova, ki ka kuti gako pai . . . Ho i ka gbarasa gbegberẽ aboro ni, mo abí he.”—ATAMBUAHE 37:34.

YA MO mo wagu dungu aboro nagunde nga biriki nga guhe ka boro anengaha ya watadu gupai i nikaa nyasanga riipaha ya? Kangia wo duhe, kinawo kura aboro aberãha. Aboro aima asada ngbatunga azogarago dunduko nga gu i aberãha nga si du niwenehe. Ono tie, i aadunga na diabese tipa ka nyasa riipa biriki te. Ya mo maabangirise ho nga regbo aduho aboro nikaa pe kina rengo fu akurayo?

Si nipa ngbarago nga, Ziazia Kekeapai nakaragapai nga ii! Si nape gupai furani nga barambeda, Mbori nika nyasa riipa biriki auru kpotosende. Wai gu ko nika manga gipai re? Vurube gako Kindo, si nga gu zogarago nga ga ngbangbaturũ nikaye na ariapai kurogo gi gaani kpotosende re. Gere nga gu Kindo Yesu aya fu apefuoko i nikpari tipaha. Rogo gu kparakpee aboro naya tipaha ga gbia kpee watadu Barani, Yesu ayaa: “Ga ngbi yé. Ani mángi rogo kpotosende wa mo akpi nyemu he.”—Matayo 6:10.

Ziazia Kekeapai nafura tipa gu bazogo nga ga gu Kindo re nga Yesu Kristo niyaa: “Ko nabatasa irazingo ahe ho ni nakpara ni ku ari; na irarungo na gu ni adu nga mounda ti ni ya. Nunga rurungbura boro du ti ko na irazingo ahe a, ko nabanda unga airazingo ahe. Ko natumo ungayo.” (Atambuahe 72:12-14) Mo ini gupai nga Yesu na nunga agu aboro i abiriko yó, na ko nika mangapai amanga tipa agu aboro i arungosi yó re! Ya mo gu pangba re afunga wasa te!

Gu Bazogo duna nunga gbiati ome tiko re, ko nika mangasunge na ga Mbori Kindo ka nyasa riipa biriki auru kpotosende. Wai ko nika mangaha? Ko nika nyasa riipa agu apai biata nasa biriki si niimangi.

Gu Ome du Ingapai Nani Kurirani

Awere ani dunduko si aida ani sovura kuti gu nyemu manga ingapai du tirani nga gu nasarani ani mangi kina agu apai ngba tirani. (ARomo 7:21-23) Ono wa vura duhe wo, wene aboro kinaho naida ka manga rurupai. Ka i duna idapase kuti gu motumo tumorii nga ga Yesu, i rengbe arengba ka gbia mbupai tipa gayo ingapai.a (1 Yoane 1:7, 9) Ngbatunga agu aboro re nikadu na momu ka gbia undo ti ga Mbori bakere mangapai nga ga nyemuse, a wa ani agedaha rogo Yoane 3:16 nga: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”

Mbori nika manga gupai duni iiriwoho tipa agu aboro du niruruyo. Rogo gu vovo zegino naye mbatayo re, Mbori nika dia serõ ingapai kusayo, na ki tona ka karaga ruru aboro yeye i da nirengberengbeyo na kini mangi rurupai. (Yesaya 26:9; 2 Petero 3:13) Ingapai adunga berewe na ome kurii aboro tipa ka sayo i nibiriki kura aboro te. Tii gu zogorago nga ga ga Mbori Kindo re, ruru aboro adunga ni akanga kutii ingapai te.

Gu Ome du gi Gbegberẽ Zegino re Nani Kurirani

Si nipa gberarago nga, dungu aboro areme namangapai niwia kaa imisa akurayo. I narungosi rungorungo aboro mbiko gu pagbia du beyo, na kini gbarasi ri kura aboro yo tipa i naabiriko aboro a. Ziazia Kekeapai nazungadi ngbatunga agu aboro re nga: “Gbegberẽ boro mbú gani pai, na gu boro zanga rurupai mbú gani aberã.” Ka ngbatunga agu airabiriki re saberã yó, Ziazia Kekeapai nakidohe nga Mbori ‘avú yó avu kpaima.’—Yesaya 55:7.

Ono tie, Mbori nika gbarasa agu aboro kusayo aidanga ka saberã yó ya. Ga Mbori Kindo nika sa gu kidohe du rogo Ziazia Kekeapai si da nirengo nga gu nayaa: “Mo súngudi Yekova, ki ka kuti gako pai . . . Ho i ka gbarasa gbegberẽ aboro ni, mo abí he.”b (Atambuahe 37:34) Ho i nika dia gbegberẽ aboro ni kusayo, ruru airisi Mbori ambunga berewe be biriki te.

Gu Ome du Satana Bakitingbanga Nani Kurirani

Gu boro gasi ngba manga ingapai nga Satana Bakitingbanga. Nairiwo gu ngbarago du ani nani nga barambeda Yekova nika rugusa Satana ka gene adunga berewe beko tipa ko nigbarasi ri aboro yo ya. Niyangaraha, Mbori agbarasa Satana nyeanye kindi. Ko adunga ho berewe tipa kaa gbarasa ri aboro yo i nibiriki aboro te.

Mo rengbe ka berãha nga pa musumo du gbua nga Mbori nika nyasa riipa agu apai nasa biriki si niimangi. Mo rengbe ka bakabangiro nga, ‘Ya mo Mbori na ome tiko ka ye na agu ariapai re? Ka si duwo, ginipai ko amanganga ha ti ni ya?’ Agi asanahe re nga wene asanahe, na Ziazia Kekeapai nafu wene akaragapai a kutini.c Ani nahõpai bero mo wisigingo agu apai Ziazia Kekeapai ayugoho nga si nika manga kumbatayo, ho biriki watadu rita marã kaa dunga ti ni berewe ya nyeanye kindi.

[Gu rukutu kekeapai du bandu kpewaraga yo]