Oni Mbedi Na Mbori
“Gine Yekova Aida Be Ro?”
GINIHE Yekova aidaha be agu aboro naida ka irisoko ngba wene gene? Ya mo ko naida ani du nirengberengbe rani, tipa ka saha nimbumbupai fu kpakpa aboro i mangi gupai ko akpinyemuhe? Watadu ko nakpinyemu ani mangi kina gupai rengbe omerani nani? Agu akaragapai du tipa agi asanahe re na nyanyakipaha ka si du nga ani naida ka mangasunge fu Mbori. Ani wisigingo wai gu nebi nangia Mika afura tipa agu apai Mbori akpinyemuhe.—Oni gedi Mika 6:8.
“Ko yugu gu he foro ngba angba.” Si aidanga ani wakana gupai awakana Mbori kpinyemuhe berani te. Ko ima pepa agu apai ko akpinyemuhe gbaiga rogo Ziazia Kekeapai yo. Mbori naida ani mangi gupai “ngba angba.” Anga gu kurapai kia ngaha te. “Mbori nga nyemuse,” sidu, ko naida kina wenepai mangi furani. (1 Yoane 4:8; 5:3) Pa manga ani gupai ko akpinyemuhe afunga kina ngbarago sa fuko te oni si nafu undo afu furani a.—Pa Fu Rugute ni Ue he 10:12, 13.
“Gine Yekova aida be ro?” Ya mo Mbori na rengo beko tipa ka ida he berani? Ii, ko na kina rengo beko! Ko naida ani gisangbako wadu ko nibaenge gaani raka na niba songodihe. (Atambuahe 36:9) Ginihe tie ko aidaha berani? Mika afura tipa agu apai Mbori akpinyemuhe rogo apai biata. Gu bambataha na gu uehe nafura tipa gaani mangapai na akuarani, na gu biataha nafura tipa gaani pagume na Mbori.
“Kina manga pai ni ruruhe.” Waraga sa nafura tipa gu pa-Ebere sayo ho kurogo pa-Zande nga “manga pai ni ruruhe” nga si nakoda “manga rurupai gbiati wene pagume fu agu aboro mo araka dagbayo.” Mbori naida ani mangipai fu kura aboro niruruhe ringbisihe kuti gupai du rogo gako arugute yo. Ani namanga rurupai nizanga ani kparaka aboro, na nipe ani rengo ho ani amangapai ni naayo. (Pa Amotumo 19:15; Yesaya 1:17; AEbere 13:18) Ho ani amanga rurupai ni fu kura aboro, si rengbe ka fõngbaduyo yo i mangi rurupai a furani.—Matayo 7:12.
“Ka kpi nyemu weneringise.” Mbori aidanga ani yugu kina weneringise sa te ono ani du a na nyemuse. Gu pa-Ebere sayo ho kurogo pa-Zande nga “weneringise” (cheʹsedh), rogoyo a nga gu “weneringise nga ga nyemuse” watadu gu “nyemuse nga ga kakuti badiangbase.” Wene bawirikipai sa tipa Ziazia Kekeapai ayaa: “Anga nzunzu sasa rogo gu fugo nga “cheʹsedh” nga nyemuse, inapai, na weneringise te; anga si nga sino sa dagba agi asino re te, ono si nakoda agu asino re dunduko.” Ka ani akpinyemu weneringise, na kini yuguhe na kpotoraniyo dunduko, ani du adu na ngbarago tipa ka undo agu aboro duna zingo. Nisangbana gipai re, ani nagbia gu ngbarago naye mbiko gamahe.—Amokedi 20:35.
“Ka ta ni umbasitise na ga Mbori.” Rogo Ziazia Kekeapai, gu fugo nga “ka ta” rogoyo nga ka “pekafuo kura gene mangapai sa.” Ani nata na Mbori nipeka ani fuo gu gene raka ko nape paha rogo Ziazia Kekeapai. Si naida ani du na “umbasitise” tipa ka pekafuo ngbatunga gu gene raka re. Rogo gini gene? Ho du ani ni na umbasitise bangiri Mbori, ani nayugoho nga parani kusande tigako na ani arengbanga ka manga apai dunduko te. Sidu tie, “ka ta ni umbasitise” nga ani du na wene bipai tipa agu apai ani asanako tipa ko mangihe furani na gbiati gu rengbe ani ka fuhe fuko.
Ani na ngbarago tie nga, Yekova akpinyemu gupai berani ani arengbanga ka mangaha ya te. Ko na ngbarago tipa gu ome ani amangaha tipa ka mangasunge fuko. (AKorosaio 3:23) Ko ima inoho nga omerani arẽnga na apai dunduko te. (Atambuahe 103:14) Ka ani aumbasi tirani ni tipa ka dia agu apai re kugume, ani rengbe arengba ka gbia ngbarago rogo ta ani naako. Si adu niwenepai ka oni tona ka wirika wai rengbe oni ka ta na Mbori. Ngbatunga gu gene mangapai re nasa gupai nga ko fu bakere maku fu boro.—Asanza 10:22.