Yesu Amoi Kpiapai Furani Nga ga Umbasitise
“Mi yugu pai fu roni, oni nimangi wa mangi mi fu roni.”—YO. 13:15.
GAONI KARAGAPAI NGA GINE?
Wai Wiri Mbori ayugu umbasitise mbata fu ko ye ku auru kpotosende no niboro?
Wai Yesu ayugu umbasitise ho ko aye ni ku auru kpotosende no niboro?
Gini aundo aboro agbiaha be padu Yesu na umbasitise?
1, 2. Rogo gu yangara yuru Yesu adu auru kpotosende, gini nyanyakipa pai ko ayuguhe fu gako amokedi?
GERE nga gu yangara yuru du Yesu auru kpotosende, ko di regbo ka sungo na gako amokedi rogo gu vurubambu du kuari Yerusarema yo. Ti regbo riahe nga ga nyemu, Ko guari ki di gako remu kusayo. Ko ba kitambara tiko. Ko uka ime ku kurungbu yo ki tona ka zunda ndu gako abawiriki na ki di kitambara ki ugusi nduyo nani. Tifuo gure, ko ukadi gako remu kubaha. Tipagine Yesu namangi gipai nga ga umbasitise re ti ni?—Yo. 13:3-5.
2 Yesu nitiko asakirogo yo ki yaa: “Oni ini gu pai mangi mi fu roni? . . . Wa du mi tie, ni Gbia ni Bayugupai, zundu kpenduroni, oni ka zunda kpendu akuaroni a. Bambiko mi yugu pai fu roni, oni nimangi wa mangi mi fu roni.” (Yo. 13:12-15) Pa manga Yesu gu sunge naadu na paha kusende re, ayugu gupai fu gako amokedi nga gu ka bangiriyo aarengbanga ka go ti ni ya, na si angarasiyo i duna umbasitise kumbatayo.
3. (a) Wai gu Yesu ayugu nyakapa umbasitise bara ue? (b) Ginipai ani nika wisigopai tipaha rogo gi kekeapai re?
3 Ho Yesu azundu ndu gako amokedi ni, anga gure nangia bambata regbo ko yugu nyakapa umbasitise fuyo te. Mbata kusayo, ho i apaa ni tipa da nikadu ni bakumba dagbayo, ko adi tooni gude ki moi ru pati ko, na Ko ki ya fuyo wee: “Gu ni ka di gi toni gude re ku gume ni rimore ni ka di re ku gume; gu ni ka di re ku gume ni nadia gu ko nakedi re ku gume; bambiko gu ni du ni toni ni dagba roni dunduko, ni nga bakumbaroni.” (Rk. 9:46-48) Ho Yesu aini gupai ni nga aFarusi aagbata kiopase, ko aya fuyo kusa rogo gako tungusapai yo wee: “Gu boro nakiisa tini i aumbasi pa ni aumbasi; gu ni naumbasi tini, i akiisa pa ni.” (Rk. 14:11) Si tie ziazia nga, Yesu aida apefuoko duna umbasitise, nga rogo berãyo yo na ki zanga du na rukö watadu kiiso patiyo. Ka ani aida ka wirika ko, si naida ani wisigi gako kpiapai nga ga umbasitise wenengai. Ani nika bi gupai abi a nga gi sino re aundongo kina gu boro sa nayugoho te ono kura aboro a.
“MI ASA NGA TIRE KU SA YO A TE”
4. Wai bangisa Wiri Mbori ayugu umbasitise mbata fu ko ye ku auru kpotosende no niboro?
4 Bangisa Wiri Mbori ayugu umbasitise mbata fu ko ye ku auru kpotosende no. Mbata fu ko ye ku auru kpotosende no niboro, ko aima raka na Bako ngbangbaturũ yo tipa badungu agarã. Gu kitabu nga Yesaya nagumbapa gu dawedawe pagume naadu dagba Wiri na Bako niyaa: “Gbia Mbori fu gu mirãse fere wa ga agu yo i ayugu pai fu yo, ya mi ini waĩ ka mi songodi gu ni nambu ni wene fugo. Ko nazingisa re wiso na awiso, ko naza ture sa gia pai wa ga agu yo i ayugu pai fu yo. Gbia Mbori za ture, mi angianga boro samungu te. Mi asa nga tire ku sa yo a te.” (Yes. 50:4, 5) Wiri Mbori ayugu gu sino nga umbasitise na kini degetuko wenengai sa agu apai Yekova aayugoho fuko. Ko aima du na kakaka nyemu ka wirikapai be ndikidi Mbori. Nairiwo wai Yesu avura kparia gu kpiapai nga ga umbasitise Yekova adu nani ka yugo inapai fu aboro ingapai re!
5. Wa Yesu avura ngia Mikaere nga bakumba maraika, wai gu ko amoi kpiapai nga ga umbasitise na zera ho tagbagapai akuru ni dagba ko na Bakitingbanga?
5 Anga amaraika dunduko ngbangbaturũ yo naadu na gu sino nga ga umbasitise wa bangisa Wiri Mbori te. Kuba gupai nga gu maraika naasa tiko ni Satana Bakitingbanga re kpinyemu ka wirika pai be Yekova, ko atona ka pekafuo agu asino naadu kia ti umbasitise nga kiopase, rukö, na ki samungu niyangaraha kuti Yekova. Ono tipa Yesu tigako, ko adu na ngbarago na kina gu bangiriba i afuhe fuko ngbangbaturũ yo na ko aamanganga sunge na gako pagbia ngba gbegberẽ gene te. Wa Yesu avura ngia Mikaere nga bakumba maraika, ‘ho tagbagapai akuru ni dagbako na Bakitingbanga tipa kangba Moize,’ ko aamanganga pai kisusi gu pagbia naadu beko te. Kuba gure, Wiri Mbori ayugu umbasitise na zera. Ko adu na ngbarago ka mbu apai kube Yekova nga Bakerepa Basapungbanga nga ga haurago ko nga Ko mangipai sa ni ngba gako gene na ti gako regbo.—Oni gedi Yuda 9.
6. Wai Yesu ayugu umbasitise ni ida ko pa ka mangasunge ni Masiya?
6 Zanga kapa, agu apai Yesu awirikihe mbata fu ko ye ku auru kpotosende no niboro akodipa agu asangbaanebi i agumbaha tipa gako raka auru kpotosende no ni Masiya. Sidu, si nawira wa ko aima ino gu kerepai naandu ka mangako kumbatayo. Ono wa si avura duwo, Yesu aidi ka ye ku auru kpotosende no na ki kpi ni gu Masiya i akido pako. Tipagine? Gu mokedi nangia Pauro agumbapa wai umbasitise aundo bangisa Wiri Mbori ki yaa: “Wa ko adu ni kina Mbori; rengba ko na Mbori adu nga bangiriko ni mosoro te, ono ko auka pa tiko ki du wa kina kanga, ki du wa boro.”—Frp. 2:6, 7.
‘KO AUMBASI TIKO’ WA BORO
7, 8. Rogo gini agene Yesu ayugu umbasitise ngbaha mbuko kindi nigude na ti regbo gako sunge tungusapai?
7 Pauro akepai ki yaa: ‘Pa bi Yesu tiko wa boro, ko aumbasi tiko, nigisangba dati kpio, ii, nga kina gu kpio nga ga wagiwagi ngua.’ (Frp. 2:8) Yesu amoi kpiapai furani nga ga umbasitise mbuko kindi nigude. Wa si avura du nga avungu Yesu nangia aYosefa na Maria angia kpakpa aboro, ‘ko aagia sangbayo kindi.’ (Rk. 2:51) Nangba gi wene kpiapai Yesu amoihe fu agu agude nga aguyo Mbori nika fu maku fuyo tipa giasangba avunguyo re!
8 Ho Yesu asono ni, ko ayugu umbasitise niperesa ko pa manga gupai Yekova akpinyemuhe mbatayo rogo gako raka. (Yo. 4:34) Ti regbo ga Yesu Kristo sunge tungusapai, ko amangisunge na ndikidi rimo Mbori na ki undo agu aboro naadu na nyemu rengo tiyo i gbia ndikidi inohe tipa asino Yekova na gako ringbisapai tipa aboro. Yesu araki ringbisihe kina kuti agu apai ko anaayugoho tipa Yekova. Nikpiapai, rogo gako kpia kparakpee yo, gu bambatapai ko agumbaha angia: ‘Barani du ngbangbaturũ yo, Ani írisi rimoro airisa.’ (Mt. 6:9) Yesu arugu apefuoko i bipa ziasi rimo Yekova na nyanyakipaha. Kina gu bangisapai re ko amangihe. Ho ko aambeda ni ka digiso gako sunge auru kpotosende, si ada ada ko ya fu Yekova rogo kparakpee yo wee: “Mi yugu rimoro fu yo [amokedi], mi ayúgo ho ayugo.” (Yo. 17:26) Kurigure, rogo ga Yesu sunge tungusapai yo naabaha, ko anaataasarimo Yekova tipa agu apai ko anaamangaha auru kpotosende.—Yo. 5:19.
9. Ginipai Zekaraya agumbaha nisangbanebi tipa Masiya, na wai gipai re adigisitihe kuti Yesu?
9 Zekaraya akepai tipa Masiya ki yaa: “Ako aboro Siona, oni dú pusiapusia gbe! Ako aboro Yerusarema, oni tá wawa! Oni ngére, gaoni bakindo naye koyo du oni ni; irarengo nga ko du na diabese, du na umbasitise nisungu auru badongi, nga kina paranga wiri nadongi.” (Zek. 9:9) Gi sangbanebi re adigisitihe ho Yesu andu ni ku Yerusarema yo mbata fu gu Pumbo Susiri rogo gu garã nangia 33 F.B.K. Rimbasa aboro agbaragi gayo aremu aguyo kini bafu be angua ku gene. Nirengo, gbata naabaha naadu rogo bakere ngbarago ho Yesu aarimo ni koyo. Wa aboro avura ka ya tiko Bakindo, ko adu kindi na kina umbasitise.—Mt. 21:4-11.
10. Ginipai Yesu ayuguhe nigiako sangbaa dati kpio?
10 Ho Yesu Kristo adu ni auru kpotosende, ko ayugu umbasitise na giasangba dati kpioko ti ngbunduru ngua-rungosi. Ko ayugu gupai zanga kapa nga, aboro ima rengba ka nye niruruyo fu Yekova ka i vura gbiatiyo na kina gini kere asada vurũ. Na Yesu ayugu gu ziree gbaiga Satana agumbaha ki ya, aboro nairiso Mbori mbiko ko nafu ahe fuyo. (Eyo. 1:9-11; 2:4) Pa gia Kristo sangba Bako rogo apai yo dunduko, asako ko songodi gu rengo du Yekova nani ka zogarago na ki yugu gupai nga ko nakido akido kuti ga Yekova gene zogarago nga si ngba kisusi. Nirengo, rago aima ngba ti Yekova ka bi wai gi Wiriko nga boro umbasitise re adu niruruko fuko.—Oni gedi Asanza 27:11.
11. Gu motumo tumorii nga ga Yesu Kristo azaki gene tipa gini maabangirise fu agu aboro du na idapase?
11 Pakpio Yesu ti ngbunduru ngua-rungosi, naasa gupai nga ko tumo aboro niungako. (Mt. 20:28) Bambiko ga Yesu motumo tumori, Yekova rengbe arengba ka mbupai furani ti gaani ingapai ringbisihe kuti agu apai ko aidaha na ki fu gu momu furani nga ani raki nyeanye kindi. Pauro ayaa: “Gamunihe aye fu aboro dũ sa gu diapairi nga ga unga mbiko manga rurupai sa.” (Rom. 5:18) Kpio Yesu azaki gene fu mbedimbedi aKristano i du na maabangirise ka raka ngbangbaturũ yo zanga kpio na ki zaki gene fu “kura akandoro” i gbia nyenye unga auru kpotosende ane.—Yo. 10:16; Rom. 8:16, 17.
“MI NGA IRAZERANGBADUSE”
12. Wai Yesu ayugu zera na umbasitise rogo gako mangapai yo na kpakpa aboro?
12 Yesu ayambu agu aboro “nambu dunduko, ki du na rõrõi tindiro” i ye fuoko. Ko ayaa: “Oni dí gi gonga ku gorõroni, ki wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni.” (Mt. 11:28, 29) Umbasitise gbiati zera naafõngbadu Yesu yo ko mangi fu kpakpa aboro rogo wene gene na kini biyo kina sa. Ko anaasananga gako abawiriki i mangi agu apai omeyo aarẽnga nani ya te. Ko atambuayo na kini ngarasiyo. Ko anaamanganga yó i ni biti yó wa airamungo te. Yesu anaafuranga fuyo kpasiaka na kini rungosiyo te. Kuba gure, ko akido apefuoko nga ka i mbedi naako na kini mangi agu apai ko ayugoho, i gbia ongada agbia, bambiko gako gonga niwenehe na gako tindiro du ni aakpuraha. Aboro dunduko si anidu fuyo taata tipa kaa fura na Yesu.—Mt. 11:30.
13. Wai Yesu ayugu nunga fu airarungo?
13 Pa koda Yesu tiko na agu aboro payo adu kusende Yisaraere yo, asako ko rugutiko na gayo azingo na nungayo ki ziko ko ki undoyo. Mbembedi na Yereo, ko agbia airavurari ue nanaahõ ahe, nangia aBatimayo na bakureako. I akpatagara kuti sana Yesu ko undoyo, ono rimbasa aboro azayo i ongo. Nairiwo wai gipai re arengbe kadu taata tipa ko zanga ka degatuko kuti gayo zungodihe! Kuba gure, Yesu aya i ye naayo fuoko, na gu nungayo naadu tiko ki sako ko husi bangiriyo. Nirengo, Yesu awiriki Bako nga Yekova niyugoko umbasitise na nunga fu aboro ingapai.—Mt. 20:29-34; Mk. 10:46-52.
“GU NI NIKAUMBASI TINI I AKÍISA NI”
14. Gini aundo aboro agbiaha ti ga Yesu sino nga ga umbasitise?
14 Gu sino Yesu Kristo adu nani nga ga umbasitise aye na ngbarago fu aboro na ki undoyo. Yekova adu na ngbarago ka bi gu Wiriko ko akpinyemuko gbe ko niumbasi tiko ka manga gupai ko akpinyemuhe. Amokedi na abawiriki anaagbia wasa be padu Yesu nibayee boro na ni irazerangbaduse. Gako kpiapai, gako yugupai, na pa tambuako yo nafõngbaduyo yo i sono rogo toro yo. Kungbo aboro anaagbia undo be ga Yesu sino nga ga umbasitise re, bambiko ko anaaundo yó rogo borose yo, na rogo gako yugopai yo, na kini ngarasiyo. Nirengo, agu aboro dunduko du na idapase kuri Yesu nika gbia aundo tigako motumo tumorii kumbatayo.
15. Wai Yesu agbia undo be padu ko na umbasitise?
15 Ginipai du tipa Yesu tigako? Ya mo gako umbasitise aundoko? Ii, bambiko ko aya fu gako abawiriki wee: “Gu ni nikaumbasi tini i akíisa ni.” (Mt. 23:12) Agu afugo re ada nirengo tipa ko. Pauro ayaa: “Mbori akiisi pa [Yesu] ti ni a gbe, ki fu gu rimo fu ko zogo arimo dũ; ya arukusue ninugadi ni rimo Yesu dunduko, agu ahe du ngbangbaturũ yo, agu ahe du auru kpotosende na agu ahe du tii kpotosende yo, ya miraahe ka kusa ha dunduko ya Yesu Kristo nga Gbia, sa ga Mbori taarimo nga Ba.” Mbiko padu Yesu na umbasitise gbiati padu ko niruruko auru kpotosende, si naasa gupai nga Yekova Mbori kiisipa ko na ki fu pagbia fuko kurii ahe ngbangbaturũ yo na auru kpotosende no.—Frp. 2:9-11.
YESU NIKA NDU ROGO “RENGO NA UMBASITI”
16. Ginipai nayugu gupai nga Wiri Mbori nikaa yugo gu sino kindi nga ga umbasitise?
16 Wiri Mbori nikaa yugo gi sino nga umbasitise re kindi kumbatayo. Bake papara atambuahe agumbapa wai Yesu nika manga fu avurako rii gako mbatabakindo ngbangbaturũ yo ki yaa: “Mo ndú rogo ga kiki ki u au, tipa pa rengo na umbasiti na rurupai.” (Tam. 45:4) Ti regbo Aramegido, Yesu Kristo nika sovura tipa agu aboro du na umbasitise kidu na rurupai na kini kpinyemu rengo. Na ginipai nika mangaha ho gu Bakindo nga Masiya nika ‘digisa ga abazogo apai dunduko na asia pai dunduko na tandu’ ni ti digido gako Zogarago Tipa Agarã Kutu? Ya mo ko adu na umbasitise? Ii, bambiko ko ‘nika fu ngbi fu Mbori nga Ba.’—Oni gedi 1 AKorindo 15:24-28.
17, 18. (a) Tipagine duhe ti ni ninyanyaki pa pai ga Yekova amoyambu pekefuo ga Yesu kpiapai nga ga umbasitise? (b) Ginipai ani nika wisigoho rogo gu kekeapai naye fuo gere?
17 Na ginipai du tipa rani? Ya mo ani apekafuo ga Yesu kpiapai na kini yugu umbasitise? Ginipai nikadu tipa rani ho gu Bakindo nga Yesu Kristo nika ye ni ka sapangbanga ti regbo Aramegido? Gu gene ko andu ngbaha watadu mangapai nayugo gupai nga ko nika batasa kina agu aboro sa du na umbasitise kidu niruruyo. Ka ani aida ka bata, si naida ani sonosi gu sino nga ga umbasitise. A wa gu sino nga umbasitise re aundo Yesu Kristo na kura aboro, kinawo a rengbehe ka undo rani rogo dungu agene yo ka ani ayugoho.
18 Ginipai rengbe ka undo rani ani pekefuo ga Yesu kpiapai nga ga umbasitise? Wai gu rengbe ani ka manga asadatise tipa kadu na umbasitise ani ki vura kaa gbiatirani na akpakarapai vurũ? Ani nika wisigopai tipa agi asanahe re rogo gu kekeapai naye fuo gere.