“Nungunungu Aboro” Nikodikodiyo Rogo Ndikidi Irisombori

“Akare [watadu ayeaye] adú ni gaoni abasopobino ni gaoni ababanda bakakue; i ayá ti roni ga Yekova aboromotumo.”—YES. 61:5, 6.

GAONI KARAGAPAI NGA GINE?

Gini bipai du kura aboro nani tipa ayeaye, ono wai du gu bipai nga ga Ziazia Kekeapai kia?

Gini yambahe i ayamba ngbatunga rikaaboro dunduko nani areme?

Rogo gini gene adunga akare watadu ayeaye ti ni dagba aDezire Yekova ya?

1. Gini bipai du kura aboro nani tipa ayeaye, ono tipagine arunga ha ti ni ya?

A WA ANI afura tipaha rogo gu kekeapai ye mbata fu gere, aboro namangasunge na gu fugo nga “kare” watadu yeaye ngba gbegberẽ gene, na si nayugopa gu sogote du yó nani. Zanga irisa du ngaha fu agu aboro nabihe nga ngbatungayo kiipaha. Kurigure, bangiriyo nago ti gupai nga boro ho kiipa ní kisusi ga kurani te. Gu waraga nga The Races of Mankind nayaa: “Ziazia Kekeapai nayamba ngbatunga aboro dunduko nga awirina.” Awiri bangisa vuse naadunga sa te, ono i kindi nga kina awirina.

2, 3. Gini bipai du Yekova nani tipa ayeaye?

² Ka ani vura kaa raka kina wari vurũ, ayeaye kina dagbarani. Kina gu bangisapai re naadu tipa agu aYisaraere Yekova Mbori amangi gu mozunga nga ga aNdiko naayo tipa i da nigako kparakpara aboro. Gu kungbo aboro naaraka dagba yó, i aadunga na ranirii rogo apai yo dunduko te, ono wa si avura duwo, si aniidi aYisaraere nimangi fuyo ringbisihe kuti andiko. Nangba gu bawene kpiapai si aida ani pekefuoho re! Si aidanga ndikidi aKristano nisogo kura aboro te. Tipagine? Petero ayaa: “Mi ini ni rengo ya Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.”—Amo. 10:34, 35.

³ Agu ayeaye naadu rogo gu Yisaraere nadumbata aima gbia undo tigu kodatise naadu dagbatiyo na aYisaraere. Gipai re nayugo gu bipai du Yekova nani nga gu Pauro afura tipaha kusa ho ko asanahe ni nga: “[Ya mo] Mbori nga kina ga aYudo Mbori sa? [a]nga ga aGendiria Mbori nga ko a te?”—Rom. 3:29; Yoe. 2:32.

4. Tipagine rengbe ani ka ya ti ni wee boro ho nga yeaye dagba “ga Mbori Yisaraere” te?

⁴ Mbiko vovo mokido, gu dungurati nga ga mbedimbedi aKristano adiba aYisaraere nga agu aboro Mbori asiayo i du nigako kparakpara aboro. Si du i ayambaha ti ni nga “ga Mbori Yisaraere.” (Gara. 6:16) A wa Pauro asakipai tipaha, dagba gi vovo rikaaboro re, “aGiriki ho na aYudo ti ni berewe ya, yeratise na zanga yeratise, na aboro kura aringara na agu yo fugoyo adu akiakia, kanga na raniri a ya, ono Kristo nga ahe dunduko, ki du rogo ahe yo dunduko a.” (Koro. 3:11) Ngba gi gene re, akare watadu ayeaye ho du rogo gu dungurati nga ga mbedimbedi aKristano te.

5, 6. (a) Gini sanahe nakura tipa Yesaya 61:5, 6? (b) Ada nga “ga Yekova aboromotumo” na agu “akare” i nafura tipa yó rogo Yesaya? (d) Gini bangisapai gi badona aboro re dunduko amangaha?

⁵ Ono kura aboro ima rengba ka bakabangiriyo na gupai peyo ho rogo Yesaya kapita 61, mbiko si na gu sangbanebi nadigisotihe kuti gu dungurati nga ga aKristano. Veresi 6 nga ga gu kapita re nafura tipa agu aboro nika mangasunge wa “ga Yekova aboromotumo.” Veresi 5 nafura tipa agu “akare” si adu nga i akodatiyo na “aboromotumo” ka mangasunge wa sa. Rogo gipai re yo nga gine?

⁶ Gu “ga Yekova aboromotumo” re nga mbedimbedi aKristano nga agu aboro nika gbia “bambata zingabekpio” na i nikadu “ni aboromotumo nga ga Mbori yo, na ga Kristo yo, i azóga rago na ko agarã ki du 1000.” (Yugo. 20:6) Kurigure, dungu ruru aKristano kinaho duna maabangirise ka raka auru kpotosende ane. Ka pepai nimasaku, agu aKristano namangasunge na kini koditiyo na agu aboro nika mangasunge ngbangbaturũ yo re, i dunduko nga ayeaye. I na ngbarago ka songoda “ga Yekova aboromotumo” na kini mangisunge wa gayo “abasopobino” na ni “ababanda bakakue” naayo wa sa. Ii, i naundo mbedimbedi aKristano rogo fu taarimo fu Mbori nitungusa yó pai na kini yugu rengo fu kura aboro. Nirengo, mbedimbedi aKristano gbiati agu abakureayo nga “kura akandoro” re, i nayugopai fu kura aboro na kini undo agu aboro naida ka mangasunge fu Mbori nyeanye kindi.—Yo. 10:16.

I NGA “NUNGUNUNGU ABORO” WAKINA ABARAYAMA

7. Wai gu du aKristano areme wakina Abarayama gbiati gu ga Mbori ruru amoyambu nadumbata?

⁷ A wa ani afura tipaha rogo gu kekeapai naaye mbata fu gere, ndikidi aKristano wakina ayeaye, watadu nungunungu aboro rogo gi ga Satana gbegberẽ zegino re. Nibi gipai re, i wakina gu ga Mbori ruru amoyambu nadumbata kodihe na Abarayama nga gu boro i aya tiko ‘boro kura ringara nangia ko.’ (Eb. 11:13) Ka gaani maabangirise vurangia kina gini gu vurũ, ani na momu berani tipa kadu na gu ngbatunga pagume naadu dagba Abarayama na Yekova. Yakoba akepai ki yaa: “‘Abarayama aidi pa Mbori, Mbori aya ti ko ruru boro nga ko’; i ki ya ti ko badiangba Mbori.”

8. Gini kidohe i akido Abarayama nani, na wai ko aberẽ tipa digisidigisihe?

⁸ Mbori akidohe nga rogo Abarayama na ngbatungako i nika fu maku ni fu rikaaboro dunduko auru kpotosende. (Oni gedi Bambata Pai 22:15-18.) Wa si avura du nga gi kidohe re adu kumbatayo tuturũu, Abarayama adu naa kido nga si adigisotihe adigiso. Ko ambedi ka digiso gako raka kuari wakina ngbuongbuo boro na gako aborokporo. Wa si avura duwo, ko akakuti gako pagume na Yekova.

9, 10. (a) Gini gene rengbe ani ka wirika Abarayama ngbaha? (b) Gini yambahe si aida ani ndu nani fu aboro?

⁹ Wa si avura du nga Abarayama ainongo boro gu regbo nzunzu gu kidohe re ka digisotihe ti ni te, gako nyemuse koyo du Yekova ni arungburanga te. Ko adianga berã ka nye dagba gu rikaaboro ko aaraka dagbayo te, ono ko amoiberãko kumbatayo. (Eb. 11:14, 15) Nairiwo wai duhe furani nipa tatamana ka wirika gu ga Abarayama kpiapai nangia ga raka taata raka, kuba baka ani bangirani tipa aũzegino, worimo, watadu agu asásá rengbe ka fu wene asunge furani! Tipagine ani aida ka raka gu raka aboro aya ti ni wee si nga wene raka rogo gu zegino niima mbeda ka digo? Tipagine ani azio tirani ti ni kuti agu ahe du tipa wiri guru regbo gbua? A wa si adu tipa Abarayama, wenepai kinaho napido rani kumbatayo. Si naida ani hipai daho gaani maabangirise kada ni ti rengo.—Oni gedi ARomo 8:25.

¹⁰ Yekova kindi nayamba rikaaboro dunduko i ye ka gbia maku vurube ngbatunga Abarayama yo. “Ga Yekova aboromotumo,” kodihe na kura akandoro nga “akare,” i nayamba aboro tipa gipai re rogo afugo niima susa 600.

ONI KPINYEMU ABORO DUNDUKO

11. Ginipai Soromo apehe nga gu naabingo kina pa aYisaraere sa ya?

¹¹ Ti gu regbo Soromo aakpara yekaru na pumbo fu Yekova rogo 1026 M.B.K., na nibi gu kidohe Yekova akido Abarayama nani, Soromo ayambu ngbatunga aboro dunduko i ye fuoko ka taasarimo Yekova naako wa sa. Rogo kparakpee yo, ko ayaa: “Na tipa gu kungba boro a, nga gu ni angia nga ga gamo aboro aYisaraere ni ya, ho ni ka niye ni gii ngbi yo tipa wo rimoro; bambiko aboro agía pa kia pa rimoro, na pa nyanyaki bero, na taĩtaĩ bero, ho gu ni ka niye ni ka akpara ningere kono du gi bambu re ni; mo gí he ngbangbaturú yo nga ga banye, ki mangi he dunduko wa ka gu kungba boro zungadi ro tipa ha; ya angbatunga aboro dunduko du auru kpotosende i ini pa rimoro, ka agunde ti ro, a wa gamo aboro aYisaraere agunde ti ro, i ki ini ya gi bambu re dua mi he, i yambu he ti rimoro.”—1 Aba. 8:41-43.

12. Tipagine kura aboro abi aDezire Yekova ti ni wakina kungbo aboro watadu wa “akare”?

¹² Kare nga gu boro ye rogo kura ringara watadu gu boro du dagba agu aboro angianga gani aboro ya. ADezire Yekova wakina akare watadu ayeaye. I nara nigoyo fu kina ga Mbori Kindo sa nga gu du Kristo nigaha Bakindo. Sidu, i nabanda tiyo nyanyaki tipa ka zanga rimiso tiyo kurogo agu apai nga ga birĩ-zogarago, ka aboro vura ka biyo wa kungbo aboro rogo gi zegino re vurũ.

13. (a) Rogo gini gene rengbe ani ka wirika ka zanga bi aboro wa “akare”? (b) Ya mo ga Yekova bambata ringbisipai adu na gupai rogoho nga aboro duni ayeaye? Oni sakinga rogoyo.

¹³ Dedede, i naino ayeaye kina tigu wiri rukutu apai i amangaha. Si rengbe kadu nga afugoyo, asinoyo, gayo mangapai, watadu gu gene i avo rokoo ngbaha. Ka ngbatungayo vura dukia, apai kinaho i amangaha nga gu kura aboro amangaha amanga a na paha ima nyaka kisusi agu asinoyo du kia re. Nirengo, aboro nabi boro nga yeaye mbiko gupai gbua nga ní namanga kura apai kia tigayo. Ka ani mbu maaberã rani fuo gi gani apai re, gu fugo nga “kare” dunga ti ni te. Ka i niya agu aboro dunduko du auru kpotosende tii bangisa zogarago sa, boro ho ka i naayamba ní nga kare watadu yeaye te. Ga Yekova bambata ringbisapai adu nga aboro dunduko du kina tii bangisa zogarago sa nga gako zogarago. Ya mo si taata ngbatungapai wa gure du fu ngbatunga aboro dunduko rogo zegino?

14, 15. Ginipai aDezire Yekova naye ka bihe na nyanyakipaha wadu yó nibadona?

¹⁴ Ani naraka rogo gu zegino aboro abihe nga ngbatungayo ngba kisusi kura ngbatunga aboro. Ono si niwenepai ka bi gupai nga kura aboro kinaho na kpinyemu ngbatunga aboro dũ. Nirengo, taatapai ngaha ka diabe iraira bipai kusayo tipa kura aboro te. Gu boro natona gu Terevizioni nga CNN nga Ted Turner, ko mangisunge na agu aboro duna inohe rogo apapara zegino naabaha. Ko ayaa: “Mi atona ka bi agu aboro du rogo gu kura aringara wakina agu aboro naraka rogo gu zegino mi araka rogoho, ono angianga wa ‘ayeaye’ ya.” Ko arũ andiko nga ka gako abamangisunge mangingo sunge na gu fugo nga ‘ayeaye’ ya. Ono i nimangisunge na gu fugo nga “agu aboro du rogo zegino dunduko” kuba gu nga ‘ayeaye.’

¹⁵ Rogo zegino naabaha, kina aDezire Yekova sa duna gu bipai nga ga Mbori tiyo wadu yó nibadona. Mbiko wa i abi apai kina wai Yekova abihe, si aria gu bipai du yó nani tipa kura aboro. Kuba gupai nga i namangaapai na atikö na agu aboro du ngbatungayo kia tigayo, watadu sogote, i na ngbarago ka bi gu wene asino na abirĩ du agi aboro re nani. Ya mo oni aberẽnga kurii gipai re na ki bingo wai oni agbia undo behe nitironi nibi gaoni mangapai koyo du kura aboro ni?

HO AKARE KADU NGA NI BEREWE YA

16, 17. Ginipai sangba digisidigisi Yugoti 16:16 na Daniere 2:44 ayugoho furani?

¹⁶ Barambeda, ngbatunga rikaaboro dunduko nika sovura kuti Yesu Kristo na gako rimbasa aboro vura nga ga ngbangbaturũ yó rogo gu ga Mbori yangara vura du tipa ga Mbori zogarago “i niya ti ni rogo pa Ebere yo, Aramegido.” (Yugo. 16:14, 16; 19:11-16) Agarã wa 2,500 kusayo, ga Mbori toro adu kugii gu nebi nangia Daniere ko fura tipa pai kumbatayo nibi wai ga aboro zogarago nika tagbagatihe na ga Mbori ringbisapai ki yaa: “Rago agu abakindo re Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.”—Dan. 2:44.

¹⁷ Ya mo oni aberẽnga kurii wai sangbana digisidigisi gupai re kadu na ome kurironi? Gu ga aboro zogarago na kparaka ngbanda arago na kini sa kura aboro i duni ayeaye, si adunga ti ni berewe te. Wa vura duhe nga aboro nikadu kindi nibakiakia, gure nika yugo wai Mbori ambakadi gako kusikusiahe ngba iiriwo gene. Si naida ngbatunga gu iiriwo maabangirise re fõngbaduraniyo ani taasirimo Bakusirani nga Yekova na kini irisiko na omerani dunduko.

18. Gini kpiapai nayugo gupai nga aDezire Yekova abingo akurayo wa “akare” te?

¹⁸ Ya mo ziree du nga bakere ariapai wa gure rengbe ka manga rogo zegino dunduko? Oó, ziree ngaha te. Si naida ani du naa kido nga si amangaha amanga wo. ADezire Yekova abingo kura aboro berewe wa “akare” te, na i amaanga berãyo fuo ngbatunga boro a te. Nikpiapai, barambeda, gu sunge gayo rukutu abe-basunge aamangaha, i akodihe kuti gu nga ga kikindigi abe-basunge tipa ka sa sunge ngerakurii tungusapai si du taata na tipa ka bi gupai nga sunge tungusapa Kindo namanga amanga wenengai. (Mt. 24:14) Mburu gi gayo diaberã re aadunga riipa ngbanda arago nga ga aringara te, kina gu ka si adu nga ndiko du naidaha wo. Gure nga gu kurapai nayugo gupai nga gu Bazogo Mbori namoiko nga Yesu Kristo, sunge tiko na gu ngbanda arago nga ga aringara te, na ko ‘nika diabe apai’ barambeda!—Yugo. 6:2.

19. Ginipai nzunzu agu afugo nga ga rengo nasaha taata?

¹⁹ Wa duhe nga aDezire Yekova rogo angbatunga nibakiakia na i nape afugo nibakiakia, i dunduko namanga ome tipa ka songoda gu nzunzu fugo nga ga rengo. Si nasayo i du nikodikodiyo na he ho rengbe ka kparaka yó te. (Oni gedi Zefania 3:9.) I wa aborokporo sa rogo gi zegino re, ono nikparakparayo ti gaha gbegberẽ mangaapai. Agi aboro du nikodikodiyo awere re, i nga kpia gu vovo zegino nikaye nga gu ayeaye nikaa dunga rogoho ya. Wa duhe nga i naraka rogo gi gbegberẽ zegino re, i nikadu na ngbarago ho agi afugo du rogo gi waraga re ka gido ni nga gu nayaa: “Ziazia Kekeapai nayamba angbatunga aboro dunduko nga awirina.”—The Races of Mankind.