Oni Mangipai Ringbisihe Kuti Ga Yesu Kparakpee
“Buba, . . . mo táasi rimo wiro, wiro táasi rimoro.”—YO. 17:1.
1, 2. Oni pekenga gupai Yesu amangihe fu gako ruru amokedi fuo mangayo Pumbo Susiri rogo 33 ti gaani regbo?
GIPAI re amangi nyemu nzinzi rago rogo Nisana 14 rogo gu garã nangia 33 ti gaani regbo. Yesu na abakureako nyasi Pumbo Susiri, nga gu naatingida yó na wai Mbori abatasi atitayo be sunge kanga Ezipeta yo. Ono gako ruru abawiriki andu ka gbia “nyenye tumori.” Fuo giro rago, si adu nga avura bairayo nika imoko. Ono gi gbegberẽpai re aye ka satihe ni pa maku. Si adu nga gu kure Yesu nauka re nika batasa aboro be ingapai na kpio.—Eb. 9:12-14.
2 Tipa ka bangirani gonga ti gu wenepai Mbori amangihe re ya, Yesu asigira kura pumbo nadiba Pumbo Susiri. Ko amangi gipai re ni kuo ko gu kpakuto naadunga na agbooro rogoho ya, na ki fuhe fu gako ruru amokedi naadu 11, na ki ya: “Borore nga gere du ni fufuhe tipa roni. Oni mangi gere nitingidi pa re.” Ko amangi kina wo a na gu inga naadu na ime kakue, ki ya: “Gi inga re, si nga vovo ndika rogo kurere, nga kina gu nauka tipa roni.”—Rk. 22:19, 20.
3. (a) Gini bakere ariapai namangi fuo kpio Yesu? (b) Gini asanahe si aida ani wisigihe nibipa gu ga Yesu kpee du rogo Yoane kapita 17?
3 Gu mozunga nga ga aNdiko naadu dagba Mbori na aYisaraere aandu ka digo. Si adu nga vovo mozunga dagba Yekova na mbedimbedi apefuo Yesu nika diabaha. Yesu anaabaka bangiriko na padu gi vovo rikaaboro re wenengai. Ndikidi aYisaraere aadunga ni kodikodi yó rogo irisombori berewe te, na gipai re agbarasi rimo Mbori. (Yo. 7:45-49; Amo. 23:6-9) Ono tipa Yesu tigako, ko aida apefuoko nye ni kodikodi yó wa ka i mangisunge sa ka ye na taarimo kuti rimo Mbori. Ginipai tie Yesu amangihe? Ko amangi bawene kparakpee du ni pa momu fu boro ka gedaha. (Yo. 17:1-26; oni bi gu sura du ti tonatonaha.) Ani rengbe ka sanahe nga, “Ya mo Mbori akaragapai kuti ga Yesu kpee?” Si naida ani wisigi tirani na ki sanahe nga, “Ya mo mi namangapai ringbisihe kutini?”
AGU APAI PAHA ANYAKI BANGIRI YESU
4, 5. (a) Ginipai ani awirikaha ti wai Yesu atona gako kpee? (b) Wai gu Yekova akaragapai kuti gupai Yesu asanako ko mangihe fuko ku mbatayo?
4 Yesu afura ni gbangaha da ku yuru, kini yugu gu wene inohe nga ga Mbori fu gako abawiriki. Fuoho ko atumba bangiriko kuari yo ki ni kpari ni ya: “Buba, ragoho da; mo táasi rimo wiro, wiro táasi rimoro; wa asia mo pa aboro fuko dũ, ya aguyo fu mo yo fuko, ko fu nyenye unga fuyo. . . . Mi taasirimo ro rogo kpotosende, mi nyasi gu sunge fu mo fere mi mangihe. Ako Buba, mo táasi rimorani na mo awere ni gu taarimo ani adu na ni na mo mbata zegino nikadu.”—Yo. 17:1-5.
5 Yesu atona gako kpee na agu apai paha anyaki bangiriko. Gu banguapai ko aberãpaha angia pa taasarimo Bako, na gipai re naringbisatihe na gu kpia kparakpee naya: “Barani du ngbangbaturũ yo, ani irisi rimoro airisa.” (Rk. 11:2) Gu kurapai Yesu aaberã paha angia pa gako abawiriki nga Bako “fu nyenye unga fuyo.” Fuo gure, Yesu asana Bako ki ya: “Buba, mo táasi rimorani na mo awere ni gu taarimo ani adu na ni na mo mbata zegino nikadu.” Yekova afu maku fu Wiriko susi gu ko asanahe tipaha ni fuko “wene rimo susi” ga amaraika dunduko.—Eb. 1:4.
“I INI RO NGA BANGISA NDIKIDI MBORI”
6. Ginipai si aidi abawiriki mangihe tipa ka gbia nyenye unga, na wai ani ainoho nga i aima du na diabese?
6 Yesu akpari a tipa gupai si aida ani mangihe nga aboro ingapai tipa ka rẽ tipa nyenye unga. (Oni gedi Yoane 17:3.) Ko ape gupai nga ani duwa ka “ini” Mbori na Kristo. Gu gene rengbe ani ka manga gipai re rogoho nga ka mangasunge na bangirani gbiati turani tipa ka wirikapai tipa Yekova na Wiriko. Gu kura gene berewe rengbe ani ka ino Mbori rogoho nga ka manga agu apai ani awirikaha tipa ko. Amokedi aima manga agi apai ue re a wa Yesu apehe rogo kparakpee ki ya: “Bambiko agu apai fu mo fere mi fuhe fuyo; i ki dihe.” (Yo. 17:8) Ono tipa i gbia nyenye unga, si aidi i ni berẽkurii Fugo Mbori na kini mangihe rogo gayo raka na aʹuru dunduko. Ya mo abawiriki adu na diabese rogo manga gipai ki da ti digido gayo raka? Nirengo, i aima mangaha. Ani ini gipai re mbiko arimoyo ni basasa dunduko ni kekehe ti gu ngapa bakporo du na mburuhe bawe na ue nga Vovo Yerusarema.—Yugo. 21:14.
7. ‘Ino’ Mbori nakoda gine, na tipagine duhe ti ni ni nyanyakipa pai?
7 Ka ani aida ka raka nyeanye kindi, ani duwa kaa ani andu ku mbatayo na ‘ino’ Mbori. Rogo gipai re nga gine? Si naida ani naawirikapai awirika kindi tipa ko. Ono anga si gbua nga ka ino asinoko na gako ringbisapai te. Ino Yekova nakoda du na wene pagume na ko gbiati akuarani idipase. Ziazia Kekeapai naya: “Gu ni adunga na nyemuse ya, ni aina nga Mbori te.” (1 Yo. 4:8) Sidu, ino Mbori nakoda giasangbako. (Oni gedi 1 Yoane 2:3-5.) Nangba gu momu nga boro ini Yekova re! Ono a wa si adu tipa Yuda Keriota, ani ima rengba ka zanga gi wene pagume re. Ani mangi ome nyanyaki ka kakutini. Ani kini ru tie ka rẽ tipa gu gamahe nga nyenye unga.—Mt. 24:13.
MBIKO “RIMORO”
8, 9. Gini banguapai Yesu aaberãpa ha ti regbo gako tungusapai, na gini sino aYudo ko asogoho?
8 Gini boro rengbe ka ti kango gu bakere nyemuse Yesu adu na ni tipa gu gako amokedi na du bakuru kusayo na aguyo du awere fuo geda ní Yoane kapita 17? (Yo. 17:20) Ti kina gu bangisa regbo re, si naida ani ini gupai nga gu banguapai Yesu abaka bangiriko na ni nga pa bata ani te. Gu banguapai ko atona gako tungusapai na ki digisihe na ni angia ka ziasi rimo Bako na ki saha si du ni taasitaasi he. Ni kpiapai, ho ko apepa gako sunge ni bambutiria Nazareta yo, ko agedipai rogo Yesaya ki ya: “Ga Gbia Toro ti re, bambiko ko auka nzeme kuri re mi tungusi wene pangbanga fu rungorungo aboro.” Nirengo, Yesu aima yamba rimo Mbori ho ko agedapa gako sunge ni.—Rk. 4:16-21.
9 Ringbisihe kuti sino aYudo, dungu agarã mbata fu Yesu ye ku auru kpotosende, agbia pambori aidanga aboro ni mangisunge na rimo Mbori te. Ani rengbe kadu naa kido nga Yesu aima soga gu gbegberẽ sino re. Ko aya fu asogoko wẽ: “Mi ye ni rimo Buba, oni adianga re kugume te; ka kura boro ye ni rimoni ni tini, ni ka oni di ni kugume.” (Yo. 5:43) Fuani, bete aʹuru mbata fu kpiko, ko afura tipa gu banguapai ko aberãpaha ho ko akpara ni ki ya: “Buba, mo táasi rimoro.” (Yo. 12:28) Ngbarani azeranga ka bi gupai nga Yesu aaberã gbe tipa Bako rogo gako kparakpee ani awisigopai tipaha awere re te.
10, 11. (a) Waigu Yesu asa rimo Bako aboro inihe? (b) Gini sasa si aida ga Yesu abawiriki da ti ni?
10 Yesu akpari ki ya: “Mi yugu rimoro fu agu aboro mo afuyo fere zegino. Gamo yo nadu, mo ki fu yo fere; i ka kuti ga pai. Mi zegino berewe te, agiyo du zegino re, mi naye koyo du mo ni. Ako Ziazia Buba, mo ká kuti aguyo fu mo yo fere ni rimoro, i du adu sa wa kina rani.”—Yo. 17:6, 11.
11 Pa yugoko rimo Bako fu gako abawiriki i inihe aima susa kungbo yamba gbua. Ko aundoyo tipa i ini gupai rimo Mbori arukubaha, gako wene asino na gu gene ko amanga rani ngbaha. (Gate 34:5-7) Kurigure, nibi gu bakere bangiriba du Yesu rogoho ngbangbaturũ yo, ko naundo gako abawiriki tipa i ni undo aboro auru kpotosende dunduko tipa i ini rimo Mbori. Gayo sasa nga gine? Tipa ka dungura dungu abawiriki mbata fu gi zegino re digi. Ho gu regbo re kada ni, ko nika batasa agu aboro du ni ruruyo fuko na ki sa aboro dunduko i inihe nga rimoko du ni bakerehe!—Yeze. 36:23.
“ABORO ZEGINO IDI PA RE”
12. Gini apai biata nyakipaha furani tipa ani du na diabese rogo sunge batasa unga aboro?
12 Ho Yesu adu ni auru kpotosende, ko amangi ome tipa ka undo gako abawiriki i dibe agu arungbura i adu na ni. Gipai adu ni nyanyakihe fuyo tipa wa ka i nyasi gu sunge Yesu atonaha. Ko akpari ki ya: “Wa mo akedi re ku zegino, kina wo kedi mi yo ku zegino.” Tipa i du na diabese rogo gi sunge batasa unga aboro re, ko anyakasipai tipa apai biata. Bambataha nga, ko akpari nga ka gako abawiriki dunga ni papara gi ga Satana zegino re ya. Uehe nga, ko akpari nga i du ni ziazia yo ni manga yó gu rengo du rogo Fugo Mbori. Biataha nga, ko akpari dedede nga gako abawiriki du ni kodikodi yó rogo nyemuse yo kina wai du ko na Bako. Gipai re naida boro na boro wisigi tiní rogoho. Ani ni basasa si aida ani sana tirani nga, ‘Ya mo mi namangapai ringbisihe kuti agu apai du biata Yesu asanahe tipaha?’ Ko adu naa kido nga ka gako abawiriki mangi agi apai re, si rengbe ka sa ‘aboro zegino idi pa ko ya ko nakedi ko.’—Oni gedi Yoane 17:15-21.
Ga Mbori ziazia toro aundo agu aKristano naadu rogo bambata sa kama agarã tipa i banda kodatise (Oni bi genewaraga 13)
13. Wai Yekova akaragapai kuti ga Yesu kparakpee rogo bambata sa kama agarã?
13 Wisigo gu kitabu ngbefuo Akitabu Wene Pangbanga nga Amokedi rengbe ka sarani tipa ani ini gupai nga Mbori aima karagapai kuti ga Yesu kparakpee. Oni berẽnga pa gu kparakaro naadu dagba bambata aKristano nangia aYudo gbiati aGendiria, airakumuko na rungorungo aboro, akanga na abairayo. Ono wa si avura duwo, i dunduko naye kadu ni kodikodi yó kina wai i naringbisi payo kuti abarapa kpoto boro na Yesu kingia rii boro tigako. (Ef. 4:15, 16) Nairiwo gu wene kodatise adunga rogo gi ga Satana zegino re ya! Si naida ani tambua Yekova nga gu boro naasaha taata fuyo vurube gako ziazia toro.—1 Kor. 3:5-7.
Ga Yekova aboro rogo zegino dunduko ni kodikodi yó (Oni bi genewaraga 14)
14. Wai Mbori nakaragapai kuti ga Yesu kparakpee ti gi gaani regbo re?
14 Si nafu kina rungo nga, fuo kpio amokedi, pa gi kodatise aima gberã. A wa i aima fura tipaha, abasamungu ange, na ki kusi agu akanisa i aya tipa wẽ si nga ga aKristano. (Amo. 20:29, 30) Ono rogo gu garã nangia 1919, Yesu akusi mbedimbedi apefuoko be gu zio nga ga ziree pambori na ki dungura yó ku rogo “wene dada tipa kpamiatise.” (Koro. 3:14, NW.) Sangbana gayo tungusapai mangi gine na zegino? Aboro bangeyo naima susa amirioni saba dagba “kura akandoro” “dagba rika aboro dunduko, na angbatunga yo, na aboro, na angbatunga afugo dunduko” ima dunguratiyo ku rogo bangisa ba na ga Mbori mbedimbedi aboro. (Yo. 10:16; Yugo. 7:9) Nairiwo wai Mbori nakaragapai kuti ga Yesu kparakpee re, nga “aboro zegino ini ya mo nakedi re, mo nakpi nyemu yo, wa kina gu mo nakpi nyemu re”!—Yo. 17:23.
WENE DIGISOPAI
15. Ginipai Yesu asanahe tipaha nibipa gako mbedimbedi abawiriki?
15 Rogo gu nyemu naadu rogo Nisani 14, Yesu afu taarimo watadu irisa fu gako amokedi ni manga ko mozunga na yó tipa i zogorago na ko rogo gako Kindo. (Rk. 22:28-30; Yo. 17:22) Ko akpari tipa agu aboro dunduko si adunga i nika da ni mbedimbedi apefuoko ki ya: “Buba, aguyo fu mo yo fere, mi nakpinyemu ani du na yo ho du mi ni a; i bi gu gi taarimo fu mo fere, bambiko mo aima digo nikpinyemu re mbata zegino nikadu.” (Yo. 17:24) Gipai re aye na ngbarago angianga kpihe dagba ga Yesu kura akandoro na mbedimbedi aKristano ya, na si nayugo gu kura gopai furani du kodatise ti ni dagba ndikidi aKristano rogo zegino dunduko areme.
16, 17. (a) Ginipai Yesu apehe ti digido gako kparakpee yo nga ko nikaa mangaha? (b) Ginipai si aida ani diberã tipaha?
16 Nibi gu maapai kurii du agbia pambori na ni, badungu agu aboro du rogo zegino aidanga kuti gupai nga Yekova ima dungura aboro areme nga aguyo ini ko te. Kina gu bangisapai re naadu tipa Yesu. Ko adigisihe na agi afugo du re nga: “Ako ruru Ba, aboro zegino ainanga ro te, mi naini ro; agiyo ini re ya mo nakedi re. Mi yugu rimoro fuyo, mi ayúgo ho ayugo; ya gu nyemuse mo nakpinyemu re na ni, si du rogoyo yo, mi ki du rogoyo yo.”—Yo. 17:25, 26.
17 Da rengbe ka ti kango nga Yesu amanganga pai ringbisihe kuti gako kparakpee te? Nidu ko ni barii dungurati, ko naundo rani kindi tipa ani ini rimo Bako na gako ringbisapai. Ani ranga ara fu gako ngbembatayo na kini gisangbako tipa kaa tungusapai na kini sa aboro ni abawiriki. (Mt. 28:19, 20; Amo. 10:42) Ani mangingo ome amanga tipa ka banda gaani kodatise. Ka ni mangi agi apai re, gure nga ani namangapai ringbisihe kuti ga Yesu kparakpee tipa ka taasarimo Yekova na ani ki gbia ngbarago nyeanye kindi.