Yekova Nafu Wasa Furani Rogo Gaani Fudifudiapai Dunduko

1, 2. Wai du Yekova afu wasa furani rogo gaani fudifudiapai yo, na gini kido Fugoko afuhe?

WIRINA sa ni bakuparanga nga guko ani ka yamba ko nga Eduardo afura fu sosono bakumba naima manga rogatise nga Stephen tipa gupai nga gu naafuda ko. Eduardo aaberãkurii gupai ani agedaha rogo 1 AKorindo 7:​28 nga: “Agu yo namanga [rogatise], pai afúda boroyo afuda.” Ko asanahe nga, “Ginipai du nga gu ‘nafuda borose’ re, na wai du rengbe mi ka mangapai kutini ka si du nga mi mangi rogatise?” Mbata fu Stephen fu karagapai kuti gu sanahe re, ko asana Eduardo nga ko makianga kurapai nga gu gu mokedi nangia Pauro akehe, du nga Yekova nga “Mbori wasa dunduko; nafu wasa fu rani rogo gaani gberãngbi yo dunduko.”​—2 Kor. 1:​3, 4.

² Yekova nirengo nga gu Barani du na nyemuse, na ko nafu wasa furani ho ani agbiatirani ni na kpakaraapai. Si ima rengba kadu nga Mbori aima songoda ro na ki yugu gene foro vurube Fugoko yo. Ani ima rengba kadu na kido nga ko naida wenepai tipa rani, kina wai ko aaidaha tipa gako amoyambu bakuru kusayo.​—Oni gedi Yeremaya 29:11, 12.

3. Gini asanahe ani ka gbia karagapai kutini?

³ Si nirengo nga, ani ima rengba ka mangapai kuti gaani fudifudiapai wenengai ka si du nga ani ima ino guhe naye na ni. Na gure nga kina boro gu rengo duho tipa gu fudifudiapai nga ga rogatise gbiati gu nga ga ramukporo. Gine du tie nga bete agu apai nga gu rengbe ka ‘fuda borose’ nga gu Pauro afura tipaha? Gini akpiapai du rogo Ziazia Kekeapai yo na ti gi gaani regbo re rengbe ka undo rani ani gbia gu wasa ani aidaha? Pa ino ani gipai re rengbe ka undo rani ani sovura kuti gaani fudifudiapai.

AGU APAI ‘NAFUDA BOROSE’

4, 5. Gini apai du ‘nafuda borose’?

⁴ Ani nageda gupai Mbori agumbaha ti tonatona gu pangbanga yo nga ga ga aboro raka nga: “Boro nihe bani . . . na nani, ki ka kuti diani, i ki du wa boro sa.” (Bam. P. 2:​24) Yekova agumba agu afugo re ti gu regbo ko anungusi gu bambata rogatise nga ga aboro. Ono tie, mbiko zanga rengba, manga rogatise na tona vovo ramukporo ima rengba ka fuda gu pagume du dagba aborokporo. (Rom. 3:​23) Dedede, gu pagbia nga ga kumbakudee nadiaba gu nga ga avungu dee. Mbori ima fu pagbia fu kumba nga ko du ni rii diako. (1 Kor. 11:3) Gipai re ni taataha fu kura vovo kumbakuadee na dereakumba te. Ringbisihe kuti Fugo Mbori, si naida diakumba idi kuti gupai nga kumbari du nikaa fu arugapai furi angianga avunguri ya. Pagume dagbase na agbio ima rengba kadu ni fudifudihe na gipai re ki ye na fudifudipai fu gu vovo arogotise re.

⁵ Dedede, vovo bakabangirise natona ho diakumba agumba gupai ni fu kumbari nga, “Mi na vuse.” Dedede, bakabangirise riipa gupai nga ri nika tona kakaza ti gu regbo du ri na vuse watadu kusa, nafurii gu ngbarago arogotise nidu nani tipa gu gude i apido ru re. Na gu kura apai nika ngeange nga gu nikaa ida marã ti gu regbo re na kumbatayo nga gu si nika ida i bipaha. Ho i avunga gude ni, si naye ka ida kura aʹariapai. Gu vovo nagude re rengbe ka dia bakere gari regbo na ka maa berãri gbe tipa kina ngerafuo wiiri. Gipai re nasa kumbakudee ko bihe nga bangirise ima go tiko mbiko gupai nga diako nadia bakere regbo kaa ngera kina fuo gude. Tipa bagude tigako, ko nada na vovo atindiro nga gu si aida ko tindihe. Agu atindiro du kuriko nakio mbiko vovo boro kinaho si aida i ngere fuoni.

6-8. Wai du rengbe zangada ka ye na gberãrago?

⁶ Gu kura kpakarapai kinaho berewe nga gu nafuda arogotise. Si rengbe kadu nga i naida ka vunga gude na omeyo dũ ono ka i avunganga ya. Ho diakumba adunga ni na vuse ya, ri ima rengba kadu na bakere gberãrago kpotoriyo. Anga rogatise watadu vunga agude nasa gupai nga ka boro bakingo bangirini ya te, ono wa vura duhe wo, ho arogotise aida gude ni ono ka i agbianga ru ya, gure nitihe ima rengba ka ‘fuda boroyo.’ (Snz. 13:12) Ti agu aregbo i aakeka Ziazia Kekeapai ti ni, zangada anaaye na bakere gbarasa rimo. Dia Yakobo nangia Raere adu rogo bakere igirã ho ri abi kina wirinari ni ri nivungu agude. (Bam. P. 30:​1, 2) Agu amokedi namangasunge rogo agu aringara duhe ni sino aboro rogoho kadu na aborokporo ni dunguyo, aboro naasasana yo dedede nga tipagine i avunganga agude ti ni ya. Wa i avura kaa fu wene karagapai nga gu du rogo birĩ yo, agu aboro re rengbe ka ya, “Wo du, ani nika kpara akpara fu Mbori tipa roni!”

⁷ Watadu oni bingo gupai du tipa wirina ringara aNgirisi yo nga guri naaida ka vunga gude ono ka ri avunganga ya. Fuani, ri ki da ti gu garã ka boro avunganga rogoho ya. Ri aidi kuti gupai nga, ri aima du na bakere gberãrago, mbiko ri aini gupai nga ri ambisa nga gari nyemupai berewe rogo gi sino raka re te. Ri na kumbari adiberã ka dia kura kungbo gude kaa sungo na u. Ono wa si avura duwo, ri aya: “Mi nidu kindi na rungo kpotore yo. Mi aima inoho nga pa dia mi kungbo gude adunga sa wa gu ka mi nivungu kina boro wire te.”

⁸ Ziazia Kekeapai ima gumba gupai nga gu dee nga Kristano “abata mbiko batika gude.” (1 Tim. 2:​15) Ono gipai re ayugongo gupai nga vunga gude watadu du na agude nika sari ri gbia nyenye unga te. Kuba gure, si nayugo gupai nga gu dee du na awiiri ti ni ka ngerafuo yo na ka ngerafuo gu kura apai nga ga kporo, regbo aadunga beri kaa perimo na kaa rimisotiri ku rogo agu apai yo nga ga kura aboro te. (1 Tim. 5:​13) Ono wa vura duhe wo, ri ima rengba kaa gbia tiri kindi na agu akpakarapai nga ga rogatise gbiati ramukporo.

9. Wai du du kpio badiarogatise ni gu fudifudiapai du kia?

⁹ Ho ani afura ni tipa agu apai nafuda arogotise, gu kuraha kinaho sa nga gu paha arengbanga ka ye ku berãse yo ni ipo ya. Kpio badiarogatise. Nirengo, gu fudifudipai kia badungu aboro agbiatiyo na ni nga ho gayo badiarogatise akpi ni. Gere nga gu fudifudipai si narengbe kadu nga gu boro gani badiarogatise nakpi re aaberãnga ha nga si nika manga ni rogo gi sino raka re te. AKristano ima ida ngutete kuti ga Yesu kidohe nga ga gu zinga be kpio naye kumbatayo. (Yo. 5:​28, 29) Gine gu maabangirise re amangaha fu gu badiarogatise du ni ungani? Si nafu bakere wasa funi. Gere nga gu kura gene gu Barani du na nyemuse vurube Fugoko afu undo gbiati wasa fu agu aboro nagbiatiyo na fudifudiapai ngbaha. Ani bingo wai kura ga Mbori amoyambu adu kusayo, na ki gbia undo ti gu wasa Yekova afuhe.

WASA HO ANI AGBIATIRANI NI NA FUDIFUDIAPAI

10. Wai du Ana agbia wasa be gari fudifudipai? (Oni bi gu sura duti tonatonaha.)

¹⁰ Dia Erikana ko akpinyemu ri gbe nangia Ana agbia tiri na fudifudipai. Ri angia irazangada baraho yuwari nangia Penina aavunga agude ni. (Oni gedi 1 Samuere 1:​4-7.) Penina anaasoapai kuti Ana “garã na garã.” Gipai re aye na kere egerã gbiati gberãrago fu Ana. Ri agbata wasa ni kpara ri fu Yekova tipa gupai re. Nirengo, “ri akpara kindi bara bangiri Yekova.” Ya mo ri aaberãha nga Yekova nika karagapai akaraga kuti gari kpee? Si nawira wa ri amaabangiri amaa wo. Ka si vura du kina wai, “kpakpuri adu nga na rungo berewe” te. (1 Sam. 1:​12, 17, 18) Ri adu na kido nga Yekova nika fu gude afu furi watadu ko nika mbisa gari zingo ngba kura gene.

11. Wai du rengbe kparakpee ka fu wasa furani?

¹¹ Wangia ani kpakpa aboro na kini raki rogo gi zegino du kutiibe Satana re, fudifudiapai tigaha nikaa manga rani amanga kindi. (1 Yo. 5:​19) Ono tie, nairiwo wai ngbaha ka ino gupai nga Yekova nga “Mbori wasa dunduko”! Gene sa rengbe ani ka gbia undo ngbaha ka mangapai kuti gaani fudifudiapai nga vurube kparakpee. Ana akusuko agu apai naadu ngbaduriyo fu Yekova. Wakina gure a, ho ani agbiatirani ni na fudifudiapai, ka ani penga kina gupai sa gbua nafuda rani fu Yekova ya. Nirengo, si naida ani zungodi ko, ka pe gupai fuko du ngbaduraniyo ni kpara ani fuko kakaka kina boro ngbaduraniyo.​—Frp. 4:​6, 7.

12. Gine naaundo gu dekurugbo nangia Ana ri gbia ngbarago?

¹² Ka si vura du nga ani naraka na bakere gberãrago mbiko zangada watadu mbiko kpio gu boro ani nakpinyemu ni gbe, ani ima rengba ka gbia wasa. Ti gu regbo Yesu adu auru kpotosende ane, kumbaku gu denebi nangia Ana akpi fuo mangayo agarã gbua saba ku rogo rogatise. Gu pangbanga nga ga Ziazia Kekeapai re afuranga tipa agude te. Gine Ana aamangaha kindi ho garãri adu ni nga 84? Ruka 2:​37 naya: “Ri aguari nga yekaru yo te, ono ri anafu tambuahe nigina riahe ki nikpari kpe yuru na uru.” Nirengo, Ana agbia wasa gbiati ngbarago ti iriso Yekova.

13. Oni funga gu kpiapai nayugo wai ndikidi abakure narengbe ka fu wasa zavura ho mbembedi agume afunga ha ni ya.

¹³ Ho ani akodatirani ni dawedawe na awirinarani, ani naye ka gbia wene abakure gbiati abadiangba. (Snz. 18:24) Paula natingidapa gu gberãrago atingida ri adu na ni ho garãri adu ni bisue ti gu regbo nari ambu rengo. Taatapai nangiaha ka diabe gu fudifudipai re te. Ono ri aima gbia bakere ngarasaro ho Ann nga guri nangia nazakigene rogo gari dungurati atona kadu ni na bakere nyemu ka undo ri rogo toro yo. Paula aya, “Wa vura duhe nga Ann aangianga gumere te, gu nyemuse ri ayuguhe ni berãri pare aima undo re. Si aundo re mi nimangisunge amanga kindi fu Yekova.” Paula namangasunge kindi fu Mbori ni ruru ri. Ri na bakere ngbarago a kaa iriso Yekova berewe kina sa na nari rogo dungurati. Ann na bakere ngbarago a mbiko ri nidu wakina na Paula rogo toro yo.

14. Agu aboro nafu wasa rengbe ka gbia gini amaku?

¹⁴ Nirengo, ho ani ayugo nyemuse ni koyo du kura aboro ni, si ima rengba ka dia gaani gberãrago tirani kusayo. Agu awirina nga adee nga arogotise watadu aguyo ata manganga rogatise ya, i ima ino gupai nirengo nga i nagbia bakere ngbarago ti tungusa wene pangbanga ni abadiasunge na Mbori. Gayo sasa nga ka fu irisa fu Mbori ni manga yo gako pai. Agu akurayo nabi sunge tungusapai wakina gu ngua nazeresa egerã. Nirengo, ani dunduko nafubee tipa dawedawe pagume rogo dungurati ho ani aberẽpa kura aboro ni nga aguyo du rogo gaani dagbarago nga ga tungusapai gbiati dungurati. (Frp. 2:4) Gu mokedi nangia Pauro angia wene kpiapai. Ko adu fu gu dungurati naadu Tesaronike yo wakina gu “de namanga pa awiriri”; ko adu a wakina bayo rogo toro yo.​—Oni gedi 1 ATesaroniko 2:​7, 11, 12.

GBIA WASA KPORO

15. Gini bangua aboro du du gayo sunge nga ka yugo rengo fu agude?

¹⁵ Gu kura bangiriba si aida ani moi berãrani fuoho nga gu wasa na undo ani afuhe fu aborokporo. Ti gu kura aregbo, vovo awirina nasana agu abatungusipai naima nyaka rogo toro yo i yugu rengo fu awiriyo, zavura ka yugo Ziazia Kekeapai fu gu rukutu yo. Kuti sangba Ziazia Kekeapai, gu bangua aboro si aida i yugupai na kini raba agude nga avunguagude. (Snz. 23:22; Ef. 6:​1-4) Ti gu kura aregbo, si rengbe ka ida kura aboro fu undo fuyo na i nabi gu undo re na nyanyakipaha. Ono wa vura duhe wo, si adianga gu tindiro kusayo nga ga avungu agude riyo te. Gayo fugodagbase dedede dagbayo wangia yo aborokporo na nyanyakipaha.

16. Ginipai si aida boro tingidihe ho ni aundo agude ni?

¹⁶ Ka avunguagude diberã nga si naida kura boro wirikipai na awiriyo, gu boro nawirikapai na awiriyo re, si aidanga ni asadi ka diaba avunguyo te. Kura aregbo kinaho i naasana Dezire Yekova ni yugupai fu agu agude adunga avungayo na nyemu rengo ya. Si naida gu Dezire Yekova re tingidi gupai nga, wa vura duhe nga ni naundo agu agude re rogo toro yo, anga ni nga vunguyo te. Na ho i amanga gu ngbatunga wirikapai re ni, si adu ni patatamana ka mangaha kina kua agu agude re yo ho du avunguyo ni kinaho watadu ho du kura nyanyaki Kristano ni kinaho watadu ka mangaha rogo gu wene ba du gbayaga. Rogo gi gene re, ka boro adunga na ndupai beni ka berã gbegberẽ berã kuti gupai namanga ya. Ani rengbe kadu na maabangirise nga, kusa, agu avunguagude re nika tinda gayo tindiro atinda Mbori nafuhe fuyo nga ka ngerafuo awiriyo rogo toro yo.

17. Wai du rengbe agude ka ye na wasa?

¹⁷ Agu agude nawirika ka kpinyemu ndikidi Mbori na ka pekafuo gako arugute rengbe ka ye na wasa fu gayo aborokporo. I rengbe ka mangaha wo ni yugo yo irisa fu avunguyo na ni undo yo yo na aũborose. I ima rengba ka fu bakere undo rogo toro yo a. Mbata fu ye Ime Akangbii, tita Sete nangia Remeke anaairiso Yekova. Gu kumba naadu na gako aborokporo ti ni re aya tipa Noa wẽ: “Ani abí wasa be gi ko re rogo gaani sunge na saberani, nga gu naye mbiko gu sende Yekova atiwa ha.” Gu sangbanebi re adigisitihe ho Mbori adi gu motiwa ni kusayo ko atiwa sende na ni. (Bam. P. 5:​29; 8:​21) Agu agude napekafuo ndikidi irisombori rengbe ka ye na wasa fu gayo aborokporo, kini undo aboro dunduko i hi gu fudifudiapai i asusa rogoho na i bati ti regbo guhe kii kisusi Ime Akangbii.

18. Gine rengbe ka undo rani ani du na wingbaduse ka hi agu agberãngbi watadu fudifudiapai dunduko ani agbiatirani na ni?

¹⁸ Kparakpee, berãkurii agu akpiapai du rogo Ziazia Kekeapai, na wene kodatise na ga Yekova aboro naundo amirioni aboro awere i gbia wasa rogo gayo fudifudiapai yo. (Oni gedi Atambuahe 145:18, 19.) Zanga kapa, pa ino ani gupai nga Yekova nga Mburu nyenye wasa nika undo rani ani du na wingbaduse ka hi agu agberãngbi dunduko ani agbiatirani na ni awere na ani ka gbiatirani na ni kumbatayo.