Oni ‘Ngarãsi Aguyo Dunduko Nakpara Kpenunga’
‘Yekova nambedi re ni nzeme mi ngarãsi agu yo dunduko nakpara kpenunga.’—Yes. 61:1, 2.
1. Ginipai Yesu amangihe fu agu aboro nanaakpara kpenunga, na tipagine ko amangihe ti ni?
YESU KRISTO ayaa: “Gi riahe nga manga kina gu pai gu ko akpi nyemu he nakedi re, mi nyasi gako sunge.” (Yo. 4:34) Yekova afu sunge fu Yesu ko mangihe. Ho Yesu aamanga gu sunge re ni, ko ayugu kina gu ngbatunga nyemuse fu aboro Bako ayuguhe. (1 Yoane 4:7-10) Gu mokedi nangia Pauro afura tipa gene sa nga gu Yekova ayugo gako nyemuse ngbaha ho ko agumba gupai ni nga Yekova nga “Mbori wasa dunduko.” (2 Kor. 1:3) Yesu ayugu kina gu bangisa nyemuse re ho ko amangi gupai ni i agumbaha rogo gu sangbanebi du rogo Yesaya. (Oni gedi Yesaya 61:1, 2.) Yesu agedi gu sangbanebi re bambutiria Nazareta yo na ki ya si digisitihe kutiko. (Rk. 4:16-21) Ti regbo ga Yesu sunge tungusapai dunduko, ko anaangarasa agu aboro nanaakpara kpenunga na kini nyakasiyo tipa i gbia zereda berãyo yo.
2, 3. Tipagine si aida apekefuo Kristo wiriki ko ti ni ningarasa yó aboro?
2 Apekefuo Yesu dunduko si aida i wiriki mangapai wa ko ningarasa yó agu aboro nakpara. (1 Kor. 11:1) Pauro ayaa: “Oni zúngadi tironi na akuaroni, ki ninyakasi tironi dagba roni yo, a wa oni namanga a.” (1 Tesa. 5:11) Si naida ani ngarasi aboro awere gbe, bambiko ani naraka rogo ‘gbegberẽ arago.’ (2 Tim. 3:1) Dedede, agu aboro nakpinyemu rurupai rogo zegino dunduko naraka dagba agu aboro nagumba agu apai na kini mangi agu apai naye na rungo gbiati gberarago.
3 A wa gu sangbanebi nga ga Ziazia Kekeapai agumbaha, rogo gi yangara arame re, badungu aboro ‘nakpi kina nyemu tiyo, ki du ni airakpinyemumarã, airaruka, airarekangose, agberẽngba yo, abasasangba avunguyo, atambua nga he ya, airazanga ziaziapai, airasakparakpa, aguaurundika, airasoapai, airazanga rugatise, airaerã, akpi nga nyemu wene pai ya, airabiriki, airanyakari, airaabiatise, nakpí nyemu sangba borose susi nyemu Mbori.’ A wa Ziazia Kekeapai agumbaha, gu gbegberẽ mangaapai nga ga aboro ‘nagberã awere ki susi.’—2 Tim. 3:2-4, 13.
4. Ginipai namanga tipa gbegberẽ apai rogo zegino areme ti gi gaani regbo re?
4 Si aidanga agi apai re iriwo tirani te, bambiko Fugo Mbori nagumba gupai furani ziazia nga, “zegino dunduko du ni zogozogo ho be gbegberẽ ko.” (1 Yo. 5:19) Gu fugo nga “Zegino dunduko,” si nakoda birĩ zogarago, apambori, sunge bagaahe, gbiati takapande apai nga gu du rogo aterevizioni. Zanga kapa, Satana Bakitingbanga nga ‘bakindo zegino’ na ki ngia “mbori gi zegino re.” (Yo. 14:30; 2 Kor. 4:4) Apai nagberã awere kina kumbatayo auru kpotosende bambiko Satana na bakere zinga mbiko ko ini gupai nga kina wiri bete regbo gbua nye tipa Yekova diko kusayo. (Yugo. 12:12) Nairiwo wai duhe nipa ngarasaro ka ino gupai nga Mbori ima mbeda ka dia Satana na gi gako gbegbere sino raka re kusayo, na gu ngbanga Satana akusihe nibipa ga Yekova bakere pagbia, i nika rugusaha!—Bambata Pai, kapita 3; Eyobo, kapita 2
I Natungusa Wene Pangbanga Rogo Zegino Dunduko.
5. Wai gu sangbanebi du tipa sunge tungusapai ada nirengo ti gi yangara areme re?
5 Yesu agumbapai nisangbanebi ki yaa: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.” (Mt. 24:14) A wa Yesu agumbaha, ga Yekova aboro rogo zegino dunduko natungusa wene pangbanga tipa ga Mbori Kindo. Areme, aDezire Yekova bangeyo naima susa 7,500,000, rogo adungurati bangehe naima susa 107,000 namanga gi sunge nga ga tungusapai re. Yesu atungusipai na ki yugupai tipa ga Mbori Kindo, aDezire Yekova namanga kina gu bangisapai re a. (Mt. 4:17) Nisangbana gi sunge re, i nafu wasa fu gu badungu aboro nakpara kpenunga. Vuru agu agarã yo ue susi re, bange agu aboro nazi bapatiza ki dani aDezire Yekova nga 570,601!
6. Ginipai oni aberãha tipa wai gaani sunge tungusapai asona kumbatayo?
6 ADezire Yekova nasa agu abuku awere du mburuhe rii Ziazia Kekeapai kurogo afugo bangehe naima susa 500. Aboro ho namangipai mbata wa gure te! Wa vura duhe nga aDezire Yekova rogo gu zegino Satana azogaha, i zaaza tipa ka manga ga Yekova sunge, na si nasona kina kumbatayo. Ka i ni he ka ya mbiko gu undo nga ga ga Mbori toro na gako rugahe ya, ka si du fuyo nikpakarakpakaraha tipa i manga gi sunge re. Bambiko i natungusa wene pangbanga rogo zegino dunduko, agu aboro nadia gu pangbanga du tipa ga Mbori Kindo re kugume nagbia kina gu bangisa wasa aDezire Yekova agbiaha.
Gu Kura Aboro Rogo Dungurati Ima Rengba ka Fu Wasa Furani
7. (a) Tipagine si aidanga ani berẽ gupai ti ni nga Mbori di agu apai dunduko naba gberarago tirani kusayo awere ya? (b) Wai gu ani aino nga ani rengbe arengba ka hi arungosiro na gberãngbi?
7 Rogo gi zegino hi be gbegbere apai na rungo re, ani nikaa gbiatirani agbia a kindi na agu apai nikaa fuda rani watadu nikaa ba gberarago tirani. Si aidanga ani berẽ gupai nga Mbori di agu apai dunduko naba gberarago tirani kusayo mbata fu ko gberesi gi gbegbere sino raka re te. Sidu, wa ani kaa pido gu uru re, ani nikaa gbia tirani agbia na aʹasada na agu aʹasada re nika yugo singia ani niruru rani fu Yekova na kini songodipa gako bakere pagbia watadu ani wo te. (2 Tim. 3:12) Ono gu undo ani agbiaha na ngarasaro be gu Barani du ngbangbaturũ yo rengba ka undo rani ani du wakina gu Mbedimbedi aKristano naadu Tesaronike yo nga aguyo nahi arungosi na gberãngbi niʹidapase.—Oni gedi 2 ATesaroniko 1:3-5.
8. Wai gu Ziazia kekeapai ayugo gupai nga Yekova nafu wasa afu fu gako amoyambu?
8 Si tie ziazia nga, Yekova nafu wasa afu fu gako aboro ho du yó ni rogo kpakarapai. Nikpiapai, ho gu gbegbere Nakindo nangia Izebere aidi ni ka imo gu nebi nangia Eriya, ko agunde na ko ki oro kusayo. Ko agumba gupai a nga ko naida ka kpi. Ono kuba gupai nga Yekova zingi na Eriya, ko angarasiko na ki fu wingbaduse fuko tipa ko susi kumbatayo na gako sunge anebi. (1 Aba. 19:1-21) Gu kpiapai nga ga agu akristano naadu rogo gu dungurati naadu rogo bambata sa kama agarã nayugo gupai berewe a nga Yekova nafu wasa afu fu gako aboro. Ziazia Kekeapai naya tipa gu dungurati naadu Gariraya yo na Somorona yo wee, i aduadu zezeredi, ki nyaki anyaka. Na “ki ta ta na gunde Gbia na gu wasa nga ga Ziazia Toro, ninge ange.” (Amo. 9:31) Nairiwo gu ngbarago du ani nani tipa wai ziazia toro afu wasa furani!
9. Tipagine rengbe wirikapai tipa Yesu ti ni ka du nipa wasa furani?
9 Wadu ani ni aKristano, ani ima gbia ngarasaro ti wirika ani pai tipa Yesu Kristo na ti peka ani fuo gako kpiapai. Yesu ayaa: “Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni. Oni dí gi gonga ku gorõroni, ki wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni. Bambiko kii nga gi gonga te, na gi tindiro ni aakpura ha.” (Mt. 11:28-30) Ho ani awirikapai ni tipa gu wene gene Yesu anaamangapai ngbaha na aboro na ki asadi ka mangapai wa ko, si nasa gupai nga ka ani dunga na bakere gberarago ya.
10, 11. Ada rogo dungurati rengbe ka fu wasa?
10 Akuarani aKristano ima rengbe a ka fu wasa furani. Nikpiapai, ani bingo wai abaakumba rogo dungurati aundo agu aboro nagbiatiyo na kpakaraapai. Gu bawiriki nangia Yakoba akepai ki yaa: “Gu ni du dagba roni yo na kaza [rogo toro yo]? Ni yámbu ga kanisa abaakumba i ki kpari auru ni.” Sangbana gipai re nga gine? “Gu kpe nga ga idapase abátasa gu ni nakaza, Gbia atúmba ni ku ari; si ngia ni amangi ingaapai, i avù ni avu ti ni.” (Yak. 5:14, 15) Gu kura aboro rogo dungurati ima rengba ka fu wasa furani a.
11 Si nidu fu adee taata i gumba gayo akpakarapai fu akurayo. Gu nyanyaki awirina nga adee naima du na bakere inohe gbe rengbe ka fu wene arugute fu agu parangayo. Si rengbe ka du nga gi nyanyaki adee re aima gbiatiyo na apai wakina gure rogo gayo raka yo. Pa du yó na nunga na gayo wene asino rengbe arengba ka undo agu parangayo gbe. (Oni gedi Tito 2:3-5.) Rengo ngaha nga, abaakumba na kura aboro rengbe arengbe na si naida aida i “nyákasi agu yo nawo” dagbarani. (1 Tesa. 5:14, 15) Na si niwenepai a tipa ani ini gupai nga, Mbori “nafu wasa fu rani rogo gaani gberãngbi yo dunduko, ya ani rengbe na fu wasa fu agu yo du rogo gu gberãngbi yo, mbiko gu wasa Mbori angarasi rani na ni.”—2 Kor. 1:4.
12. Tipagine du nduge ti ni tipa agu adunguratise nga ga aKristano na nyanyakipaha?
12 Gu nyanyakipa gene rengbe ani ka gbia wasa ngbaha nga nduge ku ba agu adunguratise yo nga ga aKristano. Agu atingidapai nga ga Ziazia Kekeapai ani agiaha yo nangarasa rani angarasa. Ani nageda gupai rogo Ziazia Kekeapai nga, aYuda na Sira “ki ngarasi awirina ni dungu apai, ki nyakasi yo.” (Amo. 15:32) Mbata fu gaani adunguratise nga ga dungurati na tifuoho, agu afugo ani agumbaha na awirinarani, si nafu wasa afu furani. Sidu, ka si vura du nga ani narungo be kpakarapai, si naida ani di regbo gbe na akuarani aKristano, bambiko ka ani kpara tirani tiyo, apai nikaa gberã kina kumbatayo. (Snz. 18:1) Kuba kpara ani tirani tiyo, si naida ani mangi gupai gu mokedi nangia Pauro agumbaha ki yaa: “Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani, wa du sino agu yo ya, ono ani rúgu akuarani aruga; ki nimangi he susi, wa bi oni he ya gu uru re si nambeda.”—Eb. 10:24, 25.
Ani Gbia Wasa Rogo Fugo Mbori Yo
13, 14. Rogo gini agene rengbe Ziazia Kekeapai ka fu wasa rani?
13 Singia ani nga agu aKristano naima zio bapatiza watadu ani tona wirikapai tipa Mbori na gako ringbisapai barambeda, ani rengbe arengba ka gbia wasa rogo Fugo Mbori yo. Pauro akepai ki yaa: “Agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.” (Rom. 15:4) Ziazia Kekeapai rengbe ka fu wasa furani na ki sa gupai nga ‘aũ manga wene apai dunduko du berani.’ (2 Tim. 3:16, 17) Pa ino ani rengo tipa ga Mbori ringbisapai na ki du na maabangirise tipa kumbatayo nafu bakere wasa afu furani. Si du tie, ani mangingo sunge amanga gbe na Fugo Mbori na agu awaraga du mburuhe rii Ziazia Kekeapai nga gu rengbe ka fu wasa furani na ki undo rani rogo dungu agene yo.
14 Yesu amoi wene kpiapai furani nimangako sunge na Ziazia Kekeapai tipa ka ruga aboro na ka fu wasa fuyo. Tifuo zinga Yesu bekpio, ko ayugu tiko fu gako abawiriki ue. Yesu azaki Ziazia Kekeapai fuyo. Zanga kapa gipai re aima fu wasa fuyo. (Rk. 24:32) Gu mokedi nangia Pauro apekefuo gu wene kpiapai nangia ga Yesu nimangako sunge na Ziazia Kekeapai tipa kaa sakapai na aboro. Agu aboro nadegetuyo fuko Beroya yo, i “adi pai wenengaĩ ka berã ha, niwisigi Ziazia Kekeapai na uru, si ngia agi apai wo re.” (Amo. 17:2, 10, 11) Si ninyanyakipa pai tipa ani gedi Ziazia Kekeapai na aʹuru dunduko gbiati agu abuku nga ga aKristano nga gu du tipa ka fu wasa na maabangirise furani ti gi kere aregbo ani raka rogoho re.
Gu Kura Agene Berewe Tipa Ka fu Wasa fu Akuarani
15, 16. Gini bete apai rengbe ani ka manga tipa ka undo na ki fu wasa fu akuarani?
15 Badungu apai kinaho rengbe ani ka mangaha tipa ka undo na ki fu wasa fu akuarani. Nikpiapai, ani rengbe ka undo agu awirinarani du nigbinza yó watadu aguyo nawoka nindu ani ka ngbeka agu ahe fuyo i aidaha ba baga ahe yo. Ani rengbe ka undo agu akurayo ti gayo asunge kporo. Si nika yugo gupai nga ani na nyemuyo tirani. (Frp. 2:4) Ani ima rengba ka tambua akuarani tipa gu wene asino du tiyo, wa gu nga nyemuse, wingbaduse, gbiati idapase.
16 Gu kura pai rengbe ani ka mangaha tipa kafu wasa fu sosono aboro nga ka ndu ka biyo na kini degeturani wa i apeka agu apai namangi yó na agu amaku i agbiaha ti manga sunge fu Yekova. Nisangbana gipai re, i rengbe arengba ka ngarasa rani na ki fu wasa furani! Ani rengbe arengba a ka geda Ziazia Kekeapai watadu agu awaraga du mburuhe rii Ziazia Kekeapai fu agu aboro ani andu kaa biyo. Singia ani rengbe ka wisigo gu vovo kekeapai du rogo Ngbaõbambu Sinziri ani nika wisigoho rogo gu poso re naayo watadu ka mbakada Gu Wisigo Ziazia Kekeapai Nga ga Dungurati naayo wa sa. Ani rengbe a ka bi agu avidio naayo ruru kangara moyambu akusaha. Fuo gure, ani rengbe a ka geda agu apangbanga nga gu nafu ngarasaro watadu ka pekapa gu ani agedihe rogo gaani abuku.
17, 18. Tipagine rengbe ani kadu ti ni na kido nga Yekova nika songoda gako ruru amoyambu asongoda na ki ngarasiyo?
17 Ka ani bi gupai nga wirina naida na wasa, ani rengbe ka maa ní rogo gaani akpee yo. (Rom. 15:30; Koro. 4:12) A wa ani kaa sovura kuti gaani akpakarapai rogo raka na kini asadi kakaka kaa fu wasa fu kura aboro, ani nika duadu na ngbatunga gu idapase na kido naadu ti bake papara Atambuahe nga gu ko nayaa: “Mo bá ga tindiro ku auru Yekova, ko asóngoda ro; ko aída nga i gbisi ruru boro wa sa te.” (Tam. 55:22) Nirengo, Yekova nika duadu ho ti aregbo dũ kafu wasa na ki songodi gako amoyambu.
18 Mbori aya fu agu airisiko naadu mbata wee: “Mi, kina re nga gu ko nangarãsa roni.” (Yes. 51:12) Yekova nika manga kina gu bangisapai re furani na ki fu maku kurii gaani apai na gaani afugo wa ani angarasa aguyo nakpara kpenunga. Singia ani na maabangirise ka ga ku ngbangbaturũ yo watadu ka raka auru kpotosende, ani dunduko rengbe ka gbia wasa be agu afugo Pauro ko agumbaha fu agu akurako nangia mbedimbedi aKristano ki yaa: “Gaani Gbia Yesu Kristo tigako, na Mbori nga Barani nakpi nyemu rani ki fu nyenye wasa fu rani na wene maabangirise mbiko undahe, ko ngárasi kpotoroni yo ki ninyakasi he rogo wene mangaapai na wene apai dunduko.” (2 Tesa. 2:16, 17)
Oni Natingidaha?
• Wai gaani sunge nga ga fu wasa fu agu aboro nakpara kpenunga namoipai?
• Gini bete apai rengbe ani ka mangaha tipa ka fu wasa fu kura aboro?
• Gini gopai duho rogo Ziazia Kekeapai nayugo gupai nga Yekova nafu wasa afu fu gako aboro?
[Gu sura du ti kpewaraga 26]
Ya mo oni naafu wasa fu agu aboro nakpara kpenunga?
[Gu sura du ti kpewaraga 28]
Paranga aboro na gu nyanyaki yó dunduko rengbe ka ngarasa akurayo