“Bangiro abi kpotore wa si adu ni iwo ho.”—ATAMBUAHE 139:16
Ya mo Mbori Rugutiko na Agu Apai du Tipa Ro?
GUPAI KUSIKUSIAHE AYUGOHO FURANI
Mo berẽnga kurii gu mbembedi pagume rengbe aboro kadu na ni—gu du bangbanda agu abi du apai tipa yo kina sa. I na gu mbembedi pagume bangbanda yo du ni kparakparaha. Nancy Segal nga nangere kurii gu Ba Wirikapai du Tipa Abi na du nga bi nitiri, agumba gupai nga, “abi na giatiyo wenengai dagbayo na i ima rugatiyo na patiyo wenengai.” Dee sa afura tipa gu pagume du dagba ri na gu kura ri du yo na ri nga abi nga: “Ani ima ino apai naabaha tipa tirani.”
Ginipai du naye na gi ngbatunga kparakpara giatise re? Wisigopai nagumba gupai nga wa vura duhe nga gu ba du yo rogoho gbiati pa sonosa yo nafubee kuti gipai re, gu bangisa kure du rogo agu abi re du, nafubee ni bakerehe kuti gi pai re.
MO MAKIANGA GIPAI RE: Gu boro nakusi rani ima ino rani ni basasa kisusi wai kura aboro na ini rani. Nirengo, gu bake papara Atambuahe nangia Davide atakipandehe ki ya: “Mo naazungure rukumbu nina yo. Kpotore adu nga ni okooko ho ti ro te, ho i amangi re ni rogo gbuko. . . . Bangiro abi kpotore wa si adu ni iwo ho; i ake pa apare dunduko ku rogo ga kitabu.” (Atambuahe 139:13, 15, 16) Kina Mbori sa ini pa gu para kure du tii kpotorani yo na rugutiko wenengai na pa wai ani akuru. Ga Mbori kparakpara inohe tipa rani na pa agu apara kure ani akuru rogoho nafu gu kidohe furani nga ko ima rugatiko na gu futufutuapai du tipa rani dunduko.
GUPAI ZIAZIA KEKEAPAI AYUGOHO FURANI TIPA GA MBORI INOHE
Davide akparikpee ki ya: “Ako Yekova, mo awisigi pa re, ki ini re! Mo ini pa gi sunga na gimi ru ku ari; mo rugu tiro na pa gi berã wa du mo tuturũ. Ako Yekova, mo ngére, mbata fu gumba mi pai ni mirãre, mo niima ina ha dunduko.” (Atambuahe 139:1, 2, 4) Kurigure, Yekova ima ino agu apai du ku kpotorani yo na ko “nawisiga kpoto aboro yo dunduko.” (1 Pekapai 28:9; 1 Samuere 16:6, 7) Ginipai agu averesi re ayugoho tipa Mbori?
Ka si vura du nga ani arengbanga ka gumba agu apai du kpotorani yo dunduko fu Mbori ho ani akparakpee ni te, Bakusirani abingo kina agu apai ani amangaha te ono ko ima rugatiko na ndu gupai ani amangaha ti ni. Kurigure, ko ima rugatiko na gu wenepai ani akpinyemu ka mangaha, zavura ka gaani zangarengba vura ka ká na ani vurũ ti manga gupai kpotorani yo akpinyemu ka mangaha. Nirengo, wa Mbori aima maa nyemuse ku rogo rani yo ni bambataha, ko na nyemu ka bi na ka rugatiko na gaani aberã gbiati ndu gaani mangaapai.—1 Yoane 4:7-10.
Pai ho Mbori nazanga inopai tipaha te. Ko ima inopai tipa gaani arungo zavura ho kura aboro ainongo pai tipa ha ni ya watadu ka rugatiyo na paha
Ziazia Kekeapai nafu kidohe furani nga
“Bangiri Gbia du fuo ruru aboro, na tuko ni haha ha tipa gayo akpe.”—1 PETERO 3:12.
Mbori nakidohe nga: “Mi arába ro ki yugu pai foro ngba gu gene mo ka ndu ngba ha; mi arúga ro ni maa bangire ti ro.”—ATAMBUAHE 32:8.
MBORI NA NUNGA TIKO
Ya mo pa ino ani gupai nga Mbori ima rugatiko na gupai du tipa rani na wai ani aberã rengbe ka undo rani ani sovura kuti akpakarapai? Mo makianga gupai namangi Anna, du Nigeria yo. Ri aya, “Mi adu na kapa singia rẽhe arẽ tipa kaa raka mbiko gu kpakarapai mi adu rogoho. Mi angia dekurugbo kini ngerefuo wire naadu bambungua yo na gu kaza nasa rii agude si nahi na ime, ho i abi re ni na gu kansa nga ga momuse si aaida i gba ha, na mi kini mbiri dungu adawa. Si aima du fere ni mbumbuhe kadu bambungua yo kina ti gu bangisa regbo wire adu yo.”
Ginipai naundo Anna ri sovura na diabese? Ri aya “mi aberãkurii averesi wa gu du rogo AFiripoio 4:6, 7, nga gu naya ‘gu zereda nga ga Mbori nagasi rugatinapai dunduko, si abánda kpotoroni yo na gaoni berã.’ Ai gu regbo gi veresi re aye ku berãre yo, mi natona ka bi tire nga mi mbembedi na Yekova, ni ino mi gupai nga ko ima rugatiko na mi wenengai kisusi wai mi na ini tire. Mi aima gbia bakere ngarasaro a be akuare aidipase du na nyemuse rogo gu dungurati nga ga aKristano.
“Wa vura duhe nga mi kindi nasovura na pa kaza kporo re, gimi kaza gbiati ga wire ima zereda tooni. Bambiko Yekova du kugii rani, ani ima wirika wai ka zanga berã gbegberẽ aberã ho ani agbia tirani ni na akpakarapai. Yakoba 5:11 nakido rani nga: ‘Ya ani ti agu yo naru nyanyaki dati digida pai ya betedi aboro du. Oni agi pa gu zadapase nga ga Eyobo, oni ki bi wai Gbia amangi fu ko ti digidaha, wa du ko na bakere nunga ti ko, na bakere inapai.’” Yekova aima rugatiko wenengai na gupai naadu tipa Eyobo, ani rengbe kadu na gu kido nga kinawo a ko narugutiko na agu akpakarapai ani andu rogoho.