Oni Mbu Agu Aberã Dunduko Kusayo Andunga na gu Inohe Nga ga Mbori Ya!

1. Gini zahe gu mokedi nangia Pauro afuhe fu mbedimbedi aKristano?

GU MOKEDI nangia Pauro afu gu zahe nga, “Ka oni ríngbisi nga tironi na gi zegino re ya.” (Rom. 12:2) Pauro ake agu afugo re fu agu aKristano naadu rogo bambata sa kama agarã. Tipagine ko afu gu nyanyaki rugute re ti ni fu agu akumba na adee naima fu gayo raka fu Mbori na i ki ima mbedayo na ziazia toro re?​—Rom. 1:7.

2-3. Waigu Satana aʹasada ka nyaga rani kusayo ti Yekova, ono waigu rengbe ani ka mbu gu gbegberẽ apai kusayo zi baha berãrani yo?

² Pauro aabaka bangiriko bambiko gupai nga si aawira gupai nga gu gbegberẽ aberãpai gbiati gu dudunguro awisigopai tipa raka ga Satana zegino asongodaha aima du na maapai kurii kura aKristano. (Ef. 4:17-19) Gupai re ima rengba ka manga rani a. Satana nga mbori gi zegino re namangasunge na badungu abirĩ tipa ka nyaga rani kusayo ti Yekova. Birĩ sa dagba agu abirĩ yo ko amangasunge na ni nga ka ani aida kadu na parani ni nyanyakihe watadu ni abaworimo, ko namangasunge na ni tipa ka nyaga rani kusayo ti Yekova. Ko ima rengba a ka asada ka mangasunge na agu apai ani nawirikihe kporo yo, sukuru yo, na be agu aboro du pati rani tipa ka sarani ani naaberã wa ko.

³ Ya mo ani rengbe ka mbu agu apai kusayo du ni ‘nyanyakihe’ berãrani yo? (2 Kor. 10:4) Pauro afu gu karagapai nga: “Ani nabafa aberã, na gu irisiirisi apai dunduko i nakiisa ha kuti gu inahe nga ga Mbori, ki nizozogo aberã dunduko ni zizi he fu giasangba Kristo.” (2 Kor. 10:5) Nirengo, na ga Yekova undo, ani ima rengba ka mbu gbegberẽ aberã kusayo. A kina wai dawa narengbe ka sovura kuti kaza, kinawo a Fugo Mbori narengbe ka undo rani ani sovura kuti gu gbegberẽ aberã nga ga ga Satana zegino.

“MBAKADA BERÃRONI BEREWE”

4. Gini aʹariapai badungu rani amangihe ho ani adi rengo adia ni kugume?

⁴ Mo berẽnga kusayo kuriipa agu aʹariapai si aidi mo mangihe ho mo adi gu rengo nga ga Fugo Mbori adia ni kugume na ki diberã ka iriso Yekova. Badungu rani nambu manga agu apai du ni gbegberẽhe tipa ka iriso Yekova. (1 Kor. 6:9-11) Nairiwo gu tambuahe du ani na ni nga Yekova aundo rani ani dibe gu gbegberẽ apai re!

5. Gini apai ue ARomo 12:2 nafura tipaha?

⁵ Ono tie, si aidanga ani berẽ gupai nga si aidanga ani mangi aʹariapai berewe te te. Wa vura duhe nga ani aima mbu manga gu kere aingapai ani anaamangaha mbata fu ani zi bapatiza, si naida ani naamanga nyanyaki asadatise amanga kindi tipa ka ne ai gupai rengbe ka sarani ani karaga tirani berewe kuti manga gu kere aingapai re. Waigu rengbe ani ka manga gipai re? Pauro akaragapai ki ya: “Ka oni ríngbisi nga tironi na gi zegino re ya, ono oni sá tironi asa ni mbakada berãroni berewe.” (Rom. 12:2) Sidu, apai ue si aida ani mangihe. Bambatapai nga, si aidanga ani ‘ringbisi tirani’ na gi zegino re te watadu si aidanga ani mbu gi zegino re si du na maapai kurirani te. Uepai nga, si naida ani ‘sa tirani’ watadu ani mangi ariapai ni mbakada ani berãrani.

6. Ginipai ani awirikaha ti agu afugo Yesu du ni kekehe rogo Matayo 12:43-45?

⁶ Gu ariapai naadu berã Pauro yo ima susa gupai gbua nga ga manga ariapai ti kpotose. Gu ariapai re nabipa bororani dunduko. (Oni bi gu sanduki nga, “Satise Watadu Kungbo Mangatise?”) Si naida ani mangi ariapai berãrani yo​—rogo gaani abipai, aberãpai, gbiati nyemuapai. Sidu, ani dunduko si aida ani sana tirani nga, ‘Ya mo agu aʹariapai mi amangaha ka wirika Kristo gbua kina ti kpotore watadu mi namanga aʹariapai nzunzu kpotoreyo na berãre yo?’ Gi sanahe re nga nyanyakipa sanahe. Rogo gu ga Yesu afugoyo du ni kekehe rogo Matayo 12:43-45, Yesu ayugu gupai si aida ani mangihe. (Oni gedihe.) Agu afugo re nayugo gu nyanyakipa rengo nga: Anga gupai sa si aida ani mangihe nga ka mbu gbegberẽ aberã kusayo te; si naida ani moi agu aberã kubaha Mbori aida na ni.

“ONI DÚ NI VOVO RONI ROGO GU TORO YO NGA GA GAONI BERÔ

7. Waigu rengbe ani ka aria berãrani na kpotoraniyo?

⁷ Ya mo ani rengbe ka aria berãrani watadu kpotoraniyo nzunzu? Fugo Mbori nakaragapai nga: “Oni dú ni vovo roni rogo gu toro yo nga ga gaoni berã, ki ukadi gu vovo boro, fu yo ni ku sangba Mbori yo na rurupai na ziaziapai nga ga rengo.” (Ef. 4:23, 24) Nirengo, ani ima rengba ka aria kpotoraniyo, ono taatapai ngaha ka mangaha te. Kurapai kinaho si aida ani mangihe susi gu nga ka mbu gbegberẽ nyemuapai gbiati mangaapai. Si naida ani aria ‘gaani aberã.’ Gipai re nakoda aria gaani nyemuapai, gaani asino, gbiati gaani ndu mangaapai. Si naida ani naamanga gipai re amanga kindi.

8-9. Waigu gu pangbanga du tipa kura wirina sa ayugo gupai nga si naida ani mangi ariapai amanga kpotoraniyo?

⁸ Ani bingo kpiapai nga ga kura wirina sa nga guko naadu mbata ni zingizingi boro. Ko anaambira bakere buda na kini ta akpata, ono tingbafuo ko mbu gi sino raka re, ko arẽ tipa ka zio bapatiza, na gipai re ki mangi wene dezirepai rogo gu dagbarago ko anaaraka rogoho. Ono rogo gu kura nyemu sa, ngbutuko tingbafuo zio ko bapatiza, ko agbiatiko na asada nga gu ko aainongo nga ko nika gbiatiko na ni ya. Kura bambiri buda sa aye ku kpuko yo na kini idi ka ta ko. Ti tonatonaha, gu wirinarani re aima ká ka ta kpata na gu kumba re. Ono ho gu kumba re ape gbegberẽ fugo ni tipa Yekova, rago agberẽ ti gu wirinarani re ni kerehe na ka gene adunga berewe ko za tiko ti zinga ya. Sidu, ni yangaraha, ko kini ta gu kumba re. Tipagine ko amangi gipai re ti ni? Wa vura duhe nga gako wisigo Ziazia Kekeapai aima undo ko ko za tiko ti ta kpata, ko aamanganga ariapai rogo gako berã na kpotoko yo te.

⁹ Ono tie, gu wirina re aambunga manga ome tipa ka manga ariapai te. (Snz. 24:16) Mbiko gu undo nga ga abaakumba, ko aandu kindi kumbatayo kaa manga sonakumbatayo. Ko aima ye ki da ni bakumba. Fuani rogo gu kura nyemu sa, ko agbia tiko berewe Bambu Kindo yo na kina gu bangisa asada ko agbiatiko na ni agarã kusayo. Kura bambiri buda sa aaida ka ta bakumba sa dagba agu abaakumba yo gu wirina re adu na yo rogo dungurati. Ginipai gu wirinarani re amangihe? Bara gere, ko afura fu gu bambiri buda re ni umbasitise zezeredi, ki zeresi ngbaduko na ki undo ko ko ga ku kpuko yo. Tipagine gu wirinarani re amangipai ti ni kia bara gere? Ko aima manga ariapai berãko yo na kpotokoyo. Ko aima ye ki da ni ndikidi zezeredi boro na ni boro umbasitise, na gipai re ki ima fu taarimo fu Yekova!

10. Ginipai si aida ani mangihe tipa ka manga aʹariapai kpotoraniyo?

¹⁰ Agi aʹariapai re amanganga gbua ni kina ipo zanga boro mangi ome amanga te. Si ima rengba kadu nga si naida ani mangi ome “nyanyaki” tipa dungu agarã. (2 Pet. 1:5) Agi aʹariapai re arengbanga ka manga mbiko gupai gbua nga ani aima digo ni irisi Yekova tipa gbanga regbo te. Si naida ani mangi bakere asadatise tipa ka manga ariapai kpotoraniyo. Apai kinaho rengbe ka undo rani ani mangi gi ariapai re. Ani wisigingo bete agu apai re.

AGU AGENE RENGBE ANI KA MANGA ARIAPAI NGBAHA BERÃRANIYO

11. Waigu kparakpee aundo rani ani aria gaani berã?

¹¹ Kparakpee nga gu bambata nyanyakipa pai si aida ani mangihe. Si naida ani mangi kparakpee wakina gu bake papara Atambuahe amangihe ki ya: “Ako Mbori, mo fú gigiri kpoto yo ku rogo re yo, ki mbakadi torore berewe ku rogo re yo ni ruru he nyanyaki.” (Tam. 51:10) Si naida ani idi kuti gupai nga si naida ani mangi ariapai amanga berãraniyo na ki sana Yekova tipa undo. Waigu rengbe ani kadu na gu kido nga Yekova nika undo rani aundo ani mangi gu ariapai re? Ani ima rengba ka gbia ngarasaro ti gupai Yekova akidopa mangaha ti rago Yezekere na gu airanyakarii nangia aYisaraere, ko aya: “Mi afú kura ngbaduse fu yo, ki moi vovo toro ku rogo yo yo . . . ki fu ngbadu boro fu yo, [naida ka ya, gu ngbaduseyo nadia ga Yekova rugute kugume].” (Yeze. 11:19) Yekova adu na nyemu ka undo agu aYisaraere re i mangi ariapai, na ko na nyemu ka undo rani a ani mangi ariapai.

12-13. (a) Ringbisihe kuti Atambuahe 119:59, ginipai si aida ani berẽkuriihe? (b) Gini asanahe si aida ani sana tirani na ni?

¹² Berãkuriipai nga gu ue nyanyakipa pai si aida ani mangihe. Ho ani ageda Fugo Mbori ni wenengai na aʹuru dũ, si naida ani di regbo ka berã dudunguro kurii agu aberã si aida ani mbuhe kusayo. (Oni gedi Atambuahe 119:59; Eb. 4:12; Yak. 1:25) Si naida ani ini agu aberãpai rengbe ka sa gupai nga agu aberã nga ga zegino du na maapai kurirani. Si naida ani idi kuti gupai nga arungbura kina tirani si aida ani mangi nyanyaki asadatise ka diabe.

¹³ Ni kpiapai, mo sananga tiro nga: ‘Ya mo gu sino nga ga kpihe kpotoreyo zavura tooni?’ (1 Pet. 2:1) ‘Ya mo rukö tire mbikopa gu ba mi asono rogoho, wai mi awirikipai, watadu gu sunge marã mi amangaha?’ (Snz. 16:5) ‘Ya mo mi nabihe nga pare nyaki kisusi agu aboro adunga na agu ahe beyo du bere ya watadu agu aboro du ngbatungayo kia?’ (Yak. 2:2-4) ‘Ya mo mi na nyemu agu ahe tire ga Satana zegino afuhe?’ (1 Yo. 2:15-17) ‘Ya mo mi nagbia ngbarago ti agu aũngbarago du ni gbegberẽ na zuu rogoho?’ (Tam. 97:10; 101:3; Amosa 5:15) Ka mo karagapai kuti agi asanahe re, mo nika ino agu abangiriba aino si aida mo mangi aʹariapai rogoho. Ho ani adia ni be agu aberã du ni ‘nyanyakihe,’ ani nafu ngbarago fu gu Barani du ngbangbaturũ yo.​—Tam. 19:14.

14. Tipagine duhe ti ni ni nyanyakipa pai furani ka sia wene abakure?

¹⁴ Sia wene abakure nga gu biatapai si aida ani mangihe. Singia ani inihe watadu ani ainongo ho te, agu aboro ani akodatirani na yo na bakere maapai kurirani. (Snz. 13:20) Si nawira gupai nga agu aboro du ani na yo sukuru yo nga agu aboro arengbanga ka undo rani ani naaberã wa gu Mbori aidaha ya. Ono tie, ani ima rengba ka gbia wene aboro i du ni abakurearani ti regbo gu gaani adunguratise nga ga aKristano. Ti regbo agu adunguratise re du rengbe yo ka fõngbaduraniyo kuti “nyemuse na wene mangaapai.”​—Eb. 10:24, 25.

ONI “RÚ NA GAONI IDAPASE NYANYAKI”

15-16. Waigu Satana aʹasada ka aria berãrani?

¹⁵ Ono tie, oni tingidi gupai nga, Satana ima diaberã ka aria gaani berã. Ko namangasunge na ngbatunga aberã dunduko tipa ka gberesa gu wene maapai kurii du Fugo Mbori na ni kurii wai ani aberã.

¹⁶ Satana nandu kindi kumbatayo kaa sana gu bangisa sanahe ko asana Eva na ni ati Edene yo, ko asanahe nga: “Ya mo rengo du nzunzu nga . . . ?” (Bam. P. 3:1, NW) Rogo gi zegino du ni zogozogoho be Satana re, ani ninaagia agu asanahe dedede nga: ‘Ya mo rengo du nzunzu nga Mbori aidanga gupai nga kumba di kurako watadu dee di kurari te? Ya mo rengo du nzunzu nga Mbori aidanga mo irisi Krisimasi gbiati auru batika te? Ya mo rengo du nzunzu nga Mbori naida gupai nga mo ká dia kure kuti kpotoroyo? Ya mo rengo du nzunzu nga Mbori aidanga mo kodi tiro na gu gamo aboro i nakusiyo kusayo rogo dungurati te?’

17. Ginipai si aida ani mangihe ka si du nga boro sana rani na sanahe tipa gaani aida tipa ka asada ka sarani ani du na kapa kutini, na ginipai AKorosaio 2:6, 7 ayugoho nga si rengbe kadu ni surungbaha?

¹⁷ Si naida ani idi kuti gaani aida zanga kapa. Ka ani abingo akaragapai kuti gu nyanyakipa asanahe du tipa gaani aida ya, ani ima rengba kadu na akapa singia gupai ani naidi kutini nga rengo. Agu akapa re ima rengba ka gberesa berãrani na ki gberesipa gaani idapase. Ginipai tie si aida ani mangihe? Fugo Mbori nape gupai furani nga ani aria berãrani, tipa gupai nga ka inopa gu he ni tirani nga ga “Mbori nyemu he du ni wene he, nzunzu, ni ziazia ha.” (Rom. 12:2) Ka ani amanga wisigopai dedede, si nika sarani ani ini gupai nga agu apai ani awirikaha rogo Baibiri yo nga rengo. Si nika sarani ani idi kuti gupai nga ga Yekova arugute ni ruruhe. Fuoho, wakina gu ngua atarãha narimi ti sende wenengai, tarãrani nika du ni nyanyakihe na ani ki ‘rú na gaani idapase nyanyaki.’​—Oni gedi AKorosaio 2:6, 7.

18. Ginipai nika banda rani be gu gbegberẽ maapai kurii nga ga gi ga Satana zegino re?

¹⁸ Anga kura boro ho rengbe ka sa gamo idapase si du ni nyanyakihe te. Sidu, mo niindu kumbatayo kindi kaa manga ariapai rogo gamo aberã yo. Mo niikpari fu Mbori dedede; mo niikpari tipa gu undo nga ga ga Yekova ziazia toro. Mo niiberẽ kuriipai nyanyaki; mo niiwisigi gamo aberãpai gbiati ndu mangaapai dedede. Mo zi wene abakure; mo sia wene abakure nga aguyo nika undo ro tipa mo aria gamo aberãpai. Ka mo mangihe wo, mo nika diabe gu gbegberẽ maapai kurii nga ga gi ga Satana zegino re na ki ‘bafu aberã, na gu irisiirisi apai dunduko i nakiisa ha kuti gu inahe nga ga Mbori.’​—2 Kor. 10:5.