Oni Ini Gipai Re?

Gini sunge aburuku anaamangaha ti agu aregbo i aakeka Ziazia Kekeapai ti ni?

TI AGU aregbo i aakeka Ziazia Kekeapai ti ni, buruku anaangerafuo ga kura boro riikporo watadu gani ahe. Gu pa-Ebere na pa-Giriki i asaha nga “buruku,” i ima rengba ka saha ti kura aregbo nga bangerekurii apai watadu bangerekurii kporo.

Ho Yosefa nangia wiri Yakobo adu ni ni kanga Ezipeta yo, Yosefa ada ni bangerekurii ga bairako kporo. Gu baira Yosefa nangia Ezipeto re ‘ambupa agu ahe dunduko nadu be ko ku be Yosefa.’ (Bam. P. 39:2-6) Kusa, ho Yosefa ada ni ni nyanyaki bazogo Ezipeta yo, ko amoi buruku ninaangera kurii kpuko.​—Bam. P. 44:4.

Ti rago Yesu, agu aboro naanidu na arago beyo anaaraka ti aregbo dunduko rogo agu agbata naanidu tuturũ ti gayo aba sopabino. Sidu, agu aboro naanidu na arago beyo re anaamaa aburuku tipa i naangera kurii agu asunge amangisunge anaamangaha rogo agu arago re.

Gini ngbatunga boro nani rẽ kadu ni buruku? Gu bakeapai nangia Korumera ni boro Roma rogo bambata sa kama agarã afu gu rugapai nga gu moyambu i anaamaa ni ni bangerekurii apai watadu ni buruku, si anaaida ni du ni gu boro “naima ino ka manga gu sunge re wenengai.” Si anaaida ni du ni gu boro “nanaamaaberã ni tipa gupai nga amangisunge nimangisunge, ono ni anaamanganga yo gbegberẽ te.” Ko ape gu kurapai berewe nga: “Gupai paha anyaki kisusi fu buruku angia si aaidanga ni berẽ gupai nga ni ima ino apai dunduko te, na si anaaida ninaaida ti aregbo dunduko ka wirika vovo apai.”

Fugo Mbori namangasunge na gu kpiapai nga ga buruku gbiati gani sunge tipa ka yugokpia bete agu asunge namanga rogo dungurati. Ni kpiapai, gu mokedi nangia Petero angarasi aKristano i mangisunge na gu tandu mangaapai Mbori afuhe fuyo tipa ka ‘manga pa akurayo na ni, wa wene ababanda gu dungu agamahe nga ga Mbori.’​—1 Pet. 4:10.

Yesu nitiko amangisunge na gu kpiapai nga ga buruku rogo gu kpiapai yo du ni kekehe rogo Ruka 16:1-8. Kurigure, rogo gu sangbanebi yo du tipa gupai nikaa yugo padu Yesu ni Bakindo, ko afu gu kidohe fu apefuoko nga ko nika maa “kangara moyambu,” watadu “kangara buruku.” Si adu nga gayo meme sunge nika ngia kaa fu riahe nga ga toro dunduko fu apefuo Kristo ti yangara arame. (Mt. 24:45-47; Rk. 12:42) Ani na tambuahe nga ani nagbia agu awaraga ruru buruku akusaha na kini sa gupai nga aboro naagbiaha rogo zegino dunduko.