Nyanyaki Dezirepai Nika Manga Fu Aboro
1. Kupati gu gumbapai nika manga, gini kurapai rengbe ka ngba ti agu aboro nika ye tipa Tingida Pakpio Yesu? Oni sakinga rogoyo.
1 Ti gini regbo? Si nika manga rogo gu yuru Tingida Pakpio Yesu nikadu rogoho. Bakere asadatise ima manga tipa ka yamba aboro i ye kadu na ani pati gipai re. Anga kina agu apai agu agino re nika giaha nikangia agu apai nika ngbatiyo sa te. Fuo ye kura dee sa kupati Tingida Pakpio Yesu, ri afura tipa wai ri abi aboro dunduko i nimangi apai rogo wene sino, na gu bawene gigiri bambu nga gu abaundosunge afu tiyo tipa ka duaha na kini ngere fuani. Sidu tie, ani dunduko kodihe na bagumbapai sia aida ani kodi berani tipa ka manga dezirepai rogo gu nyanyakipa uru nga ga garã re.—Ef. 4:16.
2. Wai rengbe ani nibasasa ka manga dezirepai fu agino?
2 Oni Fu Sene Fuyó Zaaza: Ka ani amoma ku ngbayo na kini fu sene fuyó zaaza, gure nikangia dezirepai fuyó. (Yo. 13:35) Ka si vura du nga oni arengbanga ka fu sene fu aboro dunduko te, oni rengbe arengba ka fu sene zaaza fu agu aboro susungu pati roni na ki gumbapa tironi fuyó. (Eb. 13:1, 2) Oni ngereke tipa agu agino ainongo boro kandara sa ya. Si rengbe kadu nga i agbia yambahe ti regbo gu tua namangi. Oni rengbe ka sanahe nga, “Gere nga bambata regbo furoni oni da ane?” Oni yambu yó i sungu kina pati roni, na oni ki asadi ka karagapai kuti agu asanahe kadu ngbayo. Kangia si naida gaoni dungurati kuru niipo tipa ka mbu ba fu kura dungurati si tona gaha dunguratise, oni rengbe naya fuyó wee: “Mi naida ka ino gu bipai du oni nani tipa gi mbakadapai re. Ya mo gene ho rengbe mi ka gbia roni berewe?”
3. Wai rengbe ani ka dia agu aboro niima zera rogo toro yo kugume?
3 Oni Di Agu Aboro Niima Zera Rogo Toro yo Kugume: Zanga kapa, agu abatungusipai niima zera rogo toro yo nika yeaye, kodihe na aguyo naambu kodatiyo na dungurati ono kini yeaye tipa Tingida Pakpio Yesu na agarã dunduko. Oni di yó kugume, na ki sayo i ini gupai nga oni na ngbarago tipa ka biyo berewe. (Rom. 15:7) Si naida abaakumba ndu ku kpuyo yo niipo tifuo Tingida Pakpio Yesu tipa ka ngarasa yó tipa wa ka i aye dedede tipa adunguratise. Ani namaabangirani nga gu dungu aboro nika ye re, ngbaduyó yo fõnga yó afõ i fu taarimo fu Mbori angianga mbiko kina agu apai i nika giaha ya, ono mbiko agu apai i nika bihe mbiko ‘gaani wene mangapai.’—1 Pet. 2:12.