Oni Di Yó Kugume!
1. Gini regbo nafu bawene momu tipa manga dezirepai, na tipagine?
1 Regbo ho nafu bawene momu furani ani mangi dezirepai susi regbo Tingida Pakpio Yesu te. Oni bingo: Rogo gi garã re, aboro susi amirioni bawe nikaye kadu pati Tingida Pakpio Yesu na ani na ki gi pa gu bakere nyemuse Yekova Mbori na Yesu Kristo ayuguhe tipa rani. (Yo. 3:16; 15:13) I nika inopa agu amaku rengbeyo ka gbiaha mbiko gu gamunihe nga ga Yekova. (Yes. 65:21-23) Ono tie, anga kina bagumbapai sa nika manga dezirepai rogo gu uru re te. Agu aboro dunduko nikadu pati gu dunguratise re duna momu beyo ka manga bakere dezirepai nidia yó agino kugume wenengai.—Rom. 15:7.
2. Wai rengbe ani ka dia agino kugume?
2 Kuba gupai nga ka ndu kini sungu zezeredii tipa kaa pido dunguratise si tona, si ngba angba ka oni yugu tironi fu agu aboro du pati roni. Agu aboro ye rengbe arengba kadu na gunde watadu bakabangirise. Gaani wene fugo naayo na wene sene rengbe ka sa ngbarago tiyo i ki sungu zezeredii. Tipa ka ino singia boro aye mbiko gupai nga i afu waraga yambahe afu funi, oni rengbe ka sana ní nga gani bambata regbo du ní ye tipa gaani dunguratise watadu ya mo ní ini boro herẽ. Oni rengbe arengba ka ya funi a oni sungu na ní sa na kini bi averesi rogo gaoni Ziazia Kekeapai na ní na kini bibia rogo bangisa buku. Ka si du nga oni nika manga gaoni dunguratise Bambu Kindo yo, oni rengbe arengba a ka ta na ní ka sakapa agu apai du Bambu Kindo yo funi. Fuo gumbapai, oni ya funi oni na nyemu ka karagapai sa gu sanahe kadu ngbani. Ka si du nga si naida gaoni dungurati ga niipo tipa ka mbu ba fu kura dungurati, oni rengbe ka yaa: “Mi na nyemu ka ino wai mo nabi gi dunguratise re. Ya mo gene ho wa ka mi biro berewe?” Fuoho, oni ki asadi ka ndu kuti gu mbakadapai oni namangihe. Abaakumba nikadu adu na nyemu ngarasa agu abatungusipai naima zera nga aguyo ye tipa Tingida Pakpio Yesu.
3. Tipagine duhe ti ni ninyanyakipa pai ani di agu aboro kugume nikaye tipa Tingida Pakpio Yesu?
3 Tipa dungu agino, gere nikangia bambata regbo i hĩa gu ngbarago, zereda, na kodatise nga ga gu paradizo nga ga toro nga gu du ga Yekova aboro rogoho. (Tam. 29:11; Yes. 11:6-9; 65:13, 14) Ginipai agino nika ga nani riyo yo? Gure nika ru gbe kuriipa wai ani nika dia yó kugume.