“Oni Dú Zezeredi na Aboro Dũ”

1. Gini bangua rugute nga ga Ziazia Kekeapai rengbe ani ka mangasunge nani ho ani agbia agu airakporo ni angbanga rago tiyo na gaani pai ya?

¹ Ga Yekova aboro nakpinyemu zereda, na gaani sunge tungusapai natakapande pa zereda. (Yes. 52:7) Ti kura aregbo, ho ani ata ni rogo akporo, ani nagbia kura aboro nga aguyo rago angbanga tiyo na gupai ani atungusaha ya. Ginipai rengbe ka undo rani ani du zezeredii na aboro ti regbo apai wa gure?—Rom. 12:18.

2. Tipagine duhe ti ni ninyanyakipa pai furani ani du na dudungurobipai?

² Oni Du na Dudungurobipai: Wa vura duhe nga kura aboro naazinga bambiko gupai nga i aidanga na rengo te, kurayo rengbe kaa zinga tipa kura nduapai angianga mbiko gupai ani atungusaha ya. Si rengbe kadu nga ani ye fuoni ti gu regbo adunga ní wenengai ya. Irakporo rengbe kadu na gberãrago mbiko gu fudifudiapai nagbia ní. Ka si vura du nga wene pangbanga du sa gupai nga ní zingi, si naida ani tingidi gupai nga ní zingi bambiko gupai nga i aima nanga ní. (2 Kor. 4:4) Du na dudungurobipai rengbe ka undo rani ani nye zezeredii na ki ini gupai nga ani du ní nazingi mbiko rani te.—Snz. 19:11.

3. Wai rengbe ani ka yugo irisa fu irakporo?

³ Oni Yugu Irisa: Dungu agu aboro du rogo gaani adagbarago na agu aida tarãha naima nyaka rogoyo yo. (2 Kor. 10:4) Rengo kina beyo ka sia singia i naida ka gia gupai ani apehe watadu i aidanga ka gia te. Si aidanga ani naabi ga irakporo aida na umbapaha te na si aidanga ani sa ní ní berẽ gupai nga ní ainongo pai te bambiko ani ima ino Ziazia Kekeapai susi ní te. Ka boro ya furani ani guari kpuni, si naida ani irisi ní ki guari.

4. Rogo gupai yo nga ka fura na undahe nga gine?

⁴ Oni Naafura na Undahe: Ka aboro vura kaa gumba gbegberẽ afugo furani, si naida gaani karagapai du zezeredii na undahe. (Koro. 4:6; 1 Pet. 2:23) Kuba gupai nga ka rimo kurogo paya, si naida ani gbata gupai idi ani kutini dunduko na ní. Ani rengbe arengba ka sana ní zezeredii tipa ndu gupai ní atikango ti ni. Tipa kambu imisa ní kumbatayo, gupai ngba nga ka rugusa fugo na ní.—Snz. 9:7; 17:14.

5. Gini aundo rengbe ka ye mbiko du ani zezeredii gene tungusapai yo?

⁵ Ka ani du nizezeredi rani, irakporo rengbe arengba ka tingida pa wai ani aafura funi ki degetuni adega ka kura boro ndu ka tungusapai funi. (Rom. 12:20, 21) Ka ní vura ru nyanyakii nga ní aidanga na rengo te, ní rengbe arengba kada nikura uru ni wirinarani. (Gara. 1:13, 14) Ka si vura du vurũ nga ní aidinga na rengo te, ani nika fu taarimo fu Yekova na ki fongo gaani yugopai ka ani kakuti gaani rugatise na kidu zezeredii na aboro.—2 Koro. 6:3.