Oni Wiriki gu Kpiapai Nga ga Anebi—Zefania
1. Rogo gini gene Zefania amangisunge ni nebi, na wai du ko ni wene kpiapai furani areme?
1 Rogo bebere saba kama garã M.B.K., i anaairiso Bara Yuda yo gbayaga. I aimi gu gbegberẽ Bakindo nangia Amona barambeda, na fuani gu paranga Bakindo nangia Yosiya ki tona zogarago. (2 Peka 33:21–34:1) Ti gu regbo re, Yekova amoi Zefania ko takipande pa Gako sapangbanga. Wa vura duhe nga Zefania adu rogo gu tunga naazogarago Yuda yo, ko apenga pa ga Yekova sapangbanga kurii gu zogarago nangia ga Yuda wa guhe gbua paha adu kusende te. (Zef. 1:1; 3:1-4) Wakina gure a, ani namanga nyanyaki asadatise ka wirika ga Zefania wingbaduse na ki zanga mbu agumerani i gbirisipa gaani iriso fu Yekova. (Mt. 10:34-37) Gini pangbanga Zefania atakipandehe, na sangbanaha angia gine?
2. Ginipai si aida ani mangihe tipa i õko rani ti regbo ga Yekova zinga?
2 Oni Gbata Yekova: Kina Yekova sa rengbe ka batasa aboro ti regbo gako zinga. Sidu, Zefania azungodi agu aboro naadu Yuda yo i gbata Yekova, i gbata rurupai, na ki gbata umbasitise rogo gu yangara regbo nanye. (Zef. 2:2, 3) Kina gu bangisapai re du ti gi gaani regbo re. A wakina Zefania, ani nangarasa aboro i gbata Yekova, ono si naida ani mangipai amanga tigaani a, si naida ani diberã ka zanga ‘karaga tirani kusayo ti peka Yekova.’ (Zef. 1:6) Ani nagbata Yekova niwisigo ani Fugoko wenengai na kini kpari fuko tipa ko niinungusi rani. Ani nagbata rurupai niraka ani gu raka du ni gigirihe. Ani nagbata umbasitise nira ani kutii be Mbori na kini di gu rugahe nga ga ga Yekova riigbu kugume.
3. Tipagine si aida ani du ti ni na wene bipai rogo gaani sunge tungusapai?
3 Wene Sangbanapai: Ga Zefania pangbanga sapangbanga aima fõngbadu bete agu aboro naadu Yuda yo, wa Yosiya, nga guko naatona gbata Yekova mbuko kindi ni wiri paranga. Kusa, Yosiya agbarasi agu akpiahe dunduko naadu rogo gu ringara ko adu rogoho. (2 Peka 34:2-5) Areme, wa vura duhe nga gu kura tunga nga ga Kindo natiwa pangba gene, dagba ambia, watadu dagba akiwe, kura gu kinaho a natiwa ku rogo mbudu sende kini zuku azuka nirengo. (Mt. 13:18-23) Ani na kido nga Yekova nikaa fu maku afu kindi kurii gaani asadatise wa ani ami gu tunga nga ga Kindo ti aregbo dũ.—Tam. 126:6.
4. Tipagine si aida ‘ani naasungudo Yekova’ ti ni?
4 Kura aboro Yuda yo aberẽ gupai nga pai ho Yekova nika mangaha te. Ono tie, Yekova akido aboro dunduko na gupai nga gako uru aima mbeda. (Zef. 1:12, 14) Kina agu aboro sa nagbata bagbuko rogo rimo Yekova yo narengbe ka bata. (Zef. 3:12, 17) Wa ani ‘asungudo Yekova,’ ani gbianga ngbarago agbia nimanga ani sunge ni kodikodi rani na agu akuarani ani airiso gaani bakerepa Mbori na yo!—Zef. 3: 8, 9.