Ginipai Nzunzu Rengbe ka Sa Ro Mo Gbia Wene Raka Kumbatayo?

GUPAI DUNGU ABORO NAIDI KUTI NI

SOROKA NA AKEREKURU: Kura aboro idi kuti gupai nga, pa gayo raka kumbatayo narurii pa wai akerekuru atangara tira ti regbo vunga yo. I nandu fuo agu aboro namanga soroka na akerekuru, tipa ka ino ginipai nika manga fuyo kumbatayo na ki ne gupai du ni kerehe watadu ka ino wai rengbe yo ka du na diabese.

AGUMBA SANGBAATORO: Kura aboro idi kuti gupai nga pa sana yo agu aboro nagumba sangbaatoro rengbe ka undo yo i ini ndu gupai apai amanga yo ti ni na gupai rengbe yo ka mangaha tipaha. Nibasa fuo inoyo ndu gupai re, i ima rengba ka ne gu kpakarapai rengbe ka ye kuti yo, ka gbia ziga tipa gayo kpakarapai na kidu na diabese.

IRISO ATITASE: Kura aboro idi kuti gupai nga, si naida i niirisi atitayo tipa ka gbia bandahe na maku. Van,a naraka Vietnam yo, aya, “Mi idi kuti gupai nga pa iriso mi agu atita re naima kpiko nika sa re mi gbia wene raka awere na ki gbia wene raka tipa re na awire kumbatayo.”

VUNGA BORO BEREWE: Dungu aboro nabi raka nga si anyasanga te, i nabihe nga aboro nata kpi i kini vunguyo avunga berewe. I idi kuti gupai nga, wenepai watadu gbegberẽpai namanga awere fu boro mbiko gupai ni amangihe rogo gu raka ni naadu kusayo.

Ono tie, dungu aboro nabi gi ida re nga si nga sangbaatoro. Wa vura duhe wo, aboro kindi namanga agu apai du wa gumba agu apai du kumbatayo, sunge abinza, maa ngua, watadu asada ka fura na kpikpi aboro gbiati gu kura apai. Isoke i naberã gupai nga, pa mangayo agi apai re ima rengba ka undo yo i ini agu apai du tipa yo kumbatayo.

ASANGBANAHA NGA GINE?

Ya mo agu aboro idi kuti gi ngbatunga aida re na kini mangihe gbia wene raka awere na kumbatayo?

Oni bingo gu kpiapai du tipa Hào, nga gu ko naraka Vietnam yo. Ko atona kaa mangasunge soroka na akerekuru, sangbaatoro gbiati iriso atitase tipa si undo ko. Ya mo ko adu na diabese? Hào aya, “Pa gimi sungemarã agberẽ, mi ki ti ku rogo bape, kpakarapai kidu rogo gimi ngbadimokporo, na mi ki du na bakere gberãrago.”

Qiuming, naraka Taiwan yo, aima ida kuti soroka na akerekuru, vunga boro berewe, sunge abinza, sana sangbaatoro gbiati iriso atitase. Fuo ko wisigi agi aida re wenengai, ko aya: “Mi aye ka rugatire na gupai nga, ngbatunga agi ayugopai na asino re natagbaga tihe atagbaga na si ni vunduvunduhe. Mi aye ka ino gupai nga, agu apai agu aboro ni naasoroka dedede na akerekuru apehe ni naadanga dedede ti rengo te. Ni bi gupai du tipa vungayo boro berewe, ko asana tiko nga, ka si dunga boro arengbanga ka tingida agu apai ni amangihe kusayo te, waigu rengbe ni ka manga ariapai na ki mangipai wenengai rogo gani vovo raka?”

Wakina wai Hào, Qiuming, gbiati gu kura dungu aboro naye ka rugatiyo na ni, pa gaani raka kumbatayo arunga riipa momu, akerekuru, agu atitarani nakpiki, watadu pa vungayo rani berewe te. Ya mo gere nayugo gupai nga, wiripai ho rengbe ani ka mangaha tipa gaani raka kumbatayo te?

Dungu aboro naberã gupai nga, tipa ka gbia wene raka kumbatayo, si naida i wiriki bakere wirikapai na ki gbata aũkumuko. Gini sangbanaapai mangi fu agu aboro namangi gi siapai re?