WAI KA DIABE SOGOTE

1 | Ka Mo Kparanga Aboro Ya

Gupai Baibiri Ayugoho:

‘Mbori akpara nga aboro te, ono dagba rika aboro yo dunduko [agu aboro dunduko] nagunde ti ko, ki nimangi rurupai, kina yo ngba ti ko.’—AMOKEDI 10:34, 35.

Gupai gi Veresi re Ayugoho:

Yekovaa asaranga ngbanga rani kuti gaani ringara, ngbatunga rani, rangi kpotorani, watadu sinorani te. Kuba gure, ko na maaberãko gbe kuti gini ngbatunga boro nga ani kpotorani yo. Baibiri nagumba gupai a nga, “aboro nabi kina gu tama boro du ti kpotoni, ono Yekova nangera ku kpoto aboro yo.”—1 Samuere 16:7.

Gupai Rengbe Mo ka Mangaha:

Wa vura duhe nga ka ani iningo gupai du kpoto boro yo te. Ani ima rengba ka wirika Yekova nizanga ani kpara aboro. Mo asadi ka bi aboro niba kiakia angianga ni abadona yo ya. Ka mo bi gupai nga mo na iraira bipai tipa gu kura aboro, isoke agu aboro du rangi kpotoyo watadu du gayo ringara kia—mo kpari fu Mbori ko undo ro mo di gu gbegberẽ bipai re rogoroyo kusayo. (Atambuahe 139:23, 24) Ka mo sana Yekova nzunzu tipa ko undo ro ka mo dunga na gu sino nga ga kparakaro ya, mo ima rengba kadu na gu kido nga ko nika gia gamo kparakpee agia na ki undo ro.—1 Petero 3:12.

a Yekova nga rimo Mbori.—Atambuahe 83:18.

“Zereda aadunga dagba re na pusi boro mbata te . . . Mi adu awere ni papara agu awirina du rogo zegino dunduko.”—TITUS

Gu Pangbanga Namangi Amanga—TITUS

Diabe Sogote

Kumba du rimoko nga Titus adu na bakere zinga tipa agu andiko nangia ga kparakaro, mbiko gipai re ko akodi tiko na gu kura aboro zuu naadu na kina gi bipai re. Ko aya: “Ani anaandu ku rogo agu ba gbatayo i anaaidanga na bi aboro rogoho ya, wa agu aba nga abambu rame ti marã na aba mbira buda tipa ka zubo kpata.” Titus ape gupai nga gu bakere sogote naadu rogokoyo anaasa ko ko du na bakere zinga, na ko ape kura pai nga: “Mi anaatona kpata nibasa na gu boro zangagiatise anaakura dagbarani na ni singia kumba watadu dee.”

Titus atona ka aria asinoko ti gu regbo ko atona ka wirika Baibiri na aDezire Yekova. Ho ko agedi Baibiri ni, si adu na bakere maapai kurii ko. Gupai nazi ngbadukoyo gbe angia gu kidohe du tipa gu zegino du kumbatayo nga gu i afura tipaha nga “kpio adú nga berewe te, rungo adú nga yo na akpe na ima a te.”—Yugoti 21:3, 4.

Ti tonatonaha, Titus asota asota tipa ka kusa gu sino nga ga sogote kusayo rogoko yo. Ko aya: “Si adu niba mbumbuhe fere tipa mi aria gu gene mi aaberã ngbaha na kini mangipai.” Ono ko agbia undo ti gupai ko awirikihe rogo Amokedi 10:34, 35 nga gu nafura tipa Mbori nga ko akparanga aboro te.

Sangbanaha angia gine? Titus aya: “Ho mi abi gu nyemuse ni aDezire Yekova aayugoho fu akurayo zanga bi pa rangi yo, mi aidi kuti gupai nga i du na ndikidi pambori be yo. Zavura mbata fu mi zi bapatiza ki da ni Dezire Yekova, pisi boro rogo dungurati ayambu re ku kpuko yo a tipa riahe. Si adu fere wakina musumo. Zereda aadunga dagba re na pusi boro te. Ono awere, ani aririahe wa sa kpuko yo. Mi adu awere ni papara agu awirina du rogo zegino dunduko.”