WAI KA DIABE SOGOTE

4 | Mo Dibe Sogote Mbiko Ga Mbori Undo

Gupai Baibiri Ayugoho:

“Zuzu Toro nga nyemuse, na ngbarago, na zereda, na hipai, na mangapase, na weneringise, na du ngangarã, na zera, rugatise.”—AGARATIO 5:22, 23.

Gupai gu Veresi re Ayugoho:

Ani rengbe ka nyasariipa sogote kina mbiko gu undo sa nga ga Mbori. Gako ziazia toro ima rengba ka undo rani ani du na gu zuzu toro ani arengbanga ka gbiaha mbika gaani ome ya. Kuba gupai nga ani asadi ka nyasariipa sogote nitirani, si naida ani kido kuti gu undo Mbori afuhe. Ka ani kido kuti ga Mbori ome, ani ima rengba kadu wakina gu mokedi nangia Pauro naya: “Mi rengbe na manga apai dunduko rogo gu ko nanyakasa re.” (AFiripoio 4:13) Nirengo, ani aduadu na rengba ka ya “Gi undahe naye be Yekova.”—Atambuahe 121:2.

Gupai Rengbe Mo ka Mangaha:

“Yekova ima aria re ti du ni kere zingizingi boro kuti zezeredi boro.”—WALDO

Mo kpari fu Yekova na ki sanako tipa gako ziazia toro. (Ruka 11:13) Mo sana ko ko undo ro mo du na wene asino rogo gamo raka yo. Mo wisigi Baibiri tipa agu asino rengbe ka undo ro mo dibe sogote, wa gu nga nyemuse, zereda, hipai, na zatise. Mo gbata agu agene rengbe mo ka yugo agu asino re ngbaha rogo gamo raka yo. Na mo nikodi tiro na agu aboro naida ka sonosa ngbatunga agu asino re. Ngbatunga agu aboro re ima rengba ka ‘nyakasa ro kuti nyemuse na wene mangaapai.’—AEbere 10:24.

Gu Pangbanga Namangi Amanga—WALDO

Ko Adibe Kere Sogote

Kumba du rimoko nga Waldo asusi rogo dungu kpakarapai ho ko aasona ni. Ko aya: “Ani anatakpata dedede na gu kura abadona nanaadia kere angua kuti kpotoyo yo . . . Ti gu kura regbo sa, i afu marã fu kumba naana imo aboro ko imi re, ono mi abati beko kpokoto na kina bete aoro tire.”

Waldo aadunga na ngbarago ho diako atona kaa wirika Baibiri ni na aDezire Yekova te. Ko aya: “Mi aima soga aDezire Yekova na bara dunguhe wo mi anaata ngbare kuriyo. Ono i anaakaragapai dedede zezeredi.”

Fuo bete regbo kusa, Waldo atona wirika Baibiri a. Ko aya: “Si aadunga taata fere mi mangi gupai mi aawirikaha te. Mi abi tire nga gene adunga bere tipa mi mbu zinga te.” Ono gupai ko awirikihe rogo Baibiri yo aundo ko ko mangi ariapai rogo gako raka yo.

Waldo aya: “Rogo kura uru sa, gu wirina nawirikapai na mi rimoko angia Alejandro, asana re mi gedi AGaratio 5:22, 23. . . . Alejandro asaki gupai fere nga mi arengbanga ka sonosa agi asino re ngba gi ome te, ono mbiko ga Mbori ziazia toro. Pa ino mi gi rengo re aundo re mi ini gupai nga mi ima rengba ka diabe gimi zinga!”

Waldo adu na rengba ka mbu soga kura aboro mbiko ko ambu Mbori ko undo ko. Ko aya: “Kina ngba agumere na kura abakureami ni naazera ka bi gu ariapai mi namangihe.” Ko agbia kura pai kutini nga: “Yekova ima aria re ti du ni kere zingizingi boro mi du ni zezeredi boro.”