Mo Gbia gu Nyanyakipa Ahe Nga ga Toro mo Narengbe ka Mangapai Kutini

Ho ani ageda Baibiri ni, ani ima rengba ka ngera tipa gu nyanyakipa ahe nga ga toro nimanga ani wetekapai. Ono waigu rengbe ani ka gbia undo ti ni ni bakerehe?

Mo weteke dungu apai nimaa mo berãro kuti gu futufutuapai du tipa agu apangbanga nga ga Baibiri. Ni kpiapai, mo asadi ka ino da nake gu pangbanga re, ni akehe fu da, na ni akehe ti gini regbo. Gini apai naamanga ho ni akehe ni, ginipai namangi mbata fu ni kehe, na ginipai namangi fuo ni kehe?

Mo berẽkurii agu apai rengbe mo ka wirikaha nimanga mo wetekapai tipa asanahe wa: ‘Waigu agu aboro mi agedapai tipa yo re adu? Gini asino i ayuguhe? Tipagine si aida gupai ti ni nga mi wiriki agu asino re watadu mi ne sonosaha?’

Mo mangipai kuti gupai mo nawirikihe, isoke gene gamo sunge tungusapai yo watadu rogo gamo mangaapai yo na kura aboro. Ni manga mo gipai re, mo nayugo ga Mbori tatamana a wa gu Baibiri apehe nga: “Agu yo du na tatamana ti yo, i agía agi apai re.”​—Tam. 107:43.

• Berãpai: Mo bingo wai gu papara dunguratise nga Aũkumuko Rogo Fugo Mbori Yo nga gu nidu bebere poso aundo rani tipa wai rengbe ani ka mangapai kuti gupai ani awirikaha. Gi paparaha re nidu dedede na asanahe nga gu ani narengbe ka sana tirani na ni gbiati kpiapai nga gu ani narengbe ka wisigoho.