Waigu Rengbe Ani ka Banda Gaani Nyemuse Tipa Akuarani Nyanyaki

1-2. (a) Tipagine gu mokedi nangia Pauro arengbe ka pe gupai ti ni nga “gu kii dagba ha nga nyemuse”? (b) Gini asanahe ani nika sakapai tipa ha?

HO GU mokedi nangia Pauro asakipai ni tipa idapase, maabangirise, na nyemuse, ko adigisihe ni pe ko gupai nga “gu kii dagba ha nga nyemuse.” (1 Kor. 13:13) Tipagine Pauro ape gipai re ti ni? Kumbatayo, ani adunga na idapase kuti ga Mbori akidohe nibipa vovo zegino watadu maabangirise tipa gako akidohe digisitihe te bambiko agu apai re nika ima digisotihe. Ono si nika ida aida ani kpinyemu Yekova na gako aboro. Nirengo, gaani nyemuse nikaa ndu kumbatayo kaa sona tipa yo nyeanye kindi.

² Wa duhe nga ani nikaa ida na nyemuse kindi, ani nika sakapai tipa asanahe biata. Bambataha nga, tipagine si aida ani kpinyemu akuarani ti ni? Uehe nga, waigu ani ayugo nyemuse fu akuarani? Biataha nga, waigu rengbe ani ka banda gaani nyemuse tipa akuarani nyanyaki?

TIPAGINE SI AIDA ANI KPINYEMU AKUARANI TI NI?

3. Gini andu apai du berani tipa ka kpinyemu akuarani?

³ Tipagine duhe ti ni furani ni nyanyakipa pai ka kpinyemu akuarani? Ho ani ayugo nyemuse ni tipa awirinarani, ani nayugo na ni nga ani nga ndikidi aKristano. Yesu ape gupai fu gako abawiriki nga: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:35) Berewe a, kpinyemu kura aboro nasarani ani du ni kodikodi rani. Pauro ayambu nyemuse nga “gu ũvodatise nga ga ziaziapai.” (Koro. 3:14) Ono kura nyanyaki ndupai kinaho kindi si aida ani yugu nyemuse ti ni fu akuarani. Gu mokedi nangia Yoane ape gupai fu awirinako nga: “Gu ni du nyemu Mbori ti ni, nyemu wirinani du ti ni a.” (1 Yo. 4:21) Ho ani ayugo nyemuse ni fu akuarani, ani nayugo na ni nga ani nakpinyemu Mbori.

4-5. Oni yugunga wai du gaani nyemuse tipa Mbori na ngbanya dagbaha na gaani nyemuse tipa kura aboro.

⁴ Waigu du gaani nyemuse tipa Mbori na ngbanya dagbaha na gu nyemuse ani ayugoho tipa awirinarani? Tipa ka yugoho na kpiapai, oni bingo gu kodatise du bangbanda bágundá rani na kura apapara kpotorani. Ho munganga awisigo pa wai ni bágundá ro afõ tihe ni ti bero ka bihe singia si ni rurungburaha watadu si ni nyanyakihe, ni ima rengba ka ino apai tipa wai du bágundá ro. Ginipai rengbe ani ka wirikaha ti gi kpiapai re?

⁵ Kina wai du munganga na rengba ka ino bete apai tipa kpotorani ho ni awisigo bágundá rani ni ka ino wai si afõ tihe, kinawo a rengbe ani ka ino banyaka gaani nyemuse tipa Mbori ni wisigo ani wai du gaani nyemuse tipa akuarani. Ka ani bi gupai nga ani ayugongo nyemuse fu awirinarani wa gu ani aayugoho mbata te, gere nayugo gupai nga gaani nyemuse tipa Mbori narungbura a. Ono ho ani ayugo nyemuse ni dedede fu akuarani aidipase, si nga gupai nika sarani ani ini gupai nga gaani nyemuse tipa Mbori ni nyanyakihe.

6. Ka si dunga gaani nyemuse tipa akuarani nazera, tipagine du gipai re ti ni ni kpakarapai? (1 Yo. 4:7-9, 11)

⁶ Ka si dunga gaani nyemuse tipa awirinarani ima tona kaa zera, gere nga kere kpakarapai. Tipagine? Bambiko si rengbe ka yugo gupai nga gaani pagume na Yekova ima tona kaa rungbura. Gu mokedi nangia Yoane amoi gipai re gbaiga ho ko atingidi rani ni na gupai nga: “Gu ni adu nga nyemu gu wirinani ti ni bi ni ni ya, ka nyemu Mbori du nga ti ni ni abi nga ko ya te.” (1 Yo. 4:20) Ginipai ani awirikaha ti gipai re? Yekova na ngbarago na ani kinaho ‘ani kpinyemu akuarani ni.’​—Oni gedi 1 Yoane 4:​7-9, 11.

WAIGU ANI AYUGO NYEMUSE TIPA AKUARANI?

7-8. Gini bete agene duho rengbe ani ka yugo gaani nyemuse ngbaha tipa akuarani?

⁷ Ani naabi gu zinahe bara dunguhe rogo fugo Mbori yo, nga “oni nikpi nyemu akuaroni.” (Yo. 15:12, 17; Rom. 13:8; 1 Tesa. 4:9; 1 Pet. 1:22; 1 Yo. 4:11) Ono tie, nyemuse nga guhe du kpotoraniyo, nga gu boro arengbanga ka bihe ya. Sidu tie, waigu rengbe ani ka yugo gaani nyemuse fu awirinarani? Ani rengbe ka yugoho rogo gaani afugo na gaani mangaapai.

⁸ Badungu agene duho rengbe ani ka yugoho ngbaha nga ani nakpinyemu awirinarani. Bete akpiapai gere: “Oni gúmba rengo fu akuaroni.” (Zek. 8:16) “Oni du zezeredi dagba roni.” (Mk. 9:50) “Oni ngbembatayo rogo fu irisa fu aboro.” (Rom. 12:10) ‘Oni di akuaroni kugume.’ (Rom. 15:7) ‘Oni vu akuaroni.’ (Koro. 3:13) “Oni tindi ga akuaroni tindiro atinda.” (Gara. 6:2) “Oni ngárasi tironi dagba roni yo.” (1 Tesa. 4:18) “Oni . . . ki ninyakasi tironi dagba roni yo.” (1 Tesa. 5:11) “Oni kpári tipa akuaroni.”​—Yak. 5:16.

9. Tipagine du pa fu ani wasa ti ni fu kura aboro ni nyanyakipa gene ka yugo gupai nga ani ima kpinyemu yo? (Oni bi sura a.)

⁹ Ani wisigingo gene sa dagba agu agene yo rengbe ani ka yugo gaani nyemuse fu kura aboro ngbaha. Ani nika wisigopai tipa gupai Pauro agumbaha nga: “Oni ngárasi tironi dagba roni yo.” Tipagine du ngarasa kura aboro ti ni ni nyanyakipa pai tipa ka yugo gupai nga ani nakpinyemuyo? Ringbisihe kuti kura buku sa nafura tipa Baibiri, gu fugo Pauro amangisunge na ni nga “ngarasa” watadu wasa, rogo yo nga “ka ru pati boro ka ngarasa ni ho ni andu ni rogo kere aasada.” Sidu, ho ani afu wasa ni fu gu wirina narungo, ani naundo ni ni naandu kindi kumbatayo kaa iriso Yekova niruru ni. Na ai gu regbo ani afu wasa fu wirina, ani nayugo gupai funi nga ani ima kpinyemu ni.​—2 Kor. 7:6, 7, 13.

10. Gini ngbanya du dagba nunga na wasa?

¹⁰ Du na nunga gbiati fu wasa na kina ngbanya dagbaha. Ngba gini gene? Ho du boro ni na nunga gu boro narungo, si nasa ni ni fu wasa fu gu boro re na ki mangi gupai rengbe ka undo ni. Sidu, ho du ani ni na nunga; si naundo rani ani fu wasa fu kura aboro. Pauro ayugu gupai nga ga Yekova nunga tipa aboro nasa ko ko fu wasa fuyo. Pauro asakipai tipa Yekova ya ko nga “Ba inaapai, nga Mbori wasa dunduko.” (2 Kor. 1:3) Herẽ, Pauro amangisunge na gu fugo nga “Ba inaapai” ka sakapai tipa gu nunga du boro na ni tipa akurani. Sidu, “Mbori nga Ba, watadu Mburu inaapai, bambiko gako bakere nunga tipa aboro.” Na gu gako nunga re nasa ko ko fu wasa furani “rogo gaani gberãngbi yo dunduko.” (2 Kor. 1:4) Kina wai gu gigiri ime naafu guga yo naafu wasa fu agu aboro du na gomoro ime, Yekova naafu wasa fu agu aboro du rogo gberãrago. Waigu rengbe ani ka wirika Yekova na kidu na nunga tipa kura aboro na kini fu wasa fuyo? Gene sa rengbe ani ka mangaha ngbaha nga ni sonosa ani agu asino nika undo rani tipa ani du na nunga na kini fu wasa fu kura aboro. Bete agi asino re nga gine?

11. Ringbisihe kuti AKorosaio 3:12 na 1 Petero 3:8, gini kura asino si aida ani sonosihe tipa ka banda gu nyemuse nasarani ani fu wasa fu kura aboro?

¹¹ Ginipai nika undo rani tipa ani banda gu nyemuse ani aidaha tipa ‘kaa ngarasa tirani’ na aˈuru dunduko? Si naida ani sonosi agu asino nga, ka du na nunga akuarani, kini kpinyemu akuarani, na kidu na weneringise. (Oni gedi AKorosaio 3:12; 1 Petero 3:8.) Waigu rengbe agi asino re ka undo rani? Ka ani du na nunga awirinarani na kini kpinyemuyo nzunzu, ani nika du na bakere nyemu ka fu wasa fuyo ho i arungo ni. A wa Yesu apehe, “ngba boro nagumba gu pai du kpotoni yo. Gu wene boro du na wene kumuko ni nakusa wene ahe.” (Mt. 12:34, 35) Gu nyanyakipa gene ani ayugo gaani nyemuse fu wirinarani ngbaha nga, fu wasa fuyo ho i aidaha ni.

WAIGU RENGBE ANI KA BANDA GAANI NYEMUSE TIPA AKUARANI NYANYAKI?

12. (a) Tipagine si aida ti ni ani du na rubangirise ka gaani nyemuse zerenga tipa awirinarani ya? (b) Gini sanahe ani nika sakapai tipa ha awere?

¹² Ani dunduko si aida “nyemu akuarani du adu ti rani.” (1 Yo. 4:7) Ono tie, si ni nyanyakipa pai tipa ani tingidi pa gu zahe Yesu apehe nga ‘Gu nyemuse du ti agu yo ni dungu yo [ima rengba] ka zéra.’ (Mt. 24:12) Anga Yesu aape gupai nga badungu gako abawiriki ima rengba ka mbu yugo nyemuse fu akurayo te. Ono si naida ani du na rubangirise ka zanga mbu gu zanga nyemuse du ti aboro rogo gi zegino re si du namaapai kurii wai ani amangapai na akuarani. Na gipai re rirani yo, ani sakingo pai tipa gi nyanyakipa sanahe re nga: Ginipai nika undo rani tipa ani inihe singia gaani nyemuse tipa akuarani ni nyanyakihe?

13. Ginipai nika undo rani ani inihe singia gaani nyemuse tipa awirinarani ni nyanyakihe?

¹³ Gene sa ani ayugo banyaka gaani nyemuse ngbaha nga ni wisigo ani pai tipa wai ani amangapai kuti gu kura apai rogo raka yo. (2 Kor. 8:8) Pai sa dagba agu apai rogo raka yo re, nga gu gu mokedi nangia Petero afura tipaha nga: “Ono ti ri apai dunduko oni du na bakere nyemuse dagba roni; mbiko nyemuse nadada badungu ingaapai.” (1 Pet. 4:8) Sidu, gupai ani amangaha ho awirinarani naingisi pai ni kuti rani watadu naimisi rani ni, nika undo rani ani inihe singia gaani nyemuse tipa yo ni nyanyakihe.

14. Ringbisihe kuti 1 Petero 4:8, gine ngbatunga nyemuse ani aidaha? Oni funga kpiapai.

¹⁴ Ani berẽnga wenengai kurii afugo Petero. Bambata papara veresi 8 nasakapai tipa ngbatunga gu nyemuse si aida ani du na ni nga​—“bakere nyemuse.” Gu fugo Petero amangisunge na ni nga “bakere” rogo yo nga “ka zaraga ha.” Ue papara gu veresi re nasakapai tipa gu maapai rengbe bakere nyemuse kadu na ni. Si nadada agu aingahe nga ga awirinarani. “Mo berẽnga gupai nga mbisa na gbakigbaki ahe rihe. Mo ima rengba ka dia roko ki gbaragihe rii gu mbisa re dunduko, angianga ka dada kina gbakigbaki he sa ya, ono tipa ka dada rihe dunduko na ni. Wa kina gure a, ka ani du na bakere nyemuse tipa awirinarani, ani ima rengba ka dada watadu ka mbupai fuyo angianga tipa zanga rengba sa watadu ue ya, ono ‘badungu aingapai.’”

15. Ka si dunga gaani nyemuse tipa awirinarani ni nyanyakihe, ginipai ani nika du na rengba ka mangaha? (AKorosaio 3:13)

¹⁵ Si naida gaani nyemuse tipa kura aboro du ni nyanyakihe si ki sarani ani rengbe ka mbupai ti agu aingahe nga ga akuarani aidipase​—ka si vura du vurũ nga gipai re ni kere kpakarakpakaraha. (Oni gedi AKorosaio 3:13.) Ho ani ambupai ni fu kura aboro, ani nayugo na ni nga gaani nyemuse ni nyanyakihe na ani naida ka sa ngbarago ti Yekova. Gini kurapai berewe rengbe ka undo rani tipa ani mbupai ti agu aingahe nga ga kura aboro na ka ani adunga na gberãrago niipo tipa agu apai i amangaha ya?

16-17. Gini kuraapai rengbe ka undo rani tipa ani mbupai ti gu rukutu aingapai nga ga kura aboro? Oni funga kpiapai. (Oni sura a.)

¹⁶ Mo gbe berãro kuti gu wene asino du ti awirinamo angianga gu gbegberẽhe ya. Oni bingo gi ringbisapai re. Mo berẽnga gupai nga oni pati sungo na badona nga ga awirina. Oni nagbia ngbarago ti wene regbo na ti digido gu sungo re, oni kini di sura ni badona. Mo kini rogo kura asura ue tipa ka si dunga gu bambataha angeranga wenengai te. Asura awere bero biata. Ono rogo gu kuraha sa, mo bi gupai nga wirina nakuadi kpakpuko yo. Ginipai mo nika mangaha na gu sura re? Mo nagbandaka gure kusayo bambiko gu kura asura kinaho ue aboro dunduko amoma rogo yo kodihe na gu wirina re.

¹⁷ Ani ima rengba ka ringbisa agu asura ani abandaha kuti agu apai ani abandaha berãraniyo. Dedede ani ni naabanda gu wene aregbo abanda berãraniyo ani adihe na awirinarani. Ono si rengbe kadu nga ti regbo sa dagba agu aregbo re yo, wirina ape gupai watadu ka manga gupai naangbanga ya. Ginipai si aida ani amangihe na gupai re berãraniyo? Si naida ani di gupai re kusayo berãraniyo kina wai rengbe ani ka gbandaka gu gbegberẽ sura re dagba agu akuraha. (Snz. 19:11; Ef. 4:32) Si ima rengba ka ida bangirani go ti gu wiri ingahe wirinarani amangihe re bambiko ani natingida pa gu bawene aregbo ani adihe na ni. Gure nga gu ngbatunga apai si aida ani naabanda ha na kini bihe na nyanyakipaha.

GU NDUPAI SI AIDA AIDA TI NI NA NYEMUSE AREME

18. Gini memeapai tipa nyemuse ani nasakipai tipaha rogo gi kekeapai re?

¹⁸ Tipagine si aida ani banda gaani nyemuse tipa akuarani ti ni nyanyaki? A wa ani nawirikihe, ho ani ayugo nyemuse ni fu awirinarani, gure nga ani nayugo nyemuse a fu Yekova. Waigu ani ayugo gaani nyemuse fu akuarani aidipase? Gene sa rengbe ani ka mangaha ngbaha nga ni fu ani wasa fuyo. Ka ani du na nunga kura aboro tirani, si nika sa gupai nga “ani naangarasa tirani.” Waigu rengbe ani ka banda gaani nyemuse tipa akuarani nyanyaki? Ni vu ani awirinarani zavura ho duhe ni ni kpakarakpakaraha ka mangaha wo.

19. Tipagine si aida ani yugu nyemuse ti ni nzunzu fu awirinarani areme?

¹⁹ Tipagine duhe ti ni ni nyanyakipa pai areme ani yugu nyemuse fu akuarani? Oni bingo gu ndupai Petero apehe nga: “Digida apai dunduko nambeda. Wa du he were tie, . . . oni du na bakere nyemuse dagba roni.” (1 Pet. 4:7, 8) Wa digido gi gbegberẽ sino zegino re nikaa mbeda, ginipai rengbe ani ka maaberã rani tipaha? Yesu ape gupai fu gako abawiriki nga: “Rika aboro asóga roni asoga dunduko tipa rimore.” (Mt. 24:9) Tipa ka nye ni rururani fu Yekova ani ki vura kaa gbiatirani vurũ na asogote, si naida ani nye ni kodikodi rani. Ka ani akpinyemu awirinarani, Satana adunga na diabese tipa ka kparaka rani te bambiko nyemuse​—nga “gu ũvodatise nga ga ziaziapai.”​—Koro. 3:14; Frp. 2:1, 2.