Arugute fu Agu Aboro Ninaanungusa Apapara Gu Dunguratise Nga ga Sunge

Tona ti gi Gaani Sunge Nga ga Kindo re, ani keke agu arugute re ngba kura gene tipa oni gii rogo apapara Gu Dunguratise Nga ga Sunge wenengai. Agi arugute du kusende re, si nape gu kura vovopai du kia ti gu naye mbata rogo gu Gaani Sunge Nga ga Kindo nangia ga Merekoko 2009 nga gu du na gu papara kekeapai rogoho naaya “Wai ka Mbakadatise Tipa gu Dunguratise Nga ga Sunge.”

◼ Gumbapai: Gi paparaha re nga gu gumbapai du mburuhe rii gu waraga i niyugu baraha fu bagumbapai nga gu akodanga agu aboro du pati dunguratise kurogoho ya. Si naida bamangi gi gumbapai re gbe berãni gbe ka fura sa kina agu apai rengbe ka undo dungurati.

◼ Gu Sakapai Nga Sanahe na Karagapai: Gi paparaha re, si nawira kina wai ani naawisigo Ngbaõbambu Sinziri. Gu boro namangaha, ní tonaha na wiri guru fugo na ki digisihe na wiri guru fugo a. Ní ki sasana aboro tipa i karagapai kuti agu apai du rogo agu agenewaraga re dunduko nibasasa. Si aidanga kina bagumbapai fura afura susi ome te. Oni ima rengba ka geda gu bangua averesi du rogoho ka regbo du beroni. Si aidanga oni gedi agenewaraga te kina gu ka si dunga agu arugute du tipaha gumbaha wo.

◼ Sakapai na agu Aboro Du Pati Dunguratise: Gi paparaha re, i nika mangaha wakina gumbapai, ono gu boro namangaha, si aida aida ní sana agu aboro du pati dunguratise i karagapai. Si aidanga oni mangihe wakina gumbapai zanga sana agu aboro du pati dunguratise i fura te te, na si aidanga a oni fu asasanahe afu kindi fuyó rogoho naabaha dunduko te.

◼ Yugopai na kpiapai gbiati Sasana Aboro: Agu arugute du tipa yugopai na kpiapai nayugo gupai nga gu wirina namangaha, ko du nangerakurii gu yugopai na kpiapai re; si aidanga kina ko mangihe nitiko te. Agu aboro ko asia yó i undoko ti gi paparaha re, i duwa ka i du ni agu aboro niima rẽ tipa ka mangaha na kidu niwene kpiapai rogo dungurati, na si naida ko ima manga mbakadapai naayó mbata fu regbo. Si aduadu niwenepai ka ní sia kina agu abatungusipai du na bakere inohe kuba sia aguyo du nivovo yó watadu aguyo adunga na inohe wenengai ya mbiko gupai gbua nga ní naida ka fu momu fuyó i dakpa kurii tambara yo, wa vura duhe vurũ nga ní ima rengba ka mangasunge naayó ni airakporo. Si naida agu abatungusipai namanga gu yugopai na kpiapai re, i ningere kina koyo du aboro ni. Agu aboro i asasana yó na asanahe, si naida i ru kina rii tambara yo tipa ka pe gupai i asanayo tipaha angianga ka sungo kina rogo gayó basungo kaa fura ya. Si naida oni ima asada mangaha wenengai mbata fu oni mangihe. Ka si du nga regbo dunguratise nye nikina wiri guruhe, si ki idi gu wirina re gurusi gu paparaha ní amangaha, ka ní mbunga manga yugopai na kpiapai watadu sasana aboro ya. Si naida amoundo abaakumba bi barii gu gbuu nga ga abaakumba mbata watadu kura bakumba tipa agu aboro i nasia yó i mangi agu apaparaha du beyo.

Ka si du nga gu kura paparaha kinaho du na gaha arugute nikparakparaha, si naida oni pekefuoho wenengai. Ka agu awirina nga akumba mangi Gu Dunguratise Nga ga Sunge ringbisihe kuti agi arugute fura ani tipaha re, si nika sa gupai nga gu Dunguratise re ‘naamanga dunduko nzunzu ni tangaratangaraha.’​—1 Kor 14:40.