Oni Nimangi Sonakumbatayo Amanga Kindi ni Abatungusipai
1. Gini akpiapai namangi rogo bambata kama agarã nga gu nayugo gupai nga si naida ani mangi sonakumbatayo amanga?
1 Si naida aKristano naamanga sonakumbatayo amanga kindi wangia yo abatungusipai. Si nga ndu gupai Yesu ayugupai ti ni fu apefuoko na ki undo yo gene tungusapai yo. (Rk. 9:1-5; 10:1-11) Na si a nga ndu gupai Akuira na Puriseka adi Aporo fuoyo ti ni na “ki yugu pa ga Mbori gene fu ko wenengaĩ.” (Amo. 18:24-26) Tipa kina gu bangisa ndupai re, Pauro angarasi Timoteo nga gu boro naima digo nitungusipai nga ko fu tiko tipa yugopai tipa gako sonakumbatayo “du ni yuguyugu he fu aboro dũ.” (1 Tim. 4:13-15) Ka si vura duadu vuru nga ani tungusi wene pangbanga nga ga Gbia tipa dungu agarã vuru, ani duwa ka ani amanga ome tipa kaa manga sonakumbatayo rogo gaani birĩ tungusapai.
2. Wai rengbe ani ka wirikapai be kura aboro?
2 Oni Wirikipai Be Kura Aboro: Gene sa rengbe ani ka sonosa gaani biri yugopai ngbaha nga ka wirikapai be kura aboro. (Snz. 27:17) Sidu, si naida gupai nga ani degeturani wenengai ho gu batungusipai ani nikuru na ni afura ni. Oni sana gu kura abatungusipai tipa aberãpai, na ki degeturoni kuti gupai i nika gumbaha. (Snz. 1:5) Ya mo mo nabaka bangiro tipa wai ka karaga tiro fuo gu boro mo atungusipai funi, wai ka tona wisigo Ziazia Kekeapai na boro, watadu wai ka tungusapai ngba kura gene? Ka mo gundenga ya, mo sana gaoni babiapai nga ga tungusapai ko watadu gu batungusipai naima tungusapai tipa dungu aregbo tipa ni undo ro. Oni tingidi gupai a nga ga Yekova ziazia toro ima rengba ka undo roni, sidu, si naida oni naasanahe asana tipaha kindi rogo gaoni kparakpee yo.—Rk. 11:13.
3. Ginipai si aida ani mangihe ka boro fu berãpai furani, si ku vura du vurũ nga ani naasananga ni asana te?
3 Ka boro fu berãpai furoni nga gu rengbe ka undo roni, ka oni zinginga ya, ka si vura duadu vurũ nga mo naasananga ni asana tipaha te. (Batu. 7:9) Wakina Aporo, oni di gu berãpai re kugume na ngbarago gbiati umbasitise. Mangaha wo nika yugo gupai nga ani na tatamana.—Snz. 12:15.
4. Gini nyanyakipa ndupai Yesu afuhe nga gu si aida ani mangi sonakumbatayo ti ni rogo gaani birĩ tungusapai?
4 Sonakumbatayo Nataasa Rimo Mbori: Yesu amangisunge na kpiapai tipa ka ngarasa apefuoko tipa i naamanga sonakumbatayo ni abatungusipai. Ko aringbisi tiko kuti bakakue na ki gumba gupai nga mbedimbedi apefuoko nga abehe. Ko agumba gupai nga Bako nagiriso agu abe ngua dunduko du tiko nga gu nazu tipa “si zu susi gu nadu mbata.” (Yo. 15:2) Wakina wai baira bakakue aida gupai nga si naazu azu gbe, Yekova naida gupai nga ani nimangi sonakumbatayo amanga kindi tipa kaa kusa “gu zuzuhe nga ga ngbarani.” (Eb. 13:15) Gini wene sangbanapai rengbe ka manga ka ani mangi sonakumbatayo wangia ani abatungusipai? Gupai Yesu agumbaha nakaragapai kuti gu sanahe re, ko aya: “Ka oni azuka gbe, si ka Buba du ti ni ni taasitaasi ko; si ka oni du ti ni a ni gimi abawiriki.”—Yo. 15:8.