Ani Naida Bata!

GU Due aboro age kingire rogoho Amerika yo, ime ahi rogoho nikina ipo ki fu ngbaha. Gu ime re akengedi abamangisunge ribua kurogo wiri ugu rago ime aadanga rogoho ya, badunguroho adu kusendeyo nga amitiri 73. Fuo arame biata, i akuru sendeyo, kpotoyo kidu wenengai ka pai amanganga yó ya. Ono i awiripa kura wai sendeyo?

Aboro amangisunge na amasini tipa ka ino bara agu akumba nadu tii sende yo re. Fuoho inoyo barayo, i age due ki zogo gbanga pio-marã ku sendeyo koyo agu akumba re adu ni. Sidu, i ki gbefe yó kuzegiyo nibasasa na gu pio-marã re rogo gu ba kangia murã yó re. I dunduko adu na bakere ngbarago, na i kini fu bakere tambuahe fu Mbori na fu agu aboro nabatasi yó re.

Badungu rani ime nikaa kengedanga rani kutii sende yo wa agu abage kingire nadu ribua re ya, watadu gaani raka kidu ngbapai be gberango ya. Ono wa vura duhe wo, ani dunduko si aida i batasi rani abatasa, bambiko ani arengbanga ka ne kaza na gaha fudifudiapai, na gbinza, ki dati kpio te. Gu kumba nanaagunde ti Mbori rimoko angia Eyobo, ko ayaa: “Gu boro de avungu ni gani arame ni kina guru he gbua, ki hi ahi be fudifudipai. Ni kuru wa mbumbuda, ki nyokora; ni naora wa kina nzereme, ka ni aima nga ya.” (Eyobo 14:1, 2) Agarã ima susa awere wa 3,500 tona ti rago Eyobo. Ono wa vura duhe wo, agu afugo ko agumbaha re, kina rengo du ngaha areme a, bambiko da du dagbarani rengbe ka ne gu kerepai nga kpio? Ka ani vura kaa ngerafuo tirani kina wai vurũ, ani dunduko si aida i batasi rani abatasa be arungo, gbinza, na kpio.

Aboro-birĩ-inohe naʹasadatiyo nyanyakii tipa ka sa gupai nga boro niraki nigbangaha ti gu du awere. Riigbu sa ayawee gupai si aida ka mangaha nga ka “diabe kpio” na “ka undo agu aboro du rogo gu riigbu re i niigbata gene tipa wai rengbe aboro ka raka nyeanye kindi.” Ono ka da ku awere, gu bakere birĩ-inohe du aboro nani gbiati wai i aʹasada tiyó kadu na diabese, si agbisongo garã boro kuari susi gu Moize agumbapaha agarã naima susa awere 3,500 ki yawee garã rani nadigo gbua ti 70 watadu 80 te.—Atambuahe 90:10.

Singia oni na gu bipai Eyobo adu nani watadu oni nani te, gupai ka oni anekanga ha ya nga, wa agarã nikaa nge, si nika da ti gu regbo oni ka ‘ora kusayo wa nzereme,’ tuturũu ti abadiangbaroni, tuturũu ti gaoni aborokporo, tuturũu ti kpuroni, na tuturũu ti gaoni ahe, bambiko kpio nika dia roni. Tu tatamanatatamana bakindo nangia Soromo ayaa: “Agu yo du ni ungayo i ini he ya i akpí akpi, ono kpikpi aboro aina nga pai te, kura mosoro du nga fu yo a te; bambiko tingida payo ima go ti aboro.”—Batungusipai 9:5.

Si nipa gberarago ka bi gupai nga, kpio aima digo ‘nikindo’ kurii aboro dũ, na si kingia gbegberẽ bakindo. Ii, kpio nga gu yangara vura aboro si aida i batasiyo behe. (ARomo 5:14; 1 AKorindo 15:26) Rogo zegino dunduko, agu aboro ini wai ka batasa aboro kisusi ti regbo tunguotunguopai, i arengbanga ka batasa roni oni ki nyeanye kindi niungaroni te. Ono tie, Bakusi aboro nga Yekova Mbori, ko ima manga mbakadapai tipa ka batasa aboro i ki nyeanye kindi niungayo.

[Gu kpiahe du ti kpewaraga 3]

Photo by Gene J. Puskar-Pool/Getty Images