Paranga Awirina, Ya Mo Oni Nagbata Gene ka Rẽ Tipa Sunge?
1. Ti gini regbo si aida paranga wirina tona mangapai kuti gu rugute du rogo 1 Timoteo 3:1?
1 “Ka kumba gbata sunge babipai ní nakpi nyemu wene sunge.” (1 Tim. 3:1) Afugo gu veresi re nangarasa agu awirina nga akumba i rẽ tipa sunge rogo dungurati. Ya mo si nga mo nyaki anyaka mbata mo kini ru ka rẽ tipa sunge? Wagusa te. Si ngba gbe ka mo tona ka rẽ tipa sunge rogo dungurati mbu ro kindi tooni. Rogo gi gene re, i nayugopai foro wenengai na mo ki yugu gupai rogo gamo mangapai yo nga mo ima rẽ tipa i moi ro ni moundo abaakumba ho mo ka sona ni. (1 Tim. 3:10) Ka mo du nigu paranga wirina naima zio bapatiza, ginipai rengbe mo ka mangaha tipa ka rẽ tipa sunge rogo dungurati?
2. Wai rengbe boro ka mbupa kura gani apai na ki yuguhe rogo mangimangipai yo?
2 Mbu Boro pa Kura Gani Apai: Gupai si aida mo tingidihe nga mo narẽ tipa sunge, angianga worimo ya. Sidu, mo sonosi gu sino nga ga undo awirinamo. Gene sa rengbe mo ka manga gipai re ngbaha nga ka berãkurii ga Yesu kpiapai. (Mt. 20:28; Yo. 4:6, 7; 13:4, 5) Mo sana Yekova ko undo ro mo niberẽpa akuaro. (1 Kor. 10:24) Ya mo mo rengbe ka undo gu gbinza aboro du rogo gaoni dungurati watadu aguyo duadu kpokorokpokoro? Ho aboro andu ni tipa derago watadu giriso Bambu Kindo, ya mo mo naandu tipaha? Ti regbo Gu Sukuru Nga ga Siokrasia, ka boro aadunga ho ka manga gumbapai ya, ya mo mo rengbe ka mangaha kubani? Ka mo fu tiro kaa mangapai fu akuaro, mo nika gbia bakere ngbarago.—Amo. 20:35.
3. Wai du wene pagume na Yekova na nyanyakipaha, na wai rengbe boro ka sonosa gu pagume re?
3 Wene Pagume na Yekova: Gupai nyakipaha fu moyambu rogo dungurati gbe nga ní du na wene pagume na Yekova, ka ní vura duadu na inohe wai vurũ. Gu boro du wenengai rogo toro yo nabi apai kina wai Yekova na Yesu abihe. (1 Kor. 2:15, 16) Ní nayugo “zuzu toro.” (Gara. 5:22, 23) Ní nga zaaza batungusipai nga guni naperesapa agu apai nga ga Kindo mbatayo. (Mt. 6:33) Mo rengbe ka sonosa wene asino ka mo aawisigo Ziazia Kekeapai dedede. Gipai re nakoda geda Ziazia Kekeapai na aˈuru dunduko, geda Ngbaõbambu Sinziri na Awake!, gbiati mbakadatise tipa adunguratise dunduko na kini ndu tipaha. (Tam. 1:1, 2; Eb. 10:24, 25) Ho Pauro aangarasa Timoteo ni nga ko mangi sonakumbatayo rogo toro yo, ko agumba gupai nga: “Mo berẽpa . . . ga yugopai.” (1 Tim. 4:15, 16) Sidu, ho i afu gumbapai ni foro rogo gu Gu Sukuru Nga ga Siokrasia, mo mbakadihe wenengai. Mo naambakada tiro tipa tungusapai na kini kuru dedede. Mo moi asásá na ki mangi ome tipa ka da ti ni. Wa gu nga tungusapai ni bazakigene, sunge Betere, watadu nduge tipa Gu Sukuru Du Tipa Raba Abakuparanga na Ziazia Kekeapai. Wene pagume na Yekova nika undo ro mo “óro be ga paranga gbegberẽ nyemuahe.”—2 Tim. 2:22.
4. Tipagine nyakipa du boro ti ni niruruni rogo mangapai yo?
4 Si Naida I Duni Ruruyo: Agu awirina i asiayo i kparaka riahe fu agu aKristano nadu na zingo rogo bambata sa kama agarã, “ringiyo angba” angba na si tigaha nga aboro aima inoyo ni agu aboro nadu niruruyo. Sidu, amokedi aabakanga bangiriyo tipa gu sunge i afuhe fuyo re te. Gipai re ambugene fuyo tipa i moiberã yó tipa kura nyanyakipa asunge. (Amo. 6:1-4) Sidu, ho i afu sunge ni foro rogo dungurati, si naida mo mangihe wenengai. Si naida mo pekefuo ga Noa kpiapai nga guko namangipai kina kuti agu arugute i afuhe fuko tipa mbakada kurungba. (Bam. P. 6:22) Gupai nyakipaha bangiri Yekova nga padu boro niruruni na padu na wene bakure naako.—1 Kor. 4:2; oni bi gu sanduki nga “Gu Undo Du ti Wirikapa Sunge.”
5. Tipagine si aida paranga awirina gbata gene ti ni ka rẽ tipa sunge?
5 A wa i agumbaha nisangbaanebi, Yekova naipiso gu sunge nga ga dungura aboro kurogo gako riigbu. (Yes. 60:22) Bange aboro wa 250,000 nazio bapatiza rogo agarã dunduko. Wa badungu vovo aboro aye kurogo rengo, bakere zingo duho tipa agu akumba naima rẽ tipa i ye ka nungusa dungurati na kini mangi agu asunge nga ga dungurati. Bakere sunge du awere rogo ga Yekova riigbu susi gu nidumbata. (1 Kor. 15:58) Paranga awirina, ya mo oni nagbata gene ka rẽ tipa sunge? Kangia wo duhe, gure nga oni nakpinyemu wene sunge nirengo!
[Gu sura du ti kpewaraga 2]
Wa badungu vovo aboro aye kurogo rengo, bakere zingo duho tipa agu akumba naima rẽ tipa i ye ka nungusa dungurati na kini mangi agu asunge nga ga dungurati
[Gu sura du ti kpewaraga 3]
Gu Undo Du ti Wirikapa Sunge
Paranga awirina nagbia bakere undo ho abaakumba afu asunge ni fuyo rogo dungurati na kini yugu wai fuyo si aida i mangihe. Gu kura babi adungurati sa asungu rii tambara yo kaa ngarasa kura batungusipai tifuo dunguratise. Ko ki tuka bangiriko ki bi tooni kumbagude ko naru patiko, ko ki sana gu kumbagude re singia ko naida aida ka fura na ko. Gu kumbagude re akaragapai ki ya i afu gu sunge fuko nga ga giriso rii tambara tifuo adunguratise dunduko. Avunguko aida ka ga, ono ko aidanga ka ga mbata fu mangako gu sunge i afuhe fuko te. Gu babi adungurati re aguari rii tambara yo nibasa. Ko agumba gupai nga: “Agu abaakumba du rogo gu dungurati re naraba paranga awirina dedede nifu yó asunge fuyo rogo dungurati. Nisangbana gipai re, wo i anaagumba pa agu aparanga narẽ tipa sunge amoundo abaakumba ho mi anindu ni kurogo gayo dungurati.”