“Aboro Ngbarago Nga Aguyo Nabandapa Gayo du Niruruse” fu Yekova

1-2. (a) Gini apai kura airangbii namangi ga Yekova aboro na ni, na waigu gako aboro amangapai kuti gipai re? (b) Waigu rengbe ani kadu na ngbarago zavura ho i arungosi rani ni? (Oni karagapai a tipa gu sura duti kpotoho.)

ROGO zegino dunduko awere, aringara naima susa 30 naima rugusa bete gaani asunge watadu ka kisoho dunduko. Rogo bete agu aringara re, airangbii ima ba bete awirinarani ku bambukiso yo. Gini irairapai i amangihe? Pai ho i namangihe te, na Yekova abingo ho nga i mangi gupai du ni gbegberẽhe te. Agu apai gbua i amangaha nga, geda Baibiri na kini wisigihe, sunge tungusapai na kini ndu tipa adunguratise. Na i arimisongo tiyo kurogo agu apai yo nga ga birĩ-zogarago te. Wa vura duhe nga i nagbia tiyo na arungosiro, gi ga Mbori amoyambu du ni ruruyo fu ko re, nabanda pa gayo du ni ruruseb—naida ka ya i ima yugoho nga i na ra sa fu kina Yekova. Na i na ngbarago tipa ka manga gipai re!

² Si na wiraha wa, mo ima bi sura agi aDezire Yekova du na wingbaduse re na ki bi gupai nga kpakpuyo yo na kina mongo. I na ngbarago bambiko i ima ino gupai nga Yekova na ngbarago na yo bambiko i nabanda pa gayo du ni ruruse koyo du ko ni. (1 Peka 29:17) Yesu aya: “Aboro maku nga agu yo i arungosi yo tipa rurupai . . . Oni sámbua tironi asambua, ki ningi angi; bambiko gaoni mosoro du ngbangbaturũ yo kii gbe.”—Mt. 5:10-12.

KPIAPAI FURANI

3. Ginipai Amokedi 4:19, 20, apehe nga amokedi amangihe ho i aarungosi yo ni rogo bambata sa kama agarã, na tipagine i amangihe ti ni wo?

³ Agu arungosiro awirinarani ahihe, si wakina agu arungosiro ga Yesu amokedi agbiatiyo na ni rogo bambata sa kama agarã ho i aatungusapai ni tipa ko. Bara dunguhe, ga aYudo kikindigipa agbia-ngbanga ‘arugu yo ya ka i gumba nga pai niyugu pai ni rimo Yesu wa sa ya.’ (Amo. 4:18; 5:27, 28, 40) Waigu amokedi amangipai kuti gipai re? (Oni gedi Amokedi 4:19, 20.) I aima rugatiyo na gupai nga gu boro du na bakerepa gbia be ni ‘aya fuyo i nitungusipai fu aboro’ tipa Kristo. (Amo. 10:42) APetero na Yoane nga agu aboro naafura ku bayo ape gupai na wingbaduse nga i nika giasangba Mbori susi gu nga ga abasapungbanga na i ambunga tungusapai tipa Yesu te. Gere adu wa ka i ya i asana agu aboro naadu na pagbia beyo nga, ‘Oni naida ka ya oni du na pagbia beroni kisusi Mbori?’

4. Ginipai Amokedi 5:27-29, apehe nga amokedi amangihe, na wai rengbe ani ka wirika yo?

⁴ Amokedi amoi wene kpiapai fu aKristano dunduko nga gu i apekafuo ho da ku areme nga ka ‘gia sangba Mbori agia susi ga aboro.’ (Oni gedi Amokedi 5:27-29.) Tingbafuo i ta amokedi tipa banda yo pa gayo du niruruse, i aguari bara ngba ga aYudo kikindigipa agbia-ngbanga “rago ningba angba ti yo mbiko wa ya yo i re are nahi wasiro tipa rimoko [Yesu],” na i aandu kumbatayo kindi kaa tungusapai!—Amo. 5:40-42.

5. Gini asanahe si aida ani gbia karagapai kutini?

⁵ Gu kpiapai amokedi amoihe re nakusa kura asanahe. Ni kpiapai, waigu ka amokedi arengbe ka giasangba Mbori susi gu nga ga aboro na kini mangipai kuti gu zinahe nga ga Baibiri nga gu naya, “aboro rá ara dũ fu abaira tandu”? (Rom. 13:1) Waigu rengbe ani ka ‘raka fu abazogo, fu agu yo asia yo pai fu yo,’ wa gu gu mokedi nangia Pauro apehe, na kina ti gu bangisa regbo re kini banda gaani padu ni ruruse fu Mbori nga gaani Bazogo?—Tito 3:1.

“ABAIRA TANDU”

6. (a) Ada du nga agu “abaira tandu” i nafura tipa yo rogo ARomo 13:1, na wai du si aida ani nabi yo? (b) Ginipai a du nga rengo tipa agu abazogo nga awiri aboro dunduko?

⁶ Oni gedi ARomo 13:1. Rogo gi veresi re, gu fugo nga “abaira tandu” nayugo pa agu abazogo nga awiri aboro du na ome beyo kurii akurayo. Si naida aKristano gisangba agi abazogo nga awiri aboro re. Agi abazogo re nabanda zereda, kini sa aboro i ni banda andiko, na ti kura aregbo, kini banda ga Yekova aboro. (Yugo. 12:16) Si naida ani fu marã-ngbeti, kini gunde tiyo, na kini fu gu irisa fuyo i aida na ni. (Rom. 13:7) Ono tie, agu abazogo re na gu pagbia du be yo re mbiko Yekova du idihe wo. Yesu ayugu gi bangua arengo re gbaiga ho gu bazogo nga ga aRomo ko nangia Pondio Pirato aasasana ko ni. Ho Pirato aya ni ko ima rengba ka manga diaberã ka batasa Yesu watadu ka imo ko, Yesu aya fuko: “Pai ngbaro sa re te, kina gu ka i asia pa re foro ari yo.” (Yo. 19:11) Kina wai si adu tipa Pirato, agu abazogo na agu aboro birĩ-zogarago du areme, gayo pagbia na kina digidoho ti ni.

7. Ti gini aregbo si aidanga ani gisangba agu abazogo nga awiri aboro ya, na ginipai si aida i tingidihe?

⁷ Si naida aKristano gisangba agu abazogo nga awiri aboro ka si du nga si atagbaganga tihe na ga Mbori andiko te. Ono si aidanga ani gisangba agu abazogo nga awiri aboro ka si du nga i naida ani mangi gupai nga gu Mbori asogaha te, watadu i na za rani ti manga gupai nga gu Mbori aidaha te. Ni kpiapai, i ima rengba ka ya paranga akumba di aũvura ka ndu ka sovura.c Watadu i ima rengba ka rugusa gaani Baibiri, na gu gaani awaraga du mburuhe ri Baibiri watadu ka rugusa rani ti sunge tungusapai watadu ti dungura ani tirani kaa irisombori sa. Ho abazogo amangasunge ni na gayo pagbia ngba iraira gene wa gu nga, rungosi ga Kristo abawiriki, i akaragapai akaraga fu Mbori. Yekova nabi yo abi!—Batu. 5:8.

8. Gini kparakparapai du dagba ‘baira’ na “bahe kisusi,” na tipagine du gipai re ti ni na nyanyakipaha?

⁸ Gu fugo nga ‘baira’ rogoyo nga “gu boro nyaki pani, gu boro du pani kuari.” Ono si ayugongo gupai nga anga “kura boro ho du kurini te te.” Gere nasaka rogo kura fugo yo nga—“bahe kisusi.” Wa vura duhe nga i nafura tipa gu zogarago nga ga wiri aboro nga “abaira tandu,” gu kura tandu kinaho kii paha kisusi—du nga bahe kisusi. I fura bara biama rogo Baibiri yo tipa Yekova Mbori na agu afugo nga “Bahe ki susi.”—Dan. 7:18, 22, 25, 27.

“GU KO NGA BAHE KI SUSI”

9. Ginipai gu nebi nangia Daniere abihe rogo yuguyugupai yo?

⁹ Gu nebi nangia Daniere abi yuguyugupai nga gu nayugu Yekova nga ko na pagbia beko kurii kura apagbia dunduko. Ni bambataha, Daniere abi ba kikindigi anya biama nga agu ra naru ku ba gu zogarago naadu mbata na gu naadu ti gu regbo nangia ga—Babera, Amadio na aParaso, ringara aGiriki, na Roma, na gu zogorago du areme nga ga ANgirisi na Amerika. (Dan. 7:1-3, 17) Na tingbafuo gure, Daniere abi Yekova Mbori ko nasungu ri gako mbatabakindo ngbangbaturũ yo. (Dan. 7:9, 10) Si naida gupai gu ruru nebi re abihe tingbafuo gure, du ni zahe fu agu abazogo du areme.

10. Ringbisihe kuti Daniere 7:13, 14, 27, ada du Yekova nafu pa zoga kpotosende fuyo, na gipai re nayugo ginipai tipa Ko?

¹⁰ Oni gedi Daniere 7:13, 14, 27. Mbori adi zogarago na pagbia kusayo be wiri aboro na ki fuhe fu agu aboro na rẽ na ni na kidu na bakere ome. I afuhe fu ada? Fu ‘boro wa wiri boro,’ nga Yesu Kristo, na fu “gu ziazia yo nga ga gu Ko nga Bahe ki susi” nga agu aboro du bange yo nga 144000 nga aguyo nika zogarago “nye anye kindi.” (Dan. 7:18) Si tie ziazia nga, Yekova du nga “Bahe ki susi,” bambiko kinako sa du na pagbia beko ka mangapai wa gure.

11. Gini kurapai Daniere apehe nga gu nayugopa ga Yekova bakere pagbia kurii zegino?

¹¹ Gupai Daniere abihe rogo yuguyugupai re na ngbanya dagbaha na gupai ko apehe kusayo. Ko aya, ‘Mbori nga ga ngbangbaturũ ko,’ “naroga agu abakindo ki nimoi kura abakindo.” Na ko ake gupai a nga, “gu Ko nga Bahe ki susi nazoga gu ngbi nga ga aboro, ko nafu he fu gu ni ko akpi nyemu ka fu he fu ni.” (Dan. 2:19-21; 4:17) Ya mo regbo adu nga ho Yekova adi bazogo kusayo watadu ka maa kura bazogo? Ii!

12. Oni funga kpiapai tipa wai Yekova adi abakindo ri gayo ambatabakindo mbata kusayo. (Oni bi sura.)

¹² Yekova ima yugoho ziazia nga ko na pagbia beko kurii “abaira tandu.” Ani bingo akpiapai biata. Faro nga ga Ezipeta ko asa ga Mbori aboro ni akanga na ko aká bara dunguhe ka mbu gene fuyo i ndu. Ono Mbori akusi gako aboro tii sunge kanga na ko ki imi Faro Zamba Baime yo. (Gate 14:26-28; Tam. 136:15) Gu Bakindo Babera nangia Beresasara amangi pumbo na ‘ko akiisi pa tiko fu Gbia ngbangbaturũ,’ na “ki nitaasi rimo agu ambori nga ga feda, na ga dahabu na ga sirigi” kuba Yekova. (Dan. 5:22, 23) Ono Mbori aumbasi pa gi boro rũko re. “Ni kina gu yuru re,” i aimi Beresasara na ki fu gako kindo fu aMadaio na aParaso. (Dan. 5:28, 30, 31) Bakindo Erode Aguripa gu Bambata ko nga ga Paresitina aimi gu mokedi nangia Yakoba na ki ba gu mokedi nangia Petero ku bambukiso yo na gu berãpai nga ko nika imoko a. Ono Yekova aká na Erode ti manga ko gupai ko aaida ka mangaha. “Maraika Gbia ki yawa ko ayawa,” na ko ki kpi.—Amo. 12:1-5, 21-23.

13. Oni funga kpiapai nayugo wai Yekova adibe dunguradungura abazogo.

¹³ Yekova aima yugo gako pagbia a kurii dunguradungura abazogo. Ko asovura tipa aYisaraere, na ki undo yo i nyasiriipa dunguradungura abakindo 31 nangia ga aKanano abakindo na i ki di bakere papara Ringara Mokido. (Yos. 11:4-6, 20; 12:1, 7, 24) Yekova aundo aYisaraere a i nyasiriipa Bakindo Benadada na agu abazogo 32 nga ga aSurio yo nga aguyo nasovura kuti aYisaraere.—1 Aba. 20:1, 26-29.

14-15. (a) Ginipai Bakindo Nebukadenesara na Bakindo Darayawesa apehe tipa ga Yekova bakere pagbia? (b) Ginipai bake papara Atambuahe apehe tipa Yekova na Gako rikaaboro?

¹⁴ Bara dunguhe, Yekova ima yugo tiko nga ko nga Bahe Kisusi! Ho Bakindo Nebukadenesara nga ga aBabera ko amangi rũko ni tipa ‘gako nyaka na ome nga ga bakindo tipa gu taarimo nga ga wo rimoko’ kuba gupai nga ko fu gu taarimo re fu Yekova, Mbori asa ko ka berãko du nga wenengai ya tipa wiri bete regbo. Ho berã Nebukadenesara akaraga tihe ni kubaha, ko ‘asambua gu Ko nga Bahe ki susi’ na ki idi kuti gupai nga ‘ga [Yekova] zogarago nga nyenye zogarago.’ Na ko agbia gu kurapai kutini nga: “A nga boro ho rengbe ka ka fu ko” te. (Dan. 4:30, 33-35) Tingbafuo i asadi pa ga Daniere du ni ruruse fu Mbori na Yekova ki batasi ko sima abahu yo, Bakindo Darayawesa aru ndiko nga: “Aboro kígi akiga ki nigunde ti ga Daniere Mbori, bambiko ko nga unga Mbori nye anye kindi; gako ngbi ka i agbárasa nga ha ya, gako zogarago nikanye dati digidarago.”—Dan. 6:7-10, 19-22, 26, 27.

¹⁵ Bake papara Atambuahe abi gupai nga: “Yekova nasa sangba arikaaboro ni kungba he; ko namanga ga aboro mbakada berã si du gbua.” Ko agbia kurapai kutini nga: “Aboro maku nga gu rikaaboro du gayo Mbori nga Yekova, nga agu aboro ko asia yo i du ni gako ũkumuko!” (Tam. 33:10, 12) Gere nga wene ndupai tipa ka banda pa gaani du niruruse fu Yekova!

GU YANGARA VURA

16. Ginipai rengbe ani kadu nakido tipaha nibipa “bakere gberãngbi,” na tipagine? (Oni bi sura.)

¹⁶ Ani ima geda agu apai Yekova amangihe mbata kusayo. Ginipai tie rengbe ani ka maabangirani tipaha barambeda kumbatayo? Ani ima rengba kadu na gu kido nga Yekova nika batasa gako ruru amoyambu ti regbo gu “bakere gberãngbi” nika ye. (Mt. 24:21; Dan. 12:1) Ko nika manga gipai re ti gu regbo dunguradungura rikaaboro nga aguyo i ayamba yo nga Gogo boro Magogo, nika zubo ga Yekova ruru amoyambu rogo zegino dunduko. Wa vura duhe nga gu kodikodi arikaaboro re nakoda agu arikaaboro dunduko du bangeyo nga 193 nga aboro Yu-eni, i adu nga na ome tiyo ka sovura kuti gu ko nga Bahe Kisusi gbiati gako riivura du ngbangbaturũ yo te! Yekova nakidohe nga: “Mi ayúgo pa gi du ni bahe na pa gi du ziazia ki yugu tire ku bangiri dungu arikaaboro i ini re. Si du i aína ha ya mi nga Yekova.”—Yeze. 38:14-16, 23; Tam. 46:10.

17. Ginipai Baibiri apehe tipa abakindo zegino na agu aboro na banda pa gayo du niruruse fu Yekova?

¹⁷ Gu zubohe nga ga Gogo nika ndu sa gu vura nga ga Aramegido nga gu Yekova nika gbarasa “abakindo zegino dunduko” rogoho. (Yugo. 16:14, 16; 19:19-21) Ono tie, “ruru aboro aráka zegino, airarengo ki nye rogo ho.”—Snz. 2:21.

SI NAIDA ANI BANDA PA GAANI DU NI RURUSE

18. Ginipai dungu ruru aKristano aima digo nimangihe, na tipagine? (Daniere 3:28)

¹⁸ Vuru gu dungu kama agarã yo susi, badungu ruru aKristano ima maa pa gayo ranirii na gayo raka ngbapai bambiko i nakpinyemu Yekova ni gayo Bakere Bakindo. Gu ruru aKristano re ima diaberã ka nye ni ruruyo fu Yekova wakina agu aEbere naadu biata na nye ni ruruyo fu gu Ko nga Bahe kisusi nga guko nabatasi yo rogo gbigiwi we yo.—Oni gedi Daniere 3:28.

19. Riimburu ginipai Yekova nika sarangbanga gako aboro, na gipai re naida ani mangi ginipai awere?

¹⁹ Gu bake papara Atambuahe nangia Davide akepa nyaka padu ni ruruse fu Mbori, ko aya: “Yekova nasapa ngbanga fu aboro; Ako Yekova, mo sapu ngbanga fere, kina kuti gi rurupai, na gu rengo du kpotore yo.” (Tam. 7:8) Davide ake kurapai berewe nga: “Rengo bánda re na rurupai.” (Tam. 25:21) Gu wene gene rengbe ani ka raka gaani raka ngbaha nga ka nye ni rururani fu Yekova, ka kina ginipai vura manga vurũ si aidanga ani mbu pa nye ni ruru rani fuko te! Na gipai re nika sa rani ani du wa bake papara Atambuahe nga guko naya: “Aboro ngbarago nga aguyo nabandapa gayo du niruruse . . . , nata rogo ga Yekova rugute!”—Tam. 119:1, NW.