WIRIKAPAI 49
Waigu Rengbe Gamo Ramukporo Kadu na Ngbarago?—Bambata Paparaha
Agu aboro mangi rogatise barambeda, i namaabangiriyo nga gu ngbarago i agbiaha rogo uru gayo rogatise nika nyeanye kindi. Na si ima rengba kadu wo. Agu aKristano nga aguyo naima dia gbanga regbo kurogo rogatise yo na nga aguyo namanga ome nyanyaki tipa ka mangapai kuti agu arugute nga ga Baibiri, ima ino gupai nga gipai re ima rengba ka manga wo.
1. Gini arugute Baibiri afuhe fu kumbakuadee?
Yekova ima sia kumbakudee ni bariikporo. (Mo gedi AEfeso 5:23.) Yekova naida gupai beko nga ko nimangi agu adiaberã nika fu undo fu gako ngbadimokporo. Baibiri nafu gu rugute fu kumbakuadee nga: ‘Oni kpí nyemu adiaroni.’ (AEfeso 5:25) Ginipai gipai re ayugoho? Gu kumbakudee du na nyemuse namangapai fu diako ngba wene gene, ho du yo ni kporo watadu dagba aboro. Ko nabanda ri be gu gbegberẽpai rengbe ka gbia ri na ko namanga ome nyanyaki tipa ka ngerafuo gari azingo dunduko. (1 Timoteo 5:8) Gu nyakipaha anyaka tie gbe nga, ko nangbembatayo tipa ka ngerafuo gu gari azingo nga ga toro. (Matayo 4:4) Ni kpiapai, ko ima rengba ka manga kparakpee na kini gedi Baibiri wa sa na diako. Ho kumbakudee angera ni fuo diako wenengai rogo nyemuse yo, ko nabanda gako pabakure na Yekova.—Mo gedi 1 Petero 3:7.
2. Gini arugute Baibiri afuhe fu dereakumba?
Fugo Mbori nape gupai nga ‘dia boro nigunde agunde ti kumbani.’ (AEfeso 5:33) Waigu rengbe ri ka manga gipai re? Ri rengbe ka berãpa gu wene asino du ti kumbari na agu asadatise ko amangaha tipa ka ngerafuo ri gbiati awiriyo. Ri rengbe ka yugo irisa a fuko ni songoda ri agu adiaberã ko amangaha na nifura ri fuko watadu bara ko ngba wene gene, ka si vura du vurũ nga irisi Yekova nga ko te.
3. Waigu rengbe arogotise ka nyakasa gayo rogatise?
Baibiri nape gupai tipa arogotise nga: ‘I ue i ki du wa boro sa.’ (Matayo 19:5) Gipai re nayugo gupai nga i du wa ka i sovura nyanyaki kuti ai gupai rengbe ka sa yo i kparaka. I namanga gipai re ni dia yo regbo ka sungo kina sa na kini peke gayo aberãpai gbiati bipai rogo nyemuse yo dagbatiyo. I ambunga ai boro watadu ai pai—kpara kusayo ti kina Yekova sa—ni da watadu si da na nyanyakipaha kisusi gayo badiarogatise te. I na bakere rubangirise ka zanga sonosa gbegberẽ pabakure na agu aboro angianga gayo abadiarogatise ya.
MO WIRIKI KURA DUNGU APAI
Mo bingo gu bangua arengo nga ga Baibiri nga gu rengbe ka nyakasa gaoni rogatise.
4. Kumbakuadee—oni kpinyemu adiaroni na kini ngerefuo yo wenengai
Baibiri nagumba gupai nga “akumba kpí nyemu adiayo a wa boroyo.” (AEfeso 5:28, 29) Ginipai gipai re ayugoho? Mo bi gu VIDIO re, na tifuoho mo ki sakipai tipa gu sanahe ngbefuo ho.
Gini bete agene rengbe kumbakudee ka yugo gupai ngbaha nga ko nakpinyemu diako na kini ngerefuo ri?
Mo gedi AKorosaio 3:12, na tifuoho, mo ki sakipai tipa gi sanahe re:
Waigu rengbe kumbakudee ka yugo agi asino re rogo gako rogatise yo?
5. Dereakumba—oni kpinyemu akumbaroni na kini irisi yo
Baibiri nangarasa diakumba nga ri irisi kumbari ka si vura du vurũ nga ni nairiso Yekova watadu ni airisongo ko te. Mo gedi 1 Petero 3:1, 2, na tifuoho, mo ki sakipai tipa agi asanahe re:
Ka si du nga kumbamo nga irisi Yekova te, zanga kapa mo naida aida ko irisi Yekova. Ginipai mo abihe nga si rengbe kadu na wene maapai kuriko, kaa tungusapai fuko dedede watadu ka yugo wene asino gbiati irisa? Tipagine mo abihe ti ni wo?
Kumbakuadee gbiati dereakumba ima rengba ka manga wene adiaberã kina sa. Wa vura duhe wo, ti kura aregbo, diakumba ima rengba ka zanga ida kuti gu diaberã nga ga kumbari. Ri ima rengba ka sakapa gari aberãpai fu kumbari zezeredi na rogo irisa yo, ono si naida ri ini gupai nga Yekova ima fu gu pagbia fuko nga ka manga diaberã tipa gupai du ni wenehe tipa gako riikporo. Si naida ri mangi ome nyanyaki ka songoda gu gako diaberã re. Ni manga ri he wo ri nafubee sa ngbarago rogo gari ramukporo. Mo gedi 1 Petero 3:3-5, na tifuoho, mo ki sakipai tipa gi sanahe re:
Waigu du Yekova ho dee ayugo irisa ni fu kumbari?
6. Mo ima rengba ka diabe akpakarapai rogo gamo rogatise yo
Rogatise ho du ni rengberengbe he te. Sidu tie, arogotise du wa ka i mangi ome kina sa tipa ka diabe akpakarapai. Mo bi gu VIDIO re, na tifuoho, mo ki sakipai tipa agu asanahe ngbefuo ho.
Rogo gu vidio re, gini apai naayugo gupai nga agu arogotise re na wene pagume berewe te?
Gini adiandue i amangihe tipa ka nyakasa gayo rogatise?
Mo gedi 1 AKorindo 10:24 na AKorosaio 3:13. Tifuo mo gedi averesi nibasasa, mo sakipai tipa gi sanahe re:
Waigu mangapai kuti agi arugute re narengbe ka nyakasa rogatise?
Baibiri nagumba gupai nga si naida ani nairisa akuarani. Yugo irisa nakoda manga fu aboro ngba wene gene na rogo irisa yo. Mo gedi ARomo 12:10, na tifuoho, mo ki sakipai tipa agi asanahe re:
Ya mo si naida kumbakuadee watadu dereakumba sungudi kina gayo abadiarogatise mbata i yugu irisa fuyo? Tipagine mo abihe ti ni ho? Watadu tipagine mo abingo ho ti ni wo ya?
GU KURA ABORO NAPE GUPAI NGA: “Ani mbembedi berewe na gimi badiarogatise wagu ani adu mbata te.”
Waigu rengbe mo ka sakarogo gupai yo nga Baibiri rengbearengba ka undo yo?
GINIPAI MO NAWIRIKIHE?
Kumbakudee gbiati diakumba rengbearengba kadu na ngbarago ho i akpinyemu tiyo ni, kini yugu irisa dagbatiyo, na kini mangipai kuti agu abangua arengo nga ga Baibiri.
Fugöpai
Waigu rengbe kumbakudee ka fubee kuti gu ramukporo du na ngbarago?
Waigu rengbe diakumba ka fubee kuti gu ramukporo du na ngbarago?
Ka si dunga mo ima manga rogatise, gini bangua rengo nga ga Baibiri rengbe ka undo ro mo nyakasi gamo rogatise?
MO WETEKE GU KURA APAI
Mo bi gu wene aberãpai rengbe ka undo roni oni gbia ngbarago ti raka wangia oni aborokporo.
Oni Rengbearengba ka Gbia Ngbarago Rogo Gaoni Ramukporo (burosua)
Mo bi gu manzigo nga ga vidio nga gu nayugopa agu amaku du ti mangapai kuti agu arugute nga ga Mbori rogo rogatise yo.
Mo wisigingo gupai ranigose fu gu pagbia nga ga kumba ayugoho.
“Adee, Tipagine si Aida ti ni Oni Ra fu Akumba?” (Ngbaõbambu Sinziri, Merekoko 15, 2010)
Waigu gu kura arogotise sa adibe kpakarapai kodihe na mbutise?
Ani Ambakadi Gaani Rogotise Berewe Mbiko gu Undo Nga ga Mbori (5:14)