Gu Rengo Du Tipa Aramegido

‘Atoro adaimona naandu fuo abakindo zegino dunduko ki dungura yo kurogo gu ba i niya ti ni rogo pa Ebere yo, Aramegido.’—YUGOTI 16:14, 16.

ARAMEGIDO nga rimo ba. Ono tie, si awiranga gupai nga ba adu ho wo auru kpotosende te.

Tipagine tie aboro ninaamangasunge amanga ti ni kindi na gu fugo nga “Aramegido” ho i afura ni tipa gu pai duwa vura? Boro rogo gu fugo re yo nga gine?

I Adungura Yó Kurogo gu Ba i Aya ti ni Aramegido

Gu fugo pa-Ebere i asaha kurogo Pa-Zande nga Aramegido, rogoyo nga “Gu Bagangara Nga ga Megido.” Wa vura duhe nga bagangara ho naadu wo te, ba kinaho du rimoho nga Megido. Si rogo gu ba nyanyakipa agene ue anaagbia tihe rogoho bangbanda nodiyo na dioyo rogo gu ba agu aYisaraere nadumbata anaaraka rogoho. Nyanyakipa avura i anaasoho rogo gu ba re. Si du nasa gupai nga i naamangasunge na rimo gu ba nga Megido re ho i afura ni tipa vura.a

Ono anga gupai nyakipaha tipa gu ba nga Megido re nga agu avura i anaasoho yo te, ono ndu gupai i anaasoho ti ni yo. Gu ba nga Megido angia papara gu Ringara Mokido Yekova Mbori afuhe fu aYisaraere. (Gate 33:1; Yosua 12:7, 21) Ko azungahe fuyo nga ko abanda yó abanda be agu aboro ka ye ka zubo yó na vura. (Pa Fu Rugute ni Ue he 6:18, 19) Nikpiapai, rogo gu ba nga Megido du Yekova abatasi aYisaraere ni ngba iiriwo gene be gu Bakindo aKanano nangia Yabina na gako barutiriivura nangia Sisera.—Abasapungbanga 4:14-16.

Sidu tie, gu fugo nga “Aramegido” narukuba gu kura nyanyakipa pai kia. Si arunga kuba ba te, ono si narukuba pai. Si narukuba gu vura nika manga dagba nyanyaki aome ue.

Gu sangbanebi du rogo Yugoti nafura tipa gu regbo kumbatayo Satana na gako adaimona nika sa agu abazogo nga ga zegino yó na gayo aborovura i dunguratiyo ka sovura kuti ga Mbori aboro. Rogo gi vura re, badungu amirioni aboro nika kpi ho Mbori nika diabe agu aboro ni nika zubo gako aboro na vura.—Yugoti 19:11-18.

Wa Ziazia Kekeapai agumba gupai nga Mbori nga gu boro du na “weneringise na inapai, aipo nga na zinga ya,” tipagine ko nika sa gupai ti ni nga aboro kpi wa gure? (Nemaya 9:17) Tipa ani gi tirani na ndu gupai Mbori nika mangapai ti ni wo, si naida ani gbia karagapai kuti agu asanahe biata nga: (1) Da nika tona gu vura re? (2) Tipagine Mbori nika rimiso tiko ti ni kurogo gu vura re? (3) Sangbana gu vura re nikangia gine?

1. DA NIKA TONA GU VURA RE?

Anga gu vura nga Aramegido nikangia mangapai na imisiringbaduse be Yekova te. Kuba gure, Yekova nika so gu vura re tipa ka batasa wene aboro be gu gbegberẽ aboro nika ida ka nyasa riipa yó. “Abakindo zegino dunduko” du nikangia agu aboro nikaa sovura na imisiringbaduse. Tipagine i nika zubo ga Mbori aboro ti ni? Satana nika mangasunge na abazogo gbiati aborovura wakina gako ũmbaro tipa i asadi ka nyasa riipa airisi Yekova Mbori.—Yugoti 16:13, 14; 19:17, 18.

Areme, gu berã nga abazogo rengbe ka sovura kuti ga Mbori aboro arengbanga ka ye ku berã aboro yo te mbiko gupai nga aboro nanyakasapa ranirii nga ga fugo gbiati pambori wa pai. Ono tie ngbatungapai wa gure aima manga rogo 20 sa kama agarã na si namanga amanga awere a.b Wa vura duhe wo, kparakparaapai kinaho ue dagba wai i azubo ga Mbori aboro mbataano na wai i nika zubo yó ti regbo Aramegido. Bambatapai nga, i nika zubo yó rogo aba dunduko auru kpotosende. Uepai nga, ga Yekova Mbori mangapai tipa gipai re nika nyaka kisusi gu ko amangihe mbata. (Yeremaya 25:32, 33) Ziazia Kekeapai nafura tipa gu vura re ki ya si nikangia “gu vura nga ga gu bakere rago nga ga Mbori.”

2. TIPAGINE MBORI NIKA RIMISO TIKO TI NI KUROGO GU VURA RE?

Yekova naruga agu aboro nairisoko nga i du ni aboro zereda na kini kpinyemu avurayo. (Mika 4:1-3; Matayo 5:43, 44; 26:52) Sidu, i adianga aũvura kubeyo tipa ka sovura ho i nika zubo yó ni te. Ka Mbori arimisongo tiko kurogo gu vura re tipa ka batasa gako aboro ya, i nanyasa riipa yó kindi. Ka pai mangi wo, si gbarasi pa rimo Yekova Mbori agbarasa. Ka Yekova mbu gako aboro avurayo nyasi riipa yó, si duwa ka i ya ko akpingo nyemuyo te, watadu ome tiko te. Ka pai mangingo wa gure tipa Mbori te!—Atambuahe 37:28, 29.

Mbori aidanga ka gbarasa aboro te, sidu, ko nafu zahe tipa gupai ko nika mangaha. (2 Petero 3:9) Vurube agu apangbanga du nibandabandaha rogo Ziazia Kekeapai, ko natingida aboro na gupai nga mbata kusayo, ko aima irobape ho aboro anizubo gako aboro ni. (2 Abakindo 19:35) Ziazia Kekeapai nazahe a nga kumbatayo, ho Satana gbiati agu aboro ko amangasunge naayo nika zubo ga Yekova aboro ni, ko nika sovura aso tipa ka banda yó. Fugo Mbori aima gumbaha bakuru kusayo nga Yekova nika gbarasa gbegberẽ aboro agbarasa. (Asanza 2:21, 22; 2 ATesaroniko 1:6-9) Ti gu regbo re, agu aboro re aino gupai aino nga i wo ti vura kuti gu Mbori Duna Tanduapai Dũ.—Yezekere 38:21-23.

3. SANGBANA GU VURA RE NIKANGIA GINE?

Gu vura nga ga Aramegido re nika batasa dungu mirioni aboro. Si nga gupai nika manga mbata fu zereda ye ku auru kpotosende ane.—Yugoti 21:3, 4.

Gu kitabu nga Yugoti nafura tipa “bakere rimbasa aboro” nga aguyo nika bata ti regbo gu vura re. (Yugoti 7:9, 14) Tii gu nungusahe nga ga Mbori, agi aboro re nika undo tipa ka sa kpotosende niparadizo na apai ki tona ka manga berewe rogoho ringbisihe kuti ga Yekova ringbisapai.

Ya mo ani ini gu regbo i nika zubo ga Mbori aboro ti ni?

[Footnotes]

[Gu sura du ti kpewaraga 6]

Yekova Mbori aima batasa gako aboro mbataano be avurayo

[Gu sura du ti kpewaraga 7]

Yekova nika batasa gako aboro abatasa berewe ti regbo gu vura nga ga Aramegido