“Gimi Mangapai Adu Nigbegberẽhe”

AGU APAI MI AMANGIHE:

Mi asono rogo rungorungo kporo rogo gu gbata nga Turku. Buba angia wene bangi mbaro kpata, mi na tamere anaangi mbaro kpata kinawo a. Ho mi adu ni sukuru yo, wo akuare anaasoa re sa kpata dedede, mi aadunga na ndundu tipa ka takpata te. Ho mi adani nisosono gude, mi akodi tire kuti amangi gbegberẽ apai na si asa re mi rimisi tire kurogo ta kere akpata. Mi akuru a bara agu aboro naata agu abia duna woroho kuari gbe, na mi ki tona ka bihe nga mi nika daada nibatabia.

Mi angbeke agaza ki tona riigbu tabia. Fuoho aturongo te mi ki da niwene bayango rogo gaani riigbu. Mi anaamangapai rii tambara yo wakina irapopo. Bambiko wa gaani riigbu aduna gbegberẽ mangapai na ani kidu wa zingizingi aboro, dungu aboro aima ino rani. Ani atona kaa tabia kubarabangiri dungu aboro na ki defugo agu akuraha, na gu yangadaha aima ngba ti dungu aboro. Bara ti digido gu garã nangia 1980, ani andu ku Amerika yo tipa ka tabia yo. Ani ata bete abia rogo agu agbata nga New York na Los Angeles, na ani ki sigira bakure na agu aboro nangerakurii agu aba i abika abia rogoho mbata fu ani karaga tirani ku Finland yo.

Wa mi avura kaa gbia ngbarago rogo tabia, mi akpinyemu ka raka wene raka susi gure. Rago atona ka gberã tire be gu gbegberẽ mangaapai naadu ba gaani tabia yo. Rago agberẽ a tire na gu gene mi aaraka gimi raka ngbaha. Mi aabi tire wa gbegberẽ boro, na mi aagunde nga i nika zo re rogo we. Mi aʹasadi ka gbia akaragapai rogo dungu abuku nga ga akanisa. Mi anaakpara gbe fu Mbori tipa ko undo re, wa vura duhe nga mi aabi tire nga ka mi sanga ngbarago tiko te.

GU GENE ZIAZIA KEKEAPAI AʹARIA GIMI RAKA NGBAHA:

Tipa ka undo tire, mi aamangasunge rogo gu biro nga ga kekeda awaraga. Rogo kura uru sa, mi aye ka ino gupai nga gi badiasunge angia Dezire Yekova. Mi asanako na dungu asanahe. Gako wene akaragapai rogo Ziazia Kekeapai aima ngba tire, na mi ki idi ka tona wirika Ziazia Kekeapai naako. Fuo mi wirikipai tipa bete aposo, i ayambu gu riigbu mi atabia rogoho si ndu ka tabia Amerika yo na ki kusihe gu bia re yo. Mi abihe nga boro gere nga gu momu si aidanga mi kpa ha ya.

Mi aya fu gu Dezire Yekova nawisigopai na mi, mi naida ka tabia koyo bara sa fuo gure, mi ki tona ka mangapai kuti agu arugute nga ga Ziazia Kekeapai rogo gimi raka yo. Ono ko apenga gako berãpai te, ko aya fere mi gedi afugo Yesu rogo Matayo 6:24. Gu veresi re nayaa: “A nga boro sa ka ra fu abaira ue te.” Kina iriworago naati tire ka ino rogo agu afugo Yesu yo re. Ono fuo bete aʹuru, kina ngba gi bayugu Ziazia Kekeapai nazere! Mi aya fuko wee, bambiko wa mi aida ka pekafuo Yesu, mi ima mbu tabia!

Ziazia Kekeapai adu wakina bitirobi ka yugo gimi aingahe fere. (Yakoba 1:22-25) Mi abi gupai nga gimi mangapai adu nigbegberẽhe: Mi angia boro rukö na kingia kere boro ngbaduse. Mi anaape gbegberẽ afugo, na kini takpata, nivugundo, na kini mbiribuda nikerehe. Ho mi aini gupai ni nga gi raka natagbagatihe na agu arugute nga ga Ziazia Kekeapai, rago agberẽ tire na gimi mangaapai. Wa si avura du wo, mi aima ida ka manga ariapai.—AEfeso 4:22-24.

Gbe ti tonatonaha, ome bakere gberarago aima fu rire be gu gbegberẽ apai mi amangihe kusayo. Ono gu Dezire Yekova naawisigo Ziazia Kekeapai na mi aima undo re nibakerehe. Ko ayugu gupai fere Ziazia Kekeapai apehe rogo Yesaya 1:18 nga: “Ka gaoni ingapai vura du ni zamba ha vurũ, si adú adu kpau wa morogumba.” Gi veresi re na agu akuraha aima sare mi idi kuti gupai nga gu Barani du ngbangbaturũ yo nga boro inapai, ko na nyemu ka husa agu aoro du ti agu aboro saberã tigayo aingapai.

Ho mi aini Yekova ni niboro na kini kpinyemuko, mi kpara gimi raka fuko. (Atambuahe 40:8) Mi azi bapatiza rogo gu garã nangia 1992 ti regbo gu bakere dunguratise nga ga dungu aringara nga ga aDezire Yekova namangi St. Petersburg, Russia yo.

GU UNDO MI AGBIAHA:

Mi ima zio dungu wene abakure dagba airisi Yekova yo. Dedede, wo ani naadungura tirani kini ta manzigo rogo iriiri gene yo na kini gbia ngbarago be gi gamahe nga ga Mbori re. (Yakoba 1:17) Gu kurapai ngba tire gbe nga pa roga ani tirani na Kristina. Ani ima manga dungu apai naari nga gu naaye na ngbarago furani na ani ki ima gbiatirani a na agu akpakarapai nga ga raka, na mi nidu na ngbarago kaa pekepa agu apai nabi re furi.

Wa ka mi aadanga nidezire Yekova ya, ka mi dunga niunga re areme te. Mbata kusayo, wo mi anaarimoso tire kurogo akpakarapai na kini kusi tire behe. Awere, mi na ndikidi maabangirise rogo raka yo na mi nabihe nga apai dunduko kina rogo gu baha.