Wene Pangbanga fu Rikaaboro Dunduko

Pa zinga Yesu be kpio asa gako abawiriki i idi kuti gupai ko anaagumbaha fuyo na si asa yó i du a zaaza. Gu mokedi nangia Pauro ata rogo agu aringara naadu Asia Minor yo na Mediterena yo, tipa ka sigira adungurati na kini nyakasi aKristano i ru nyanyaki tipa ruru mangapai na sa agu asogote naagbiayo yo. Wa i avura ka gbiatiyo na akparakapai, dungu aboro aima da ni aKristano.

Kusa i aba Pauro ku bambukiso yo. Wa si avura duwo, ko akeke awaraga tipa ka ngarasa akurako aKristano na kini fu arugute fuyo. Ko azahe tipa gu kerepai abasamungu kuti ndikidi pambori aaye na ni. Ga Mbori toro aundo ko tipa ko bipai ku mbatayo nga “gbegberẽ awaru” nika kura ki “nigumba irairaapai,” ami nika rimo ku dagbayo “ka gbefa abawiriki fuo yo.”​—Amokedi 20:29, 30.

Ti digido bambata sa kama agarã, agi abasamungu re atona ka kura. Ti gu regbo re, Yesu afu Yugoti fu Yoane tipa gupai si adu nga si nika manga ku mbatayo. A wa Yoane akehe, abasamungu aarengbanga ka ká na Mbori ti ringbisa gako mbakadapai tipa kpotosende na aboro te. Si adu nga i nika tungusa gu wene pangbanga nga ga Kindo fu “arikaaboro, na ngbatunga aboro, na ngbatunga afugoyo, na aboro.” (Yugoti 14:6) I nika karaga paradizo berewe ku auru kpotosende ane, na agu aboro namanga gupai Mbori akpinyemuhe nika raka rogoho.

Ya mo ‘wene pangbanga’ nga gipai re te? Ka si du tie wo, mo wirikipai tipa gupai Mbori apehe fu aboro du rogo Ziazia Kekeapai yo na ki bi wai rengbe mo ka gbia undo ti ni areme na ku mbatayo.

Mo ima rengbe ka geda Ziazia Kekeapai rogo Internet rogo www.jw.org/zne Rogo gu bangiriba re, mo ima rengba ka wisigo gu burosua nga, Gu Wene Pangbanga Naye be Mbori na gbiati gu buku nga Gini Apai Nzunzu Ziazia Kekeapai Ayugoho? kodihe na gu kura awaraga nasakapai tipa ndu gupai si aida ani kido ti ni kuti Ziazia Kekeapai na wai rengbe ani ka mangapai kuti gaha arugute wangia ani aborokporo na rogo gaani raka yo. Watadu mo sana boro sa dagba aDezire Yekova tipa gu kura apai.

​—Mburu agi apai re rii Amokedi, AEfeso, AFiripoio, AKorosaio, Firemona, 1 Yoane, Yugoti.