Ukuhlwaya Ingcebo Yohlobo Oluhlukile
KUSUKELA kudala, abantu baye babazisa ubuhle bengcebo yendalo esitholakele eyake yacasha emhlabeni. Ngokwesibonelo, iHavilah, indawo ehlotshaniswa ne-Arabhu yasendulo, yayidume ngamatshe e-onyx anemibala emihle. (Genesise 2:11, 12) Noma cabanga ubona umpristi omkhulu wakwa-Israyeli wasendulo ephethe isihlangu sesifuba esenziwe nge-onyx, irubi, i-emerald, itopazi, namanye amatshe ayigugu—angu-12 esewonke—anegolide. Yeka ukuthi kwakuba ubukhazikhazi kanjani! (Eksodusi 28:15-20) Futhi, amatshe amaningi ayigugu asetshenziselwa ukwakha ithempeli eJerusalema, elalinikezelelwe ukukhulekela uJehova. (1 IziKronike 29:2) Amaningi alawomatshe ayigugu kungenzeka ayepholishwa ukuze acwebezele kakhulu. Lokho okuye kwatholwa abavubukuli muva nje kubonisa ukuthi ezinkulungwaneni zeminyaka edlule, abantu babesebenzisa umshini wezinyawo olula ukuba basebenzise itshe lokusila ukuze bapholishele kulo amatshe amahle. Ngakho indlela yanamuhla yokuchitha isizungu ngokuqoqa amatshe amahle ayikhona okuthile okusha.
Izinto Zokusebenza Ozidingayo Nendawo
‘Yiziphi izinto engizozidinga ekuqoqeni amatshe amahle?’ ungase ubuze. Isando sokuqhekeza amatshe, esiyisikwele bese siba yisicaba kolunye uhlangothi futhi sicije ngakolunye, sibalulekile. Iphepha lokusonga okutholakalayo kanye nesikhwama ozokufaka kuso kuyokwanela. Uyabona? Akubizi neze.
‘Ngizoqala kuphi ukufuna amatshe amahle?’ uyabuza ngokulandelayo. Amathafa kanye nemisebe yomfula kuyizindawo ezikahle ongaqala kuzo ukuhlwaya kwakho. Kungani kulapho? Kungenxa yokuthi izingcezu ezingavamile zamatshe amahle, eziqhephuke emadwaleni amakhulu endaweni ephakeme, zingagingqika zehle ngentaba noma ngomfula, zibe sezilolongeka futhi zipholisheka njengoba zehla. Lapho imifula ihlangana khona nolwandle, ungathola amatshe amahle egugulekele lapho umfula ungenela khona olwandle nezimbokodo ezikhukhulwe amanzi zaze zayofika ogwini lolwandle zisuka emadwaleni angaphansi kolwandle. Ezinye izindawo ezinganikeza amathuba ajabulisayo kubaqoqi bamatshe amahle izindawo eziye zambiwa kuvulwa imigwaqo kanye nezindawo eziseduze nezinkwali noma izimayini esezashiywa. Kodwa kufanele uqaphe kulezozindawo. Kuhlala kunengozi yokuthi amatshe aqhephukile angawa. Kwezinye izindawo, kungase kudingeke uthole imvume ngaphambi kokuba uqalise ukuhlwaya kwakho.
Uma uhlala eNingizimu Afrika noma eBrazil, ungase ube nenhlanhla yokuthola amatshe edayimane. Amarubi namasafire angatholakala emisebeni yemifula yaseNdiya, eMyanmar, naseThailand, futhi ama-emerald angatholakala eColombia, eNdiya, eNingizimu Afrika, naseZimbabwe. EChina naseJapane, i-jade ne-jadeite kuthandwa kakhulu ekwenzeni amatshe ayigugu, izinto zokuhlobisa, kanye nezinto zokushisa impepho. I-jade itholakala eMyanmar, New Zealand, Alaska, naseJapane.
Elinye lamatshe ayigugu amahle kakhulu i-opal, uhlobo lwe-silica engesiyo ikristalu. Njengoba etholakala e-Australia naseMexico, ama-opal anezinhlobonhlobo ezinhle zemibala—othi awube bomvu, ophuzi, oluhlaza okotshani, noluhlaza okwesibhakabhaka. Ama-opal athambile ngokuqhathaniswa futhi lapho epholishwa ngokuvamile ambozwa ngongwengwezi lwe-quartz ukuze kuvinjelwe ukuklwebheka.
Izinto Ezisetshenziswa Izimfundamakhwela
Amatshe anjengalawa ayizinto ezingatholwa omakadebona futhi akuvamile ukuba atholwe izimfundamakhwela. Nokho, i-quartz, iyinsada futhi kulula ukuyithola. Ingenye yamaminerali avame kakhulu akha amadwala futhi itholakala ezinhlotsheni zamadwala ezintathu ezinkulu. Ungase uthole ukuthi olunye uhlobo lwe-quartz lukhanya ngalé, kanti ezinye zingase zingenise ukukhanya noma ngisho zifiphale. Ezinye zinemihlobiso yemibala ebomvu, ophuzi, onsomi, oluhlaza okotshani, noma onsundu. Yiqiniso, ngaphezu kokufuna ama-quartz, ungaqoqa noma iliphi iqhezu ledwala elinombala noma imihlobiso ethakazelisayo. Lapho itshe selipholishiwe, bungase bukumangalise ngokujabulisayo ubuhle balo futhi ungase ufise ukulisebenzisa njengetshe lokuhloba elihlotshiswe kakhulu, njengento yokuhlobisa phezu kwekhabethe, noma njengengxenye yentaba yokuzenzela enamatshe engadini yakho.
Ngemva kokuqoqa izingcezu ezanele zamadwala, kudingeka wazi okuthile ngezindlela zokupholisha. Ezinye izinhlangano zabantu abaqoqa amatshe zisikisela ukuba uwulukuhlele amatshe nento yokushukusha namanzi emphongolweni ophendukayo onenjini encane esebenza ngogesi. Lokhu kuyodinga isineke nesikhathi, ngokunokwenzeka kuyothatha amasonto amaningi, uqala ngento yokushukusha emahhadla, bese kuza ecolekile, bese kuthi ekugcineni kufakwe uphawuda wokupholisha. Kodwa imiphumela iyifanele kahle kakhulu imizamo.
Ezinye Izinhlobo Zamatshe
Ukuqoqa amatshe amahle akugcini nje kuphela ekuqoqeni izingcezu ezincane. EJapane amatshe amahle amakhulu asetshenziselwa ikakhulu ukuhlobisa ingadi. Lamatshe angabiza imali enkulu ngendlela emangalisayo. Ngokwesibonelo, iqhezu elilodwa letshe elinombala obomvana elinesisindo esingamakhilogremu angu-700 lalibiza imali engaphezulu kakhulu kwamaRandi angu-6 700. Kungani lalibiza kangaka? Ukuba yigugu kwalo kusebuhleni obungokwemvelo bendlela elakheke ngayo. Ungase uhlele ukuba amanzi ageleze esuka endaweni eyakheke njengenkomishi ephezulu kulelitshe, agelezele phansi njengokungathi izimpophoma ezincane.
Ingabe manje uvukwa ugqozi lokuhamba uyohlwaya amatshe amahle? Uma kunjalo, sithemba ukuthi uzothola ingcebo yohlobo oluhlukile.—Inikelwe.