I-chitenge—Esetshenziswa Ngezindlela Ezihlukahlukene

NGUMLOBELI WE-PHAPHAMA! ENAMIBIA

I-CHITENGE—ingabe uyazi ukuthi iyini? Uma ithuba likuvumela, ake siye endaweni ethile ehlala abaNsundu siyobona ukuthi i-chitenge isetshenziswa kanjani futhi kudlalwe kanjani ngayo ngezindlela ezihlukahlukene.

Indawo esivakashela kuyo kuseRundu, eNamibia. Siqala emakethe ephithizelayo. Abesifazane abeneme bayahweba, bayathenga, bayathengisa, noma babuzana impilo. Kodwa uma ubhekisisa, uyaqaphela ukuthi cishe bonke babhince indwangu ekhethekile, isiketi okuthiwa i-chitenge.

I-chitenge kakotini ingamamitha amabili ubude nobubanzi obuyimitha nengxenye futhi inemibala nemiklamo enhlobonhlobo. Amanye ahlotshiswe ngezithombe zezilwane, kanti amanye ahlotshiswe ngabantu noma ngezinto zemvelo.

Ngokulandelayo, sivakashela abantu abahlala kulendawo emizini yabo eyakhiwe ngodaka yafulelwa ngotshani. Abesifazane bamatasa ngemisebenzi yabo—behlelemba isihlabathi esiphambi kwemizi yabo noma bebasa umlilo wokuphekela umkhaya. Abanye bambethe i-chitenge kuphela, manje eluliwe yaboshelwa esifubeni njengengubo. Lapho laba besifazane begqoka—mhlawumbe begqoka iyembe nesiketi—babhinca i-chitenge ukuze iziketi zabo zingangcoli lapho behamba emigwaqweni ewubhuqu.

Umbonile lowaya wesifazane osemusha okhangayo? Ushuqule i-chitenge—engamamitha amabili ubude—wayenza umnqwazo oyinkimbinkimbi, omuhle. Futhi bheka indlela abelethe ngayo umntanakhe. Ubophe enye i-chitenge njengembeleko eboshelwe ehlombe elilodwa. Umntanakhe uyakujabulela kakhulu ukubelethwa unina ngalendlela. Uma eqala ukukhala, unina umane aqaqe lembeleko ayilethe ngaphambili abese emncelisa noma amlolozele elokhu ehamba.

Kungenzeka ukuthi umbonile nalapho ebopha imali yakhe ngefindo lechopho lesiketi sakhe—umxhaka wemali okahle. Ngemva kokuthenga izinto azidingayo, ukhumula i-chitenge ewumshuqulo, afake imifino yakhe kuyo, ayibophe ngobuchule, abese eyithwala ekhanda alibangise ekhaya.

Lapho efika ekhaya, uyobona nezinye izindlela zobuhlakani ezihlukahlukene zokusebenzisa lendwangu. Phambi komnyango ngamunye kulenga i-chitenge enombala ogqamile. Njengoba ubona, lendlu ayinazo izindonga ezihlukanisa amagumbi. Kunomgibe, kwase kulengiswa ama-chitenge amane kuwo, ahlukanisa indawo yokuhlala nekamelo lokulala.

Lomame osimemile ubeka imifino yakhe phansi futhi aqaphele ukuthi akanazo izinkuni. Ngaphambi kokuba ashone ehlathini eyotheza izinkuni, uqikelela ukuba athathe enye i-chitenge. Ngemva kokutheza, ubopha izinkuni nge-chitenge eyodwa. Ube esethatha enye i-chitenge ayenze inkatha, ayibeke ekhanda. Lokhu kuba isivikelo esihle lapho ethwala lenyanda enkulu yezinkuni ebuyela kwakhe.

Lapho esebeke izimbiza zakhe eziko, unquma ukuthatha umzuzwana ayobingelela omakhelwane. Lapho esakhuluma ekhomba nangezandla, undlala i-chitenge yakhe phansi abese ebeka umntanakhe kuyo. Umntwana uyamomotheka ejabule njengoba unina emnika uthi lokuba adlale ngalo.

Ngokushesha umngane wethu kufanele aphume ayobheka izimbiza. Kodwa seliguqubele, futhi ngokungazelele seliqala ukuna. Engenandaba, ugona umntanakhe ngengalo eyodwa abese egubuzela ikhanda lakhe nge-chitenge. Ngalesi sambulela sakhe esitholakala eduze, asezemboze ngaso nomntanakhe, ulibangisa ekhaya eyobheka izimbiza.

Iyisiketi, iyingubo yokugqoka, iwumxhaka wemali, iyisikhwama sokufaka izimpahla, iwumcamelo, iyingubo yokulala, iyisambulela, iyimbeleko, iwumnqwazo—izindlela zokusebenzisa i-chitenge ziningi kakhulu futhi ziwubufakazi bokuhlakanipha kwalaba bantu abaNsundu.

[Izithombe ekhasini 23]

I-“chitenge” isetshenziswa ngezindlela eziningi: njengesibopho sezinkuni, imbeleko yomntwana, umnqwazo omuhle, ingubo enemibala egqamile