INgxenye 8

Injongo KaNkulunkulu Isondela Ekugcwalisekeni

1, 2. UNkulunkulu ubelenza kanjani ilungiselelo lokuqeda ukuhlupheka?

UKUBUSA kwabantu kanye namademoni abayizihlubuki bekulokhu kuwuhudulela phansi umkhaya wesintu amakhulu amaningi eminyaka. Nokho, uNkulunkulu akazange angakunaki ukuhlupheka kwethu. Kunalokho, phakathi nawo wonke amakhulu eminyaka, ubelokhu enza ilungiselelo lokukhulula isintu ekuxhakathisweni ububi nokuhlupheka.

² Ngesikhathi sokuhlubuka e-Edene, uNkulunkulu waqala ukwembula injongo yakhe yokwakha uhulumeni owawuyokwenza lomhlaba ube ikhaya labantu eliyipharadesi. (Genesise 3:15) Kamuva, njengomkhulumeli kaNkulunkulu oyinhloko, uJesu wenza lohulumeni kaNkulunkulu ozayo waba isihloko sokufundisa kwakhe. Wathi kwakuzoba yiwona kuphela ithemba lesintu.—Daniyeli 2:44; Mathewu 6:9, 10; 12:21.

3. UJesu wawubiza ngokuthini uhulumeni ozayo womhlaba, futhi ngani?

³ UJesu wabiza lowohulumeni kaNkulunkulu ozayo ngokuthi “umbuso wezulu,” njengoba wawuzobusa usezulwini. (Mathewu 4:17) Wawubiza futhi ngokuthi “umbuso kaNkulunkulu,” njengoba uNkulunkulu ayezoba uMsunguli wawo. (Luka 17:20) Emakhulwini eminyaka adlule uNkulunkulu waphefumulela abalobi bakhe ukuba babhale iziprofetho eziphathelene nalabo ababeyokwakha lowohulumeni nalokho owawuzokufeza.

INkosi Yomhlaba Omusha

4, 5. UNkulunkulu wabonisa kanjani ukuthi uJesu wayeyiNkosi yakhe egunyaziwe?

⁴ NguJesu, eminyakeni ecishe ibe izinkulungwane ezimbili edlule, owagcwalisa iziprofetho eziningi eziphathelene nalowo owayezoba iNkosi yoMbuso kaNkulunkulu. Wabonakala kunguyena okhethwe uNkulunkulu ukuba abe uMbusi walowo hulumeni wasezulwini phezu kwesintu. Futhi ngemva kokufa kwakhe, uNkulunkulu wavusela uJesu ekuphileni kwasezulwini njengesidalwa somoya esinamandla, esingenakufa. Kwakunofakazi abaningi ababona ukuvuka kwakhe.—IzEnzo 4:10; 9:1-9; Roma 1:1-4; 1 Korinte 15:3-8.

⁵ UJesu ngalesosikhathi ‘wahlala ngakwesokunene sikaNkulunkulu.’ (Heberu 10:12) Lapho walinda isikhathi uNkulunkulu ayezomnikeza ngaso amandla okuba athathe isinyathelo njengeNkosi yoMbuso kaNkulunkulu wasezulwini. Lokhu kwagcwalisa isiprofetho esikumaHubo 110:1, lapho uNkulunkulu emtshela ukuthi: “Hlala ngakwesokunene sami, ngize ngenze izitha zakho zibe-yisenabelo sezinyawo zakho.”

6. UJesu wabonisa kanjani ukuthi wayekufanelekela ukuba iNkosi yoMbuso kaNkulunkulu?

⁶ Lapho esemhlabeni, uJesu wabonisa ukuthi wayesifanelekela lesosikhundla. Naphezu kokushushiswa, wakhetha ukugcina ubuqotho kuNkulunkulu. Ngokwenza kanjalo, wabonisa ukuthi uSathane wayenamanga lapho ethi akukho muntu owayeyothembeka kuNkulunkulu ngaphansi kovivinyo. UJesu, umuntu ophelele, ‘uAdamu wesibili,’ wabonisa ukuthi uNkulunkulu akenzanga iphutha ngokudala abantu abaphelele.—1 Korinte 15:22, 45, NW; Mathewu 4:1-11.

7, 8. Yiziphi izinto ezinhle uJesu azenza lapho esemhlabeni, futhi wabonisani?

⁷ Yimuphi umbusi oke wafeza okuningi kangaka okuhle njengoba kwenza uJesu eminyakeni embalwa yenkonzo yakhe? Enikezwe amandla umoya ongcwele kaNkulunkulu, uJesu waphulukisa abagulayo, abakhubazekile, izimpumputhe, izithulu, nezimungulu. Waze wavusa ngisho nabafileyo! Wabonisa ngesilinganiso esincane lokho ayezokwenzela isintu ngesilinganiso sembulunga yonke lapho eba semandleni oMbuso.—Mathewu 15:30, 31; Luka 7:11-16.

⁸ UJesu wenza okuningi okuhle lapho esemhlabeni kangangokuba umfundi wakhe uJohane wathi: “Kukhona nezinye izinto eziningi azenza uJesu; uma zilotshiwe zona ngazinye, ngithi nezwe lonke lingezanele izincwadi ezingalotshwa.”—Johane 21:25.a

9. Kungani abantu abanhliziyo ziqotho bathutheleka kuJesu?

⁹ UJesu wayenomusa futhi enozwela, enothando olukhulu kakhulu ngabantu. Wasiza abampofu nabacindezelekile, kodwa akazange ababandlulule abacebile noma abasezikhundleni. Abantu abanhliziyo ziqotho basabela esimemweni sothando sikaJesu lapho ethi: “Zanini kimi nina nonke enikhatheleyo nenisindwayo, mina ngizakuniphumuza. Bekani ijoka lami phezu kwenu, nifunde kimi, ngokuba ngimnene, ngithobile ngenhliziyo; khona imiphefumulo yenu iyakufumana impumuzo. Ngokuba ijoka lami lihle, nomthwalo wami ulula.” (Mathewu 11:28-30) Abantu abesaba uNkulunkulu bathutheleka kuye futhi babheka phambili ekubuseni kwakhe.—Johane 12:19.

Ababusi Abakanye Naye

10, 11. Obani abazohlanganyela noJesu ekubuseni phezu komhlaba?

¹⁰ Njengoba nje ohulumeni babantu beba nabaphathi ababambisene nabo, kunjalo nangoMbuso kaNkulunkulu wasezulwini. Abanye ngaphandle kukaJesu bazohlanganyela ekubuseni phezu komhlaba, ngoba uJesu wathembisa abangane bakhe abaseduze ukuthi babezobusa naye njengamakhosi phezu kwesintu.—Johane 14:2, 3; IsAmbulo 5:10; 20:6.

¹¹ Khona-ke, kanye noJesu, inani elilinganiselwe labantu nalo livuselwa ekuphileni kwasezulwini. Lakha uMbuso kaNkulunkulu ozoletha izibusiso zaphakade esintwini. (2 Korinte 4:14; IsAmbulo 14:1-3) Ngakho kuyo yonke leminyaka, uJehova uye wabeka isisekelo sokubusa okuzoletha izibusiso zaphakade emkhayeni wesintu.

Ukuzibusa Kuzophela

12, 13. Yini uMbuso kaNkulunkulu manje osumi ngomumo ukuba uyenze?

¹² Kulelikhulu leminyaka uNkulunkulu uye wahileleka ngokuqondile ezindabeni zomhlaba. Njengoba iNgxenye 9 yalencwajana izochaza, isiprofetho seBhayibheli sibonisa ukuthi uMbuso kaNkulunkulu ngaphansi kukaKristu wamiswa ngo-1914 futhi manje umi ngomumo ukuba uchoboze sonke isimiso sikaSathane. LowoMbuso usukulungele ‘ukubusa phakathi kwezitha [zikaKristu].’—IHubo 110:2.

¹³ Ngokuphathelene nalokhu isiprofetho esikuDaniyeli 2:44 sithi: “Ezinsukwini zalawomakhosi [akhona manje] uNkulunkulu wasezulwini uyakumisa umbuso [ezulwini] ongasoze wachithwa nobukhosi bawo bungayikushiyelwa kwabanye abantu [ukubusa komuntu ngeke kuphinde kuvunyelwe], kepha [uMbuso kaNkulunkulu] uyakuchoboza, uqede yonke lemibuso, wona uqobo ume phakade.”

14. Yiziphi ezinye izinzuzo ezizolethwa ukuphela kokubusa komuntu?

¹⁴ Lapho konke ukubusa okungancikile kuNkulunkulu sekugudluziwe, ukubusa koMbuso kaNkulunkulu phezu komhlaba kuyoba ngokuphelele. Futhi ngenxa yokuthi uMbuso ubusa usezulwini, ngeke wonakaliswe abantu. Amandla okubusa ayoba lapho ayekhona ekuqaleni, ezulwini, kuNkulunkulu. Futhi njengoba ukubusa kukaNkulunkulu kuyolawula wonke umhlaba, akukho muntu oyokhohliswa izinkolo zamanga noma amafilosofi abantu anganelisi kanye nemibono yezombangazwe. Akukho lutho kulezo zinto oluyovunyelwa ukuba lube khona.—Mathewu 7:15-23; IsAmbulo, izahluko 17 kuya ku-19.

[Umbhalo waphansi]

[Izithombe ekhasini 18]

Lapho uJesu esemhlabeni waphulukisa abagulayo futhi wavusa abafileyo ukuze abonise lokho ayeyokwenza emhlabeni omusha

[Isithombe ekhasini 19]

UMbuso kaNkulunkulu wasezulwini uyochoboza zonke izinhlobo zokubusa komuntu kokuzibusa ngaphandle kukaNkulunkulu