INgxenye 9
Indlela Esazi Ngayo Ukuthi ‘Sisezinsukwini Zokugcina’
1, 2. Singazi kanjani ukuthi sisezinsukwini zokugcina yini?
SINGAQINISEKA kanjani ukuthi siphila esikhathini lapho uMbuso kaNkulunkulu uzothatha isinyathelo ngokumelene nalesimiso esikhona sezinto sokubusa komuntu? Singazi kanjani ukuthi siseduze kakhulu nesikhathi lapho uNkulunkulu eyoqeda khona bonke ububi nokuhlupheka?
2 Abafundi bakaJesu Kristu babefuna ukwazi lezozinto. Bambuza ukuthi sasiyoba yini ‘isibonakaliso’ sokuba khona kwakhe emandleni oMbuso kanye ‘nesesiphelo sezwe.’ (Mathewu 24:3) UJesu waphendula ngokubalula izenzakalo kanye nezimo ezinyakazisa umhlaba ezaziyohlangana ukuze zibonise ukuthi isintu sasesingene ‘esikhathini sokuphela,’ “ezinsukwini zokugcina” zalesimiso sezinto. (Daniyeli 11:40; 2 Thimothewu 3:1) Ingabe thina kulelikhulu leminyaka sisibonile lesosibonakaliso esihlanganisa izici eziningi? Yebo, sisibonile, kakhulu!
Izimpi Zezwe
3, 4. Izimpi zalelikhulu leminyaka zifanelana kanjani nesiprofetho sikaJesu?
3 UJesu wabikezela ukuthi ‘isizwe sasiyovukela isizwe, nombuso uvukele umbuso.’ (Mathewu 24:7) Ngo-1914 izwe lahileleka empini eyavivisa izizwe nemibuso ngendlela eyayehlukile kunoma iyiphi impi ngaphambi kwayo. Ziqaphela leloqiniso, izazi-mlando zangalesosikhathi zayibiza ngokuthi iMpi Enkulu. Kwakuyimpi yokuqala yaloluyahlobo emlandweni, impi yezwe yokuqala. Amasosha kanye nabangahilelekile empini abangu-20 000 000 balahlekelwa ukuphila kwabo, inani elidlula kude elabafa kunoma iyiphi enye impi ngaphambili.
4 IMpi Yezwe I yaphawula ukuqala kwezinsuku zokugcina. UJesu wathi lesi kanye nezinye izenzakalo kwakuyoba ‘ukuqala kwemihelo.’ (Mathewu 24:8) Lokho kwaba yiqiniso, njengoba iMpi Yezwe II yabulala abantu abengeziwe, amasosha kanye nabangahilelekile empini abacishe babe ngu-50 000 000 belahlekelwa ukuphila kwabo. Kulelikhulu lama-20 leminyaka, abantu abangaphezu kwabangu-100 000 000 baye babulawa ezimpini, abaningi ngokuphindwe kane kunengqikithi yeminyaka engu-400 edlule! Yeka isizathu esikhulu sokulahlwa kokubusa komuntu!
Obunye Ubufakazi
5-7. Yibuphi obunye ubufakazi bokuthi sisezinsukwini zokugcina?
5 UJesu wahlanganisa ezinye izici ezaziyohambisana nezinsuku zokugcina: “Kuyakuba-khona ukuzamazama okukhulu komhlaba nobici [imiqedazwe yezifo] nendlala izindawo ngezindawo.” (Luka 21:11) Lokho kufanelana kahle nezenzakalo ezenzeka kusukela ngo-1914, njengoba kuye kwaba nokwanda okukhulu kokucindezeleka okubangelwa yilezo zinhlekelele.
6 Ukuzamazama okukhulu komhlaba kuyizenzakalo ezivamile, ezidlula nokuphila kwabantu abaningi. Umkhuhlane waseSpain uwodwa wabulala abantu abacishe babe ngu-20 000 000 ngemva kweMpi Yezwe I—okunye ukulinganisela kubonisa ukuthi bangu-30 000 000 noma ngaphezulu. Ingculaza iye yabulala amakhulu ezinkulungwane zabantu futhi ingabulala izigidi ezengeziwe esikhathini esizayo esiseduze. Unyaka ngamunye izigidi zabantu zibulawa izifo zenhliziyo, umdlavuza, kanye nezinye izifo. Izigidi ezengeziwe zibulawa ukufa kancane kancane ngenxa yendlala. Ngokungangabazeki ‘abagibeli bamahhashi besAmbulo’ nezimpi zabo, ukuntuleka kokudla, kanye nemiqedazwe yezifo bebelokhu bebulala amanani amakhulu omkhaya wesintu kusukela ngo-1914.—IsAmbulo 6:3-8.
7 UJesu wabikezela nangokwanda kobugebengu okukhona kuwo wonke amazwe. Wathi: “Ngenxa yokwanda kokubi kuzakuphola uthando lwabaningi.”—Mathewu 24:12.
8. Isiprofetho esikweyesi-2 Thimothewu isahluko 3 sifanelana kanjani nesikhathi sethu?
8 Ngaphezu kwalokho, isiprofetho seBhayibheli sabikezela ngokuwohloka kokuziphatha okusobala kuwo wonke umhlaba namuhla: “Ezinsukwini zokugcina kuzakuvela izikhathi ezinzima; ngokuba abantu bazakuba-ngabazithandayo, nabathandimali, nabazigabisayo, nabazidlayo, nabahlambalazayo, nabangalaleli abazali, nabangabongiyo, nabahlazisayo, nabangenaluthando, nabahlebi, nabangazithibi, nabangenabumnene, nabangathandi okuhle, nabakhapheli, nabanamawala, nabakhukhumele, nabathanda injabulo kunokuthanda uNkulunkulu, nabanesimo sokumesaba uNkulunkulu, kepha amandla akho bewaphika . . . Ababi nabakhohlisi bazakuqhubekela phambili ebubini.” (2 Thimothewu 3:1-13) Konke lokho kuye kwenzeka phambi kwamehlo ethu.
Esinye Isici
9. Yini eyenzeka ezulwini eyaqondana nokuqala kwezinsuku zokugcina emhlabeni?
9 Kunesinye isici esibangela ukwanda okukhulu kokuhlupheka kulelikhulu leminyaka. Njengoba kwaqondana nokuqalisa kwezinsuku zokugcina ngo-1914, kwenzeka okuthile okwabeka isintu engozini enkulu ngisho nangokwengeziwe. Ngalesosikhathi, njengoba isiprofetho esisencwadini yokugcina yeBhayibheli silandisa: “Kwase kuba-khona ukulwa ezulwini; uMikayeli [uKristu esembusweni wasezulwini] nezingelosi zakhe balwa nodrako [uSathane]. Nodrako walwa enezingelosi zakhe [amademoni], kepha kabaze banqoba, nendawo yabo kayabe isafunyanwa ezulwini. Wayesephonswa phansi udrako omkhulu, inyoka endala ethiwa uMhlebi noSathane, odukisa izwe lonke, waphonswa phansi emhlabeni, nezingelosi zakhe zaphonswa kanye naye.”—IsAmbulo 12:7-9.
10, 11. Isintu sathinteka kanjani lapho uSathane namademoni akhe /bephonswa phansi emhlabeni?
10 Yaba yini imiphumela emkhayeni wesintu? Isiprofetho siyaqhubeka: “Maye kuwe-mhlaba nakuwe-lulwandle, ngokuba uSathane wehlele kini enolaka olukhulu, azi ukuthi unesikhathi esifushane!” Yebo, uSathane uyazi ukuthi isimiso sakhe sisondela esiphelweni saso, ngakho wenza konke okusemandleni ukuze enze abantu bafulathele uNkulunkulu ngaphambi kokuba yena kanye nezwe lakhe bagudluzwe. (IsAmbulo 12:12; 20:1-3) Yeka indlela lezozidalwa zomoya ezehliswe ngayo ngenxa yokuthi zasebenzisa kabi inkululeko yazo yokuzinqumela! Yeka indlela izimo emhlabeni eziye zadabukisa ngayo ngaphansi kwethonya lazo, ikakhulukazi kusukela ngo-1914!
11 Akumangalisi ukuthi uJesu wabikezela ngesikhathi sethu: “Nasemhlabeni usizi luyakwehlela izizwe, zixakeke . . . Abantu baphele amandla ngokwesaba nangokubheka okuvelela umhlaba.”—Luka 21:25, 26.
Ukuphela Kokubusa Kwabantu Nokwamademoni Kuseduze
12. Yisiphi esinye seziprofetho zokugcina ezisazogcwaliseka ngaphambi kokuphela kwalesimiso?
12 Zingaki iziprofetho zeBhayibheli ezisazogcwaliseka ngaphambi kokuba uNkulunkulu abhubhise lesimiso esikhona? Zimbalwa kakhulu! Esinye sezokugcina sikweyoku-1 Thesalonika 5:3, esithi: “Lapho besakhuluma ngokuthula nokulondeka, ngokungazelele inhlekelele iyakubehlela.” (The New English Bible) Lokhu kubonisa ukuthi isiphelo salesimiso siyoqala “lapho besakhuluma.” Izwe lingazange liyibone kusengaphambili, imbubhiso iyogadla ngokuzumayo, lapho abantu benake ukuthula nokulondeka abanethemba lokuthi bazokuthola.
13, 14. Yisiphi isikhathi senkathazo uJesu asibikezela, futhi siyophela kanjani?
13 Lelizwe elingaphansi kwethonya likaSathane liphelelwa isikhathi. Ngokushesha lizofika esiphelweni salo ngesikhathi senkathazo uJesu athi ngaso: “Ngokuba lapho kuyakuba-khona usizi olukhulu olungazange lube-khona kwasekuqaleni kwezwe kuze kube-manje nolungasayikuba-khona.”—Mathewu 24:21.
14 Umvuthwandaba ‘wosizi olukhulu’ uyoba impi kaNkulunkulu yeArmagedoni. Leso isikhathi umprofethi uDaniyeli akhuluma ngaso lapho uNkulunkulu ‘eyakuchoboza’ khona “aqede yonke lemibuso.” Lokhu kuyosho ukuphela kwakho konke ukubusa kwabantu okukhona okungancikile kuNkulunkulu. Ukubusa koMbuso wakhe okubusa kuvela ezulwini kuyobe sekuzilawula ngokuphelele zonke izindaba zesintu. UDaniyeli wabikezela ukuthi ngeke kuphinde kwenzeke ukuba igunya lokubusa lishiyelwe “kwabanye abantu.”—Daniyeli 2:44; IsAmbulo 16:14-16.
15. Yini ezokwenzeka ethonyeni likaSathane namademoni akhe?
15 Ngalesosikhathi lonke ithonya likaSathane namademoni nalo liyophela. Lezozidalwa zomoya eziyizihlubuki ziyogudluzwa ukuze ‘zingabe zisadukisa izizwe.’ (IsAmbulo 12:9; 20:1-3) Ziye zathola isigwebo sokufa futhi zilinde ukubhujiswa. Yeka ukuthi kuyoba impumuzo kanjani ngesintu ukukhululeka ethonyeni lazo elonakalisayo!
Obani Abayosinda? Obani Abangeke Basinde?
16-18. Obani abayosinda ekupheleni kwalesimiso, futhi obani abangeke basinde?
16 Lapho izahlulelo zikaNkulunkulu zikhishwa ngokumelene nalelizwe, obani abayosinda? Obani abangeke basinde? IBhayibheli libonisa ukuthi labo abafuna ukubusa kukaNkulunkulu bayovikelwa futhi bayosinda. Labo abangakufuni ukubusa kukaNkulunkulu ngeke bavikelwe kodwa bayobhujiswa nezwe likaSathane.
17 IzAga 2:21, 22 zithi: “Abaqotho [labo abazithoba ekubuseni kukaNkulunkulu] bayakuhlala ezweni, abapheleleyo basale kulo. Kepha ababi [labo abangazithobi ekubuseni kukaNkulunkulu] bayakunqunywa ezweni, nabambuluzayo bayakusishulwa kulo.”
18 IHubo 37:10, 11 nalo lithi: “Kusengumzuzwana, omubi angabe esabakho; . . . Kepha abathobekileyo bazakulidla ifa lomhlaba, bathokoze ngokuthula okukhulu.” Ivesi 29 liyenezela: “Abalungileyo bazakudla ifa lomhlaba, bahlale kuwo njalonjalo.”
19. Yisiphi iseluleko okufanele sisithathe ngokungathi sína?
19 Kufanele sisithathe ngokungathi sína iseluleko esikumaHubo 37:34, esithi: “Lindela uJehova, ulonde indlela yakhe; uzakukuphakamisa, udle ifa lomhlaba, ubukele lapho ababi bechithwa khona.” Amavesi 37 no-38 athi: “Mbhekisise ongasolekiyo, umbone oqotho; ngokuba umuntu wokuthula, ukugcina kwakhe kuhle. Kepha abaphambukayo bayakubhujiswa bonke; isikhathi sababi siyakunqunywa.”
20. Kungani singathi lezi izikhathi okuvusa amadlingozi ukuphila kuzo?
20 Yeka indlela okududuza ngayo, yebo, indlela okujabulisa ngayo ukwazi ukuthi uNkulunkulu ungokhathalelayo ngempela nokuthi ngokushesha uzobuqeda bonke ububi nokuhlupheka! Yeka indlela okuvusa amadlingozi ngayo ukuqaphela ukuthi sekuseduze kakhulu ukugcwaliseka kwalezoziprofetho ezikhazimulayo!
[Isithombe ekhasini 20]
IBhayibheli labikezela ngezenzakalo ezaziyokwakha ‘isibonakaliso’ sezinsuku zokugcina
[Isithombe ekhasini 22]
Ngokushesha, eArmagedoni, labo abangazithobi ekubuseni kukaNkulunkulu bayonqunywa. Labo abazithobayo bayosindela ezweni elisha elinokulunga