Ngubani “UNkulunkulu Weqiniso Nokuphila Okuphakade”?
UJEHOVA, uYise weNkosi yethu uJesu Kristu, nguye onguNkulunkulu weqiniso. UnguMdali, lowo onikeza abamthandayo ukuphila okuphakade. Lena indlela abaningi abafunda iBhayibheli futhi abalikholelwayo abebengawuphendula ngayo umbuzo obuzwe esihlokweni. Ngempela, uJesu ngokwakhe wathi: “Lokhu kusho ukuphila okuphakade, ukungenisa kwabo ulwazi ngawe, owukuphela kukaNkulunkulu weqiniso, nangalowo omthumileyo, uJesu Kristu.”—Johane 17:3.
Noma kunjalo, abantu abaningi abasontayo bawaqonda ngenye indlela la mazwi. Amazwi asesihlokweni, atholakala kweyoku-1 Johane 5:20, ngokwengxenye athi: “Simunye nalowo weqiniso, ngeNdodana yakhe uJesu Kristu. Lo unguNkulunkulu weqiniso nokuphila okuphakade.”
Abantu abakholelwa emfundisweni kaZiqu-zintathu bathi isabizwana sokukhomba esithi “lo” (houʹtos) sibhekisela egameni elandulela lesi sabizwana, uJesu Kristu. Bagomela ngokuthi uJesu “unguNkulunkulu weqiniso nokuphila okuphakade.” Nokho, le ncazelo iphambene nayo yonke imiBhalo. Futhi izazi eziningi ezinegunya aziwamukeli lo mbono kaZiqu-zintathu. Isazi saseCambridge University, uB. F. Westcott, sabhala: “Into enengqondo kakhulu ukuthi [isabizwana esithi houʹtos] asibhekisele kulowo oseduze kakhulu naso, kodwa sibhekisele kulowo owayevelele engqondweni yomphostoli.” Ngakho, umphostoli uJohane wayekhuluma ngoYise kaJesu. Isazi semfundiso yenkolo esingumJalimane u-Erich Haupt sabhala: “Kufanele kutholakale ukuthi elithi [houʹtos] libhekisela egameni eliseduze nelandulele . . . noma egameni okukhulunywe ngalo ekuqaleni impela elithi Nkulunkulu. . . . Ukuqonda la mazwi njengagcizelela ukuthi uNkulunkulu weqiniso munye kubonakala kuvumelana kakhulu nesixwayiso sokugcina sokungakhonzi izithombe kunokubonisa ukuthi uKristu unguNkulunkulu.”
Ngisho nencwadi ethi A Grammatical Analysis of the Greek New Testament, eyanyatheliswa i-Pontifical Biblical Institute yaseRome, ithi: “[Houʹtos]: ngokwendlela [amavesi] 18 kuya ku-20 ahlelwe ngokulandelana ngayo ngesisindo, kuyabonakala ukuthi kukhulunywa ngoNkulunkulu wangempela, weqiniso, ongavumelani nobuqaba. (ivesi 21).”
Elithi houʹtos, ngokuvamile elihunyushwa ngokuthi “lo” noma “lona,” alibhekiseli kulowo okusuke kuqedwa ukukhulunywa ngaye emshweni. Eminye imiBhalo iyalicacisa leli phuzu. Kweyesi-2 Johane 7, yena lo mphostoli owabhala incwadi yokuqala kaJohane, wabhala: “Sekukhona abakhohlisi abaningi ezweni, abantu abangavumi ukuthi uJesu Kristu weza enyameni. Lona [houʹtosʹ] ngumkhohlisi nomphik’ ukristu.” Lapha, isabizwana asinakubhekisela kumuntu okuqeda ukukhulunywa ngaye—uJesu. Kusobala ukuthi elithi “lona” libhekisela kulabo abamenqaba uJesu. Bebonke ‘bangumkhohlisi nomphik’ ukristu.’
EVangelini lakhe, umphostoli uJohane wabhala: “U-Andreya umfowabo kaSimoni Petru wayengomunye walaba ababili abezwa lokho okwashiwo uJohane base belandela uJesu. Okokuqala lona [houʹtos] wathola umfowabo, uSimoni.” (Johane 1:40, 41) Kusobala ukuthi elithi “lona” alibhekiseli kumuntu wokugcina okukhulunywe ngaye, kodwa libhekisela ku-Andreya. Kweyoku-1 Johane 2:22, lo mphostoli usebenzisa isabizwana esifanayo ngendlela efanayo.
ULuka usisebenzisa ngendlela efanayo lesi sabizwana, njengoba singabona encwadini yezEnzo 4:10, 11: “Ngegama likaJesu Kristu umNazaretha, enambethela kodwa uNkulunkulu wamvusa kwabafileyo, kungaye le ndoda imi lapha phambi kwenu iphilile. Lo [houʹtosʹ] ‘uyitshe nina bakhi enaliphatha njengelingento yalutho eseliyinhloko yegumbi.’” Kuyacaca ukuthi isabizwana esithi “lo” asibhekiseli endodeni eyaphulukiswa, nakuba kuyiyo le ndoda okukhulunywe ngayo ngaphambi nje kwegama elithi houʹtos. Ngokuqinisekile, elithi “lo” evesini 11 libhekisela kuJesu Kristu, umNazaretha, ‘oyitshe legumbi’ okwakhelwe kulo ibandla lobuKristu.—Efesu 2:20; 1 Petru 2:4-8.
NezEnzo 7:18, 19 ziyalicacisa leli phuzu: “Kwavela enye inkosi eGibhithe, eyayingamazi uJosefa. Lena [houʹtos] yasebenzisa ubuqili ohlangeni lwakithi.” Isabizwana (esithi houʹtos) lapha esihunyushwe ngokuthi “lena,” sibhekisela kuFaro, inkosi yaseGibhithe.
Amavesi afana nalawa afakazela lokho okushiwo isazi esingumGreki uDaniel Wallace, esithi lapho kusetshenziswa izabizwana zokukhomba zesiGreki, “igama elandulela isabizwana emshweni lingase lingabi yilokho umlobi akhuluma ngakho ngempela.”
“Lowo Weqiniso”
Njengoba umphostoli uJohane abhala, “lowo weqiniso” nguJehova, uYise kaJesu Kristu. Ungukuphela kukaNkulunkulu weqiniso, uMdali. Umphostoli uPawulu wavuma: “Empeleni kithi kukhona uNkulunkulu oyedwa uBaba, okuvela kuye zonke izinto.” (1 Korinte 8:6; Isaya 42:8) Esinye isizathu esenza ukuba “lowo weqiniso” okukhulunywa ngaye kweyoku-1 Johane 5:20 kube uJehova ukuthi unguMthombo weqiniso. Umhubi wabiza uJehova ngokuthi ‘unguNkulunkulu weqiniso’ ngoba Yena uthembekile kukho konke akwenzayo futhi akanakuwaqamba amanga. (IHubo 31:5; Eksodusi 34:6; Thithu 1:2) Ikhuluma ngoYise wasezulwini, iNdodana yathi: “Izwi lakho liyiqiniso.” Futhi ngokuqondene nokufundisa kwakhe siqu, uJesu wathi: “Lokho engikufundisayo akukhona okwami, kodwa kungokwalowo ongithumile.”—Johane 7:16; 17:17.
UJehova ubuye abe ‘ukuphila okuphakade.’ UnguMthombo wokuphila, Lowo ophana ngalokho kuphila njengesipho esingafanelwe esebenzisa uKristu. (IHubo 36:9; Roma 6:23) Kuyaphawuleka ukuthi umphostoli uPawulu wathi uNkulunkulu ‘ungumvuzi walabo abamfuna ngobuqotho.’ (Hebheru 11:6) UNkulunkulu wavuza iNdodana yakhe ngokuyivusa kwabafileyo, futhi uYise uyobavuza ngokuphila okuphakade labo abamkhonza ngayo yonke inhliziyo yabo.—IzEnzo 26:23; 2 Korinte 1:9.
Ngakho-ke, kufanele sifike kusiphi isiphetho? Kwesithi, uJehova, hhayi omunye, “unguNkulunkulu weqiniso nokuphila okuphakade.” Yena yedwa ufanelwe ukukhulekelwa abantu ábadala, akhulekelwe yedwa.—IsAmbulo 4:11.