Ukuhlanganiswa Uthando NgoNkulunkulu

LAPHO kumiswa ibandla lamaKristu ekhulwini lokuqala leNkathi Yethu Evamile, esinye sezici zalo ezivelele—naphezu kokungafani kwamalungu alo—kwakuwubunye balo. Labo bakhulekeli bakaNkulunkulu weqiniso babevela ezizweni zase-Asiya, eYurophu nase-Afrika. Babenezizinda ezihlukahlukene—abapristi, amasosha, izigqila, ababaleki, abathengisi, ochwepheshe kanye nosomabhizinisi. Abanye babengamaJuda, kanti abanye babengabeZizwe. Abaningi babekade beyiziphingi, ongqingili, izidakwa, amasela, noma abaphangi. Noma kunjalo, lapho beba amaKristu, bayishiya imikhuba yabo emibi futhi baba munye okholweni.

Yini eyenza ubuKristu bekhulu lokuqala bakwazi ukuhlanganisa bonke laba bantu baba munye? Kungani kwakunokuthula phakathi kwabo nanabantu bonke? Kungani babengahlanganyeli ekuvukeleni nasezingxabanweni? Kungani ubuKristu bakuqala babuhluke kangaka ezinkolweni ezinkulu zanamuhla?

Yini Eyenza Amalungu Ebandla Asondelana?

Isici esiyinhloko esenza amakholwa aba nobunye ekhulwini lokuqala kwakuwuthando ngoNkulunkulu. Lawo maKristu asiqaphela isibopho sawo esiyinhloko sokuthanda uNkulunkulu weqiniso, uJehova, ngayo yonke inhliziyo yawo, umphefumulo kanye nengqondo. Ngokwesibonelo, umphostoli uPetru, umJuda, wayalwa ukuba avakashele umuntu wezizwe emzini wakhe, umuntu ngokuvamile ayengeke abe nobuhlobo obuseduze naye. Okwamshukumisela ukuba alalele ngokuyinhloko kwakuwuthando ngoJehova. UPetru namanye amaKristu ekhulu lokuqala babenobuhlobo obuseduze noNkulunkulu obabusekelwe olwazini olunembile ngobuntu baKhe, izinto azithandayo nangazithandi. Ngokuhamba kwesikhathi, bonke abakhulekeli bakaNkulunkulu baqonda ukuthi intando kaJehova yayiwukuba ‘bahlangane emqondweni ofanayo nasendleleni efanayo yokucabanga.’—1 Korinte 1:10; Mathewu 22:37; IzEnzo 10:1-35.

Okunye ókwenza amakholwa asondelane kwakuwukholo lwawo kuJesu Kristu. Ayefuna ukulandela eduze ezinyathelweni zakhe. Wawayala: “[Kumelwe] nithandane; njengoba nje nami nginithandile . . . Bonke bayokwazi ngalokho ukuthi ningabafundi bami, uma ninothando phakathi kwenu.” (Johane 13:34, 35) Lokhu kwakungeke nje kube umuzwa wokuthatheka, kodwa kwakuyoba uthando lokuzidela. Wawuyoba yini umphumela? UJesu wathandazela labo ababa nokholo kuye wathi: ‘Ngicela ukuba bonke babe munye, njengoba nje wena, Baba, umunye nami futhi nami ngimunye nawe, ukuba nabo babe munye nathi.’—Johane 17:20, 21; 1 Petru 2:21.

UJehova wathululela umoya wakhe ongcwele, noma amandla asebenzayo, ezincekwini zakhe zeqiniso. Lo moya wabangela ukuba zibe nobunye. Wenza ukuba kuwo wonke amabandla zibe nobunye endleleni ezaziqonda ngayo izimfundiso zeBhayibheli. Abakhulekeli bakaJehova babeshumayela isigijimi esifanayo—ukungcweliswa kwegama likaJehova ngoMbuso kaNkulunkulu ngoMesiya, uhulumeni wasezulwini ozobusa sonke isintu. AmaKristu okuqala ayesiqonda isibopho sawo sokuba ‘angabi ingxenye yezwe.’ Ngenxa yalokho, noma nini lapho kuba nokuvukela kwezakhamuzi noma izingxabano zempi, amaKristu ayehlala engathathi hlangothi. Ayephishekela ukuba nokuthula nawo wonke umuntu.—Johane 14:26; 18:36; Mathewu 6:9, 10; IzEnzo 2:1-4; Roma 12:17-21.

Wonke amakholwa afeza umthwalo wawo wokuthuthukisa ubunye. Kanjani? Ngokuqiniseka ukuthi ukuziphatha kwawo kuvumelana neBhayibheli. Ngakho, umphostoli uPawulu wabhalela amaKristu: “Nilahle ubuntu obudala obuvumelana nenkambo yenu yokuziphatha yangaphambili, futhi nigqoke ubuntu obusha.”—Efesu 4:22-32.

Ubunye Balondolozwa

Yiqiniso, amakholwa ekhulu lokuqala ayengaphelele, futhi kwakuye kube nezimo ezivivinya ubunye bawo. Ngokwesibonelo, izEnzo 6:1-6 zilandisa ukuthi kwaba nokungezwani okuthile phakathi kwamaKristu angamaJuda ayekhuluma isiGreki nalawo ayekhuluma isiHebheru. Lawo ayekhuluma isiGreki ayenomuzwa wokuthi ayebandlululwa. Nokho, lapho abaphostoli sebetsheliwe ngale ndaba, bayixazulula ngokushesha nangobulungisa. Kamuva, inkinga ngemfundiso ethile yaholela empikiswaneni maqondana nezibopho zalabo abangewona amaJuda ebandleni lobuKristu. Kwenziwa isinqumo esisekelwe ezimisweni zeBhayibheli, futhi lesi sinqumo samukelwa ngobunye.—IzEnzo 15:1-29.

Lezi zibonelo zibonisa ukuthi ebandleni lobuKristu lekhulu lokuqala ukungezwani akuzange kuholele ekuhlukaneni ngokwezinhlanga noma ezingxabanweni zokungavumelani ngezimfundiso ezithile. Kungani? Ngenxa yokuthi izici ezibangela ubunye—uthando ngoJehova, ukholo kuJesu Kristu, uthando lokuzidela ngomunye nomunye, ukwamukela isiqondiso somoya ongcwele, ukuqonda okufanayo izimfundiso zeBhayibheli nokuzimisela komuntu ukushintsha ukuziphatha kwakhe—zazinamandla ngokwanele ukugcina ibandla lokuqala linobunye futhi linokuthula.

Ubunye Ekukhulekeleni Ezikhathini Zanamuhla

Ingabe ubunye bungafinyelelwa ngendlela efanayo namuhla? Ingabe lezi zici ezifanayo zisengawenza amalungu enkolo abe nobunye futhi abe nokuthula nazo zonke izizwe kuzo zonke izingxenye zomhlaba? Yebo, zingakwenza! OFakazi BakaJehova bayinhlangano yomhlaba wonke yabazalwane abanobunye emazweni angaphezu kuka-230 kuhlanganise neziqhingi. Futhi bahlanganiswa yizici ezifanayo ezazihlanganisa amaKristu ekhulu lokuqala.

Isici esiyinhloko esenza oFakazi BakaJehova babe nobunye ukuzinikela kwabo kuJehova uNkulunkulu. Lokhu kusho ukuthi balwela ukuba qotho kuye kuzo zonke izimo. Futhi oFakazi BakaJehova babonisa ukholo kuJesu Kristu nasezimfundisweni zakhe. La maKristu abonisa uthando lokuzidela kwabakholwa nawo futhi ashumayela izindaba ezinhle ezifanayo zoMbuso kaNkulunkulu kuwo wonke amazwe ashumayela kuwo. Ayakujabulela ukukhuluma ngalo Mbuso nabantu bazo zonke izinkolo, izinhlanga, izizwe namaqembu ahlukahlukene omphakathi. Futhi oFakazi BakaJehova bahlala bengathathi hlangothi ezindabeni zezwe, okubasiza ukuba bamelane nezingcindezi zombusazwe, ezamasiko, ezenhlalo nezentengiselwano ezisihlukanisa kangaka isintu. Bonke oFakazi bamukela isibopho sokuthuthukisa ubunye ngokuziphatha ngokuvumelana nezindinganiso zeBhayibheli.

Ubunye Bukhanga Abanye

Lobu bunye ngokuvamile buye bavusa isithakazelo kubantu ababengebona oFakazi. Ngokwesibonelo, u-Ilsea wayeyindelakazi yamaKatolika ehlala emzini wezindelakazi eJalimane. Yini eyamkhanga koFakazi BakaJehova? U-Ilse wathi: “Bangabantu abakahle kunabo bonke engake ngababona. Abayi empini, abenzi lutho olungalimaza abanye. Bafuna ukusiza abantu ukuba baphile ngenjabulo emhlabeni oyipharadesi lapho sekubusa uMbuso kaNkulunkulu.”

Esinye isibonelo nguGünther, owayeyisosha laseJalimane elalithunyelwe eFrance ngempi yezwe yesibili. Ngolunye usuku umpristi wamaProthestani wenzela amasosha asebuthweni likaGünther inkonzo. Lo mpristi wathandazela izibusiso, isivikelo nokunqoba. Ngemva kwaleyo nkonzo, uGünther waya esabelweni sakhe sokuba umlindi. Ebuka ngesibonakude, wabona kolunye uhlangothi lwempi amabutho ayelwa nawo esenkonzweni eyayiqhutshwa umpristi. Kamuva uGünther waphawula: “Kungenzeka ukuthi nalowaya mpristi wayethandazela izibusiso, isivikelo nokunqoba. Ngazibuza ukuthi kungenzeka kanjani ukuthi amasonto obuKristu abe sezinhlangothini eziphikisanayo zempi.” Lezi zinto zagxila enkumbulweni kaGünther. Kwathi kamuva lapho ehlangana noFakazi BakaJehova, abangahlanganyeli empini, waba yingxenye yabo, abazalwane bomhlaba wonke.

U-Ashok noFeema babesonta enkolweni yaseMpumalanga. Emzini wabo, babenendawo yokukhulekela unkulunkulu. Lapho kuhlasela ukugula okubi emkhayeni wabo, baphinde bahlola inkolo yabo. Lapho bexoxa noFakazi BakaJehova, u-Ashok noFeema bahlatshwa umxhwele izimfundiso zeBhayibheli nawuthando olukhona phakathi koFakazi. Manje bangabamemezeli abashisekayo bezindaba ezinhle zoMbuso kaJehova.

U-Ilse, uGünther, u-Ashok noFeema bamunye nezigidi zoFakazi BakaJehova abangabazalwane bomhlaba wonke. Bayasikholelwa isithembiso seBhayibheli sokuthi lezi zici ezibenza babe munye ekukhulekeleni namuhla ngokushesha zizokwenza sonke isintu esilalelayo sibe munye. Ngaleso sikhathi, ngeke kuphinde kube khona izenzo zobudlova, ukungabi nobunye nokwahlukana egameni lenkolo. Wonke umhlaba uyoba munye ekukhulekeleni uNkulunkulu weqiniso, uJehova.—IsAmbulo 21:4, 5.

[Umbhalo waphansi]

[Izithombe ekhasini 4, 5]

Nakuba ayevela ezizindeni ezahlukahlukene, amaKristu okuqala ayemunye