Indlela KaJehova Yokubusa Ibonakaliswe Ifanele!
“OPhezukonke unguMbusi embusweni wabantu.”—DAN. 4:17.
1, 2. Iziphi ezinye zezizathu ezenze ukubusa kwabantu kwehluleka?
UKUBUSA kwabantu kwehlulekile! Asikungabazi lokho. Isizathu esiyinhloko salokho kwehluleka ukuthi abantu abanakho ukuhlakanipha kokubusa ngempumelelo. Ukwehluleka kokubusa kwabantu kubonakala kakhulu namuhla lapho iningi lababusi liye lazibonakalisa ‘lingabantu abazithandayo, abathanda imali, abazazisayo, abazidlayo, abangathembeki, abangafuni sivumelwano, abanyundeli, abangenakho ukuzithiba, abanolaka, abangenalo uthando lokuhle, abakhapheli nabakhukhumele.’—2 Thim. 3:2-4.
2 Abazali bethu bokuqala benqaba indlela kaNkulunkulu yokubusa. Mhlawumbe bayenqaba becabanga ukuthi babekhetha ukuzibusa bona, kanti empeleni, babekhetha ukubuswa uSathane. Ukubusa kabi kwabantu osekuneminyaka engu-6 000—okuthonywe kakhulu “umbusi waleli zwe,” uSathane—kuye kwawonakalisa kakhulu umlando wabantu waze waba kuleli zinga okulo namuhla. (Joh. 12:31) Ikhuluma ngesimo sabantu namuhla, i-Oxford History of the Twentieth Century ibonisa ukuthi akusizi “ukufuna izwe eliphelele.” Iyachaza: “Akukhona nje ukuthi alinakutholakala, kodwa imizamo yokuliletha iholela enhlekeleleni, ekubuseni kobushiqela nasezimpini ezimbi kakhulu.” Yeka ukuvuma ngokungagunci ukuthi ukubusa kwabantu kuyehluleka!
3. Singathini ngendlela uNkulunkulu ayeyobusa ngayo ukube u-Adamu no-Eva abonanga?
3 Yeka ukuthi kudabukisa kangakanani-ke ukuthi abazali bethu bokuqala benqaba okuwukuphela kokubusa okuphumelelayo—ukubusa kukaNkulunkulu! Yiqiniso, asazi ngokuthe ngqo ukuthi uJehova wayeyoyihlela kanjani indlela yakhe yokubusa umhlaba ukube u-Adamu no-Eva bahlala bethembekile kuye. Nokho, singaqiniseka ngokuthi ukube sonke isintu sasikwamukele ukubusa kukaNkulunkulu, sasiyoba nothando futhi singabandlululani. (IzE. 10:34; 1 Joh. 4:8) Ukuhlakanipha kukaNkulunkulu okungenakuqhathaniswa kwenza siqiniseke nangokuthi ukube isintu saqhubeka sibuswa uJehova, ngabe agwemeka wonke amaphutha aye enziwa ababusi abasekela ukubusa kwabantu. Ukubusa kukaNkulunkulu, umbuso ongokwasezulwini, kwakuyophumelela ‘ekwaneliseni isifiso sayo yonke into ephilayo.’ (IHu. 145:16) Ngamafuphi, kwakuyoba ububusi obungenamaphutha. (Dut. 32:4) Akuve kudabukisa ukuthi abantu babenqaba.
4. USathane uye wavunyelwa ukuba abuse ngezinga elingakanani?
4 Noma kunjalo, kuhle ukukhumbula ukuthi ngisho noma uJehova avumela abantu ukuba bazibuse, akakaze alidele ilungelo lakhe lokubusa izidalwa zakhe. Ngisho nenkosi yaseBhabhiloni enamandla yaphoqeleka ukuba iqaphele ukuthi empeleni “oPhezukonke unguMbusi embusweni wabantu.” (Dan. 4:17) Ekugcineni, uMbuso kaNkulunkulu uyokwenza ukuba intando yaKhe yenziwe. (Math. 6:10) Yiqiniso, uJehova uye wavumela uSathane ukuba azenze “unkulunkulu walesi simiso sezinto” okwesikhashana ukuze izimpikiswano ezaphakanyiswa yilowo mphikisi ziphendulwe ngokugculisayo. (2 Kor. 4:4; 1 Joh. 5:19) Noma kunjalo, uSathane akakaze akwazi ukudlulela ngale kwalokho uJehova akuvumelayo. (2 IziKr. 20:6; qhathanisa noJobe 1:11, 12; 2:3-6.) Bekulokhu futhi kunabantu abakhetha ukuzithoba kuNkulunkulu, ngisho noma bephila ezweni elibuswa iSitha sikaNkulunkulu esikhulu.
Ukubusa KukaNkulunkulu Phezu Kuka-Israyeli
5. Yini ama-Israyeli azibophezela ukuyenza?
5 Kusukela esikhathini sika-Abela kuze kube sesikhathini sezinzalamizi, kunabantu abaningana abathembekile abakhulekela uJehova futhi balalela imiyalo yakhe. (Heb. 11:4-22) Osukwini lukaMose, uJehova wenza isivumelwano nenzalo yenzalamizi uJakobe, futhi le nzalo yaba isizwe sakwa-Israyeli. Ngo-1513 B.C.E., ama-Israyeli azibophezela wona nenzalo yawo ukuthi amukela uJehova njengoMbusi, athi: “Konke uJehova akukhulumile sizimisele ukukwenza.”—Eks. 19:8.
6, 7. Kwakunjani ukubusa kukaNkulunkulu phezu kuka-Israyeli?
6 UJehova wayenenjongo lapho ekhetha ama-Israyeli ukuba abe abantu bakhe. (Funda uDuteronomi 7:7, 8.) Lokho kuwakhetha kwakhe kwakuhilela okungaphezu kwenhlalakahle yawo. Kwakuhilela igama nobukhosi bukaNkulunkulu, futhi lokhu kwakubaluleke kakhulu. Ama-Israyeli ayezoba ubufakazi bokuthi uJehova uwukuphela kukaNkulunkulu weqiniso. (Isaya 43:10; 44:6-8) Ngakho, uJehova wathi kuleso sizwe: “Uyisizwe esingcwele kuJehova uNkulunkulu wakho, futhi uJehova ukukhethile ukuba ube yisizwe sakhe, impahla ekhethekile, kuzo zonke izizwe ezisebusweni bomhlaba.”—Dut. 14:2.
7 Indlela uNkulunkulu ayewabusa ngayo yayibonisa ukuthi uyazi ukuthi awaphelele. Ngesikhathi esifanayo, imithetho yakhe yayiphelele futhi ibonisa izimfanelo zakhe njengoMniki-mthetho. Imiyalo uJehova ayinikeza ngoMose yaqokomisa ngokucacile ubungcwele bukaNkulunkulu, ukuthanda kwakhe ubulungisa, ukuzimisela kwakhe ukuthethelela nokubekezela kwakhe. Kamuva, osukwini lukaJoshuwa nesizukulwane sakhe, isizwe sayilalela imiyalo kaJehova futhi sajabulela ukuthula nezibusiso ezingokomoya. (Josh. 24:21, 22, 31) Leyo nkathi yomlando wama-Israyeli yabonisa ukuthi indlela kaJehova yokubusa iyaphumelela.
Ukubusa Kwabantu Kuhambisana Nokulahlekelwa
8, 9. Isiphi isicelo esingahlakaniphile esenziwa u-Israyeli, futhi saba namiphi imiphumela?
8 Nokho, njengoba iminyaka iqhubeka, ama-Israyeli ayelokhu ephambuka ekubuseni kukaNkulunkulu abese ewayeka angawavikeli. Ekugcineni, ama-Israyeli acela ngomprofethi uSamuweli ukuba abe nenkosi engumuntu, ebonakalayo. UJehova watshela uSamuweli ukuba awanikeze ayekucela. Nokho, uJehova wanezela: “Akuwena abamalile, kodwa yimi abamalile ukuba ngingabi yinkosi phezu kwabo.” (1 Sam. 8:7) Nakuba uJehova awavumela ama-Israyeli ukuba abe nenkosi engumuntu, wawaxwayisa ngokuthi ukubuswa inkosi engumuntu kwakuyowalahlekisela okuthile.—Funda eyoku-1 Samuweli 8:9-18.
9 Umlando uye wabonisa ukuba yiqiniso kwaleso sixwayiso sikaJehova. Lapho ebuswa amakhosi angabantu, ama-Israyeli abhekana nezinkinga ezinkulu, ikakhulukazi lapho inkosi yayingathembekile. Sicabanga ngalesi sibonelo sika-Israyeli, akusimangazi ukuthi kuwo wonke umlando ukubusa kwabantu abangamazi uJehova kuhlulekile ukuletha imiphumela emihle nehlala njalo. Yiqiniso, abanye abezombusazwe baye bacele uNkulunkulu ukuba abusise imizamo yabo yokuletha ukuthula nokulondeka, kodwa angababusisa kanjani labo abangazithobi endleleni yakhe yokubusa?—IHu. 2:10-12.
Isizwe Esisha Esibuswa UNkulunkulu
10. Kungani uNkulunkulu akhetha esinye isizwe esikhundleni sika-Israyeli?
10 Isizwe sakwa-Israyeli sazibonisa singazimisele ukukhonza uJehova ngokwethembeka. Ekugcineni, senqaba uMesiya owayemiswe uNkulunkulu, futhi uJehova wasilahla wabe esehlela ukuba esikhundleni saso kungene iqembu labantu elakha isizwe esisha. Ngenxa yalokho, ngo-33 C.E. kwazalwa ibandla lobuKristu elakhiwa abakhulekeli bakaJehova abagcotshiwe. Empeleni, lelo bandla laliyisizwe esisha esingaphansi kwegunya likaNkulunkulu. UPawulu wakhuluma ngaso ‘njengo-Israyeli kaNkulunkulu.’—Gal. 6:16.
11, 12. Endabeni yokwengamela, ikuphi ukufana okukhona phakathi kuka-Israyeli wasendulo ‘no-Israyeli kaNkulunkulu’?
11 Isizwe sakwa-Israyeli ongokwemvelo nesizwe esisha, “u-Israyeli kaNkulunkulu,” zinezinto ezihluke ngazo nezinto ezifana ngazo. Ngokungafani no-Israyeli wasendulo, ibandla lobuKristu alinayo inkosi engumuntu futhi akudingeki linikele ngemihlatshelo yezilwane ngenxa yezoni. Into isizwe sakwa-Israyeli esifana ngayo nebandla lobuKristu yilungiselelo lamadoda amadala, noma abadala. (Eks. 19:3-8) Laba badala abawubusi umhlambi. Kunalokho, balusa ibandla futhi bahola ngokungazigodli emisebenzini yobuKristu. Basebenzelana ngothando nelungu ngalinye lebandla, bebonisa bonke inhlonipho babanike nesithunzi.—2 Kor. 1:24; 1 Pet. 5:2, 3.
12 Ukuzindla ngokusebenzelana kukaNkulunkulu no-Israyeli kwenza amalungu ‘ka-Israyeli kaNkulunkulu’ nabangane bawo ‘bezinye izimvu’ bamazise kakhulu uJehova nendlela yakhe yokubusa. (Joh. 10:16) Ngokwesibonelo, umlando ubonisa ukuthi ababusi abangabantu kwa-Israyeli babeba nethonya elikhulu kubantu ababebabusa, kungaba elihle noma elibi. Leli qiniso ligcizelela kulabo abaholayo phakathi kwamaKristu ukuthi nakuba bengebona ababusi njengalawo makhosi asendulo, ngaso sonke isikhathi kumelwe babe isibonelo esihle sokholo.—Heb. 13:7.
Indlela UJehova Abusa Ngayo Namuhla
13. Iyiphi ingqopha-mlando eyenzeka ngo-1914?
13 Namuhla amaKristu amemezela emhlabeni wonke ukuthi sekuseduze ukuba ukubusa kwabantu kuphele. Ngo-1914, uJehova wamisa uMbuso wakhe emazulwini ngaphansi kweNkosi ayimisile, uJesu Kristu. Ngaleso sikhathi, wanika uJesu igunya ‘lokunqoba nelokuphelelisa ukunqoba kwakhe.’ (IsAm. 6:2) Le Nkosi eyayisanda kubekwa esihlalweni sobukhosi yatshelwa: “Nqoba phakathi kwezitha zakho.” (IHu. 110:2) Kuyadabukisa ukuthi izizwe ziyaqhubeka zenqaba ukuzithoba ekubuseni kukaJehova. Ziyaqhubeka zenza sengathi “akekho uJehova.”—IHu. 14:1.
14, 15. (a) UMbuso kaNkulunkulu usibusa kanjani namuhla, futhi sicabanga ngalokho, imiphi imibuzo okufanele sizibuze yona? (b) Kubonakala kanjani ukuthi indlela kaNkulunkulu yokubusa isaphakeme nanamuhla?
14 Ambalwa amalungu agcotshiwe ‘ka-Israyeli kaNkulunkulu’ asekhona, futhi njengabafowabo bakaJesu, ayaqhubeka ekhonza ‘njengamanxusa abambele uKristu.’ (2 Kor. 5:20) Aye amiswa njengesigaba senceku ethembekileyo neqondayo ukuze anakekele futhi alungiselele ukudla okungokomoya kwamanye amaKristu agcotshiwe nokwesixuku esikhulayo samaKristu, manje esihlanganisa izigidi ezinethemba lokuphila phakade emhlabeni. (Math. 24:45-47; IsAm. 7:9-15) Ukuchuma okungokomoya okujatshulelwa abakhulekeli bakhe beqiniso namuhla kubonisa ukuthi uJehova uyalibusisa leli lungiselelo.
15 Ngamunye wethu kufanele azibuze: ‘Ingabe ngiyiqonda ngokugcwele imithwalo yemfanelo enginayo ebandleni lobuKristu? Ngiyisekela ngokufanele yini indlela kaJehova yokubusa? Ingabe ngiyaziqhenya ngokuba isikhonzi soMbuso kaJehova obusayo? Ngizimisele yini ukuqhubeka ngitshela abanye ngoMbuso kaNkulunkulu ngezinga engikwazi ngalo?’ Njengeqembu, sizithoba ngokuzithandela esiqondisweni esivela eNdikimbeni Ebusayo futhi siyabambisana nabadala abamisiwe emabandleni. Ngokwenza kanjalo, sibonisa ukuthi siyayamukela indlela kaNkulunkulu yokubusa. (Funda amaHebheru 13:17.) Ukuzithoba kwenza sibe nobunye emhlabeni wonke, okuyinto eyivela kancane kuleli zwe elingenabo ubunye. Kubuye kwenze sibe nokuthula nokulunga futhi kukhazimulisa uJehova, kubonise ukuthi indlela yakhe yokubusa iyona engcono kunazo zonke.
Ukubusa KukaJehova Kuyanqoba
16. Isiphi isinqumo wonke umuntu okufanele asenze?
16 Isikhathi sokuxazulula izimpikiswano ezaphakama e-Edene sisondela ngokushesha. Ngakho, manje isikhathi sokuba abantu benze isinqumo. Umuntu ngamunye kumelwe anqume ukuthi uyoyamukela yini indlela kaNkulunkulu yokubusa noma uyokhetha ukubusa kwabantu. Sinikwe ilungelo lokusiza abamnene ukuba benze isinqumo esifanele. Maduzane, e-Armagedoni, ukubusa kukaJehova kuzoyithatha unomphela indawo yohulumeni babantu abathonywe uSathane. (Dan. 2:44; IsAm. 16:16) Ukubusa kwabantu kuzophela, futhi uMbuso kaNkulunkulu uzobusa wonke umhlaba. Ngomqondo ophelele, indlela kaJehova yokubusa iyobe ibonakaliswe ifanele.—Funda isAmbulo 21:3-5.
17. Imaphi amaqiniso asiza abamnene ukuba benze isinqumo esihle ngokuphathelene nokubusa?
17 Labo abangakasenzi isinqumo esiwujuqu sokuba ngasohlangothini lukaJehova kufanele bacabangele ngomthandazo izinzuzo eziyolethwa ukubusa kukaNkulunkulu esintwini. Ukubusa kwabantu kuye kwehluleka ukuxazulula inkinga yobugebengu, kuhlanganise neyobuphekula. Ukubusa kukaNkulunkulu kuyosusa bonke ababi emhlabeni. (IHu. 37:1, 2, 9) Ukubusa kwabantu kuye kwaholela ezimpini ezingapheli, kodwa ukubusa kukaNkulunkulu ‘kuyoqeda izimpi kuze kube semkhawulweni womhlaba.’ (IHu. 46:9) Phela, ukubusa kukaNkulunkulu kuyoletha ngisho nokuthula phakathi kwabantu nezilwane! (Isaya 11:6-9) Ububha nendlala kuyizinto ezivamile ekubuseni kwabantu, kodwa uMbuso kaNkulunkulu uyoziqeda zonke lezi zinto. (Isaya 65:21) Ngisho nababusi abangabantu ababenezisusa ezinhle baye bahluleka ukuqeda ukugula nokufa, kodwa lapho sekubusa uNkulunkulu, asebegugile nabagulayo bayobuyela ebungqabavwini bobusha babo. (Jobe 33:25; Isaya 35:5, 6) Ngempela, umhlaba uyoba ipharadesi lapho kuyovuswa khona ngisho nabafileyo.—Luka 23:43; IzE. 24:15.
18. Singabonisa kanjani ukuthi sikholelwa ukuthi indlela kaNkulunkulu yokubusa iyona engcono kunazo zonke?
18 Yebo, ukubusa kukaNkulunkulu kuyolungisa wonke umonakalo oye wabangelwa uSathane lapho ethonya abazali bethu bokuqala ukuba bahlubuke kuMdali wabo. Ake ucabange nje ukuthi sekuyiminyaka eyizinkulungwane ezingu-6 uSathane enza umonakalo, kodwa uNkulunkulu, esebenzisa uKristu, uyolungisa wonke lowo monakalo ngeminyaka eyinkulungwane! Yeka ubufakazi obungenakuphikiswa bokuthi indlela kaNkulunkulu yokubusa iphakeme kakhulu! NjengoFakazi bakaNkulunkulu wethu, simamukela njengoMbusi wethu. Ngakho, usuku nosuku, yebo ihora ngalinye, masibonise ukuthi singabakhulekeli bakaJehova, izikhonzi zoMbuso wakhe nokuthi siyaziqhenya ngokuba oFakazi bakhe. Masisebenzise wonke amathuba ukuze sitshele noma imuphi umuntu oyolalela ukuthi indlela kaJehova yokubusa iyona engcono kunazo zonke.
Ngokuphathelene Nokubusa KukaNkulunkulu, Sifundeni . . .
• KuDuteronomi 7:7, 8?
• Kweyoku-1 Samuweli 8:9-18?
[Izithombe ekhasini 29]
UJehova ubelokhu ebusa
[Isithombe ekhasini 31]
Ukuzithoba ngokuzithandela ekubuseni kukaJehova kwenza sibe nobunye emhlabeni wonke