Sondela KuNkulunkulu
Uyakhumbula Ukuthi “Siluthuli”
OWESIFAZANE ongumKristu wabhala la mazwi lapho ecabanga ngamaphutha akhe angesikhathi esedlule: “Ngangingakholwa ukuthi uJehova angangithethelela ngokuphelele, ngangicabanga ukuthi ngiyodliwa unembeza ngize ngife.” Yiqiniso, kunzima ukuphila nesazela. Nokho, iBhayibheli linikeza induduzo engadambisa ubuhlungu bezoni eziphendukayo. Cabangela amazwi omhubi uDavide asencwadini yeHubo 103:8-14.
UDavide wayazi ukuthi “uJehova unesihe” futhi ‘akaqhubeki esisola.’ (Amavesi 8-10) Uma uNkulunkulu ethola isizathu sokubonisa umusa, noma isihe, uwubonisa ngokugcwele, angawugodli. UDavide, imbongi eyigagu, usebenzisa izifaniso ezintathu ukuze achaze ukuthi uNkulunkulu usibonisa umusa ngezinga elingakanani.
“Njengoba amazulu ephakeme kunomhlaba, kanjalo umusa wakhe wothando mkhulu kulabo abamesabayo.” (Ivesi 11) Uma sibheka isibhakabhaka ebusuku, siyehluleka ukuqonda ibanga elikhulu eliphakathi komhlaba namazulu agcwele izinkanyezi. Ngalesi sifaniso, uDavide usenza siqaphele ubukhulu bomusa kaJehova, isici sothando lwakhe oluqotho. Lo musa utholwa ‘yilabo abesaba’ uNkulunkulu—“abazithoba ngenhlonipho egunyeni lakhe ngokusuka enhliziyweni,” njengoba kusho esinye isazi.
“Njengokuqhelelana kwempumalanga nentshonalanga, uzibeké kude kangako izeqo zethu.” (Ivesi 12) Lingakanani lelo banga? Alicabangeki. Enye incwadi ekhuluma ngeBhayibheli ithi: “Uma ungazama ukuhamba uze ufike lapho kugcina khona umhlaba, cishe uyohamba kuze kube phakade.” UDavide lapha usitshela ukuthi lapho uNkulunkulu esithethelela izono zethu, uzibeka kude lé.
“Njengoba ubaba ebonisa umusa emadodaneni akhe, kanjalo uJehova ubonisé umusa kulabo abamesabayo.” (Ivesi 13) UDavide, kwayena owayengubaba, wayeyazi imizwa kababa onothando. Ubaba onjalo uzizwa eshukumiseleka ukuba abonise uzwela ezinganeni zakhe, ikakhulu uma zisezinhlungwini. UDavide usiqinisekisa ngokuthi uBaba wethu wasezulwini onothando uzibonisa umusa izingane zakhe zasemhlabeni, ikakhulu lapho izinhliziyo zazo eziphendukile ‘ziphukile futhi zichobozekile’ ngenxa yezono zazo.—IHubo 51:17.
Ngemva kokusebenzisa izifaniso ezintathu, uDavide wembula lokho okwenza uJehova ababonise umusa abantu abangaphelele: “Yena uyakwazi ukwakheka kwethu, ekhumbula ukuthi siluthuli.” (Ivesi 14) UJehova uyazi ukuthi siyizidalwa ezenziwe ngothuli, ezinobuthakathaka nokulinganiselwa. Ngenxa yokuthi uyazi ukuthi sizalwe sinesono, uhlale ‘ekulungele ukuthethelela’—inqobo nje uma sibonisa ukuphenduka okusuka enhliziyweni.—IHubo 86:5.
Ingabe amazwi kaDavide akhuluma ngomusa kaJehova awakuthinti inhliziyo? Owesifazane ocashunwe ekuqaleni wafunda ngalokho okushiwo yiBhayibheli ngokulungela kukaNkulunkulu ukuthethelela, futhi washukumiseleka ukuba athi: “Sengiqala ukuba nomuzwa wokuthi ngingasondelana ngempela noJehova, futhi ngizwa sengathi ngethulwe umthwalo osindayo.”a Funda okwengeziwe ngomusa kaNkulunkulu nendlela ongawuthola ngayo. Mhlawumbe nawe uyozizwa wethulwe umthwalo osindayo.
Izahluko zeBhayibheli ongazifunda ngo-August:
[Umbhalo waphansi]
a Bheka isahluko 26, esinesihloko esithi “UNkulunkulu ‘Okulungele Ukuthethelela,’” encwadini ethi Sondela KuJehova, enyatheliswa oFakazi BakaJehova.
[Amazwi acashunwe esihlokweni ekhasini 13]
“Sengiqala ukuba nomuzwa wokuthi ngingasondelana ngempela noJehova, futhi ngizwa sengathi ngethulwe umthwalo osindayo”